TV
సాక్షి, నల్గొండ: పండుగ సంబరం ముగిసింది. వరుస సెలవులతో పల్లెలకు పరుగులు పెట్టిన ప్రజలు తిరిగి భాగ్యనగరంవైపు అడుగులు వేస్తున్నారు. దసరా సెలవులు కావడంతో సుమారు 15లక్షల మందిపైగా హైదరాబాద్‌ విడిచి స్వస్థలాలకు వెళ్లారు. సెలవుల అనంతరం నగరానికి తిరిగి పయనమయ్యారు. వర్షాలు కురుస్తున్నా హైదరాబాద్‌కు క్యూ కట్టారు. దీంతో నగరానికి వచ్చే దారులన్నీ రద్దీతో నిండిపోయాయి. టోల్‌గేల్‌లు అన్నీ వాహనాలతో నిండిపోయాయి.
నల్గొండ జిల్లా కొర్లపాడు టోల్‌గేట్‌ వద్ద భారీగా ట్రాఫిక్‌ జామ్‌ ఏర్పడింది. కిలోమీటర్ల పొడవునా వాహనాలు నిలిచిపోయాయి. దసరా విడిది కోసం ఆంధ్రప్రదేశ్‌కు వెళ్లిన వారు నగరానికి తిరుగు ప్రయాణం అవ్వడంతో రద్దీ విపరీతంగా పెరిగింది. కార్లు, బస్సులు కిలోమీటర్ల పొడవునా నిలిచిపోయాయి. ఆంధ్రప్రదేశ్‌ కృష్ణా జిల్లా నందిగామ వద్దకూడా వాహనాలు బారులు తీరాయి.
