లాల్‌దర్వాజా అమ్మవారికి సింధు పూజలు

చాంద్రాయణగుట్ట: లాల్‌దర్వాజా సింహవాహిని మహంకాళి అమ్మవారికి ప్రముఖ బ్యాడ్మింటన్‌ క్రీడాకారిణి పీవీ సింధు ఆదివారం బంగారు బోనం సమర్పించారు. గత వారం జరిగిన బోనాల పండుగకు ఆమె చైనాలో జరుగుతున్న పోటీల కారణంగా హాజరు కాలేకపోయారు. ఈ క్రమంలో ఆదివారం మారుబోనం ఉత్సవంలో ఆలయ కమిటీ సభ్యుల ఆహ్వానం మేరకు సింధు ఆలయానికి విచ్చేశారు. సంప్రదాయ వస్త్రాధారణతో వచ్చిన ఆమెకు మేళతాళాలతో స్వాగతం పలికారు. అమ్మవారికి బోనం సమర్పించి ప్రత్యేక పూజలు చేశారు.

ఈ సందర్భంగా సింధు మాట్లాడుతూ.. లాల్‌దర్వాజా అమ్మవారు తన ఇష్టదైవంగా చెప్పారు. ఏటా బోనాల జాతరకు వస్తుంటానని, అమ్మ దీవెనతోనే తాను అంతర్జాతీయ స్థాయిలో రాణిస్తున్నట్టు చెప్పారు. త్వరలో జరిగే ఏషియన్‌ చాంపియన్‌షిప్‌లో విజేతగా నిలిచి తిరిగి అమ్మవారిని దర్శించుకుంటానని స్పష్టం చేశారు. ఈ కార్యక్రమంలో ఆలయ కమిటీ చైర్మన్‌ పి.వై.కైలాష్‌ వీర్, ప్రతినిధులు కె.వెంకటేష్, జి.మహేష్‌ గౌడ్, బి.బల్వంత్‌ యాదవ్, మాణిక్‌ ప్రభు గౌడ్, తిరుపతి నర్సింగరావు, విష్ణు గౌడ్, కాశీనాథ్‌ గౌడ్, రాజ్‌కుమార్‌ యాదవ్, అరవింద్‌ కుమార్‌ గౌడ్‌ తదితరులు పాల్గొన్నారు.