చోడవరం టౌన్: చోడవరం ఆర్టీసీ కాంప్లెక్సులో ఆదివారం ఓ విచిత్ర సంఘటన చోటు చేసుకుంది. తన మనుమరాలు ఆర్టీసీ బస్సులో తప్పిపోయిందంటూ ఓ మహిళ లబోదిబోమంటూ పరుగులు తీసింది. ఆటో పట్టుకుని ఆర్టీసీ బస్సు వెనుక ఛేజ్ చేసింది. కానీ...ఏం జరిగిదంటే.. మాడుగుల మండలం వీరనారాయణం గ్రామానికి చెందిన దాసరి అప్పలనర్స ఆదివారం లంకెలపాలెంలో ఉన్న తన కుమార్తె జక్కం మాధవి ఇంటికి వచ్చింది. తిరుగు ప్రయాణంలో మాధవి కూతరు సంధ్యతో కలసి అనకాపల్లి నుంచి చోడవరం ఆర్టీసీ కాంప్లెకు వచ్చింది. ఇక్కడి కాప్లెక్స్‌లో స్వగ్రామం వెళ్లేందుకు జాలంపల్లి బస్సు ఎక్కింది.
 
 మనమరాలుకు బిస్కెట్లు కొందాం అని అప్పలనర్స.. సంధ్య బస్సులో కూర్చోబెట్టి కిందకు దిగింది. కాంప్లెక్స్‌లో ఓ దుకాణం వద్ద బిస్కెట్లు కొనుగోలు చేసి తిరిగి చూసే సరికి కాంప్లెక్స్‌లోని ఓ బస్సు కదిలి వెళ్లిపోతోంది. ఆత్రుతగా చూసిన అప్పలనర్స తన మనమరాలు ఉన్న బస్సు వెళ్లిపోతోందనుకుని కాంప్లెక్స్ బయటకు వచ్చి ఆటో డ్రైవర్‌ని వెళ్లిపోతున్న బస్సుని కలవాలని.. అందులో తన మనమరాలు ఉండిపోయిందని ఏడుస్తూ ప్రాధేయపడింది. దీంతో ఆటో డ్రైవర్ బస్సును వెండించాడు. వడ్డాది వద్ద బస్సును ఆపి తన మనమరాలు గురించి వెతకసాగింది. అయితే ఆ బస్సులో సంధ్య లేకపోవడంతో తీవ్రంగా ఏడుస్తోంది. తర్వాత బస్సులోని వారిని ఆరా తీయగా ఇది జాలంపల్లి బస్సు కాదని.. నర్సీపట్నం బస్సు అని చెప్పడంతో అప్పలనర్స నివ్వెరపోయింది.
 
 అక్కడ నుంచి తిరిగి మళ్లీ చోడవరం ఆర్టీసీ కాంప్లెక్సుకు తిరుగుపయానమైంది. ఇదే సమయంలో చోడవరం కాంప్లెక్సు వద్ద జాలంపల్లి బస్సులో ఏడుస్తున్న సంధ్యను డ్రైవర్ లోకేష్ విషయం అడిగి తెలుసుకున్నాడు. తన అమ్మమ్మ తనను బస్సులో వదిలేసి వెళ్లిపోయిందని బాలిక చెప్పడంతో డ్రైవర్ చిన్నారిని చోడవరం పోలీసులకు అప్పగించాడు. అంతలో అప్పలనర్స తిరిగి చోడవరం కాంప్లెక్స్‌కి వచ్చి తన మనమరాలు గురించి అక్కడివారిని అడిగింది. బస్సు డ్రైవర్ పాపను పోలీసుస్టేషన్‌కి తీసుకువెళ్లాడని అక్కడివారు చెప్పడంతో ఆమె పోలీసు స్టేషన్‌కు పరుగుపెట్టింది. సంధ్య అక్కడ ఉండడంతో ఊపిరి పీల్చుకుంది. పోలీసుల సమక్షంలో ఆర్టీసీ డ్రైవర్, కండక్టర్‌లు సంధ్యను అప్పలనర్సకు అప్పగించడంతో కథ సుఖాంతం అయింది.


 చోడవరంలో 175 కిలోలు స్వాధీనం
  
 చోడవరం: జిల్లాలో గంజాయి రవాణాకు అడ్డూ అదుపూ లేకుండా పోతోంది. రోజూ రూ.లక్షలు విలువైన గంజాయి తరలిస్తున్నారు. గురువారం ఒక్క రోజే జిల్లాలోని వివిధ ప్రాంతాల్లో 535 కిలోల గంజాయిని పోలీసులు స్వాధీనం చేసుకున్నారు. దీని విలువ సుమారు రూ.25 లక్షలు ఉంటుందని అంచనా. పోలీసులు 16 మందిని అరెస్టు చేశారు. చోడవరం ఆర్టీసీ కాంప్లెక్స్ సమీపంలో అక్రమంగా తరలిస్తున్న 175 కిలోల గంజాయిని పోలీసులు పట్టుకున్నారు. గురువారం వాహనాలు తనిఖీచేస్తుండగా లారీలో గంజాయిని గుర్తించారు. దీని విలువ రూ.15 లక్షలు ఉంటుందని అంచనా. పాడేరు నుంచి పెందుర్తి వెళుతున్న లారీ ముందు పల్సర్ మోటారు సైకిల్‌పై ఇద్దరు వస్తుండగా వెనుక లారీలో గంజాయిని రవాణాచేస్తున్నారు.
 
 అనుమానం వచ్చి లారీని తనిఖీ చేయగా అందులో గంజాయి ఉన్నట్టు గుర్తించామని, వెంటనే లారీతోపాటు పైలట్‌గా వెళుతున్న పల్సర్ మోటారు సైకిల్‌ను స్వాధీనంచేసుకుని ఆరుగురిని అరెస్టుచేశామని తెలిపారు. ఎల్.కోట మండలం పోతంపేటకు చెందిన లారీడ్రైవర్ కోరుకొండ రాజుతోపాటు జి.మాడుగుల మండలం చుట్టుమెట్ట కాలనీకి చెందిన కిల్లో బాబూరావు, కిల్లో ఎప్రా ఎలియాస్ రిషి, ఉబలగరువుకి చెందిన పాండ్ర సింహాచలం, పాండ్ర లక్ష్మణరావు, వంతల రామారావును అరెస్టు చేశామన్నారు. వీరి వద్ద నుంచి రూ.3వేలు నగదు, ఐదు సెల్‌ఫోన్లు స్వాధీనం చేసుకున్నామని ఎస్‌ఐ చెప్పారు.