చిన్నకోడూరు(సిద్దిపేట): పాపకు స్నానం చేయిస్తుండగా వేడి నీళ్లు మింగడంతో శ్వాస ఆగిపోయింది. 108 సిబ్బంది సీపీఆర్‌ చేసి పాప ప్రాణాలు కాపాడారు. ఈ సంఘటన సిద్దిపేట జిల్లాలో బుధవారం జరిగింది. వివరాల్లోకి వెళ్తే.. చిన్నకోడూరు మండలం చంద్లాపూర్‌ శివారులోని కాళేశ్వరం ప్రాజెక్టు నిర్మాణంలో బీహార్‌కు చెందిన ప్రేమ్‌నాథ్‌ యాదవ్, కవిత దంపతులు పనిచేస్తున్నారు. వీరికి 23 రోజుల వయసున్న బేబీ సుబ్బలక్ష్మి ఉంది.  అయితే, ఆ పాపకు స్నానం చేయిస్తుండగా వేడి నీళ్లు మింగింది. దీంతో శ్వాస ఆగిపోయింది. వెంటనే గ్రామానికి చెందిన ఏఎన్‌ఎం తిరుమల, ఆశావర్కర్‌ సుగుణ 108 సిబ్బందికి సమాచారం ఇచ్చారు. 108 సిబ్బంది అశోక్, వెంకట్‌ అక్కడకు చేరుకుని పరీక్షించి.. బేబీ గుండె, నాడీ కొట్టు­కోవడం లేదని గమనించారు. వెంటనే ఈఆర్‌సీపీ డాక్టర్‌ చక్రవర్తికి విషయం చెప్పి, ఆయన సూచనల ప్రకారం ప్రథమ చికిత్స (సీపీఆర్‌) చేస్తూ సిద్దిపేట ప్రభుత్వ ఆస్పత్రికి తరలించారు. బేబీ ప్రాణాలు కాపాడిన 108 సిబ్బందిని బంధువులు, హాస్పిటల్‌ సిబ్బంది అభినందించారు.   ఈ ఘటనపై మంత్రి హరీష్‌ రావు స్పందించారు. బిడ్డ ప్రాణాలు కాపాడిన 108 సిబ్బందికి అభినందనలు తెలిపారు. అత్యవసర సమయంలో సమయస్ఫూర్తిగా వ్యవహరించి చేసిన మీ సేవలు అమూల్యం అంటూ ట్విట్టర్‌లో కామెంట్స్‌ చేశారు.  సిద్దిపేట జిల్లా చిన్న కోడూరు మండలంలో 23 రోజుల బిడ్డకు సీపీఆర్ చేసి ప్రాణాలు కాపాడిన 108 సిబ్బందికి అభినందనలు 💐 అత్యవసర సమయంలో సమయస్ఫూర్తిగా వ్యవహరించి చేసిన మీ సేవలు అమూల్యం🙏🏻 CPR Saves Lives. pic.twitter.com/tItoUzi1Vj — Harish Rao Thanneeru (@BRSHarish) April 5, 2023


 అనంతపురం న్యూసిటీ : 'వైద్యో నారాయణో హరి' అన్న నానుడికి మరోసారి అర్థం చెప్పారు ప్రభుత్వ సర్వజనాస్పత్రి చిన్న పిల్లల విభాగం వైద్యులు.  56 రోజుల పాటు వైద్యులు, సిబ్బంది శ్రమ ఫలితం ఓ పసికందుకు పునర్జన్మ లభించింది. చిన్న పిల్లల విభాగంలోని ఎస్‌ఎన్‌సీయూ ఇన్‌చార్జ్‌ డాక్టర్‌ దినకర్, సిబ్బంది కృషి మరువలేనిదని ఆయనకు రుణపడి ఉంటామని పాప తల్లిదండ్రులు ఆనందం వ్యక్తం చేశారు. పుట్టపర్తికు చెందిన దేవిక గర్భం దాల్చిన ఆరు నెలల 10 రోజులప్పుడు బ్లీడింగ్‌ ఆగడం లేదని  నగరంలోని ఎంఎన్‌ఆర్‌ ఆస్పత్రికి వచ్చింది. పరీక్షించిన వైద్యులు సిజేరియన్‌ చేయాలని, బిడ్డకు గ్యారెంటీ లేదని చెప్పారు. భర్త నరేష్‌ అందుకు ఒప్పుకున్నాడు.
 
 గత అక్టోబర్‌ 7న సిజేరియన్‌ చేయగా పాప 990 గ్రాముల బరువుతో పుట్టింది. పాప ఇన్‌ఫెక్షన్స్‌తో పాటు శరీరంతో టెంపరేచర్, గ్లూకోజ్‌ తగ్గిపోయాయి. పాప బతకదన్న తరుణంలో సర్వజనాస్పత్రికి వెళ్లారు. అక్కడ పరీక్షించిన ఎస్‌ఎన్‌సీయూ ఇన్‌చార్జ్‌ డాక్టర్‌ దినకర్‌ మాట్లాడుతూ గర్భంలో 40 వారాలు ఉండాల్సిన పాప 25 వారాలకే పుట్టిందని కష్టమైన కేసు అని వివరించారు. శాయశక్తులా ప్రయత్నిస్తామని డాక్టర్‌ దినకర్‌ తల్లిదండ్రులకు భరోసా ఇచ్చారు. అప్పటి నుంచి పాపను ఐసీయూలో ఉంచి ’కంగారో మదర్‌ కేర్‌ పక్రియ’ను  మొదలు పెట్టారు. ఈ పక్రియతో పాప త్వరగా కోలుకుంది. మరో రెండ్రోజుల్లో పాపను డిశ్చార్జ్‌ చేయనున్నారు.