లారీ ఢీకొని ఇద్దరి మృతి

తూప్రాన్ :వేగంగా ప్రయాణిస్తున్న లారీ ఎదురుగా వస్తున్న బైక్‌ను ఢీకొట్టడంతో బైక్ పై ప్రయాణిస్తున్న ఇద్దరు యువకులు మృతిచెందారు. ఈ సంఘటన మెదక్ జిల్లా తూప్రాన్ మండలం కళ్లకల్ బంగారమ్మ గుడి సమీపంలో ఆదివారం చోటుచేసుకుంది. వివరాల్లోకి వెళ్తే... శివంపేట మండలం దొంతి గ్రామానికి చెందిన దినేష్ రెడ్డి, గోపీ, సాయికిరణ్ బైక్ మీద వెళ్తున్న సమయంలో ఎదురుగా వేగంగా వస్తున్న రాజస్థాన్‌కు చెందిన లారీ ఢీకొట్టింది.

దీంతో బైక్ మీద ఉన్న దినేష్ రెడ్డి(19), గోపీ(18), అక్కడికక్కడే మృతిచెందగా.. సాయికిరణ్(19)కు తీవ్ర గాయాలయ్యాయి. కాగా ప్రమాదానికి కారణమైన లారీని గ్రామస్తులు అడ్డుకొని పోలీసులకు అప్పగించారు. మృతిచెందిన వారిని గజ్వేల్ ప్రభుత్వ ఆస్పత్రికి తరలించారు. గాయాలపాలైన సాయికిరణ్‌ను స్థానిక ప్రైవేటు ఆస్పత్రికి తరలించగా.. అతని పరిస్థితి విషమంగా ఉందని తెలిసింది.