బొమ్మనహళ్లి: వెండితెరపై చూపే మంచి నటన ప్రేక్షకులను మైమరపిస్తుంది. అభిమానులనూ చేసేస్తుంది. ఆ నటన అలా ఎల్లలు దాటిన అభిమానుల్ని సంపాదించుకోవడం వింతేమీ కాదు. తక్కువ సినిమాల్లో నటించినా మంచి సినిమాల్లో నటించి తన నటన ద్వారా కర్ణాటకలో ఎక్కువ మంది అభిమానులు సంపాదించుకున్న నటుల్లో ప్రస్తుతం రాకింగ్‌ స్టార్‌ యశ్‌ ముందున్నాడు. సామాజిక సేవా కార్యక్రమాల్లోనూ ఇష్టంగా పాల్గొంటాడు. అలాంటి యశ్‌కు కన్నడనాటే కాదు అమెరికాలోనూ అభిమానులను సంపాదించుకున్నాడు. లీ ఎం. సెంట్రాచియో అనే మహిళ నటుడు యశ్‌కు వీరాభిమాని. తాను ఎందుకు నటుడు యశ్‌కు వీరాభిమానిగా మారాననేది ఒక వీడియోలో చెబుతూ దానిని సోషల్‌ మీడియాలో పోస్ట్‌ చేశారు. భారతీయ సినిమాలు అంటే తనకు చాలా ఇష్టమని, ముఖ్యంగా యశ్‌ నటించిన సినిమాలను చూసిన తాను ఆయన నటనకు ఆరాధకురాలిని అయిపోయానని చెప్పారు. ఆయన హీరోగా నటించిన గూగ్లీ సినిమాలో ఉన్న యశ్‌ నటన, డైలాగులు, పాటలు చాలా నచ్చాయని, దాంతోనే రాకింగ్‌స్టార్‌ యశ్‌కు వీరాభిమానిగా మారినట్లు చెప్పారు. తాను గత మూడు సంవత్సరాల నుంచి భారతీయ సినిమాలను చూస్తున్నానని, ఇందుకోసం హిందీ భాషను సైతం నేర్చుకుంటున్నానని, హిందీలోకి అనువదించిన గూగ్లీ సినిమాను చూశానని తెలిపారు. తాను యశ్‌ గురించి అధ్యయనం చేసేటప్పుడు కొందరు స్నేహితులయ్యారని, వారి ద్వారా యశ్‌ సినిమాల సీడీలను తెప్పించుకున్నట్లు చెప్పారు. అమెరికాలో కూడా యశ్‌ కన్నడ సినిమాలను విడుదల చేయాలని కోరారు. ప్రస్తుతం యశ్‌ నటించిన కేజీఎఫ్‌ కన్నడ సినిమా విడుదలకు సిద్ధంగా ఉంది, అది రిలీజ్‌ కాగానే తప్పకుండా చూస్తానని తెలిపారు.


  సినీనటి ప్రణీత
  పాత శ్రీకాకుళం : వస్త్ర ప్రపంచంలో నాణ్యతకు పేరుగాంచింది ఎస్‌ఆర్ షాపింగ్ మాల్ అని ప్రముఖ సినీ నటి ప్రణీత అన్నారు. పట్టణంలోని జీటీ రోడ్డు ప్రాంతంలో ఏర్పాటు చేసిన ఎస్‌ఆర్ షాపింగ్ మాల్‌ను ఆమె గురువారం ప్రారంభించారు. ఈ సందర్భంగా ఆమె మాట్లాడుతూ విశాఖపట్నంలో ఎస్‌ఆర్ షాపింగ్ మాల్స్ నాలుగు ఉన్నాయని, ప్రస్తుతం శ్రీకాకుళం శాఖ ప్రారంభించడం ఆనందంగా ఉందన్నారు. శ్రీకాకుళం ప్రజలకు కావాల్సిన అన్ని రకాల వస్త్రాలు ఇక్కడ లభిస్తాయని చెప్పారు.
 
  
  రానున్న దసరా, దీపావళి, క్రిస్మస్, సంక్రాంతి పండగలకు మంచి ఆఫర్లు ఈ మాల్ ద్వారా లభిస్తాయన్నారు. అనంతరం షాపింగ్ మాల్‌లోని నాలుగు ఫ్లోర్లను ఆమె సందర్శించారు. కార్యక్రమంలో జెడ్పీ చైర్‌పర్సన్ చౌదరి ధనలక్ష్మి, ఎస్‌ఆర్ షాపింగ్ మాల్ మేనేజింగ్ డెరైక్టర్ గోపీనాథ్‌రెడ్డి తదితరులు పాల్గొన్నారు. ఈ సందర్భంగా నటి ప్రణీతతో ఫొటోలు దిగేందుకు షాపింగ్ మాల్ సిబ్బంది, తదితరులు క్యూ కట్టారు.
 
  


 హైదరాబాద్ : చిత్ర పరిశ్రమ అంటేనే పోటీ ప్రపంచం. ఇక హీరోయిన్ల మధ్య పోటీ సహజమే. ఇద్దరు హీరోయిన్లు కలిసి నటిస్తున్నారంటే వారి మధ్య సయోధ్య ఉండదని అంటుంటారు అయితే కోలీవుడ్, టాలీవుడ్లో తన అందంతో పాటు నటనా కౌశలంతో దూసుకువెళ్తున్న ఓ నటిని మరో నటి తన పోగడ్తలతో ఆకాశానికి ఎత్తేసింది.  ఇంతకీ ఎవరా ఆ ఇద్దరు హీరోయిన్లు అనేగా డౌట్....  
 
 ఏం మాయ చేశావే అంటూ టాలీవుడ్ చిత్ర పరిశ్రమలో ఇలా ప్రవేశించి అలా అగ్రహీరోల సరసన నటించి ప్రేక్షకుల మనస్సు దోచేసిన నటి సమంత. అలాంటి నటిని ప్రశంసల జల్లులతో ముంచెత్తుతోంది మరో హీరోయిన్ అమీ జాక్సన్. సమంతతో పరిచయమై కొద్ది సంవత్సరాలే అయినా ఆమెతో స్నేహబంధం మరింత దృఢమైందని.... సమంతకు తాను పెద్ద అభిమాని అని పేర్కొంది. అలాగే ఆమె అంటే తనకు చాలా చాలా గౌరవం అని చెప్పింది. బ్రిలియంట్ యాక్టరస్ అంటూ కితాబు ఇచ్చింది. ఏ మాయ చేశావే చిత్రం హిందీ రీమేక్లో సమంత పాత్రను తాను పోషించానని అమీ జాక్సన్ ఈ సందర్భంగా గుర్తు చేసుకుంది.
 
 సమంతతో కలిసి నటించడమంటే భలే ఇష్టమని తెగ పొంగిపోతూ చెప్పింది. అన్నట్లు మరిచాను అంటూ ఈ ఏడాది సమంతతో కలసి తాను రెండు చిత్రాల్లో నటిస్తున్నానని సంబరపడిపోతూ తెలిపింది. ఆ రెండు చిత్రాలలో ఓ సినిమాలో ధనుష్ హీరో కాగా... మరో దానిలో విజయ్ హీరోగా నటిస్తున్నట్లు వివరించింది.