టౌన్‌హాల్ నవీకరణకు పచ్చజెండా

న్యూఢిల్లీ: నగరంలోని చారిత్రక కట్టడాల్లో ఒకటైన టౌన్‌హాల్ త్వరలో కొత్త హంగులతో దర్శనమివ్వనుంది. ఈ భవనం నవీకరణకు కేంద్ర పర్యాటకశాఖ రూ. 50 కోట్లను మంజూరు చేసింది. మరింతమంది పర్యాటకులను ఆకట్టుకోవాలన్న లక్ష్యంతోనే పర్యాటకశాఖ ఈ నిర్ణయం తీసుకుందని ఉత్తర ఢిల్లీ మున్సిపల్ కార్పొరేషన్(ఎన్డీఎమ్సీ) అధికారి ఒకరు తెలిపారు. ఎన్డీఎమ్సీ పరిధిలోని 150 సంవత్సరాల ఈ పురాతన భవనాన్ని నవీకరించేందుకు రూ. 50 కోట్లతో సంబంధిత అధికారులు ప్రతిపాదనలు రూపొందించారు. ఈ ప్రతిపాదనల వివరణాత్మక నివేదికను మంత్రిమండలికి పంపడంతో ఎట్టకేలకు ఆమోదముద్రపడిందని ఎన్డీఎమ్సీ ప్రజాసంబంధాల అధికారి యోగేంద్రసింగ్ మాన్ తెలిపారు. నగరంలోని పురాతన కట్టడాల్లో ఒకటైన ఈ టౌన్‌హాల్ చాందినీచౌక్‌లో ఉంది.