జగిత్యాలక్రైం: జగిత్యాల జిల్లా కేంద్రంలోని భవానీనగర్‌లో సాంఘిక సంక్షేమ బాలికల వసతి గృహం లో సోమవారం సిలిండర్‌ పేలింది. దీంతో రేకులషెడ్డు, భవనం కాంపౌండ్‌వాల్‌ కూలిపోయాయి. కిటికీలు, తలుపులు ధ్వంసమయ్యాయి. ప్రిన్సిపాల్‌ సకాలంలో స్పందించడంతో పెను ప్రమాదం తప్పింది.  వసతి గృహంలో 400 మంది విద్యార్థినులున్నారు. సాయంత్రం వంటమనిషి అనసూర్య వంట చేస్తుండగా ఒక్కసారిగా సిలిండర్‌కు మంటలు అంటుకోవడంతో అక్కడే ఉన్న ప్రిన్సిపాల్‌ మాధవికి విషయం చెప్పింది. అప్రమత్తమైన ఆమె  విద్యార్థినులను వెంటనే బయటకు వెళ్లాలని సూచించడంతో వారంతా భయంతో పరుగులు పెట్టారు. ఇంతలోనే భారీ పేలుడు శబ్దం వినిపించడంతో స్థానికులు ఉలిక్కిపడ్డారు. అగ్నిమాపక శాఖ సిబ్బంది మిగతా సిలిండర్లను తొలగించారు.  భయాందోళనతో కన్నీరుమున్నీరవుతున్న విద్యార్థినులను వారు ఓదార్చారు. బాధ్యులపై చర్యలు: కొప్పుల   ఘటన స్థలాన్ని సంక్షేమశాఖ మంత్రి కొప్పుల ఈశ్వర్‌ సోమవారం రాత్రి సందర్శించారు. ఘటన జరిగిన తీరు వివరాలను అడిగి తెలుసుకున్నారు. బాధ్యులపై చర్యలు తీసుకుంటామని చెప్పారు.  


 విజయనగరం: స్థానిక మూడులాంతర్ల సెంటర్ వద్ద ఓ హోటల్‌లో ప్రమాదవశాత్తు గ్యాస్ సిలిండర్ పేలింది. ఈ ఘటనలో నలుగురికి గాయాలయ్యాయి. బాధితులను దగ్గరలోని ప్రైవేటు ఆసుపత్రికి తరలించారు. పేలుడు ధాటికి హోటల్ ధ్వంసమయింది. హోటల్ మొత్తం ధ్వంసమయినా కౌంటర్‌లోని నగదు మాత్రం సురక్షితంగా ఉండటంతో యజమాని కాసింత ఊపిరిపీల్చుకున్నాడు.
 
 మంటలు చెలరేగిన సమయంలో పేలిన సిలిండర్ పక్కనే మరో మూడు సిలిండర్‌లు ఉన్నాయి. సకాలంలో అగ్నిమాపక సిబ్బంది వచ్చి మంటలను అదుపు చేయటంతో పెను ప్రమాదం తప్పింది.