అనంతపురం సెంట్రల్‌: ప్రభుత్వ ఉద్యోగులనే టార్గెట్‌గా చేసుకొని నగరంలో దొంగలు విజృంభిస్తున్నారు. వారం రోజుల క్రితం ఉద్యానశాఖ ఏడీ వెంకటరమణ ఇంట్లో జరిగిన దొంగతనం మరువకముందే వ్యవసాయశాఖ అనుబంధ ‘ఆత్మ’ విభాగం పీడీగా పనిచేస్తున్న డాక్టర్‌ పెరుమాళ్ల నాగన్న ఇంట్లో దొంగలు పడ్డారు. బాధితుడు తెలిపిన మేరకు... నగరంలో హౌసింగ్‌బోర్డులో ‘ఆత్మ’ పీడీ నాగన్న నివాసముంటున్నారు. కుటుంబం మొత్తం కర్నూలులో స్థిరపడగా ఆయనొక్కరే ఇక్కడ ఉంటున్నారు. కుమారులు ఇతర ప్రాంతాల్లో స్థిరపడ్డారు. గురువారం విజయవాడలో రాష్ట్రస్థాయి వర్క్‌షాపు ఉండడంతో 13వ తేదీన వెళ్లారు.
 
 ఇంటికి తాళం వేసిన విషయాన్ని పసిగట్టిన దొంగలు గురువారం రాత్రి చొరబడ్డారు. శబ్దం వస్తే పక్కింటి వారు వస్తారేమోనని వారి ఇంటికి బయట గడియపెట్టారు. మొత్తం మూడు తలుపుల తాళాలు పగలగొట్టి లోపలికి ప్రవేశించారు. అలమారలోని 14 తులాల బంగారు, రూ. 30 వేలు నగదు, 1.5 కిలోల వెండి, నాలుగు పట్టుచీరలు చోరీ చేశారు. శుక్రవారం ఉదయాన్నే పక్కింటి వారు పీడీ నాగన్నకు సమాచారం అందించారు. టూటౌన్‌ పోలీసులు ఘటనా స్థలాన్ని పరిశీలించారు. అనంతరం బాధితుడి ఫిర్యాదు మేరకు కేసు నమోదు చేసుకున్నారు.


 అనంతపురం అగ్రికల్చర్‌ : వ్యవసాయ సాంకేతిక యాజమాన్య సంస్థ (ఆత్మ) డిప్యూటీ ప్రాజెక్టు డైరెక్టర్‌ (డీపీడీ)గా వెయిటింగ్‌ జాబితాలో ఉన్న ఉద్యానశాఖ డిప్యూటీ డైరెక్టర్‌ ఎన్‌వీ రమణను నియమిస్తూ ఉద్యానశాఖ కమిషనర్‌ చిరంజీవ్‌చౌదరి శుక్రవారం ఉత్తర్వులు జారీ చేశారు. ఇక్కడ డీపీడీగా ఉన్న మైఖేల్‌రాజీవ్‌ను చిత్తూరు జిల్లా ఉద్యానశాఖ డీడీగా బదిలీ చేస్తూ ఉత్తర్వులు ఇచ్చారు.


 
 పోతవరం (పి.గన్నవరం) :
 
 
 జిల్లాలో 92 మిశ్రమ, సుస్థిర వ్యవసాయ క్షేత్రాలను నెలకొల్పుతున్నట్టు ఆత్మ ప్రాజెక్ట్‌ డైరెక్టర్‌ పి.పద్మజ వెల్లడించారు. ఇప్పటికే 66 క్షేత్రాలు ప్రారంభం కాగా, మరో 26 యూనిట్ల ఏర్పాటుకు చర్యలు తీసుకుంటున్నట్టు చెప్పారు. వరి చేనులో చేపల పెంపకానికి సంబంధించిన మిశ్రమ వ్యవసాయ క్షేత్రాన్ని పోతవరంలో శుక్రవారం ఆమె పరిశీలించారు. ఈ సందర్భంగా విలేకర్లతో మాట్లాడుతూ, ప్రతి అంగుళం భూమినీ రైతులు సద్వినియోగం చేసుకుంటూ మిశ్రమ పంటలతో అదనపు ఆదాయం పొందాలని సూచించారు. ఇందుకు ముందుకు వచ్చే రైతులకు ప్రభుత్వం రాయితీలు అందిస్తోందని వివరించారు.
 
 మిశ్రమ వ్యవసాయ విధానంలో.. ఎకరం చేను చుట్టూ మూడడుగుల లోతున కందకం తవ్వి, దానిలో చేపలు పెంచడం, చేను మధ్యలో వరి, గట్లపై కూరగాయలు పండిస్తారని చెప్పారు. ఇందుకుగానూ ఒక్కో క్షేత్రానికి రూ.25 వేల రాయితీ ఇస్తున్నారన్నారు. సుస్థిర వ్యవసాయ క్షేత్రంలో.. వరి చేనులో ఒకవైపు చిన్న చెరువు తవ్వడం, గట్లపై కూరగాయలు, అపరాలు పండించడం, పశువులను, కోళ్లను పెంచడం చేపట్టాలని పద్మజ వివరించారు. ఈవిధమైన వ్యవసాయ క్షేత్రం ఏర్పాటు చేసుకునే రైతులకు రూ.20 వేల రాయితీ ఇస్తున్నట్టు చెప్పారు. జిల్లాలో ఇప్పటికే 46 మిశ్రమ వ్యవసాయ క్షేత్రాలు ప్రారంభం కాగా మరో 18 యూనిట్లు ఏర్పాటు చేయాల్సి ఉందన్నారు. అలాగే, 20 సుస్థిర వ్యవసాయ క్షేత్రాలు ప్రారంభం కాగా, మరో 8 మంది రైతులకు వీటిని మంజూరు చేస్తామని చెప్పారు. తక్కువ నీటితో పంటలు పండించాలన్న లక్ష్యంతో రైతులకు అవగాహన సదస్సులు, శిక్షణ కార్యక్రమాలు నిర్వహించేందుకు ప్రధానమంత్రి కృషి సించాయి యోజన (పీఎంకేఎస్‌వై) కింద జిల్లాకు రూ.25 లక్షలు మంజూరైనట్టు ఆమె చెప్పారు. నీటిని పొదుపుగా వినియోగిస్తూ, పంటలు పండించడంపై అధ్యయనం చేసేందుకు జిల్లాలో రెండు విడతలుగా మొత్తం 70 మంది రైతులను మహారాష్ట్ర, ఛత్తీస్‌గఢ్‌ రాష్ట్రాలకు పంపుతున్నట్టు పద్మజ వివరించారు. ఈ కార్యక్రమంలో ఏడీఏ జె.ఎలియాజర్, ఏఓ  సీహెచ్‌డీ విజయకుమార్‌ తదితరులు పాల్గొన్నారు.