కోచ్ పదవిపై ద్రవిడ్ వ్యాఖ్య
  
 న్యూఢిల్లీ: భారత సీనియర్ జట్టు కోచ్ పదవి చేపట్టే విషయంలో చాలా ఆలోచించి నిర్ణయం తీసుకోవాల్సి ఉందని మాజీ కెప్టెన్ రాహుల్ ద్రవిడ్ స్పష్టం చేశారు. అత్యున్నత స్థాయి బాధ్యతలు స్వీకరించేందుకు కావాల్సినంత  సమయం, సామర్థ్యం తనకు ఉన్నాయో లేవో ప్రస్తుత పరిస్థితుల్లో తేల్చుకోలేకపోతున్నానని చెప్పారు. ‘నిర్ణయం తీసుకోవడానికి కాస్త సమయం పడుతుంది. ప్రస్తుతం కోచ్ పదవి చేపట్టేందుకు సిద్ధంగా ఉన్నానని చెప్పలేను. అలాగని లేనూ అని చెప్పలేను. కేవలం కోచ్ పదవి చేపట్టాలనే కోరిక మాత్రమే ఉంటే సరిపోదు. సమయం, సామర్థ్యం, వ్యూహాలు ఇలా చాలా అంశాలను పరిశీలించుకోవాలి.
 
 వందశాతం దానిపై దృష్టిపెట్టగలమా? లేదో? చూసుకోవాలి. ఓవరాల్‌గా తుది నిర్ణయం తీసుకునే ముందు చాలా విషయాలను పరిగణనలోకి తీసుకోవాల్సి ఉంది’ అని చెప్పారు. జట్టుకు కోచింగ్ ఇవ్వడమంటే ప్రతి రోజూ ఏదో ఓ కొత్త విషయాన్ని నేర్చుకోవడమేనని ద్రవిడ్ అన్నారు.
 
 మరోవైపు కోచ్ పదవికి అభ్యర్థిని ఎంపిక చేసే ముందు ద్రవిడ్ అభ్యర్తిత్వంపై కూడా బోర్డు తన ఉద్దేశాన్ని స్పష్టం చేస్తుందని బీసీసీఐ కార్యదర్శి అనురాగ్ ఠాకూర్ తెలిపారు. అయితే సరైన సమయంలో సరైన వ్యక్తిని కోచ్‌గా ఎంపిక చేస్తామని స్పష్టం చేశారు. 2019 వన్డే ప్రపంచకప్ వరకూ కోచ్ కొనసాగుతారు కాబట్టి... అన్ని రకాలుగా ఆలోచించాకే నిర్ణయం తీసుకుంటామని ఠాకూర్ అన్నారు.


 లండన్: వన్డే, టి20 ఫార్మాట్ నుంచి సంప్రదాయక టెస్టు క్రికెట్‌ను కాపాడుకునేందుకు భారత మాజీ కెప్టెన్ రాహుల్ ద్రవిడ్ పలు సూచనలు చేశాడు. దీంట్లో భాగంగా పింక్ కలర్ బంతులతో డే అండ్ నైట్ టెస్టులు ఆడించాలని చెప్పాడు. టి20, టెస్టులకు మధ్య ఫాస్ట్ ఫుడ్, రుచికరమైన భోజనానికి ఉన్న తేడా ఉందని అన్నాడు.
  
   ‘టెస్టు క్రికెట్ అనేది మహా వృక్షం లాంటిది. వన్డే అయినా టి20 అయినా వీటి కొమ్మలుగానే చెప్పుకోవచ్చు. అందరికీ చెట్టు ఫలాలు కనిపిస్తున్నా వాటిని మోస్తున్న చెట్టు సంగతి మరువరాదు. కొమ్మలకు కానీ ఫలాలకు కానీ ఇదే జీవన వనరు. దాన్ని కాపాడుకోవాల్సిన అవసరం ఉంది. చెట్టును నరికేస్తే ఇంకేమీ ఉండవు. అందుకే టెస్టులను మనం కాపాడుకోవాలి’ అని ద్రవిడ్ వివరించాడు. సుదీర్ఘ ఫార్మాట్ అనేది ఓ ఆటగాడి నైపుణ్యానికి పరీక్ష అని చెప్పాడు.