న్యూఢిల్లీ: ఢిల్లీ విశ్వవిద్యాలయం విద్యార్థి సంఘం (డూసూ) ఎన్నికల్లో అఖిల భారత విద్యార్థి పరిషత్ (ఏబీవీపీ) విజయకేతనం ఎగురవేసింది. శనివారం వెలువడిన ఫలితాల్లో అధ్యక్ష, ఉపాధ్యక్ష, కార్యదర్శి, సంయుక్త కార్యదర్శి పదవులను కైవసం చేసుకుంది. గత సంవత్సరం జరిగిన ఎన్నికల కంటే ఈ ఎన్నికల్లో తనతో పోటీపడిన భారత జాతీయ విద్యార్థి సంఘం (ఎన్‌ఎస్‌యూఐ) కంటే అత్యుత్తమ ఫలితాలను సాధించింది. ఏబీవీపీ తరఫున బరిలోకి దిగిన మోహిత్ అధ్యక్షుడిగా ఎన్నికయ్యారు. ఇక ఉపాధ్యక్షుడిగా ప్రవీణ్ మాలిక్, కార్యదర్శిగా కనికా షెకావత్, సంయుక్త కార్యదర్శిగా అశుతోశ్ మాధుర్‌లు ఎన్నికయ్యారు. ఢిల్లీ విశ్వవిద్యాలయం ప్రధాన ఎన్నికల అధికారి డీఎస్ రావత్ శనివారం ఇక్కడ మీడియాతో మాట్లాడుతూ ఏబీవీపీ అభ్యర్థి మోహిత్‌కు మొత్తం 20,178 ఓట్లు వచ్చాయని, ఇక ఎన్‌ఎస్‌యూఐ తరఫున బరిలోకి దిగిన గౌరవ్ తుషిర్‌కు 19,804 ఓట్లు దక్కాయని అన్నారు. 914 ఓట్ల తేడాతో గౌరవ్ పరాజయం పాలయ్యాడన్నారు.
  
  మాట నిలబెట్టుకున్నాం: రోహిత్
  విద్యార్థులకు ఇచ్చిన వాగ్దాలన్నింటినీ తాము నెరవేర్చామని ఏబీవీపీ జాతీయ కార్యదర్శి రోహిత్ చహల్ పేర్కొన్నారు. ప్రధానమంత్రిగా నరేంద్ర మోడీ బాధ్యతలను చేపట్టిన తర్వాత అందరిలోనూ ఆశలు, ఆకాంక్షలు బాగా పెరిగిపోయాయన్నారు. నాలుగేళ్ల అండర్‌గ్రాడ్యుయేట్ కోర్సు (ఎఫ్‌వైయూపీ)ని రద్దు చేయించిన ఘనత తమదేనన్నారు. మోడీ సునామీ కారణంగా తాము విజయం సాధిం చగలిగామని అన్నారు.
  
  మోడీ ప్రభావమే: సతీష్ ఉపాధ్యాయ
  ఢిల్లీ విశ్వవిద్యాలయం విద్యార్థి సంఘానికి జరిగిన ఎన్నికల్లో ఏబీవీపీ విజయం ప్రధానమంత్రి నరేంద్రమోడీ మోడీ ప్రభావమేనని బీజేపీ ఢిల్లీ రాష్ట్ర శాఖ అధ్యక్షుడు సతీష్ ఉపాధ్యాయ పేర్కొన్నారు. ఏబీవీపీకి అండగా నిలిచిన ప్రతి ఒక్కరికీ ధన్యవాదాలు తెలియజేస్తున్నానన్నారు. శనివారం ఆయన ఇక్కడ మీడియాతో మాట్లాడుతూ విద్యార్థులంతా అనూహ్య రీతిలో ఏబీవీపీకి మద్దతు పలికారని పేర్కొన్నారు.
  
  ట్విటర్‌లో షా అభినందనలు
  ఢిల్లీ విశ్వవిద్యాలయం విద్యార్థి సంఘం (డూసూ) ఎన్నికల్లో ఏబీవీపీ విజయాన్ని సాధించినందుకు బీజేపీ జాతీయ అధ్యక్షుడు అమిత్‌షా అభినందనలు తెలిపారు. నాలుగు పదవులను దక్కించుకోవడం గర్వకారణమన్నారు. ఈ గొప్పదనం విద్యార్థులు, కార్యకర్తలదేనన్నారు. నాలుగు ప్యానళ్లలోనూ విజయం సాధించడం గొప్ప విషయమన్నారు. జాతీయ రాజధానితోపాటు దేశంలోని యువత అంతా బీజేపీ విధానాలను సమర్థిస్తున్నారనడానికి ఇదొక చిహ్నమన్నారు. యువతే ఈ దేశానికి భవితగా అభివర్ణించారు. వారితోటే శ్రేష్ట భారత్, ఏక్ భారత్ సాకారమవుతాయంటూ ఆశాభావం వ్యక్తం చేశారు.
  


  న్యూఢిల్లీ: యూనివర్సిటీ రేడియోను ప్రచారం నిమిత్తం విద్యార్థి సంఘాలు వాడుకోవచ్చని ఢిల్లీ యూనివర్సిటీ తెలిపింది. ఢిల్లీ యూనివర్సిటీ విద్యార్థి సంఘాల ఎన్నికల నేపథ్యంలో పోటీలో ఉన్న అభ్యర్థులు వర్సిటీతోపాటు అనుబంధ కళాశాలల్లో చదువుకుంటున్న విద్యార్థులను సైతం కలుసుకోవాల్సి ఉంది. అయితే వీరు ఆయా కళాశాలలకు వెళ్లి విద్యార్థులందరినీ ముఖాముఖి కలిసేందుకు ఉన్న అవకాశాలు తక్కువనే చెప్పవచ్చు. ఈ నేపథ్యంలో పోటీలో ఉన్న అభ్యర్థులు రేడియో ద్వారా విద్యార్థులకు చేరువయ్యేందుకు అనుమతిస్తున్నట్లు డూసూ ప్రధాన ఎన్నికల కమిషనర్ డీఎస్ రావత్ తెలిపారు.
  
  ఈ నెల 8వ తేదీ నుంచి 10వ తేదీ వరకు కమ్యూనిటీ రేడియో 90.4 ఎంహెచ్‌జెడ్‌ను అభ్యర్థులు తమ ప్రచారానికి వాడుకోవచ్చని ఆయన తెలిపారు. ఒక్కో అభ్యర్థికి గరిష్టంగా 5 నిమిషాలు సమయం ఇస్తామని చెప్పారు. ముఖ్య ఎన్నికల అధికారి, ముఖ్య రిటర్నింగ్ అధికారి, రిటర్నింగ్ అధికారి సభ్యులుగా ఉన్న కమిటీకి సదరు అభ్యర్థుల ప్రసంగాలను ఎడిట్ చేసే హక్కు ఉంటుందన్నారు. కాగా రేడియో ద్వారా తమ ప్రసంగాన్ని వర్సిటీ విద్యార్థులందరికీ వినిపించడం అభ్యర్థులకు చాలా ఉపయోగపడుతుందని ఆయన అభిప్రాయపడ్డారు. కాగా, కమ్యూనిటీ రేడియో ద్వారా తమ ప్రసంగం వినిపించడానికి అభ్యర్థులకు కేటాయించిన 5 నిమిషాల సమయం చాలా తక్కువని ఎన్‌ఎస్‌యూఐ అధికార ప్రతినిధి అమ్రిష్ రంజన్ పాండే అభిప్రాయపడ్డారు.
  
  ‘అభ్యర్థులు వర్సిటీ అనుబంధ కళాశాలన్నింటికీ వెళ్లి విద్యార్థులను కలిసి ప్రచారం చేయడం కొంత కష్టంతో కూడుకున్న పనే.. అలాగే ప్రైవేట్ ఎఫ్‌ఎం చానళ్ల ద్వారా ప్రచారానికి నిబంధనలు ఒప్పుకోవడం లేదు.. ఇటువంటి సమయంలో కమ్యూనిటీ ఎఫ్‌ఎం ద్వారా అభ్యర్థులకు ప్రచారానికి అవకాశం కల్పించడం మంచిదే..’ అని ఏబీవీపీ జాతీయ కార్యదర్శి రోహిత్ చహల్ అన్నారు. ఇదిలా ఉండగా, అభ్యర్థులనుంచి వచ్చే అభ్యర్థనలబట్టి వారికి కేటాయించే సమయంలో కొంత మార్పులుచేర్పులు చేసే అవకాశముందని సీఈవో స్పష్టం చేశారు. కాగా, కమ్యూనిటీ రేడియో 2007లో ప్రారంభమైంది. విద్యార్థి సంఘాల ఎన్నికల ఈ నెల 12వ తేదీన జరగనున్నాయి.
  
  డూసూ నామినేషన్లు పూర్తి
  ఢిల్లీ యూనివర్సిటీ స్టూడెంట్స్ యూనియన్(డూసూ) ఎన్నికలకు సంబంధించి నామినేషన్ల ప్రక్రియ బుధవారంతో పూర్తయినట్లు ప్రధాన ఎన్నికల అధికారి డి.ఎస్.రావత్ తెలిపారు. నాలుగు పదవులకు గాను మొత్తం 144 నామినేషన్లు దాఖలయ్యాయని ఆయన చెప్పారు. వీటిలో అధ్యక్ష పదవికి 37, ఉపాధ్యక్ష పదవికి 32 దరఖాస్తులు చెల్లుబాటయ్యాయని రావత్ తెలిపారు. అలాగే కార్యదర్శికి 41, సంయుక్త కార్యదర్శి పదవికి 34 దరఖాస్తులు చెల్లుబాటయ్యాయని చెప్పారు. ఈ నెల 5వ తేదీ మధ్యాహ్నం 12 గంటల్లోగా అభ్యర్థులు తమ నామినేషన్లను ఉపసంహరించుకోవచ్చని రావత్ తెలిపారు.  
  


 సాక్షి, న్యూఢిల్లీ:నరేంద్ర మోడీని ప్రధాన మంత్రి అభ్యర్థిగాప్రకటించడంతోపాటు ఢిల్లీ విశ్వవిద్యాలయం విద్యార్థి సంఘం(డూసూ) ఎన్నికల్లో బీజేపీ అనుబంధ విద్యార్థి సంస్థ ఏబీవీపీ విజయం సాధించడంతో ఢిల్లీ బీజేపీ నేతల్లో కొత్త ఉత్సాహం కనిపిస్తోంది. మోడీని ప్రధానమంత్రి అభ్యర్థిగా ప్రకటిస్తూ పార్టీ అధ్యక్షుడు శుక్రవారం చేసిన ప్రకటనతో రానున్న అసెంబ్లీ ఎన్నికల్లో విజయావకాశాలు మరింత మెరుగుపడతాయనే ఆశాభావాన్ని స్థానిక నేతలు వ్యక్తం చేస్తున్నారు. మోడీని ప్రధాని అభ్యర్థిగా ప్రకటించడం వల్ల ముస్లిం ఓటర్లు  పార్టీకి మరింత దూరమయ్యే ప్రమాదముందనే వాదనను అంగీకరిస్తున్నప్పటికీ మొత్తం మీద ఈ ప్రకటన ప్రభావం సానుకూలంగానే ఉంటుందంటున్నారు. డూసూ ఎన్నికల్లో ఏబీవీపీ విజయం, మోడీపై పార్టీ ప్రకటన తమలో కొత్త ఉత్సాహాన్ని నింపిందని, ఇదే ఉత్సాహంతో సెప్టెంబర్ 29న నరేంద్ర మోడీతో నిర్వహించే ర్యాలీని మరింత గొప్పగా నిర్వహిస్తామని చెబుతున్నారు. 
  
  ర్యాలీ విధానసభ ఎన్నికల కోసం పార్టీ చేస్తోన్న సన్నాహాలకు మరింత ఊపు తీసుకొస్తుందనే అభిప్రాయాన్ని వ్యక్తం చేస్తున్నారు. ఢిల్లీ అసెంబ్లీ ఎన్నికలకు ‘లిట్మస్ టెస్ట్’గా పరిగణించే ఢిల్లీ విద్యార్థి సంఘం ఎన్నికల్లో ఏబీవీపీ ఘనవిజయం సాధించడం ద్వారా నరేంద్ర మోడీ ప్రభావం రానున్న అసెంబ్లీ ఎన్నికల్లో ఎలా ఉండనుందో ముందుగానే చెప్పిందంటున్నారు. డూసూ ఎన్నికల ప్రచారం కోసం ఏబీవీపీ నరేంద్ర మోడీ పోస్టర్లను ఉపయోగించిన వైనాన్ని వారు ప్రస్తావిస్తున్నారు. డూసూ ఎన్నికలలో ఏబీవీపీ ఓటమిని మోడీ ఓటమిగా అభివర్ణించిన ఎన్‌ఎస్‌యుఐ తాజా పరిణామంతో మట్టికరిచిందని, ఏబీవీపీ గెలిపించి విద్యార్థులు మోడీని గెలిపించారని అభివర్ణిస్తున్నారు. నరేంద్ర మోడీ యువతకు నేత అని డూసూ ప్రెసిడెంట్‌గా గెలిచిన అమన్ అవానా, ఉపాధ్యక్షుడుగా గెలిచిన ఉత్కర్ష్ చౌదరి, జాయింట్ సెక్రటరీగా గెలచిన రాజు రావత్  అభిప్రాయపడ్డారు.
  
  డూసూ ఎన్నికల్లో ఏబీవీపీ గెలిచినట్లుగానే ఢిల్లీ అసెంబ్లీ ఎన్నికలతోపాటు త్వరలో జరగనున్న లోక్‌సభ ఎన్నికల్లో కూడా బీజేపీ విజయకేతనం ఎగురవేస్తుందని ధీమాగా చెబుతున్నారు. కాగా 2014 సాధారణ ఎన్నికల కోసం ప్రధాన మంత్రి అభ్యర్థిగా మోడీని ప్రకటించినందున రానున్న విధానసభ ఎన్నికల కోసం ఢిల్లీ ముఖ్యమంత్రి అభ్యర్థిని కూడా ప్రకటించాల్సిన ఆవరముందని స్థానిక బీజేపీ నేతలు పార్టీ పెద్దలపై ఒత్తిడి పెంచుతున్నారు. మోడీని ప్రధాన మంత్రి అభ్యర్థిగా ప్రకటించిన తరువాత ఢిల్లీకి ముఖ్యమంత్రి అభ్యర్థిని ప్రకటించే విషయంపై ఆర్‌ఎస్‌ఎస్ మేధోమథన  సమావేశం జరిపిందని పార్టీ వర్గాలు చెబుతున్నాయి. 
  
  త్వరలో అసెంబ్లీ ఎన్నికలు జరుగునున్న నాలుగు రాష్ట్రాల్లో ఒక్క ఢిల్లీ మినహా మిగతా అన్ని రాష్ట్రాలకు ముఖ్యమంత్రి అభ్యర్థులను పార్టీ ప్రకటించిందని బీజేపీ సీనియర్ నేత ఒకరు గుర్తుచేశారు. ఢిల్లీ ఎన్నికల కోసం ‘టీమ్ బీజేపీ’గా ప్రజల ముందుకు వెళ్లాలని పార్టీ గతంలో నిర్ణయించినప్పటికీ నరేంద్ర మోడీని ప్రధానమంత్రి అభ్యర్థిగా ప్రకటించడంతో  ఢిల్లీలో పరిస్థితి మారిపోయిందన్నారు. అవినీతి మచ్చలేని నరేంద్ర మోడీని ప్రధాన మంత్రి అభ్యర్థిగా ప్రకటించడానికి వెనుక  ఆర్‌ఎస్‌ఎస్  తెచ్చిన ఒత్తిడిని పార్టీ వర్గాలు ప్రస్తావిస్తున్నాయి. ఢిల్లీ బీజేపీలో అవినీతి మచ్చ అంటని నేతగా గుర్తింపు పొందిన డాక్టర్ హర్షవర్ధన్‌ను ఢిల్లీ ముఖ్యమంత్రి అభ్యర్థిగా ప్రకటించాలని ఆర్‌ఎస్‌ఎస్ ఒత్తిడి తెస్తోందని కూడా చెబుతున్నాయి.