సేవల నాణ్యతలో ఐజీఐకి రెండో స్థానం

 సాక్షి, న్యూఢిల్లీ: ప్రపంచంలోని పెద్ద విమానాశ్రయాలలో ఒకటైన ఇందిరాగాంధీ అంతర్జాతీయ విమానాశ్రయం(ఐజీఐ) వరుసగా మూడవసారి సేవల నాణ్యతలో రెండవ స్థానాన్ని దక్కించుకుంది. సంవత్సరానికి 2.5 కోట్ల నుంచి 4 కోట్ల మంది ప్రయాణికులు రాకపోకలు సాగించే విమానాశ్రయాల శ్రేణిలో ఇందిరాగాంధీ అంతర్జాతీయ విమానాశ్రయానికి ఈ స్థానం దక్కింది.  అయితే  ప్రపంచంలోని అన్ని కేటగిరీలకు చెందిన 235 విమానాశ్రయాలతో పోల్చినప్పుడు సేవల నాణ్యతలో ఐజీఐకి ఆరవ స్థానం లభించింది. గత ఏడాది ఈ కేటగిరీలో ఐజీఐ నాలుగవ స్థానంలో నిలిచింది. సేవల నాణ్యతకు ప్రామాణికంగా నిర్ణయించిన 5 పాయింట్ల స్కేలుపై ఐజీఐకి 4.84 పాయింట్లు లభించాయి.  
 
 విమానాశ్రయ సేవల నాణ్యతకు ఎయిర్‌పోర్టు కౌన్సిల్ ఇంటర్నేషనల్ (ఏసీఐ) అందించిన అవార్డును ఇటీవల దక్షిణ కొరియాలోని సియోల్ నిర్వహించిన కార్యక్రమంలో ఐజీఐ స్వీకరించింది. డయల్, సీఐఎస్‌ఎఫ్ , ఢిల్లీ డ్యూటీ సర్వీసెస్ ప్రైవేట్ లిమిటెడ్, ఎయిర్‌లైన్ ఆపరేటింగ్ కమిటీ, జెట్ ఎయిర్‌వేస్‌లకు చెందిన పది మంది ప్రతినిధుల బృందం ఈ అవార్డు ప్రదానోత్సవ కార్యక్రమంలో పాల్గొంది. ఈ సందర్భంగా  ఢిల్లీ విమానాశ్రయాన్ని నిర్వహిస్తున్న డయల్ సీఈవో ఐ.ప్రభాకర రావు మాట్లాడుతూ..‘మూడేళ్లుగా వరుసగా ఈ అవార్డును ఏసీఐ నుంచి అందుకోవడం మాకు ఆనందంగా ఉంది. మా భాగస్వాములు, ఉద్యోగుల సమష్టి కృషితో ఇది సాధ్యమయ్యింది.
 
 మా కస్టమర్లకు ఎటువంటి అసౌకర్యం కలుగకుండా సేవలందించేందుకు మేం ఎప్పటికప్పుడు తగిన చర్యలు తీసుకుంటున్నాం. ఈ సమయంలో ఏఎస్‌క్యూ నుంచి రెండోస్థానం పొందినట్లు అవార్డు రావడం మా బాధ్యతను మరింత పెంచినట్లయ్యింది..’ అని తెలిపారు. ప్రయాణికుల సంఖ్యను బట్టి ఏసీఐ విమానాశ్రయాలను 2-5 మిలియన్ పాసింజర్ల కేటగిరీ, 5-15 మిలియన్లు, 15-25 మిలియన్లు, 25-40 మిలియన్లు, 40 మిలియన్ల పై కేటగిరీలుగా విభజించి ర్యాంకులు అందచేసింది. ఏసీఐలో ప్రపంచంలో ఉన్న 174 దేశాల్లోని 1,751 విమానాశ్రయాలు సభ్యత్వంకలిగి ఉన్నాయి. ఇదిలా ఉండగాఏసీఐ ర్యాంకుల ర్యాంకుల ప్రకారం ముంబైలోని ఛత్రపతి శివాజీ అంతర్జాతీయ విమానాశ్రయం ఐదవస్థానంలో  నిలిచింది.