2,10,881 మంది రైతుల ఎదురుతెన్నులు
 
      జిల్లాలో మాఫీ చేయాల్సింది రూ.1046 కోట్లు
 
      సాధ్యం కాదంటున్న బ్యాంకర్లు
 
      చెల్లించాలని రైతులపై ఒత్తిడి
 
      నోటీసులు జారీ చేస్తున్న అధికారులు
 
      అన్నదాతలకు నరకయాతన
 
  విశాఖ రూరల్, న్యూస్‌లైన్ : తెలుగుదేశం పార్టీ ఎన్నికల హామీ అయిన రుణ మాఫీ అమలవుతుందా? గద్దెనెక్కేశాం కదా అని హామీని గాలికొదిలేస్తుందా? ప్రస్తుత పరిస్థితుల్లో వేల కోట్ల రుణాలను రద్దు చేసే అవకాశముందా? రాష్ట్ర పరిస్థితి తెలుసుకోకుండానే చంద్రబాబు హామీ ఇచ్చేశారా? లేదా రైతులను మభ్య పెట్టి ఓట్లను రాబట్టుకోవడానికి తప్పుడు హామీలు గుప్పించారా? ఇలా అనేక సందేహాలు అన్నదాతల మెదళ్లను తొలిచేస్తున్నాయి.
 
 మూడేళ్లుగా ప్రకృతి విపత్తులతో పంటలు నష్టపోయిన రైతులకు రుణ మాఫీ హామీ కొండంత బలాన్నిచ్చింది. టీడీపీకి అధికారం కట్టబెట్టాక ఇప్పుడు దీనిపై రోజుకో ప్రకటనలు చేస్తుండడం పట్ల రైతుల్లో ఆందోళన నెలకొంది. రుణాలను రద్దు చేస్తారన్న ఆశతో రైతులు అప్పులు చెల్లించలేదు. గతేడాది ఖరీఫ్, రబీ సీజన్‌లలో బ్యాంకర్లు మొత్తంగా రూ.1046 కోట్లను రైతులకు రుణంగా ఇచ్చాయి.
 
 ఈమేరకు రుణ మాఫీ సాధ్యం కాదని,  ఇప్పటి వరకు దానిపై ఎటువంటి నిర్ణయం జరగలేదని,యథావిధిగా చెల్లించాలని రైతులపై ఒత్తిడి తీసుకువస్తున్నాయి. దీంతో రుణ మాఫీ అవుతుందో లేదో తెలియక.. పంట నష్టాలతో పెట్టుబడులు రాక.. తీసుకున్న రుణాలను తిరిగి చెల్లించలేక రైతులు నరకయాతనకు గురవుతున్నారు
  
 రుణమాఫీతో 2,10,881 మందికి లబ్ధి :
  
 గత ఖరీఫ్‌లో జిల్లాలో రూ.600 కోట్లు రుణాలు  లక్ష్యంగా నిర్దేశించారు. 1,32,375 మందికి లక్ష్యాన్ని మించి రూ.640 కోట్లు అందజేశారు.  రబీ 2013-14 సీజన్‌కు రూ.200 కోట్లు లక్ష్యంగా పెట్టుకోగా 14,548 మందికి రూ.104 కోట్లు అప్పులిచ్చారు. జిల్లాలో గతేడాది 3729 మంది కౌలు రైతులకు రుణ అర్హత కార్డులు ఇచ్చినప్పటికీ కేవలం 287 మందికి రూ.56.1 లక్షలను మాత్రమే పంట రుణాల కింద ఇచ్చారు.
 
 గతేడాది నుంచి ఇప్పటి వరకు పావలా వడ్డీ కింద 7505 రైతులకు రూ.2.65 కోట్లు అందజేశారు. దీంతో పాటు లక్షలోపు రుణం తీసుకొని సకాలంలో చెల్లించిన వారిలో 56,166 మంది రైతులకు రూ.11.73 కోట్లను వడ్డీ లేని రుణాలుగా బ్యాంకుల ద్వారా అందించారు. గతేడాది వరుసగా తుపాన్లు, అల్పపీడనం రావడంతో పంటలు తీవ్రంగా దెబ్బతిన్నాయి. దీంతో రైతులు పూర్తిగా నష్టపోయారు. ఫలితంగా 10 శాతం మంది రైతులు కూడా రుణాలు చెల్లించలేకపోయారు.
  
 రుణాలు చెల్లించకపోతే నోటీసులు
 
 తెలుగుదేశం పార్టీ అధ్యక్షుడు చంద్రబాబునాయుడు ఎన్నికలకు మూడు నెలల ముందు చేపట్టిన పాదయాత్ర నాటి నుంచి రైతుల రుణాలను మాఫీ చేస్తామంటూ హామీలు గుప్పించారు. ఎన్నికల్లో విజయం సాధించాక తొలి సంతకం రుణమాఫీ ఫైలుపైనే చేస్తానని అనేకసార్లు ప్రకటించారు. అసలు ఆ హామీ ఆచరణయోగ్యమో? కాదో? అన్న విషయాన్ని పక్కనపెడితే ఆ ప్రకటన రైతుల్లో ఆశలు రేకెత్తించాయి.
 
 కానీ ప్రస్తుతం చంద్రబాబు ఆ హామీపై భిన్నమైన ప్రకటనలు చేస్తుండడంతో రైతుల్లో మళ్లీ భయాందోళనలు నెలకొన్నాయి. ఇదిలా ఉంటే సకాలంలో రుణాలు చెల్లించని పక్షంలో నోటీసులు జారీ చేస్తామని బ్యాంకర్లు చెబుతున్నారు. ఇప్పటి వరకు రుణమాఫీపై నిర్ణయం జరగలేదని, ఎటువంటి మార్గదర్శకాలు లేవని యథావిధిగా రుణాలు చెల్లించాల్సిందేనని బ్యాంకులు తెగేసి చెబుతున్నాయి.
 
 ఈ నెల 8వ తేదీన ముఖ్యమంత్రిగా చంద్రబాబు ప్రమాణ స్వీకారం చేసే రోజున రుణమాఫీ ఫైలుపై సంతకం చేస్తారో లేదో తేలిపోనుంది. కరువు, వరదలతో పెట్టుబడులు కూడా కోల్పోయిన తమను రుణమాఫీతో ఆదుకోవాలని రైతులు కోరుతున్నారు.
  
  వెంటనే అమలు చేయాలి
  రుణమాఫీ పథకాన్ని వెంటనే అమలు చేయాలి. ఎన్నికలలో ఇచ్చిన హామీ మేరకు టీడీపీ ప్రభుత్వం రైతు రుణాలను మాఫీ చేయాలి. ప్రకటన కోసం వెయ్యి కళ్లతో ఎదురుచూస్తున్నాం. ఖరీఫ్ సాగుకు పెట్టుబడులు లేక దిక్కుతోచని స్థితిలో ఉన్నాం. ప్రస్తుతం బ్యాంక్‌లలో ఉన్న రుణాలన్నింటిని మాఫీ చేస్తేనే రైతులు ఆర్థికంగా నిలదొక్కుకొని పంటలు సాగు చేసుకునే అవకాశం ఉంటుంది.
  - అప్పలస్వామి నాయుడు, రైతు, వెంకుపాలెం
  
  మాఫీ చేస్తేనే బతుకు
  నాది అచ్యుతాపురం మండలం పెదపాడు. సహకార బ్యాంకులో రూ. 5వేలు, ఇతర బ్యాంకుల్లో రూ.25 వేలు వ్యవసాయ రుణంగా తీసుకున్నాను. వడ్డీతో రూ. 70వేలు అయింది. రానున్న ఖరీఫ్‌కు పెట్టుబడి లేదు. అప్పు తీరిస్తేనే బ్యాంకర్లు మళ్లీ రుణం ఇస్తామంటున్నారు. టీడీపీ రుణమాఫీ హామీ అమలవుతుందోలేదో? పాత రుణాలు మాఫీ అయి కొత్తగా రుణాలు ఇస్తేనే బతుకు. లేదంటే కష్టమే.      
  - బండి అప్పారావు
  


  తెలుగుదేశం ఇచ్చిన ఎన్నికల హామీల్లో రైతుల రుణమాఫీ ప్రధానమైనదని చెప్పవచ్చు. తర్వాత డ్వాక్రా రుణాల రద్దూ ఆ పార్టీ వాగ్దానాల్లో కీలకమైనదే. ఇప్పుడు అధికారంలోకి వచ్చింది ఆ పార్టీయే గనుక.. జిల్లాలో లక్షలాది మంది రైతులు, 70 వేల డ్వాక్రాసంఘాల్లోని మహిళలూ కోటి ఆశలతో ఆ హామీల అమలు కోసంఎదురు చూస్తున్నారు. మరోవైపు టీడీపీ హామీలతో గత నాలుగు నెలలుగా ఆ రుణాల చెల్లింపు నిలిచిపోయిందని బ్యాంక్ అధికారులు అంటున్నారు.
  
  సాక్షి, కాకినాడ : మనది వ్యవసాయ ప్రధానమైన జిల్లా. సార్వత్రిక ఎన్నికల్లో టీడీపీ పైచేయి సాధించడంతో.. ఇప్పుడు ఎక్కడ విన్నా.. ముఖ్యంగా గ్రామసీమల్లో ఆ పార్టీ అధినేత చంద్రబాబు ఇచ్చిన రైతుల రుణమాఫీ, డ్వాక్రా రుణాల రద్దు హామీలపై చర్చే వినబడుతోంది. టీడీపీ దశను మార్చాయని భావిస్తున్న హామీలను ఏర్పాటు కానున్న చంద్రబాబు సర్కారు అమలు చేసే రోజు కోసం రైతులు, డ్వాక్రా మహిళలూ ఆశగా ఎదురు చూస్తున్నారు.
 
  రైతు పక్షపాతి, మహానేత వైఎస్ రాజశేఖరరెడ్డి ఒత్తిడి మేరకు యూపీఏ-1 ప్రభుత్వం దేశవ్యాప్తంగా సుమారు రూ.74 వేల కోట్ల రైతురుణాలు మాఫీ చేయగా, మన రాష్ర్ట రైతులకు సంబంధించి రూ.12 వేల కోట్ల రుణాలు మాఫీ అయ్యాయి. అనంతరంగా వైఎస్ రైతులకు విరివిగా రుణాలు ఇవ్వడంతో ఉమ్మడి ఆంధ్రప్రదేశ్‌లో రూ.లక్షా 27 వేల కోట్ల రుణాలు పొందగలిగారు. కొత్త ఆంధ్రప్రదేశ్‌కు సంబంధించి ఈ మొత్తం రూ.68 వేల కోట్ల వరకు ఉంటుందని లెక్కతేల్చారు. మన జిల్లా వరకు చూస్తే జాతీయ, గ్రామీణ, కో ఆపరేటివ్ బ్యాంకులకు సంబంధించి 600 శాఖలున్నాయి. వీటిలో 50కి పైగా డీసీసీబీ బ్రాంచ్‌లుండగా, 33 గ్రామీణ బ్యాంకులు, 70కి పైగా ప్రైవేటు బ్యాంకుల శాఖలు కాగా, మిగిలినవన్నీ జాతీయ బ్యాంకులవి.
 
 వీటి పరిధిలో 3.60 లక్షల మంది రైతులకు పంట రుణాల కింద రూ.2,750 కోట్లు మంజూరు చేయగా, వాటిలో పాతబకాయిలు సుమారు రూ.450 కోట్లున్నాయి. మరో4.50 లక్షల మంది రైతులకు సంబంధించి రూ.4,050 కోట్ల మేర బంగారం మీద ఇచ్చిన రుణాలున్నాయి. అంటే జిల్లాలో రైతులకు సంబంధంచి అన్ని రకాల రుణాలు సుమారు రూ.6,800 కోట్ల వరకు ఉన్నాయి.
 
  30 శాతం కూడా లేని చెల్లింపులు
  సాధారణంగా రైతులు తొలి పంట(ఖరీఫ్)కు తీసుకున్న రుణాలను మార్చి 31 లోగా, రెండో పంట(రబీ) రుణాలను జూలై 31 లోగా చెల్లిస్తుంటారు. టీడీపీ రుణమాఫీ హామీ ప్రభావంతో గతనాలుగు నెలలుగా రైతు రుణాల చెల్లింపు దాదాపు నిలిచిపోయింది. పాతబకాయిలు రూ.450 కోట్లు కలిపి మరో రూ.600 కోట్ల వరకు మార్చి మాసాంతానికి వసూలయ్యేవి. అయితే 30 శాతం కూడా వసూలు కాలేదు.
 
 కొత్త ఆర్థిక సంవత్సరంలో ఇప్పటి వరకు రైతుల రుణాలకు సంబంధించి ఒక్క రూపాయి కూడా వసూలు కాలేదని బ్యాంకర్లు చెబుతున్నారు. రూ.వెయ్యి కోట్లకు పైగా వసూళ్లు నిలిచి పోవడంతో టర్నోవర్ నిలిచిపోయిందని, దీనివల్ల వచ్చే ఖరీఫ్‌లో తిరిగి పంట రుణాలివ్వడం కష్టతరమేని అంటున్నారు. సాధ్యమైనంత త్వరగా రుణాల మాఫీ మార్గదర్శకాలు జారీ కాకుంటే బ్యాంకులకు మరింత చిక్కు సమస్య ఎదురవుతుందని కాకినాడలోని ఓ జాతీయ బ్యాంకు బ్రాంచ్ మేనేజర్ అన్నారు.  
 
  డ్వాక్రా రుణాలదీ అదే బాట
  డ్వాక్రా సంఘాలకు సంబంధించి మ్మడి రాష్ర్టంలో రూ.25 వేల కోట్ల రుణాలుంటే కొత్తగా ఏర్పడబోయే మన రాష్ర్టంలో 13 జిల్లాలకు సంబంధించి రూ.14 వేల కోట్ల వరకు ఉన్నాయి. ఒక్క మన జిల్లాలోనే 70 వేల డ్వాక్రా సంఘాలకు రూ.1,300 కోట్ల మేర రుణాలున్నాయి. వీటిలో పాతబకాయిలు రూ.70 కోట్లు. రైతులు పంట చేతి కొచ్చే సమయంలోనే రుణాలు చెల్లిస్తుంటారు. కానీ డ్వాక్రా మహిళలు ప్రతి నెలా ఠంచన్‌గా రుణాలు చెల్లిస్తుంటారు. లేకపోతే వడ్డీ మినహాయింపు వర్తించదు.
 
 అయితే ప్రస్తుతం వీరు కూడా రుణాలు చెల్లించడం లేదు. ప్రతి నెలా వీరి ద్వారా రూ.40 కోట్ల వరకు రికవరీ ఉంటుంది. గత నాలుగు నెలలుగా ఇది పూర్తిగా నిలిచిపోయింది. ఇలా ఓవైపు రైతురుణాలు, మరోవైపు డ్వాక్రా రుణాల చెల్లింపు నిలిచిపోవడంతో బ్యాంకుల టర్నోవర్ క్షీణించింది. రుణాల రికవరీ కోసం రిజర్వు బ్యాంకు నుంచి ఒత్తిళ్లు వస్తున్నా ఏమీ చేయలేని స్థితిలో ఉన్నామని బ్యాంకుల అధికారులు అంటున్నారు.