నర్సీపట్నం: సంకల్ప బలం ఉంటే ఏదైనా సాధించవచ్చని నిరూపించాడా యువకుడు. ఆర్మీలో ఉద్యోగం వచ్చిందని సంతృప్తి చెందలేదు. అందులోనే ఉన్నత స్థానానికి వెళ్లాలని నిరంతరం కష్టపడ్డాడు. పోటీ పరీక్షలు రాసి అనుకున్నది సాధించాడు. యువతరానికి ఆదర్శంగా నిలిచాడు. రావికమతం మండలం జెడ్‌.కొత్తపట్నం పంచాయతీ శివారు గంపవానిపాలేనికి చెందిన విజనగిరి గోవింద్‌ విజయప్రస్థానమిది. గోవింద్‌ పుట్టింది పల్లెటూరు అయినప్పటికీ తల్లిదండ్రులు రాజారావు, సత్యవతి ప్రోత్సాహంతో చదువుపై దృష్టి సారించారు. ప్రాథమిక విద్య గంపవానిపాలెం ప్రభుత్వ పాఠశాల, కొత్తకోట జూనియర్‌ కాలేజీలో ఇంటర్‌, బీకాం డిగ్రీ నర్సీపట్నం ప్రభుత్వ డిగ్రీ కళాశాలలో పూర్తి చేశారు. 2011లో కాకినాడలో నిర్వహించిన ఓపెన్‌ సెలక్షన్‌ ర్యాలీలో క్లర్క్‌గా సెలెక్ట్‌ అయ్యారు. భోపాల్‌లో ఎలక్ట్రికల్‌, మెకానికల్‌ ఇంజనీర్‌ సెంటర్‌లో ఏడాదిన్నర శిక్షణ పూర్తి చేసుకుని, అహ్మదాబాద్‌లో విధుల్లో చేరారు. 13 ఏళ్లుగా ఆర్మీలో సేవలు అందిస్తున్నారు. 2023 మార్చిలో ఎస్‌ఎస్‌బీ (సర్వీసెస్‌ సెలక్షన్‌ బోర్డు) బెంగళూరులో ఇంటర్వ్యూ నిర్వహించింది. ఈ ఇంటర్వ్యూలో 152 మంది పోటీ పడగా 8 మంది ఎంపికయ్యారు. ఈ ఎనిమిది మందిలో గోవింద్‌ ఒకరు. ఆఫీసర్స్‌ విభాగం క్లాస్‌వన్‌లో స్పెషల్‌ కమిషన్‌ ఆఫీసర్‌ (లెఫ్టినెంట్‌)గా ఎంపికయ్యారు. బిహార్‌ రాష్ట్రం గయాలో ఆఫీసర్స్‌ ట్రైనింగ్‌ అకాడమీలో శిక్షణ పూర్తి చేసుకున్నారు. శిక్షణ అనంతరం తల్లిదండ్రులు, భార్య భవాని, పిల్లలతో కలిసి ఆనందాన్ని పంచుకున్నారు. ఇండియన్‌ ఆర్మీలో స్పెషల్‌ కమిషన్‌ ఆఫీసర్‌గా రాజస్థాన్‌లో బాధ్యతలు చేపట్టనున్నారు.


 డిగ్రీ చదివాడు. ఆర్మీ ఉద్యోగం కూడా సంపాదించాడు.. కానీ వ్యసనాలు అతన్ని పతనం చేశాయి. ఘరానా మోసగాడిగా మార్చాయి. మత్తు పానీయాలు ఇచ్చి మహిళలను లోబరచుకోవడం, ఆనక బంగారు నగలతో ఉడాయించడం.. ఆర్మీ ఉద్యోగాల పేరుతో నిరుద్యోగలను ముంచడం.. యథేచ్ఛగా చోరీలకు పాల్పడటంతోపాటు హత్యలకు తెగబడటం ద్వారా ఆ యువకుడో ఘరానా నేరగాడిగా మారాడు.
  
  పాలకొండ రూరల్:సోమవారం ఉదయం.. విశాఖపట్నం నుంచి పాలకొండకు వెళ్లేందుకు ఓ మహిళ బస్సు ఎక్కింది. అప్పటికే బస్సులో ఉన్న ఒక ప్రయాణికుడు తన పక్క ఖాళీగా ఉన్న సీటులో కూర్చోమన్నాడు. మిగతా సీట్లు నిండిపోవడంతో ఆమె అతని పక్క సీట్లో కూర్చుంది. ఆ ప్రయాణికుడు మెల్లగా ఆమెతో మాటలు కలిపాడు. తనది కూడా పాలకొండేనని చెప్పాడు. కొద్దిసేపటి తర్వాత తన వద్దనున్న కూల్‌డ్రింక్ ఇచ్చాడు. మొహమాటంతో ఆమె తీసుకొని తాగింది.
  
  అప్పటికే అందులో నిద్రమాత్రలు కలిపి ఉండటంతో మత్తులోకి జారుకుంది. వెంటనే ఆగంతకుడు తన పని కానిచ్చేశాడు. ఆమె మెడలోని బంగారు ఆభరణాలు చేజిక్కుంచుకొని బస్సు దిగి వెళ్లిపోయాడు. కొంత సేపటికి తేరుకున్న ఆ మహిళ జరిగిన మోసాన్ని గ్రహించి పాలకొండ పోలీసులకు ఫిర్యాదు చేసింది. ఆమె ఇచ్చిన ఆధారాల ప్రకారం వేట సాగించిన పోలీసులు కొన్ని గంటల వ్యవధిలోనే నిందితుడిని పట్టుకున్నారు. విచారణలో అతను చెప్పిన వివరాలు విని విభ్రాంతికి గురయ్యారు. అతడు గుండెలు తీసిన బంటని అర్థమైంది. హత్యలు, అత్యాచారాలు, చోరీలు, మోసాలు అతనికి నిత్యకృత్యమని.. అతనిపై పలు కేసులు కూడా ఉన్నాయని పోలీసులు తెలిపారు.
  
  చదువుతోపాటే వ్యసనాలు
  పోలీసులు అరెస్టు చేసిన ఈ ఘరానా మోసగాడి పేరు కొట్టిశ లక్షుంనాయుడు. వీరఘట్టం మండలం వండువ స్వగ్రామం. డిగ్రీ వరకు చదివిన నాయుడు.. చదువుకుంటున్నప్పుడే వ్యసనాలకు బానిసయ్యాడు. విలాసాలు మరిగి చిన్న చిన్న మోసాలకు పాల్పడేవాడు. చదువు పూర్తి అయిన తర్వాత ఆర్మీ ఉద్యోగం సంపాదించినా వ్యసనాలు, నేరాలతో దాన్ని దూరం చేసుకున్నాడు. ఒక సందర్భంలో జైలుకు వె ళ్లగా అక్కడ కొందరు చోరీ కేసు నిందితులతో ఏర్పడిన పరిచయాలు.. అతని నేరచరిత్రను మరోమలుపు తిప్పాయి.
  
  నేరాల చిట్టా ఇదీ..
  పోలీసులు చెప్పిన వివరాల ప్రకారం లక్షుంనాయుడు నేరాల చిట్టా చాంతాండంత ఉంది..
   2006లో ఆర్మీలో ఉద్యోగాలిప్పిస్తానంటూ శ్రీకాకుళం, విశాఖపట్నంతో పాటు స్వగ్రామమైన వండువలోనూ పలువురు నిరుద్యోగులను నమ్మించి పెద్ద మొత్తంలో డబ్బుతో ఉడాయించాడు. చివరికి విశాఖపట్నం జిల్లా బుచ్చయ్యపేటలో అరెస్టయ్యాడు.  వివాహం చేసుకున్న నాయుడు వివాహానంతరం కుటుంబ సభ్యులనూ మోసం చేశాడు.  2005లో ఒక ప్రైవేటు కంపెనీలో పనిచేస్తూ సంస్థ యజమాని నుంచి రూ.1.50 లక్షల అప్పు తీసుకున్నాడు. అప్పు తీర్చాలని యజమాని ఒత్తిడి చేయడంతో అతన్ని మెళియాపుట్టి మండలం పెద్దమడి వద్ద క్లచ్ వైరుతో ఉరి వేసి హతమార్చాడు. మృతదేహాన్ని పెద్దపాడు కాలువలో పడవేశాడు.
  
   2010లో ఏలూరులో జరిగిన ఓ హత్య కేసులో లక్షుంనాయుడు పాత్ర కీలకమైనదని పోలీసులు చెప్పారు.
   ఇదే ఏడాది ఒక అత్యాచార కేసులో అరెస్టయ్యాడు.  జైలు నుంచి బయటకు వచ్చిన తర్వాత ఒంటరి మహిళలను లక్ష్యంగా చేసుకున్నాడు. వారితో మాటలు కలిపి మత్తు మందు కలిపిన కూల్‌డ్రింక్ ఇచ్చి.. వారిలో ఒంటిపై ఉన్న ఆభరణాలు చోరీ చేసేవాడు. వీలైతే వారిపై అత్యాచారానికి పాల్పడేవాడు.  2013లో పాలకొండలో రెండు, టెక్కలిలో ఒకటి, రాజాంలో ఒక ఇంటిలో చొరబడి బంగారం, వెండి ఆభరణాలను కూడా దొంగలించినట్టు విచారణలో వెల్లడైంది. సుమారు 25 తులాల వెండి, 19 తులాల బంగారాన్ని చోరీ చేసినట్లు లక్షుంనాయుడు అంగీకరించాడు. అతని నుంచి 8 తులాల బంగారు ఆభరణాలను పోలీసులు స్వాధీనపర్చుకున్నారు.
  
  తస్మాత్ జాగ్రత్త
  లక్షుంనాయుడును మీడియా ముందు ప్రవేశపెట్టిన పాలకొండ డీఎస్పీ దేవానంద్‌శాంతో మాట్లాడుతూ నేరగాళ్లు రోజురోజుకు పెచ్చిమీరిపోతున్నారని, ఈ నేపథ్యంలో మహిళలతో పాటు అన్ని వర్గాల వారు చైతన్యం వంతం కావాలన్నారు. అపరిచిత వ్యక్తులతో పరిచయాలు, వారికి ఫోన్ నెంబర్లు ఇవ్వడం సరైన పద్ధతి కాదని, ఆ విధంగా ప్రవర్తించడం కారణంగానే లక్షుంనాయుడు వంటి నేరగాళ్లకు అవకాశం కల్పించినట్టవుతుందన్నారు. ఫిర్యాదు అందిన కొన్ని గంటల వ్యవధిలో సీఐ మజ్జి చంద్రశేఖర్, ఎస్సై ఎల్.చంద్రశేఖర్‌తో పాటు క్రైమ్ విభాగం నుంచి గవరయ్య, రమేష్, గోవింద్ తదితరులు బృందాలుగా ఏర్పడి ఘరానా మోసగాడిని అదుపులోకి తీసుకున్నారని ప్రశంసించారు.
  
  


 కలికిరి(చిత్తూరు), న్యూస్‌లైన్ : అమ్మారు అనంతపురం జేఎన్‌టీయూ కళాశాల విద్యార్థిని, అబ్బాయి బెంగళూరులో ఆర్మీలో ఉద్యోగం. ఇంటర్నెట్ సాయంతో ఇరువురూ ప్రేమించుకున్నారు. ఫేస్‌బుక్‌లో మనసులు కలిశాయి. పెద్దల ప్రమేయం లేకుండా ప్రేమ వివాహం చేసుకుని పోలీసులను ఆశ్రయించడంతో కథ సుఖాంతమైంది.  
  
  వివరాలిలా ఉన్నాయి. కలికిరి మండలం మేడికుర్తి పంచాయతీ పసలవాండ్లపల్లెకు చెందిన ఎం.సహదేవయ్య కుమారుడు మహేంద్ర బెంగళూరులో ఆర్మీలో ఉద్యోగం చేస్తున్నాడు. అనంతపురం జిల్లా ధర్మవరం కేశవనగర్‌కు చెందిన సత్యనారాయణ కుమార్తె ఎస్.రాజరాజేశ్వరి జేఎన్‌టీయూ కళాశాలలో బీటెక్ ఫైనల్ ఇయర్ చదువుతోంది. ఇరువురూ ఇంటర్నెట్ ద్వారా రెండేళ్లుగా ప్రేమించుకున్నారు. ఫేస్‌బుక్‌లో ఇద్దరి మనసులూ కలవ డంతో రెండు రోజుల కిందట ప్రేమ వివాహం చేసుకున్నారు.
  
  పెద్దల నుంచి తమకు రక్షణ కల్పించాలని ఆదివారం మదనపల్లె డీఎస్పీని కలిశారు. ఆయన సూచనల మేరకు కలికిరి పోలీసులను ఆశ్రయించారు. ఎస్‌ఐ. సోమశేఖర్‌రెడ్డి సోమవారం ఇరు కుటుంబాల పెద్దలను స్టేషన్‌కు పిలిపించి కౌన్సెలింగ్ చేశారు. తామిద్దరం మేజర్లమని, ఇష్టపడే పెళ్లి చేసుకుంటున్నట్లు ప్రేమికులిద్దరూ తెలిపారు. ఇరు కుటుంబాల పెద్దలు అంగీకరించడంతో కొత్త జంట పసలవాండ్లపల్లెకు వెళ్లింది. మంగళవారం ధర్మవరం బయలుదేరింది.