కింగ్స్ పంజాబ్ బోణి

కింగ్స్ పంజాబ్ బోణి

మొహాలి:ఇండియన్ ప్రీమియర్ లీగ్(ఐపీఎల్)-9లో కింగ్స్ పంజాబ్ జట్టు బోణి చేసింది. ఆదివారం పుణె సూపర్ జెయింట్స్తో జరిగిన మ్యాచ్లో కింగ్స్ పంజాబ్ ఆరు వికెట్ల తేడాతో విజయం సాధించింది.  పంజాబ్ విజయంలో మురళీ విజయ(53;49 బంతుల్లో 5ఫోర్లు, 2 సిక్సర్లు), వాహ్రా(51;33 బంతుల్లో 7ఫోర్లు) ధాటిగా ఆడి జట్టు విజయంలో ముఖ్య భూమిక పోషించారు. ఈ జోడీ తొలి వికెట్కు 97 పరుగుల భాగస్వామ్యాన్ని నెలకొల్పి శుభారంభం అందించింది. అనంతరం మిచెల్ మార్ష్(4), డేవిడ్ మిలర్ల్(7)లు విఫలమైనా, మ్యాక్స్ వెల్(32 నాటౌట్;14 బంతుల్లో 3 ఫోర్లు, 2సిక్సర్లు) దూకుడుగా ఆడటంతో పంజాబ్ ఇంకా ఎనిమిది బంతులు మిగిలి ఉండగానే విజయం సాధించింది.

అంతకుముందు టాస్ గెలిచి బ్యాటింగ్ చేసిన పుణె నిర్ణీత ఓవర్లలో ఏడు వికెట్లు కోల్పోయి 152 పరుగులు నమోదు చేసింది. పుణె జట్టులో డు ప్లెసిస్(67;53 బంతుల్లో 8 ఫోర్లు), స్టీవ్ స్మిత్(38;26 బంతుల్లో 5 ఫోర్లు) మినహా ఎవరూ రాణించలేదు. పుణె ఆటగాళ్లలో అజింక్యా రహానే(9),  కెవిన్ పీటర్సన్(15), తిషారా పెరీరా(8),కెప్టెన్ మహేంద్ర సింగ్ ధోని(1) లు నిరాశపరిచారు.