అనంతపురం అగ్రికల్చర్‌: అర్హులైన రైతులందరికీ డ్రిప్‌ యూనిట్లు అందించడానికి వీలుగా వచ్చే వారంలో క్షేత్రస్థాయిలో ప్రాథమిక పరిశీలన (పీఐఆర్‌) చేపట్టాలని ఏపీఎంఐపీ పీడీ ఎం.వెంకటేశ్వర్లు ఆదేశించారు. శనివారం ఆయన స్థానిక ప్రాంతీయ ఉద్యాన శిక్షణ కేంద్రంలో ఏపీడీలు ఆర్‌.విజయశంకరరెడ్డి, జి.చంద్రశేఖర్, ఎంఐడీసీ సత్యనారాయణమూర్తితో కలిసి ఎంఐ ఇంజనీర్లు, ఎంఐఏఓలు, కంపెనీ డీసీఓలతో సమీక్ష సమావేశం నిర్వహించారు. ఈనెల 10 నుంచి 15వ తేదీ వరకు జిల్లాలో  నిర్వహించిన డ్రిప్‌ రిజిష్ట్రేషన్‌ వారోత్సవాల్లో వచ్చిన 12 వేల దరఖాస్తులను మరోసారి క్షేత్రస్థాయికి వెళ్లి ప్రాథమికంగా అన్ని అంశాలు పరిశీలించి అర్హత జాబితా సిద్ధం చేయాలన్నారు. ఈనెల 23 నుంచి 29వ తేదీ వరకు జిల్లా అంతటా పీఐఆర్‌ వారోత్సవాలు చేపట్టాలని ఆదేశించారు.
 
 బోర్లలో నీళ్లు వస్తున్నట్లు రైతుల ఫొటోతో పీఐఆర్‌ జాబితా తయారు చేయాలన్నారు. మరోపక్క రిజిష్ట్రేషన్ల నమోదు కొనసాగించాలన్నారు. ప్రస్తుతం రాష్ట్ర వ్యాప్తంగా 85,134 హెక్టార్లకు డ్రిప్‌ కోసం ఆన్‌లైన్‌ రిజిష్ట్రేషన్లు చేసుకోకగా, అందులో అనంతపురం జిల్లాలో 31,340 హెక్టార్లకు రైతులు రిజిస్ర్టేషన్‌ చేసుకున్నారన్నారు. ఈ సంఖ్యను ఇంకా పెంచగలిగితే ఈ ఏడాది నిర్దేశించుకున్న లక్ష్యాన్ని సులభంగా సాధించడానికి వీలవుతుందన్నారు. ఈ ఏడాది 31,750 హెక్టార్లకు డ్రిప్‌ యూనిట్లు ఇవ్వాలని లక్ష్యంగా పెట్టుకోగా ఇప్పటివరకు 1,667 మంది రైతులకు 2,011 హెక్టార్లకు సరిపడా డ్రిప్‌ యూనిట్లు మంజూరు చేశామన్నారు. 2016–17కు సంబంధించి మంజూరు చేసి, ఇన్‌స్టాల్‌ చేసిన డ్రిప్‌ యూనిట్లకు చివరి పరిశీలన నివేదిక (ఎఫ్‌ఐఆర్‌) సమర్పించాలని ఆదేశించారు.


 అనంతపురం అగ్రికల్చర్ : బిందు పరికరాల ఏర్పాటు కార్యక్రమం మందకొడిగా సాగుతోంది. గతేడాది(2015-16)లో మంజూరు చేసిన డ్రిప్ యూనిట్లు రైతుల పొలాల్లో బిగించడం ఆలస్యమవుతోంది. మార్చి 31వ తేదీ వరకు మంజూరు చేసిన వాటిని ఏప్రిల్ నెలాఖరులోగా పొలాల్లో బిగిస్తామని ప్రకటించారు. కానీ.. ఇంకా 40 శాతం మంది రైతులు ఎదురుచూస్తున్నారు. గతేడాది 22,645 మంది రైతులకు సంబంధించి 23,184 హెక్టార్లకు సరిపడా డ్రిప్ యూనిట్లు మంజూరు చేశారు. మంజూరులో రాష్ట్రంలో ‘అనంత’ అగ్రస్థానంలో ఉండగా రెండో స్థానంలో చిత్తూరు జిల్లా 15,914 హెక్టార్లకు ఇచ్చారు.
 
 అయితే ఇన్‌స్టాలేషన్ కార్యక్రమంలో వెనుకబడ్డారు. ఏపీఎంఐపీ పీడీ, ఏపీడీలు వెంటపడుతున్నా.. మెటీరియల్ సరఫరా కాకపోవడం, వేసవితో రైతులు కూడా బిగించుకునేందుకు కొంత వెనుకాడుతుండటంతో ఈ ప్రక్రియ నత్తనడకన సాగుతోంది. వారం వారం సమీక్షలో ఇన్‌స్టాలేషన్‌కు అధికారులు గడువు మీద గడువు పొడిగిస్తున్నా పూర్తీ కాని పరిస్థితి నెలకొంది. మొదట ఏప్రిల్ 31 అన్నారు. తర్వాత మే 10 తేదీకి పెంచారు. ఇపుడు మే నెలాఖరుకు పొడిగించారు. శనివారం నాటికి 14,332 మంది రైతులకు 14,803 హెక్టార్లలో డ్రిప్ పరికరాలు బిగింపు పూర్తయింది. ఇంకా 8,313 మంది రైతులకు డ్రిప్ పరికరాలు ఇవ్వాల్సి ఉంది. జూన్ నుంచి కొత్త విధానం అమలు చేస్తామని ప్రకటించిన నేపథ్యంలో మే నెలాఖరుకు వంద శాతం పూర్తీ కావడం కష్టంగానే కనిపిస్తోంది.
 
 
 ఈనెలాఖరుకు వంద శాతం పూర్తీ చేయాలని కంపెనీలు, ఎంఐఏఓలకు స్పష్టమైన ఆదేశాలు జారీ చేశామని ఆ శాఖ అధికారులు చెబుతున్నారు. లేదంటే మంజూరైన డ్రిప్‌ను రద్దు చేయడానికి వెనుకాడబోమన్నారు. ఇకపోతే ప్రస్తుత 2016-17లో 42 వేల మంది రైతులకు 35 వేల హెక్టార్లకు డ్రిప్ ఇవ్వాలని లక్ష్యంగా ఇచ్చారు. అందులో ప్రస్తుతానికి 473 మంది రైతులకు 482 హెక్టార్లకు డ్రిప్ యూనిట్లు మంజూరు చేశారు. ఇంకా బిగించడం మొదలు కాలేదు. కాగా మీ-సేవా కేంద్రాల్లో ప్రస్తుతం 32,985 హెక్టార్లకు డ్రిప్ కావాలంటూ 25,225 మంది రైతులు తమ పేర్లు నమోదు చేసుకున్నారు.