సాక్షి, అమరావతి: మద్యం విధానంపై చంద్రబాబు ప్రభుత్వం నమోదు చేసిన అక్రమ కేసుకు అనుకూలంగా అబద్ధపు వాంగ్మూలం ఇవ్వాలంటూ రిటైర్డ్‌ ఐఏఎస్‌ అధికారి ధనుంజయ్‌రెడ్డి, కృష్ణమోహన్‌రెడ్డిని సిట్‌ తీవ్ర వేధింపులకు గురి చేస్తోంది. గురువారం 13 గంటలకుపైగా విచారణ పేరుతో ప్రహసనం సాగించడం సిట్‌ కుట్రలకు అద్దం పడుతోంది. రిటైర్డ్‌ అధికారులైన వారిని ఉదయం 10 గంటల నుంచి రాత్రి 11.15 గంటల వరకు విచారణ పేరుతో విజయవాడ పోలీస్‌ కమిషనర్‌ కార్యా­లయంలో ఉంచడం గమనార్హం. తాము తదుపరి విచారణ చేపట్టేవరకు ధనుంజయ్‌రెడ్డి, కృష్ణమోహన్‌రెడ్డిపై ఎలాంటి కఠిన చర్యలు తీసుకోవద్దని సిట్‌ను ఆదేశిస్తూ తదుపరి విచారణను సుప్రీంకోర్టు శుక్రవారానికి వాయిదా వేయడం తెలిసిందే. ఈ నేపథ్యంలో వారిద్దరూ బుధవారం స్వచ్ఛందంగా సిట్‌ ముందు విచారణకు హాజరయ్యారు. తొలిరోజు మధ్యాహ్నం 2 గంటల నుంచి రాత్రి 10 గంటల వరకు వారిని విచారించిన సిట్‌ అధికారులు మరుసటి రోజు గురువారం కూడా రావాలని పేర్కొన్నారు. దీంతో వారిద్దరూ వరుసగా రెండో రోజు గురువారం కూడా విచారణకు హాజరయ్యారు. ఉదయం 10 గంటలకే విజయవాడ పోలీస్‌ కమిషనర్‌ కార్యాలయానికి చేరుకున్నారు.మళ్లీ మళ్లీ.. అవే ప్రశ్నలుసిట్‌ చీఫ్‌గా ఉన్న విజయవాడ పోలీస్‌ కమిషనర్‌ ఎస్వీ రాజశేఖర్‌బాబు, ఇతర అధికారులు వారిని విడివిడిగా రోజంతా విచారించారు. మొదటి రోజు అడిగిన ప్రశ్నలనే మళ్లీ మళ్లీ అడగడం గమనార్హం. వైఎస్సార్‌సీపీ ప్రభుత్వ హయాంలో మద్యం విధానంతో తమకు ఏమాత్రం సంబంధం లేదని ధనుంజయ్‌రెడ్డి, కృష్ణమోహన్‌రెడ్డి మరోసారి స్పష్టం చేశారు. సీఎంవో కార్యదర్శి, ఓఎస్డీలకు మద్యం విధానం రూపకల్పన, అమలుతో ఎలాంటి సంబంధం ఉండదని నిబంధనలను ఉటంకిస్తూ తేల్చి చెప్పారు. ఆ అంశం పూర్తిగా ఎక్సైజ్‌ శాఖ, బెవరేజస్‌ కార్పొరేషన్‌కు సంబంధించినదని పేర్కొన్నారు. అయినా సరే సిట్‌ అధికారులు పదే పదే అవే ప్రశ్నలు వేస్తూ వారిని వేధించారు. ఉద్దేశపూర్వకంగానే కాలయాపన చేస్తూ వారిపై మానసిక ఒత్తిడికి గురి చేసేందుకు యత్నించారు. ఇక మెయిల్‌ ఐడీలు, పాస్‌ వర్డ్‌ చెప్పమని సిట్‌ అధికారులు అడిగారు. అందుకు వారిద్దరూ సున్నితంగా తిరస్కరించారు. న్యాయస్థానం ఆదేశాల మేరకు నడుచుకుంటామని స్పష్టం చేశారు.వెళ్లిపోవచ్చంటూ.. మళ్లీ రప్పించి..ఎట్టకేలకు రాత్రి 9.30 గంటల సమయంలో ధనుంజయ్‌రెడ్డి, కృష్ణమోహన్‌రెడ్డి నుంచి సెల్‌ ఫోన్లు తీసుకుని విచారణ ముగిసిందని, వెళ్లవచ్చని సిట్‌ అధికారులు చెప్పారు. అయితే బయటకు వెళుతున్న వారిని మరోసారి వెనక్కి రప్పించారు. సిట్‌ చీఫ్‌ ఎస్వీ రాజశేఖర్‌బాబు మరోసారి విచారిస్తారని, వేచి ఉండాలని సూచించారు. అయితే రాజశేఖర్‌బాబు పనుల మీద బయటకు వెళ్లినందున ఆయన వచ్చే వరకు వేచి ఉండాలంటూ మరో గంటన్నరకుపైగా కాలహరణం చేశారు. వారిద్దరినీ మానసికంగా, శారీరకంగా వేధించడమే లక్ష్యంగా వ్యవహరించారు. సిట్‌ అధికారుల తీరుపై వైఎస్సార్‌సీపీ లీగల్‌ సెల్‌ సభ్యులు తీవ్ర అభ్యంతరం తెలిపారు. న్యాయస్థానం ఆదేశాలకు విరుద్ధంగా సిట్‌ అధికారులు వ్యవహరిస్తున్నారని పేర్కొన్నారు. దాంతో ఎట్టకేలకు రాత్రి 11.15 గంటల సమయంలో విచారణ ముగిసిందంటూ ధనుంజయ్‌రెడ్డి, కృష్ణమోహన్‌రెడ్డిని సిట్‌ అధికారులు పంపించేశారు. ఇలా ఉద్దేశపూర్వకంగా వేధించాలని ముందుగానే రూపొందించుకున్న ప్రణాళికను అమలు చేశారు. శుక్రవారం కూడా మళ్లీ విచారణకు రావాలని వారికి సిట్‌ అధికారులు సూచించారు.సిట్‌ తీరు దారుణందర్యాప్తు పేరుతో ధనుంజయ్‌రెడ్డి, కృష్ణమోహన్‌రెడ్డిని సిట్‌ వేధింపులకు గురి చేస్తోంది.రాజ్యాంగం, న్యాయస్థానాల తీర్పులు అంటే ఏమాత్రం లెక్కలేనట్లు కుట్రపూరితంగా వ్యవహరిస్తోంది. సీనియర్‌ సిటిజన్లు అయిన వారిద్దరినీ 12 గంటలకు పైగా విచారణ పేరుతో వేధించడం ప్రభుత్వ కుట్రకు తార్కాణం. పౌరుల స్వేచ్ఛ, ప్రాథమిక హక్కులను కాలరాస్తున్నారు. ఈ అక్రమ కేసులో గతంలో ఓ నిందితుడి పట్ల సిట్‌ అధికారులు ఇలాగే వ్యవహరిస్తే న్యాయస్థానం ఆగ్రహం వ్యక్తం చేసింది. ఆయన ఇంటికి వెళ్లి విచారించాలని, సాయంత్రం 5 గంటల తరువాత విచారించవద్దని ఆదేశించింది. అయినా సరే సిట్‌ తీరు ఏమాత్రం మారలేదు. సిట్‌ అధికారులు రాజకీయ పార్టీ నేతల్లా వ్యవహరించడం సరికాదు. ఈ వ్యవహారాన్ని న్యాయస్థానం దృష్టికి తీసుకువెళతాం. – మనోహర్‌ రెడ్డి, వైఎస్సార్‌సీపీ లీగల్‌ సెల్‌ అధ్యక్షుడురాజకీయ వేధింపులు...రాజకీయ కారణాలతోనే ధనుంజయ్‌రెడ్డి, కృష్ణమోహన్‌రెడ్డిని సిట్‌ వేధిస్తోంది. కక్ష పూరితంగా వ్యవహరిస్తోంది. ఈ అంశాన్ని న్యాయస్థానం దృష్టికి తీసుకెళతాం. – మొండితోక అరుణ్‌కుమార్, దేవినేని అవినాశ్, వైఎస్సార్‌సీపీ నేతలు మద్యం విధానంపై కేసు... ముందస్తు బెయిల్‌పై నేడు ‘సుప్రీం’ విచారణ ధనుంజయరెడ్డి, కృష్ణమోహన్‌రెడ్డిలకు ఇప్పటికే అరెస్టు నుంచి తాత్కాలిక ఊరట బాలాజీ గోవిందప్ప అరెస్ట్‌పైనా తేలుస్తామన్న ధర్మాసనం సాక్షి, న్యూఢిల్లీ: మద్యం విధానానికి సంబంధించి అక్రమ కేసు ఎదుర్కొంటున్న ధనుంజయరెడ్డి, కృష్ణమోహన్‌రెడ్డి, బాలాజీ గోవిందప్ప దాఖలు చేసుకున్న ముందస్తు బెయిల్‌ పిటిషన్లపై సుప్రీంకోర్టు శుక్రవారం మరోసారి విచారించనుంది. తాము తదుపరి విచారణ చేపట్టేవరకు ధనుంజయరెడ్డి, కృష్ణమోహన్‌రెడ్డిని అరెస్టు చేయరాదని ఆదేశిస్తూ ఈ నెల 13న సర్వోన్నత న్యాయస్థానం ఆదేశాలు జారీ చేయడం తెలిసిందే. ఈ నేపథ్యంలో వారి ముందస్తు బెయిల్‌ పిటిషన్లు జస్టిస్‌ జేబీ పార్దీవాలా, జస్టిస్‌ ఆర్‌.మహదేవన్‌లతో కూడిన ద్విసభ్య ధర్మాసనం ముందు నేడు మరోసారి విచారణకు రానున్నాయి. ధనుంజయరెడ్డి, కృష్ణమోహన్‌రెడ్డి ఇప్పటికే స్వచ్ఛందంగా సిట్‌ విచారణకు హాజరైన విషయం తెలిసిందే. మరింత మురికిగా మార్చవద్దంటూ ఘాటు వ్యాఖ్యలు..ముందస్తు బెయిల్‌ పిటిషన్‌పై సుప్రీంకోర్టులో విచారణ జరగనుందని తెలిసి కూడా అదే రోజు తెల్లవారుజామున బాలాజీ గోవిందప్పను ఆగమే­ఘాలపై అరెస్ట్‌ చేశారని గత విచారణ సందర్భంగా ఆయన న్యాయవాది సిద్ధార్థ్‌ దవే ధర్మాసనం దృష్టికి తెచ్చారు. గోవిందప్ప అరెస్ట్‌ అక్రమమని నిరూపిస్తామని, దర్యాప్తు సంస్థ తీరును పరిగణనలోకి తీసుకోవాలని అభ్యర్థించారు. దీనిపై సుప్రీం ధర్మాసనం స్పందిస్తూ.. తదుపరి విచారణలో బాలాజీ గోవిందప్ప అరెస్ట్‌ సంగతి కూడా తేలుస్తామని ప్రకటించింది. దీనిపై రాష్ట్ర ప్రభుత్వ తరపు న్యాయవాది సిద్ధార్థ్‌ అగర్వాల్‌ అభ్యంతరం వ్యక్తం చేయగా... జస్టిస్‌ పార్దీవాలా ధర్మాసనం తీవ్ర అసహనం వ్యక్తం చేసింది. ఈ వ్యవహారాన్ని మరింత మురికిగా మార్చవద్దంటూ రాష్ట్ర ప్రభుత్వాన్ని ఉద్దేశించి ఘాటు వ్యాఖ్యలు చేసింది. ఇప్పటికే గోవిందప్ప అరెస్ట్‌ నేపథ్యంలో ముందస్తు బెయిల్‌ పిటిషన్‌ నిరర్ధకమవుతుందంటూ వాదన వినిపించిన రాష్ట్ర ప్రభుత్వ న్యాయ­వాదులపై తీవ్ర అసహనం వ్యక్తం చేసిన ధర్మాసనం... ఈ మొత్తం వ్యవహారంలో మీరేం చేస్తున్నారో స్పష్టంగా కనిపిస్తోందంటూ ఘాటుగా వ్యాఖ్యానించింది.

సాక్షి, అమరావతి: మద్యం విధానం రూపకల్పనలో గానీ, అమలుతో గానీ తమకు ఏమాత్రం సంబంధం లేదని రిటైర్డ్‌ ఐఏఎస్‌ అధికారి ఎ.ధనుంజయ్‌రెడ్డి, ఓఎస్డీ కృష్ణమోహన్‌రెడ్డి విస్పష్టంగా పేర్కొన్నారు. వైఎస్సార్‌సీపీ ప్రభుత్వ హయాంలో మద్యం విధానంపై టీడీపీ కూటమి ప్రభుత్వం నమోదు చేసిన అక్రమ కేసులో వీరిద్దరూ బుధవారం స్వచ్ఛందంగా సిట్‌ విచారణకు హాజరయ్యారు. వీరిపై శుక్రవారం వరకు ఎలాంటి చర్యలు తీసుకోవద్దని సుప్రీంకోర్టు ఆదేశించింది. ఈ నేపథ్యంలో ధనుంజయ్‌రెడ్డి, కృష్ణమోహన్‌రెడ్డి విజయవాడ పోలీస్‌ కమిషనర్‌ కార్యాలయంలో సిట్‌ విచారణకు హాజరయ్యారు. వీరిని విడివిడిగా మధ్యాహ్నం 2 నుంచి రాత్రి 8 వరకు విచారించారు. చెరో 60 ప్రశ్నలు అడిగినట్లు సమాచారం. అన్ని ప్రశ్నలకు ధనుంజయ్‌రెడ్డి, కృష్ణ మోహన్‌రెడ్డి దీటుగా సమాధానం ఇస్తూ తమపై నమోదు చేసింది అక్రమ కేసేనని తేల్చిచెప్పారు. మద్యం విధానం రూపొందించడం, అమలుతో తమకు ఏమాత్రం సంబంధం ఉండదని నిబంధనలను ఉటంకిస్తూ స్పష్టం చేశారు. డిస్టిలరీలతో వ్యవహారాలన్నీ బెవరేజస్‌ కార్పొరేషన్‌ ఎండీనే పర్యవేక్షిస్తారని స్పష్టం చేశారు. ఈ కేసులో సాక్షులు కొందరు మీ పేర్లు చెప్పారని సిట్‌ అధికారులు పేర్కొనగా, తాము కూడా ఏమాత్రం సంబంధం లేనివారి పేర్లను చెబితే వారినీ నిందితులుగా చేరుస్తారా అని ధనుంజయ్‌రెడ్డి, కృష్ణమోహన్‌రెడ్డి ఎదురు ప్రశ్నించడంతో సిట్‌ అధికారులు మౌనం దాల్చారు. రాజ్‌ కేసిరెడ్డితో గానీ డిస్టిలరీల ప్రతినిధులతో గానీ తాము ఎలాంటి అధికారిక, అనధికారిక వ్యవహారాలు నిర్వహించలేదని అన్నారు. తమపై నమోదు చేసింది పూర్తిగా అక్రమ కేసని న్యాయ పోరాటం ద్వారా ఆ విషయాన్ని నిరూపిస్తామని తేల్చిచెప్పారు. కాగా, ధనుంజయ్‌ రెడ్డి, కృష్ణ­మోహన్‌రెడ్డిలను గురువారం కూడా విచారణకు రావాలని సిట్‌ అధికారులు కోరారు.

సాక్షి, అమరావతి: చంద్రబాబు రెడ్‌బుక్‌ అరాచకాలను వెలుగులోకి తెస్తున్న ‘సాక్షి’ పత్రికపై టీడీపీ కూటమి ప్రభుత్వం కక్ష సాధింపు చర్యలకు తెగబడుతోంది. నిజాన్ని నిర్భయంగా ఎత్తి చూపడంతో భరించలేక తప్పుడు కేసులకు ఒడిగడుతూ కుట్ర రాజకీయాలు చేస్తోంది. పల్నాడు జిల్లాలో వైఎస్సార్‌సీపీ కార్యకర్తను టీడీపీ గూండాలు హత్య చేసిన ఉదంతాన్ని వెల్లడించడంపై అక్రమ కేసు నమోదు చేయించడమే ఇందుకు నిదర్శనం. సాక్షి పత్రికపై మాచర్ల టీడీపీ మండలాధ్యక్షుడు ఎన్‌.వీరస్వామి అక్కడి పోలీసులకు ఫిర్యాదు చేశారు. టీడీపీ ఎమ్మెల్యే ఆనంద్‌­బాబు, ఇతర టీడీపీ నేతలు మంగళవారం సాయంత్రం ఇక్కడ డీజీపీకి ఫిర్యాదు చేశారు. ఆ వెంటనే డీజీపీ స్పందించి పల్నాడు జిల్లా ఎస్పీని ఆదేశించడం.. వెనువెంటనే రాత్రికి రాత్రే ఎఫ్‌ఐఆర్‌ నమోదు చేయడం అంతా పక్కా పన్నాగంతో చకచకా సాగిపోయింది. దీంతో సాక్షి పత్రిక ఎడిటర్‌ ఆర్‌.ధనుంజయ్‌రెడ్డితోపాటు ఇదే పత్రికకు చెందిన ఆరుగురు పాత్రికేయులపై బీఎన్‌ఎస్‌ సెక్షన్లు 196(1), 352, 353,(2), 61(1) రెడ్‌విత్‌ 3(5) కింద ఎఫ్‌ఐఆర్‌ నమోదు చేసింది. ఈ అక్రమ కేసుకు సంబంధించిన వివరాలు ఇలా ఉన్నాయి. పింఛన్‌ కోసం వస్తే కడతేర్చారన్నది వాస్తవంపల్నాడు జిల్లా మాచర్ల నియోజకవర్గంలోని పశువేములకు చెందిన వైఎస్సార్‌సీపీ కార్యకర్త హరిశ్చంద్ర టీడీపీ గుండాలకు భయపడి కుటుంబంతో సహా పొరుగున తెలంగాణలోని నల్కొండ జిల్లా కనగల్‌లో పది నెలలుగా తల దాచుకుంటున్నారు. ప్రతి నెల పింఛన్‌ తీసుకునేందుకు వచ్చి వెంటనే వెళ్లిపోతున్నారు. ఈ విషయాన్ని గుర్తించిన టీడీపీ వర్గీయులు పక్కా పన్నాగంతో ఆయన్ను హత్య చేశారు. ఏప్రిల్‌ నెల ఫించన్‌ తీసుకునేందుకు ఈ నెల 3న రాష్ట్ర సరిహద్దుల్లోని నాగార్జునసాగర్‌ హిల్‌ కాలనీ వద్దకు వచ్చి.. తమ గ్రామం పశువేములకు చెందిన ఒకరికి ఫోన్‌ చేశారు. సామాజిక పింఛన్లు ఇస్తున్నారా.. లేదా.. అని అడిగారు. అతను ఆ విషయాన్ని టీడీపీ వర్గీయులకు చేరవేశాడు. వెంటనే టీడీపీ గూండాలు వచ్చి హిల్‌ కాలనీలో ఉన్న హరిశ్చంద్రను కిడ్నాప్‌ చేసి తీసుకెళ్లారు. అనంతరం ఆయనపై దాడి చేసి, హత్య చేసి.. మృతదేహాన్ని పశువేములలోని ఆయన పొలంలోనే పడేశారు. హరిశ్చంద్ర భార్య నిర్మల తన భర్తను కిడ్నాప్‌ చేశారని తెలంగాణలోని విజయపురి పోలీసులకు ఫిర్యాదు చేశారు. దీనిపై విచారణ చేపట్టిన పోలీసులు.. పశువేములలో దారుణ హత్యకు గురైన హరిశ్చంద్ర మృతదేహాన్ని ఈనెల 4న గుర్తించారు. కర్రలతో కొట్టి.. గొంతుకోసి.. ముఖంపై యాసిడ్‌ పోసి మరీ దారుణంగా హత మార్చినట్టు నాగార్జున సాగర్‌ పోలీసులు ప్రాథమికంగా నిర్ధారించారు. హిల్‌ కాలనీలోని ఓ దుకాణం వద్ద ఉన్న సీసీ టీవీ కెమెరాల నుంచి పుటేజీ సేకరించారు. హరిశ్చంద్రను కిడ్నాప్‌ చేసి తీసుకువెళుతున్న దృశ్యాలు అందులో స్పష్టంగా కనిపించాయి.పూర్తి అవగాహనతోనే వార్త ప్రచురితంహరిశ్చంద్ర హత్య సమాచారం తెలియగానే ఆయన కుటుంబ సభ్యులు, బంధువులు సంఘటన స్థలానికి చేరుకుని బోరున విలపించారు. తమపై టీడీపీ గూండాలు కక్ష కట్టిన తీరును హరిశ్చంద్ర భార్య నిర్మల, కుమారుడు మురళి వివరించారు. ఇది టీడీపీ గూండాల పనేనని కన్నీటి పర్యంతమయ్యారు. పల్నాడు జిల్లాలో నెలకొన్న పరిస్థితులు క్షణ్ణంగా తెలుసుకుని పూర్తి వివరాలతో సాక్షి పత్రిక ఏపీ ఎడిషన్‌లో వార్తను ప్రచురించింది. తెలంగాణలోని విజయపురి పోలీస్‌ స్టేషన్‌లో నమోదైన కేసు వివరాలతోపాటు మృతుని కుటుంబ సభ్యుల ఆవేదన, పశువేములలోని నెలకొన్న వాస్తవ పరిస్థితులను సమగ్రంగా వివరించింది. కాగా, తెలంగాణలో పాత్రికేయులు కేవలం అక్కడి పోలీసులు తెలిపిన ప్రాథమిక సమాచారాన్ని మాత్రమే వార్తగా ఇచ్చారు. హరిశ్చంద్రను సమీప బంధువులే హత్య చేశారని సాక్షి పత్రిక ఏపీ ఎడిషన్‌లోనూ, తెలంగాణ ఎడిషన్‌లోనూ ప్రచురించింది. కాగా, ఆ సమీప బంధువులు టీడీపీ గూండాలేనన్నది ఏపీలోని పాత్రికేయులకు పూర్తి సమాచారం, అవగాహన ఉంది కాబట్టి మరింత సమగ్రంగా వార్తను ప్రచురించారు. అంతేతప్ప సాక్షి పత్రిక ఏపీ, తెలంగాణ ఎడిషన్లలో ప్రచురితమైన వార్తలోని అంశాల మధ్య వ్యత్యాసం లేదు. ఈ హత్యపై తెలంగాణ పోలీసులు దర్యాప్తు చేస్తున్నారు.ఏ ఎండకాగొడుకు పచ్చ ముఠా నిర్వాకమే ప్రజల్ని మోసగించేందుకు పరస్పర విరుద్ధ వాదనలు, కథనాలు, పత్రికా ప్రకటనలు ఇవ్వడం పచ్చ ముఠా పన్నాగం. ఏపీ, తెలంగాణ ఎడిషన్లలో పరస్పర విరుద్ధంగా ఈనాడుతోపాటు ఎల్లో మీడియా లెక్కకు మించి కథనాలు ప్రచురించిన విషయాన్ని పాత్రికేయ సంఘాలు గుర్తు చేస్తున్నాయి. టీడీపీ.. ప్రజల్ని మోసగించేందుకు ఏపీలోనే ఉత్తరాంధ్ర, కోస్తా, రాయలసీమ ప్రాంతాల్లో పరస్పర విరుద్ధంగా పత్రికా ప్రకటనలు జారీ చేసిన విషయాన్ని ప్రస్తావిస్తున్నారు. ఎన్నికల ముందు టీడీపీ, ఈనాడుతోపాటు ఇతరత్రా ఎల్లో మీడియాలో ఇచ్చిన ప్రకటనలే అందుకు నిదర్శనం. ‘కలల రాజధాని అమరావతి’అని విజయవాడ ఎడిషన్‌లో ప్రకటనలు ఇచ్చిన టీడీపీ.. అదే రోజు విశాఖపట్నం ఎడిషన్‌లో మాత్రం ‘ఆంధ్రప్రదేశ్‌ వికాసానికి గ్యారంటీ’ అని ప్రకటనలు జారీ చేయడం గమనార్హం. టీడీపీ, ఎల్లో మీడియా కుయుక్తులకు ఇలాంటి ఉదాహరణలు కోకొల్లలుగా ఉన్నాయి.

సాక్షి, అమరావతి: సీఎం కార్యాలయం(సీఎంవో)లో పనిచేసే అధికారులకు శాఖలను కేటాయిస్తూ ప్రత్యేక ప్రధాన కార్యదర్శి డాక్టర్‌ కేఎస్‌ జవహర్‌రెడ్డి బుధవారం ఉత్తర్వులిచ్చారు.   కేఎస్‌ జవహర్‌రెడ్డి(స్పెషల్‌ సీఎస్‌): జీఏడీ, హోం శాఖ, రెవెన్యూ, అటవీ పర్యావరణ, వైద్య ఆరోగ్య శాఖ, శాసనసభ వ్యవహారాలు, పరిశ్రమలు, పెట్టుబడులు, మౌలిక వసతులు, కేంద్ర ప్రభుత్వ అంశాలు, సీఎంవో ఎస్టాబ్లిష్‌మెంట్, రాష్ట్ర విభజన సమస్యలు  సాల్మన్‌ ఆరోఖ్యరాజ్‌(కార్యదర్శి): పౌర సరఫరాలు, విద్య, పంచాయతీరాజ్, గ్రామీణాభివృద్ధి, గనులు, ఐటీ అండ్‌ ఎలక్ట్రానిక్స్, అన్ని సంక్షేమ శాఖలు  ధనుంజయ్‌రెడ్డి(కార్యదర్శి): ఆర్థిక, ప్రణాళిక శాఖ, జల వనరులు, వ్యవసాయ అనుబంధ రంగాలు, మునిసిపల్‌ పరిపాలన, ఇంధన శాఖ, పర్యాటక, యువజన సర్వీసులు, మార్కెటింగ్‌ అండ్‌ సహకార శాఖలు  ముత్యాలరాజు(అదనపు కార్యదర్శి): ప్రజాప్రతినిధుల వినతులు, రెవెన్యూ(ల్యాండ్, రిజిస్ట్రేషన్‌ అండ్‌ స్టాంప్స్‌), గృహ నిర్మాణం, రవాణా, రోడ్లు, భవనాల శాఖలు, కార్మిక, నైపుణ్యాభివృద్ధి శాఖలు  

సాక్షి, అమరావతి:  గ్రామ, వార్డు సచివాలయాల ద్వారా ఇప్పటివరకు 33 లక్షల వినతులను పరిష్కరించారని గ్రామ, వార్డు సచివాలయాలు, స్పందన వ్యవహారాలలో ముఖ్యమంత్రి సలహాదారు ఆర్‌.ధనుంజయ్‌రెడ్డి తెలిపారు. సచివాలయాల వ్యవహారాల శాఖ ముఖ్య కార్యదర్శి అజయ్‌జైన్, కమిషనర్‌ అండ్‌ డైరెక్టర్‌ జీఎస్‌ నవీన్‌కుమార్‌తో కలిసి శుక్రవారం ఆయన రాష్ట్రంలోని 15,004 గ్రామ, వార్డు సచివాలయాల ఉద్యోగులతో టెలీ కాన్ఫరెన్స్‌ ద్వారా మాట్లాడారు. ధనుంజయ్‌రెడ్డి ఏమన్నారంటే..  ► స్థానిక సచివాలయాల ద్వారా ప్రభుత్వం అందజేస్తున్న 540 రకాల సేవలపై ప్రజలందరికీ అవగాహన కల్పించి మరింత మంది ఈ సేవలను వినియోగించుకునేందుకు తోడ్పడాలి.   ► ప్రజల నుంచి నేరుగా అందే వినతులతో పాటు వలంటీర్ల ద్వారా అందే వినతుల పరిష్కారం విషయంలో సచివాలయాల సిబ్బంది అలసత్వం చూపవద్దు.   ► సీఎం వైఎస్‌ జగన్‌ సూచించిన విధంగా నిర్ణీత గడువులోగానే వినతుల పరిష్కారం పూర్తవ్వాలి. సేవల్లో ఆలస్యమైతే సంబంధీకులే బాధ్యత వహించాల్సి ఉంటుంది. అందుకు పరిహారం కూడా చెల్లించాల్సి ఉంటుంది.   ► సీఎం జగన్‌మోహన్‌రెడ్డి గ్రామాల పర్యటనకు వచ్చినప్పుడు సచివాలయాల ద్వారా అందజేసే సేవల విషయంలో ఎలాంటి ఫిర్యాదులు వచ్చే పరిస్థితి రాకూడదు.  ► ప్రతి వార్డు, గ్రామ సచివాలయంలో ప్రభుత్వం అమలు చేస్తున్న సంక్షేమ పథకాల వివరాలు, వాటికి అర్హత, దరఖాస్తు చేసుకునే విధానం వంటి సమాచారం తెలియజేస్తూ నోటీసు బోర్డులు తప్పనిసరిగా ఉండాలి.  ► ప్రభుత్వానికి సంబంధించి ప్రజలకు ఉపయోగపడే అన్ని ముఖ్యమైన ఫోన్‌ నంబర్ల జాబితా, సంక్షేమ కార్యక్రమాల అమలు క్యాలెండర్, సచివాలయాల ద్వారా అందుబాటులో ఉన్న సేవల వివరాలతో కూడిన డిస్‌ప్లే బోర్డులు ఉంచాలి.  

సాక్షి, అమరావతి : ముఖ్యమంత్రి కార్యాలయంలో పనిచేసే అధికారులకు శాఖలు కేటాయించారు. సీఎం కార్యాలయంలో పనిచేస్తున్న ఇతర అధికారులు అందరికీ ముఖ్యమంత్రి ముఖ్య సలహాదారు అజేయకల్లం ఈ కేటాయింపులు చేశారు.  అజేయ కల్లం, సీఎం ముఖ్య సలహాదారు:  సాధారణ పరిపాలన, హోంశాఖ, ఆర్థిక, ప్రణాళిక, రెవెన్యూ, శాంతిభద్రతల అంశాలు, ముఖ్యమంత్రి కార్యాలయ కార్యకలాపాలు. పీవీ రమేష్, సీఎం స్పెషల్‌ చీఫ్‌ సెక్రటరీ:  వైద్య ఆరోగ్యం, కుటుంబ సంక్షేమ శాఖ, విద్యాశాఖ(పాఠశాల, ఇంటర్, ఉన్నత, సాంకేతిక విద్య), పరిశ్రమలు,వాణిజ్యం, మౌళిక వసతులు, పెట్టుబడులు,ప్రభుత్వ రంగ సంస్థలు, ఐటీ, ఇన్‌ఫ్రా, ఇంధన శాఖ.  సొల్మన్‌ ఆరోక్య రాజ్, సీఎం కార్యదర్శి:  ట్రాన్స్‌పోర్ట్‌ రహదారులు, భవనాల శాఖ, ఏపీఎస్‌ఆర్టీసీ, గృహ నిర్మాణం, ఆహార,పౌరసరఫరాల, వినియోగదారుల సమస్యలు, పంచాయతీరాజ్,గ్రామీణ అభివృద్ధి, సెర్ప్, అన్ని సంక్షేమ శాఖలు, యువజన వ్యవహారాలు, క్రీడలు. కె.ధనుంజయరెడ్డి, సీఎం అదనపు కార్యదర్శి: నీటి వనరులు, పర్యావరణం, అటవీ,సాంకేతిక, మున్సిపల్‌ అడ్మినిస్ట్రేషన్, అర్బన్‌ డెవలప్‌మెంట్, సీఆర్‌డీఏ, వ్యవసాయం, హార్టికల్చర్, సెరికల్చర్, పర్యాటకం.  జె.మురళి, సీఎం అదనపు కార్యదర్శి: పశుసంవర్థక, పాడి పరిశ్రమ,మత్స్యశాఖ, సహకారం, సంస్కృతి. డాక్టర్‌ ముక్తాపురం హరికృష్ణ, సీఎం ప్రత్యేక అధికారి: ఆరోగ్య శ్రీ, ముఖ్యమంత్రి సహాయనిధి(సీఎంఆర్‌ఎఫ్‌), విజ్ఞాపనలు(ఎంపీలు, ఎమ్మెల్యేలు, ప్రజల విజ్ఞప్తులు). పి.కృష్ణమోహన్‌రెడ్డి, ఆఫీసర్‌ ఆన్‌ స్పెషల్‌ డ్యూటీ(ఓఎస్‌డీ): ముఖ్యమంత్రికి సంబంధించిన మినిట్‌ టు మినిట్‌ ప్రోగ్రామ్, అపాయింట్‌మెంట్స్, విజిటర్స్‌ అపాయింట్‌మెంట్స్‌.  

సాక్షి , నెల్లూరు: జిల్లా కేంద్ర సహకార బ్యాంక్‌లో నిధులు దుర్వినియోగం అయ్యాయని వాటిపై వివరణ ఇవ్వాలని కలెక్టర్‌ ముత్యాలరాజు జారీ చేసిన నోటీసులు రాజకీయ దుమారం రేపాయి. వీటిపై కోర్టులో న్యాయపోరాటం చేయాలని పాలకమండలి నిర్ణయించింది. జిల్లా కేంద్ర సహకార బ్యాంక్‌(డీసీసీబీ) చైర్మన్‌ మెట్టుకూరు ధనుంజయరెడ్డి నివాసంలో పాలకమండలి సభ్యులతో ఆయన సమావేశం అయ్యారు. ఈ క్రమంలో నోటీసులు జారీవెనుక జరుగుతున్న పరిణామాలు, దీని వెనుక ఉన్న సహకార శాఖ అధికారుల పాత్ర చర్చించారు. అనంతరం అందరూ రాజకీయ పార్టీలకు అతీతంగా ఏకమై న్యాయపోరాటం ద్వారానే దీనిని తేల్చుకోవాలని నిర్ణయించి న్యాయవాదితో చర్చలు జరిపారు. నోటీసులకు తిరిగి వివరణ ఇవ్వడంతో పాటు కోర్టులో దీనిని సవాలు చేయాలని నిర్ణయించారు. రాజధాని నిర్మాణానికి విరాళం ఇవ్వడం. అలాగే బ్యాంక్‌ శత జయంతి వేడుకులను అట్టహాసంగా నిర్వహించడం కూడా నిధుల దుర్వినియోగంలో భాగం అయ్యాయని నోటీసుల్లో సారాంశం. ఇవన్నీ కూడా గతంలో తెలుగుదేశం పార్టీలో ఉన్నప్పుడు చేసినవే. అవి కూడా పాలకమండలి తీర్మానంతో పాటు సబ్‌ కమిటీ అనుమతితో చేసిన కార్యక్రమాలు ఇప్పుడు డీసీసీబీ చైర్మన్‌గా ఉన్న మెట్టుకూరు ధనుంజయరెడ్డి సార్వత్రిక ఎన్నికలకు ముందు వైఎస్సార్‌ కాంగ్రెస్‌ పార్టీలో చేరడడంతో నోటీసులు జారీ చేసి వేధింపుల పర్వం మొదలుపెడుతున్నారనే ఆరోపణలున్నాయి.  పార్టీ మారగానే నోటీసుల హడావుడి ఇదిలా ఉంటే మెట్టుకూరు ధనుంజయరెడ్డికి నోటీసులు జారీ చేయడం అటు రాజకీయ వర్గాలతో పాటు సహకారశాఖలోనూ తీవ్ర చర్చనీయాంశంగా మారింది. పార్టీ మారడంతో అధికారులపై అధికారపార్టీ నేతలు ఒత్తిడి తీసుకురావడంతో వారికి ఒక అధికారి సహకారం తోడైంది. దీంతో హడావుడిగా బ్యాంక్‌ అధికారులను 14,15 తేదీలు పిలిచి మాట్లాడి అప్పటికప్పుడు వారితో నివేదికలు సిద్ధం చేసి 16వ తేదీతో నోటీసులు జారీ చేశారు. గతంలో సహకార శాఖలో పనిచేసిన ఒక మహిళా అధికారి డైరెక్షన్‌తోనే ఈ తతంగం అంతా నడిచినట్లు తెలుస్తుంది. సదరు మహిళా అధికారి గతంలో బ్యాంక్‌లో కీలక బాధ్యతలు నిర్వహించారు. ఈమెపై కొన్ని ఆరోపణలు రావడంతో ఆమెను తప్పించారు. ఈ క్రమంలో అప్పట్లో ఆమె అధికారులను తప్పుదోవ పట్టించేలా నివేదికలు ఇచ్చిందని దానిలో భాగంగానే తాజాగా జారీ అయిన నోటీసులు అని పాలకవర్గ సభ్యులు మండిపడుతున్నారు. ముఖ్యమంత్రిగా ఉన్న చంద్రబాబునాయుడు పిలుపుతోనే రాజధాని నిర్మాణానికి 2014లో రూ.6 లక్షలు విరాళం బ్యాంక్‌ ప్రకటించారు. దాదాపు ఐదేళ్ల క్రితం ప్రకటించిన విరాళం ఇది. అది కూడా బ్యాంక్‌ పాలకవర్గం అనుమతితో జరిగిన విషయం. అలాగే సీఎంను ఆహ్వానించిన శతజయంతి వేడుకలకు రూ.35 లక్షలు ఖర్చు చేశారు. దీనికి కలెక్టర్‌ కూడా హాజరయ్యారు. అలాగే బ్యాంక్‌ కాంప్లెక్స్‌లోని షాపుల అద్దెలు బాగా తక్కువగా ఉండటం,  పాలక మండలి తీర్మానంతో బిడ్‌లు ఆహ్వానించి షాపులను కేటాయించారు. ఈ క్రమంలో అద్దెలు తగ్గించడం వల్ల, అప్పటి నుంచి ఇప్పటి వరకు దాని వల్ల రూ.42.30 లక్షలు నష్టం వాటిల్లిందని దీనిని దుర్వినియోగంగా చూపారు. ఈ మూడు అంశాలపై ఈ నెల 25న పాలకవర్గం తరుపున న్యాయవాది హాజరుకావాలని పాలకమండలి నిర్ణయించింది.  

ఎన్ని యుద్ధాలు.. ఇంకెన్ని ఉద్యమాలు.. మరెన్నో వేడుకలు. అన్నిటికీ సాక్షి సిక్కోలు. అశోకుడి మనసు మార్చిన నేల ఇది. బౌద్ధానికి గుండె పరిచి స్వాగతించిన గడ్డ ఇది. అణచివేతకు గురైన ప్రతిసారీ ప్రజా ఉద్యమాలకు పురుడు పోసిన ప్రాంతమిది. లోకానికి వెలుగు పంచే సూర్యనారాయణుడికి నీడనిచ్చిన పవిత్ర స్థలమిది. ఓ వైపు శాంతి, మరోవైపు యుద్ధం.. అవసరమైన సందర్భంలో ఏ దారినైనా పయనించగల సత్తా ఉన్న కర్మభూమి. ఆ గురుతులన్నీ జిల్లాకేంద్రంలో కొలువుదీరాయి. ఆ జ్ఞాపకాలు బొమ్మల రూపంలో మరోమారు గుండెలకు హత్తుకుంటున్నాయి. శ్రీకాకుళంలో శుక్రవారం ప్రారంభమైన కళింగాంధ్ర ఉత్సవాలు సిక్కోలు ఘన చరితను చాటిచెప్పాయి.   శ్రీకాకుళం న్యూకాలనీ: సిక్కోలు చారిత్రకతను భవిష్యత్‌ తరాలవారికి తెలియజేయాల్సిన అవసరం జిల్లా ప్రజల అందిరిపైనా ఉందని కలెక్టర్‌ కె.ధనంజయరెడ్డి అన్నా రు. శ్రీకాకుళం ఆర్ట్స్‌ కళాశాల మైదానంలో కళింగాంధ్ర ఉత్సవాలను ఆయన శుక్రవారం ప్రారంభించారు. ఈ సందర్భంగా మాట్లాడుతూ... క్రీస్తుపూర్వం 3వ శతాబ్ధంలో ఈ ప్రాంతం చారిత్రక ఘట్టాలను నేటి యువతకు తెలియజేయాల్సిన ఆవశ్యకత ఉందన్నారు. స్థానిక జిల్లాకు కలెక్టర్‌గా వచ్చిన తరువాత కళింగపట్నం సాగర తీరాన బీచ్‌ ఫెస్టివల్‌ నిర్వహించినట్లు గుర్తుచేశారు. దీనికి జిల్లా ప్రజలు విశేషంగా ఆధరించి విజయంతం చేశారన్నారు. ఈసారి భిన్నంగా చేయాలనే ఉద్దేశంతో కళింగాంధ్ర ఉత్సవాలను నిర్వహించేందుకు ఏర్పాట్లు చేసినట్లు వివరించారు. శ్రీకాకుళం వైభవం, సాంస్కృతిక కళారూపాలు, జిల్లా ప్రత్యేకతను ఇందులో ఇనుమడింప జేశామని, దీనిని అంతా ఆస్వాదించాలని కోరారు. అన్ని విభాగాల అధికారులతో సమన్వంతో ఐటీడీఏ పీఓ శివశంకర్‌ అత్యద్భుతంగా కార్యక్రమాన్ని డిజైన్‌ చేశారని కొనియాడారు. 21 నెలల పాటు జిల్లాలో పనిచేసి ఇక్కడి నుంచి బదిలీపై వెళ్లడం బాధగా ఉందన్నారు. పని చేసిన కొద్ది రోజులైనా ఎంతో తృప్తినిచ్చిందన్నారు. ప్రజంతా ఆస్వాదించాలి ఐటీడీఏ పీఓ, ఇన్‌చార్జ్‌ జాయింట్‌ కలెక్టర్‌ లోతేటి శివశంకర్‌ మాట్లాడుతూ జిల్లాలో జరిగే చారిత్రక సంఘటనలు గురించి కోడిరామ్మూర్తి స్టేడియంలో ఏర్పాటు చేశామని తెలిపారు. జాయింట్‌ కలెక్టర్‌–2 పి.రజనీకాంతారావు మాట్లాడుతూ సంస్కృతి సంప్రదాయాలను చాటి చెప్పే ప్రదర్శనశాల ఏర్పాటు చేసిన కార్యక్రమాన్ని విజయవంతం చేయాలని కోరారు. అంతకుముందు కలెక్టర్‌ జ్యోతి వెలిగించి, నింగిలోకి బెలూన్లను విడిచిపెట్టి, లాంఛనంగా వేడుకలను ప్రాంభించారు. కార్యక్రమంలో డీఆర్‌ఓ కె.నరేంద్రప్రసాద్, డీఆర్‌డీఏ పీడీ ఎ.కల్యాణచక్రవర్తి, మున్సిపల్‌ కమిషనర్‌ ఆర్‌.శ్రీరాములునాయుడు, మెప్మా అధికారి కిరణ్‌కుమార్, సెట్‌శ్రీ సీఈఓ బీవీ ప్రసాధరావు, పర్యాటక శాఖాధికారి నారాయణరావు, డీఎస్‌డీఓ శ్రీనివాస్‌కుమార్, ఏపీఐఐసీ అధికారి బడగల హరిధర్రావు తదితరులు పాల్గొన్నారు. ఎగ్జిబిషన్‌ను ప్రారంభించిన కలెక్టర్‌ అలాగే కోడిరామ్మూర్తి స్టేడియంలో ఏర్పాటు చేసిన ‘కాల గమనంలో శ్రీకాకుళం’ ఎగ్జిబిషన్‌ను జిల్లా కలెక్టర్‌ ధనంజయరెడ్డి ప్రారంభించారు. క్రీస్తుపూర్వం 3వ శతాబ్ధం నాటి జిల్లా చరిత్ర, ప్రాచీన గ్రంథాలలో కళింగప్రాంత ప్రస్తావన, క్రీస్తుపూర్వం 261 నాటి కళింగయుద్ధం, శ్రీకూర్మ దేవాలయం, శాలిహుండం ఇలా.. జిల్లా చరిత్రతోపాటు ఏర్పాటైన, రూపుదిద్దుకున్న కట్టడాలు, నిర్మాణాలు, ప్రఖ్యాత ప్రదేశాలు, గుర్తింపు పొందిన స్థలాలు, ప్రఖ్యాతిగాంచిన వస్తువులు, తయారీ, నిర్మాణ, కళలు, సాంప్రదాయాలు, క్రీడాకారులు ఇలా ప్రతీ అంశాన్ని సమ్మేళనం చేస్తు ప్రత్యేకంగా ప్రదర్శనలు చేశారు. సీతంపేట ఐటీడీఏ పరిధిలో నిర్మితమైన, నిర్మితంకానున్న పలు ప్రాజెక్టులను ఉన్నతంగా తీర్చిదిద్దారు. ప్రజలు వీటిని సందర్శంచేందుకు ఎగబడుతున్నారు. అలాగే స్టాల్స్‌ల వద్ద వివిధ జిల్లాస్థాయి అధికారులను ఇన్‌చార్జ్‌లుగా నియమించారు. వీరితోపాటు ఉపాధ్యాయులు, పీఈటీలు, వివిధ శాఖల ఉద్యోగులు విధుల్లో పాల్గొన్నారు. పోలీసులు ప్రత్యేక బందోబస్తు కల్పిస్తున్నారు. అయితే ఉదయం ప్రారంభంకావాల్సిన ఎగ్జిబిషన్‌ సాయంత్రం 7 గంటల వరకు ప్రారంభం కాకపోవడంతో కళాభిమానులు, ప్రజలు ఒకింత అసహనానికి గురయ్యారు. మరోవైపు శ్రీకాకుళం ఆర్ట్స్‌ కళాశాల మైదానంలో ఏర్పాటు చేసిన పలు ఆకృతులు ఎంతగానో ఆకట్టుకున్నాయి. ప్రముఖ గాయని కల్పన, జిల్లాకు చెందిన ధనుంజయ్‌ పాడిన పాటలకు ఆహుతులు ఉర్రూతలూగారు. మిమిక్రీ కళాకారుడు శివారెడ్డి, యాంకర్‌ హరితేజతో కలిసి నవ్వులు పూయించారు. వీటితో పాటు భామిని మండలం ఘనసరకు చెందిన శివ భాగవతం బృందం ప్రదర్శన ప్రత్యేక ఆకర్షణగా ఆకట్టుకుంది. నేటి సాంస్కృతిక కార్యక్రమాలు ♦ సాయంత్రం 4 గంటల నుంచి ♦ తప్పిడగుళ్లు–అల్లినగరం అప్పన్న ఎస్‌ఎం పురం, సత్తిబాబు ♦ నాదస్వరం–మల్లేశ్వర్రావు ♦ బుర్రకథ, ఆరంగి వెంకటరావు ♦ కర్నాటక వీణా వాయిధ్యం–యేళ్ల శ్రావణి ♦ అన్నమయ్య సంకీర్తన–రఘురాం ♦ క్లాసీకల్‌ మ్యూజిక్‌–లక్ష్మీగణపతి శర్మ ♦ భరతనాట్యం–మంగళంపల్లి పూజ ♦ కూచిపూడి, భరతనాట్యం నత్య ప్రదర్శన–అనూరాధ, కీర్తి ప్రియ సాయంత్రం 7 గంటల నుంచి.. ♦ కళింగ వైభవముపై చారిత్రక నాటకం ♦ ఫోక్‌ సింగర్, పంజాబీ, పైకా ఒడిశా అక్రోబేట్స్‌ కార్యక్రమం ♦ టీవి యాంకర్, ఈటీవి జబర్ధస్త్‌ ఫేమ్‌ రెష్మీ, టీవీ కొరియోగ్రాఫర్‌ పొట్టి రమేష్‌ల డాన్స్, రష్యన్‌ అమ్మాయిల ప్రత్యేక అభినయ కార్యక్రమాలు ♦ కళింగాంధ్ర సాంప్రదాయాన్ని ప్రతిబింబించేలా బిగ్‌బాస్‌ విన్నర్‌ కౌషల్‌ పర్యవేక్షణలో కోల్‌కత్తా మోడల్స్‌తో డిజైనర్‌ ఫ్యాషన్‌ షో ♦ ప్రముఖ గాయనీ గాయకులు శ్రీకృష్ణ, మల్లిఖార్జున, గోపికా పూర్ణిమల ఆర్కెస్ట్రా ♦ మంగ్లీ, గాలిపటాల సుధాకర్‌ యాంకరింగ్‌ చేయనున్నారు.

శ్రీకాకుళం పాతబస్టాండ్‌:కాలం గడుస్తున్నా ప్రగతి కనిపించడం లేదు.. సమావేశాలకు సైతం ఆలస్యంగా వస్తున్నారు.. పని చేయాలని ఇష్టంలేకపోతే సెలవుపై వెళ్లిపోండి.. కొత్తగా వచ్చేవారైనా పనులను పూర్తి చేస్తారని కలెక్టర్‌ కె.ధనంజయరెడ్డి పలు శాఖల అధికారులనుద్దేశించి వ్యాఖ్యానించారు. జిల్లాలోని పలు విభాగాల్లో పనుల ప్రగతి లేదని, గత నెలకు ఈ నెలకు ఏమాత్రం మెరుగుదల కనిపించడం లేదంటూ ఆగ్రహం వ్యక్తం చేశారు. కొంతమంది అధికారులు ప్రగతిపై సరైన సమాధానం చెప్పకపోవడంతో కథలు చెప్పవద్దని, ఇప్పటికే పలుమార్లు కథలు వింటూ వస్తున్నానని.. ఇక నుంచి వినేది లేదన్నారు. ప్రధానంగా పీఆర్‌ ఇంజినీరింగ్, డీఆర్‌డీఏ, ఆర్‌డబ్ల్యూఎస్, ఐటీడీఎస్,  విద్యాశాఖ, ఇంజినీరింగ్‌ విభాగాలకు చెందిన అధికారుల పనితీరుపై తీవ్ర అసంతృప్తిని వ్యక్తం చేశారు. ఈనెల 29న అమరావతిలో కలెక్టర్ల సమావేశాన్ని ముఖ్యమంత్రి చంద్రబాబు నిర్వహించనున్నారు. ఈ నేపథ్యంలో జిల్లాలోని శాఖల వారీగా ప్రగతిపై సంబంధిత శాఖాధికారులతో సమీక్షా సమావేశం బుధవారం తన కార్యాలయంలో నిర్వహించారు. సమావేశానికి కొంతమంది అధికారులు ఆలస్యంగా రావడాన్ని గమనించిన కలెక్టర్‌ సమావేశానికి బొట్టుపెట్టి పిలవాలా అని ఆగ్రహం వ్యక్తం చేశారు. రాష్ట్రంలో శ్రీకాకుళం, అనంతపురం, విశాఖపట్నంవెనుకబడి ఉన్నాయన్నారు. ఈ నేపథ్యంలో రాత్రి.. పగలు కష్టపడి, పనులకు కావాల్సిన అనుమతులు ఇస్తుంటే ఎందుకు పని చేయడంలేదని అధికారులను ప్రశ్నించారు. చాల శాఖలకు పనులు సజావుగా జరిగేందుకు వీలుగా అడ్వాన్సు కూడా ఇచ్చామని, అయినా పనులు ఎందుకు జరగడం లేదని నిలదీశారు. అధికారులు సమావేశాలకు సమాచారం లేకండా వస్తున్నారని, ఏం చేస్తున్నారని ప్రశ్నించారు. తిత్లీ తుపానుకు సంబంధించిన బిల్లులు సైతం కొంతమంది అధికారులు దొంగ బిల్లులు కొన్ని మండలాల్లో పెడుతున్నారన్నారు. పంచాయతీరాజ్‌ ఇంజినీరింగ్‌ అధికారులు సమావేశానికి హాజరు కాకపోవడంతో కలెక్టర్‌ ఆగ్రహం వ్యక్తం చేశారు. పింఛన్ల పంపిణీలో ఏడాదిగా జిల్లా  వెనుకబడి ఉందని, ప్రతి నెలా వెనుకబాటు తనానికి కారణమేమిటని ఆయన డీఆర్‌డీఏ పీడీని ప్రశ్నించారు. ఇక నుంచి సకాలంలో పింఛన్లు పంపిణీ చేయాలని ఆదేశించారు. గ్రామీణ నీటి సరఫరా విభా గం ఇంజినీరు తీరుపై మండి పడ్డారు. రన్నింగ్‌ వాటర్‌ సప్‌లై, మరుగుదొడ్ల నిర్మాణాల ప్రగతి నెలరోజులుగా ఒక్క అడుగు కూడా ముందుకు వెళ్లలేదన్నారు. అడ్వాన్సులు ఇచ్చినా పనులు చేయడం లేదన్నారు. పాఠశాలలకు, అంగన్‌వాడీ భవనాలకు  ఇంతవరకు ఎందుకు రన్నింగ్‌వాటర్‌ను సరఫరా చేయలేదని సంబంధితశాఖ ఈఈని కలెక్టర్‌ నిలదీశారు. అంగన్‌వాడీ భవనాల్లో సమస్యలుంటే తనకు ఎందుకు చెప్పడం లేదని, పర్యవేక్షణ ఎందుకు చేయడం లేదని ఐటీడీఎస్‌ అధికారులను ప్రశ్నించారు. అన్ని శాఖల్లోనూ ఇంజినీరింగ్‌ విభాగాలు అధ్వానంగా ఉన్నాయని,  ప్రగతి ఏమాత్రం కనిపించడం లేదన్నారు. తీరు మారాలని సంబంధిత అధికారులను హెచ్చరించారు. ఒకే పనిని పదేపదే చెప్పించుకోవడం సరికాదన్నారు. ఆదరణ పథకానికి సంబంధించిన అనుమతులు త్వరితగతిన ఇవ్వాలని, మండలాభివృద్ధి అధికారులు, ప్రత్యేకాధికారుల దగ్గర జాప్యం జరుగుతోందన్నార. మీ లాగెన్‌లో ఎందుకు అన్ని రోజులు ఉంచుకుంటున్నారని ప్రశ్నించారు. ఎప్పు డు వచ్చిన దరఖాస్తులను అప్పుడే  పంపించాలన్నారు. మేదరి, రజక, కల్లుగీత తదితర వర్గాలకు నేరుగా రూ. పది వేలు వంతున చెక్కులు చెల్లించాల్సి ఉండగా.. ఇందులో ఎంపీడీవోల జాప్యం ఉందన్నారు. ఉపాధి హమీ నిధులతో సంబంధం ఉన్న  వివిధ శాఖల పనులు వేగవంతం చేయాలని, నిధులు సకాలంలో ఖర్చు చేయకపోతే నష్టం జరుగుతోందని కలెక్టర్‌ ధనంజయరె డ్డి అన్నారు. సమన్వయ కమిటీ సమావేశం నిర్వహించి పనులు వేగవంతం చేయాలని డ్వామా పీడీని ఆదేశించారు. సమావేశంలో జిల్లా జాయింట్‌ కలెక్టర్‌ కేవీఎన్‌ చక్రధరబాబు, జేసీ–2 పి రజనీకాంతరావు, డీఆర్‌డీఏ పీడీ జి.సి.కిశోర్‌కుమార్, జిల్లా రెవెన్యూ అధికారి కె నాగేంద్ర ప్రసాద్, డ్వామా పీడీ హెచ్‌.కూర్మారావు, జెడ్పీ సీఈవో బి. నగేష్, ఆర్డీవోలు ఎం.వి.రమణ, ఎస్‌.వెంకటేశ్వర్లు, ఆర్‌. గున్నయ్య పాల్గొన్నారు.

కె.ధనంజయరెడ్డి.. కలెక్టర్‌గా అనతి కాలంలోనే తనదైన ముద్ర వేసిన అధికారి. పదవి చేపట్టి ఏడాదే అయినా సిక్కోలు భౌగోళిక, ఆర్థిక, సామాజిక, రాజకీయ పరిస్థితులపై ఒక స్పష్టమైన అవగాహనతో పనుల్లో తన మార్క్‌ చూపించారు. వంశధార రెండో దశ ప్రాజెక్టు పనుల్లో కనిపిస్తున్న వేగం ఆయన తీసుకున్న చొరవే. జిల్లాలో ఏడాది పదవీ కాలం పూర్తి చేసుకున్న సందర్భంగా ఆయన ఆదివారం ‘సాక్షి’ తో ప్రత్యేకంగా ముచ్చటించారు. వ్యవసాయానికి పెద్ద పీట వేస్తున్నట్లు చెప్పారు. ప్రజా సంక్షేమంపైనా ప్రత్యేకంగా దృష్టి పెట్టినట్లు వివరించారు.   – సాక్షి ప్రతినిధి, శ్రీకాకుళం సాక్షి: జిల్లాలో వ్యవసాయమే ప్రజల ప్రధాన వ్యాపకం. ఈ రంగంలో అభివృద్ధికి మీరు తీసుకుంటున్న చర్యలేమిటి? కలెక్టరు: ఖరీఫ్‌ పంటకాలం నవంబరు నాటికి పూర్తయితే తర్వాత రబీలోనూ సాగు విస్తీర్ణం పెంచేందుకు వీలవుతుంది. అంతేకాదు ఇది రైతుకు లాభదాయకం కూడా. రబీలో ఆరుతడి పంటల ను ప్రోత్సహించే విషయంలో సఫలమయ్యాం. మొక్కజొన్న, రాగి (చోడి) పంటల విస్తీర్ణం పెరి గింది. వాణిజ్య, ఉద్యాన, కూరగాయల సాగు పెంచేందుకు దృష్టి సారిస్తాం. జీడిమామిడి, కొబ్బరి తోటల్లో పసుపు, అల్లం తదితర అంతర పంటల సాగును ప్రోత్సహిస్తాం. అలాగే జిల్లాలో ని నీటి వనరుల్లో చేపలు పెంచేందుకు సీడ్‌ను మ త్స్యశాఖ ఇప్పటివరకూ బయటి నుంచే తెప్పించే ది. ఈ ఏడాది రూ.5 కోట్లతో జిల్లాలోనే సీడ్‌ను తయారయ్యేలా చర్యలు తీసుకుంటున్నాం.  సాక్షి: వచ్చే ఖరీఫ్‌ ప్రణాళిక ఏమిటి? కలెక్టరు: ఖరీఫ్‌కు సంబంధించి మే 15వ తేదీ నాటికి విత్తనాలు, ఎరువులు సిద్ధం చేస్తాం. ఖరీఫ్‌ కాలాన్ని ముందుకు తెచ్చేవిధంగా రైతులను సన్నద్ధం చేస్తున్నాం. తోటపల్లి, మడ్డువలస ప్రాజెక్టు ఆయకట్టు రైతులకు గతంలో జూన్‌ ఆఖర్లో లేదా జూలై నెలలో సాగునీరు విడుదల చేసేవారు. ఈ సారి జూన్‌ 7వ తేదీనే ముహూర్తం నిర్ణయించాం. గొట్టా బ్యారేజీ నుంచి వంశధార నీటిని అదే నెల 21వ తేదీన విడుదల చేస్తాం. దీనివల్ల రబీ సీజన్‌ ముందుకు జరుగుతుంది. నవంబరు 16వ తేదీ నుంచి మార్చి వరకూ ఆ సీజన్‌లో సాగునీరు అందించాలనేది మా ప్రయత్నం. గోదావరి జిల్లాల్లో మాదిరిగా రొటేషన్‌ విధానాన్ని తీసుకొస్తాం.  సాక్షి: పెండింగ్‌ ప్రాజెక్టుల పరిస్థితి, ఇప్పటికే ఉన్న ప్రాజెక్టుల ఆధునికీకరణ ఎంతవరకూ వచ్చింది?  కలెక్టరు: వంశధార రెండో దశ ప్రాజెక్టులో భాగమైన హిరమండలం జలాశయంలో జూలై నాటికి 8 టీఎంసీల నీరు నింపాలనే లక్ష్యం మేరకు చు రుగ్గా పనులు చేయిస్తున్నాం. నిర్మాణ పనులు గతం కన్నా త్వరితగతిన సాగుతున్నాయి. అలాగే హైలెవల్‌ కెనాల్‌పై కొత్తగా ఐదు ఎత్తిపోతల పథకాలు నిర్మించేందుకు ప్రాజెక్టు సమగ్ర నివేదిక (డీపీఆర్‌)లు సిద్ధం చేస్తున్నాం. ఇవి సాకారమైతే మరో నాలుగైదు వేల ఎకరాల భూమికి నీరు అందుతుంది. జిల్లాలో అంతకుముందు 15 ఎత్తిపోతల పథకాలకు ప్రతిపాదనలు చేస్తే వాటిలో నాలుగు ప్రారంభమయ్యాయి. మరో ఆరు ప్రాజెక్టుల నిర్మాణ పనులు పూర్తయ్యాయి. తోటపల్లి పాత ఆయకట్టు, నారాయణపురం ఆయకట్టు ఆధునికీకరణకు ప్రభుత్వ అనుమతి కోసం చూస్తున్నాం. మహేంద్ర తనయ ఆఫ్‌షోర్‌ ప్రాజెక్టు పనులు కూడా ఇటీవల కాలంలో పుంజుకున్నాయి.  సాక్షి: జలసిరి పథకం అమలులో ఎదురవుతున్న ఇబ్బందుల మాటేమిటి?  కలెక్టరు: జలసిరి పథకం కింద 9 వేల బోర్లు వేయాలనేది లక్ష్యం. ఇప్పటికే 1100 పూర్తి చేశాం. వాటిలో 300 పంపుసెట్లకు సోలార్‌ విద్యుత్తు వ్యవస్థను అనుసంధానం పూర్తికావడంతో అవి రైతులకు అందుబాటులోకి వచ్చాయి. వాటిని మిగతా రైతులు చూసి దరఖాస్తు చేయడానికి ముందుకొస్తున్నారు. అయితే బోరురిగ్‌లు వీలైనన్ని అందుబాటులో లేకపోవడం వల్ల తవ్వకం ఆలస్యమవుతోంది. తెలంగాణ ప్రాంతం నుంచి అదనపు రిగ్‌లను రప్పించే ఏర్పాట్లు చేస్తున్నాం.  సాక్షి: జాతీయ గ్రామీణ ఉపాధి హామీ చట్టం (ఎన్‌ఆర్‌ఈజీఏ) అమలు జిల్లాలో ఎలా ఉంది? కలెక్టరు: జిల్లాలో 84 శాతం మంది గ్రామాల్లోనే ఉన్నారు. వారి కుటుంబాలకు ఉన్నచోటే పని కల్పించడం ద్వారా వలసలు నివారించవచ్చు. మెటీరియల్‌ కాంపొనెంట్‌ పెంచడం వల్ల ఇతర అభివృద్ధి కార్యక్రమాలకు నిధులు అందుబాటులో ఉంటున్నాయి. అన్ని కుటుంబాలకు వంద రోజుల పనిదినాలు కల్పించడానికి కృషి చేస్తున్నాం.  సాక్షి: కేంద్ర ప్రభుత్వం ప్రతిష్టాత్మకంగా చేపట్టిన కొవ్వాడ న్యూక్లియర్‌ పార్కు పనులు ఎంతవరకూ వచ్చాయి? కలెక్టరు: భూసేకరణ, నిర్వాసితులకు పరిహారం, పునరావాసం కల్పనకు సంబంధించిన జాతీయ అణుసంస్థ (ఎన్‌పీసీఐఎల్‌) ఇప్పటికే రూ.500 కోట్ల నిధులు కేటాయించింది. భూసేకరణ దాదాపు కొలిక్కి వచ్చింది. మే 15వ తేదీనాటికి పూర్తవుతుంది. సుమారు రూ.19 కోట్ల వ్యయంతో 1878 నిర్వాసిత కుటుంబాలకు మోడ్రన్‌ కాలనీ నిర్మాణ పనులు, మౌలిక వసతుల కల్పన చర్యలు వేగవంతమయ్యాయి. అలాగే ఉద్యోగులకు టౌన్‌షిప్‌ నిర్మాణం కోసం 390 ఎకరాల అటవీ భూమి గుర్తించాం.  సాక్షి: జిల్లాలో మహిళలు, పిల్లల్లో పౌష్టికాహార లోపం సమస్య ఎక్కువగా ఉంది. దీని పరిష్కారానికి మీ ప్రణాళిక? కలెక్టరు: జిల్లాలో ప్రస్తుతం 40 వేల మంది గర్భిణుల్లో 10,800 మందికి రక్తహీనత సమస్య ఉంది. దీన్ని అశ్రద్ధ చేస్తే ప్రసూతి సమయంలో తల్లీబిడ్డలిద్దరికీ ప్రమాదం. ఐసీడీఎస్‌ ద్వారా గర్భిణులకు, పిల్లలకు పౌష్టికాహారం పంపిణీ జరుగుతోంది. దీంతోపాటు చిరుధాన్యాలతో తయారైన బిస్కెట్లు, ఉండలు, వేరుశనగ ఉండలు వంటి బలవర్థకమైన ఆహారం అందించేందుకు ప్రయత్నాలు చేస్తున్నాం. దీనికి ఏటా రూ.2 కోట్ల వరకూ ఖర్చవుతుంది. ఆ ఆహారం తయారీ బాధ్యత స్వయంశక్తి సంఘాలకు అప్పగిస్తాం. వచ్చే నెల నుంచే ఇది ప్రారంభిస్తున్నాం. సాక్షి: జిల్లాలో మరో ప్రధాన సమస్య కిడ్నీ వ్యాధులు. రోగులకు ఉపశమన చర్యలేమిటి? కలెక్టరు: ఉద్దానంలో గత ఏడాది లక్ష మందికి నిర్వహించిన ప్రాథమిక వైద్య పరీక్షల్లో సీరమ్‌ క్రియాటిన్‌ 1.2 దాటినవారు 13 వేల మంది ఉన్నట్లు తేలింది. సామాజిక పరిస్థితుల వల్ల ఈ వైద్య పరీక్షలకు ముందుకురానివారు మరో 75 వేల మంది వరకూ ఉన్నారని అంచనా. వ్యాధి ప్రారంభంలో గుర్తించిన వెంటనే వారికి అవసరమైన మందులు ఉచితంగా అందించాలనే ఉద్దేశంతో రూ.6.7 కోట్లతో ప్రతిపాదనలు ప్రభుత్వానికి పంపించా. అనుమతి కోసం ఎదురుచూస్తున్నాం. అలాగే ప్రతి ఇంటికి మరుగుదొడ్డి నిర్మించుకోవాలని, ఆహారపు అలవాట్లు మార్చుకోవాలని ప్రజల్లో అవగాహన కల్పించే కార్యక్రమాలు చేపట్టాం.  సాక్షి: బాల్య వివాహాల వంటి సామాజిక సమస్యలు ఎక్కువగా ఉన్నాయి. వాటిపై దృష్టి పెడుతున్నారా? కలెక్టరు: బాల్య వివాహాల అరికట్టడంతో పాటు గర్భస్థ దశ నుంచి ఆడశిశువుల పరిరక్షణకు ప్రత్యే క చర్యలు తీసుకుంటున్నాం. వెలుగు సిబ్బంది ద్వారా గ్రామాల్లో అవగాహన కార్యక్రమాలు చేపడుతున్నాం. అలాగే జిల్లాలోని అన్ని పాఠశాలల్లో జూన్‌ 12 నాటికి రూ.14 కోట్లతో తాగునీరు, మరుగుదొడ్లలో నీటి (రన్నింగ్‌ వాటర్‌) సదుపాయం కల్పించే పనులు ప్రారంభించాం. విద్యార్థులకు దృష్టి పరీక్షలు చేయిస్తాం. జిల్లాలో దృష్టి సమస్య ఉన్న పిల్లలు 10 వేల మంది వరకూ ఉం టారని అంచనా. వారికి రూ.40 లక్షల వ్యయంతో కళ్లద్దాలు కూడా జూలై నెలాఖరు నాటికి అందజేయాలనేది నా ప్రయత్నం.  సాక్షి: సేవల రంగంలో జిల్లా అభివృద్ధికి తీసుకుంటున్న చర్యలేమిటి? కలెక్టరు: జిల్లాకు టెంపుల్‌ టూరిజమే ప్రధానం. అరసవల్లి, శ్రీకూర్మం, శ్రీముఖలింగం ఆలయాలను మాస్టర్‌ప్లాన్లతో అభివృద్ధి చేస్తున్నాం. శాలిహుండం బౌద్ధారామం, కళింగపట్నం బీజ్, ఏజెన్సీలోని జగతిపల్లి ప్రాంతాలను పర్యాటక కేంద్రాలుగా మార్చేందుకు చర్యలు తీసుకుంటున్నాం. జూన్‌ నెలాఖరు నాటికల్లా అన్ని గిరిజన గ్రామాలకు రోడ్డు సదుపాయం కల్పించాలనేది నా లక్ష్యం. 


 మంత్రాలయం(కర్నూలు): కర్నూలు జిల్లా మంత్రాలయం మండలం బూదురు గ్రామంలో వైఎస్సార్ సీపీ, కాంగ్రెస్ పార్టీ కార్యకర్తల మధ్య ఆదివారం ఘర్షణ తలెత్తింది. ఇరు వర్గాలు దాడులు చేసుకోవడంతో కాంగ్రెస్ నేత ధనంజయ రెడ్డికి తీవ్రగాయాలయ్యాయి. ఈ ఘటనలో వైఎస్సార్ సీపీకి చెందిన ఇద్దరు కార్యకర్తలు కూడా గాయపడ్డారు. ధనంజయరెడ్డిని కర్నూలులోనిఓ ఆస్పత్రికి తరలించి చికిత్స అందిస్తున్నారు. ఇరు వర్గాల మధ్య ఘర్షణ చోటు చేసుకున్న సమాచారం అందుకున్న పోలీసులు అక్కడికి చేరుకుని పరిస్థితిని చక్కదిద్దారు.