ఫ్రెడీ మ్యాక్‌కు 5.1 బిలియన్ డాలర్లు చెల్లించనున్న జేపీ మోర్గాన్

న్యూయార్క్: తప్పుడు వివరాలతో తనఖా రుణాలను బదలాయించిన వివాదంలో ఫ్రెడీ మ్యాక్,  ఫ్యానీ మే సంస్థలకు జేపీమోర్గాన్ చేజ్ 5.1 బిలియన్ డాలర్ల పరిహారం చెల్లించనుంది. 2005-2007 మధ్యలో జేపీ మోర్గాన్ ఈ రుణాలను బదలాయించింది. వీటిని రాబట్టుకోవడం సులువేనని నమ్మించింది. అయితే, అటుపైన తనఖా రుణాల సంక్షోభం దరిమిలా ఫ్రెడీ మ్యాక్, ఫ్యానీ మే తీవ్రంగా నష్టపోయాయి. దీంతో, ప్రభుత్వరంగానికి చెందిన ఈ రెండు సంస్థలను నిర్వహిస్తున్న ఫెడరల్ హౌసింగ్ ఫైనాన్స్ ఏజెన్సీ , ఇలాగే నష్టపోయిన మరికొన్ని సంస్థలతో కలిసి జేపీ మోర్గాన్ చేజ్‌పై దావా వేసింది. అయితే, ఈ ప్రక్రియలో తీవ్ర జాప్యం జరుగుతుండటంతో చేజ్ తో 5.1 బిలియన్ డాలర్లకి సెటిల్మెంట్ చేసుకునేందుకు ఎఫ్‌హెచ్‌ఎఫ్‌ఏ అంగీకరించింది.