విద్యకు సాటి వచ్చే ధనం లేదనేది సుభాషితం. కాని నేటి వ్యాపార యుగంలో ధనం అన్ని రంగాలనూ శాసిస్తున్నట్టే... విద్య మీద కూడా ఆధిపత్యాన్ని చలాయిస్తూ దాన్ని అంగడి సరుకుగా దిగజారుస్తోంది. నేడు సాధారణ డిగ్రీలు మొదలుకొని విద్యారంగంలో అత్యున్నత అర్హతలకు సంబంధించిన పట్టాల వరకు కొనగలిగిన స్తోమత ఉన్నవారికి లభించడం ఈ దుఃస్థితికి నిదర్శనం.ముఖ్యంగా విదేశాలలోనూ, ఉత్తర భారతదేశంలోనూ పుట్టగొడుగుల్లా వెలుస్తున్న నకిలీ విశ్వవిద్యాలయాలు విక్రయిస్తున్న ఈ డిగ్రీలను ప్రచార వ్యామోహం గల సంపన్నులు తమ పేర్లకు అలంకారాలుగా తగిలించుకొని, అవి తమ ప్రతిభాచిహ్నాలుగా చాటుకుంటున్నారు. ఊరేగింపులు, అభినందన సభలు, విందులు, వినోదాలు ఏర్పాటు చేసుకొని అవి తమ కీర్తి కిరీటాలుగా జనాన్ని భ్రమపెడుతున్నారు. ప్రముఖ నిర్మాత కాట్రగడ్డ మురారి తనకో విదేశీ సంస్థ డాక్టరేట్‌ను ఇవ్వజూపితే ‘డాక్టరేట్‌ ఇంత తేలికా?’ అని నిజాయతీగా వ్యాఖ్యానించడమే కాదు, తెచ్చుకున్న ఆ డాక్టరేట్‌ బిరుదును ఎప్పుడూ తన పేరు ముందు, కనీసం ‘నవ్విపోదురు గాక’ పుస్తక రచయితగా కూడా ఉపయోగించలేదు. అలా ప్రలోభాలకు లొంగకుండా అర్హత లేని బిరుదులను తోకలుగా ఉపయోగించని వారు అరుదు. నకిలీ విద్యార్హతలతో ఆత్మవంచనకు, పరవంచనకు పాల్పడుతున్న పెద్దమనుషులే ఎక్కువ.డాక్టరేట్ల సంతర్పణకు కాణాచులుగా మన విశ్వవిద్యాలయాలను చెప్పుకోవాలి. పీహెచ్‌డీ పట్టాల కోసం పరిశోధనలు ఉద్యోగాలకో, పదోన్నతులకో అవసరం కావడంతో నాటి ప్రమాణాలు దిగజారుతున్నాయి. ఈ జాతరలో పరిశోధక విద్యార్థులు అడ్డదారులను వెతు క్కుంటుంటే పర్యవేక్షకులు వారి కోర్కెలకు అనుగుణంగా తోడ్పడి లబ్ధి పొందుతున్నారు. ‘కాదేదీ కవిత కనర్హం’ అన్నట్లు పరిశోధన ఆవశ్యకత లేని, కేవలం ‘మెథడాలజీ’ చట్రంలో ఇమిడ్చి పీహెచ్‌డీ పట్టాను పొందే సులభమైన, ఎందుకూ పనికిరాని అంశాన్ని పరిశోధక విద్యార్థికి సూచించడం... విద్యార్థి ఆర్థికంగా ఆశపెడితే సిద్థాంత గ్రంథాన్ని తామే అన్నీ రాసి ఇవ్వడం కొందరు పర్యవేక్షక గురువులు చేస్తున్న నిర్వాకాలు. విశ్వవిద్యాలయాల వెలుపల సిద్ధాంత గ్రంథ రచనకు ధరను మాట్లాడుకొని రాసిపెట్టడం వృత్తిగా కలిగిన నిరుద్యోగ మేధావులు కూడా ఉండడంతో కొందరు పరిశోధకులు వారు అడిగిన డబ్బిచ్చి శ్రమ పడకుండా ‘డాక్టర్లు’ అనిపించుకుంటున్నారు.తెలుగే కాదు, ఆంగ్లం, హిందీ వంటి ఇతర భాష ల్లోనూ, సాంఘిక విజ్ఞాన శాస్త్ర విభాగాల్లోనూ పరిశోధనల స్థాయి భిన్నంగా లేదు. కొందరు ప్రబుద్ధులు ఎలాగోలా ‘పీహెచ్‌డీ’ అనిపించుకుంటే చాలని పూర్వుల కృషిని కొల్ల గొట్టి రాసిన సిద్ధాంత గ్రంథాలకు కూడా అయ్యవార్ల ఆశీస్సులతో ఆమోద ముద్రను వేయించుకొని ‘మమ’అంటున్న సందర్భాలు కూడా లేక పోలేదు. అయితే పరిశోధనలన్నీ కాకి బంగారం బాపతేననీ, యోగ్యతకూ నిజాయతీకి స్థానం లేదనీ అనడం కువిమర్శే అవుతుంది. విశ్వవిద్యాలయాలు వివిధ రంగాలలో– ప్రతిభామూర్తులను గుర్తించి వారికి గౌరవ డాక్టరేట్లను, కళాప్రపూర్ణ వంటి బిరుదులనూ ప్రకటించడం ఆనవాయి తీగా వస్తోంది. అయితే వాటిని కానీ, కొన్ని ప్రామాణిక సంస్థలు ఇస్తున్న బిరుదులను కానీ విశ్వనాథ, శ్రీశ్రీ, జాషువా, పుట్టపర్తి, సినారె, ఆరుద్ర వంటి దిగ్దంతులెవరూ ఎప్పుడూ, ఎక్కడా భుజకీర్తులుగా వినియోగించుకోలేదు. ఏనుగులపై ఊరేగించినా, గురుతుల్యుల చేత గండ పెండేరాలతో సన్మానింపబడినా వారు వాటిని స్వోత్కర్షగా వాడుకోలేదు. కానీ నేడు కీర్తి కాంక్షతో అభినవ కృష్ణదేవరాయలం అనుకునే కవి పోషకులు, ‘అంతా కవులము కామా’ అనుకునే చిల్లర కవులు ఎక్కువయ్యారు. చ‌ద‌వండి: ఇది మాయ కాక మరేమిటి?వారు ఆశ్రిత కవులకు ‘కవిరత్న’, ’కవిశేఖర’, ‘కవితిలక’ వంటి బిరుదులను ప్రదానం చేసి శాలువాలను కప్పడం... వీరు మరునాడు స్థానిక పత్రికలలో ఆ సత్కారాల గురించి ఘనంగా రాయించుకోవడం ప్రహస నమైపోయింది. ఇటీవల కొన్ని సంస్థలు ఏకంగా కొందరు స్థానిక కవులకు ‘గౌరవ డాక్టరేట్‌’లను కూడా ప్రదానం చేస్తున్నాయి. కొంతనయం– పద్మ పురస్కారాలను కూడా ప్రకటించడం లేదు! ఏ హక్కు, అధికారం లేకుండా ఎవరు పడితే వారు ఇలా బిరుదులనివ్వడం, ప్రతిభాశూన్యులైన కవులు కూడా వాటిని అలంకారాలుగా ప్రదర్శించడం సమాజానికి హానికరం. దీనికి నియంత్రణ అవసరం!చ‌ద‌వండి: ఎవరిని ఎలా పిలవాలి?ఇటీవల ప్రముఖ క్రికెట్‌ క్రీడాకారుడు రాహుల్‌ ద్రావిడ్‌కు బెంగుళూరు విశ్వవిద్యాలయం వారు ‘గౌరవ డాక్టరేట్‌’ను ప్రకటిస్తే ఆయన సున్నితంగా తిరస్కరించడమే గాక ‘అవసరమనుకుంటే ‘నేను థీసిస్‌ను సమర్పించి డాక్టరేట్‌ తీసుకుంటాను కాని ఉచితంగా కాదు’ అని వ్యాఖ్యానించడం అభినందనీయం. ఆదర్శవంతులు ముఖ్యంగా రాజకీయ, చిత్ర రంగాలకు చెందిన ప్రముఖులు ఎటువంటి ప్రలోభాలకూ లోను కాకుండా గౌరవ డాక్టరేట్ల ప్రత్యేకతను కాపాడుతారని ఆశిద్దాం.- పైడిపాలవిశ్రాంత తెలుగు ఉపన్యాసకులు

చండీగఢ్‌: భారత మహిళల టి20 క్రికెట్‌ జట్టు కెప్టెన్‌ హర్మన్‌ప్రీత్‌ కౌర్‌ను డిప్యూటీ సూపరింటెండెంట్‌ ఆఫ్‌ పోలీస్‌ (డీఎస్పీ) ఉద్యోగం నుంచి తప్పించారు. ఆమె డిగ్రీ పట్టభద్రురాలు కాదని, అమె సమర్పించిన సర్టిఫికెట్‌ నకిలీదని తేలడంతో పంజాబ్‌ పోలీస్‌ శాఖ డీఎస్పీ ఉద్యోగం నుంచి తొలగించింది. అమె 12వ తరగతి వరకే చదవడంతో హర్మన్‌ప్రీత్‌ విద్యార్హతకు తగిన కానిస్టేబుల్‌ ఉద్యోగాన్ని ఇచ్చే అవకాశముంది. కాగా ఆమెపై ఎలాంటి చట్టపరమైన చర్యలు తీసుకోబోమని పోలీస్‌ శాఖ ప్రకటించడం పెద్ద ఊరటనిచ్చే విషయం. లేదంటే ఈ అర్జున అవార్డీకి ఇబ్బందికర పరిస్థితులు ఎదురయ్యేవి. గతంలో హర్మన్‌కు రైల్వే శాఖ ఉద్యోగమిచ్చింది. సొంత రాష్ట్రం పంజాబ్‌ నుంచి డీఎస్పీ ఉద్యోగ అవకాశం రావడంతో రైల్వే జాబ్‌కు రాజీనామా చేసి ఈ ఏడాది మార్చిలో డీఎస్పీగా చేరింది. ఆ సమయంలో మీరట్‌లోని చౌదరి చరణ్‌సింగ్‌ యూనివర్సిటీలో గ్రాడ్యుయేషన్‌ పూర్తిచేసినట్లు సర్టిఫికెట్‌ దాఖలు చేసింది. పోలీస్‌ శాఖ విచారణలో ఆమె సర్టిఫికెట్‌ నకిలీదని, ఆ వర్సిటీలో ఆమె చదవలేదని తేలింది. సరిగ్గా ఇలాంటి ఉదంతమే ఫిబ్రవరిలోనూ జరిగింది. కామన్వెల్త్‌ గేమ్స్‌ స్వర్ణపతక విజేత, అథ్లెట్‌ మన్‌దీప్‌ కౌర్‌ నకిలీ పట్టాతో డీఎస్పీగా చేరడంతో తర్వాత తొలగించారు.    

ఫిమేల్‌ జెనిటల్‌ మ్యుటిలేషన్‌’ కు వ్యతిరేకంగా దాఖలైన ఒక పిటిషన్‌ను విచారిస్తూ,  బాలికల జననాంగాల జోలికి మతాచారాలు ఎందుకు వెళ్లాలని సుప్రీంకోర్టు వ్యాఖ్యానించింది. జెనిటల్‌ మ్యుటిలేషన్‌ వల్ల బాలికల ఆరోగ్యం దెబ్బతినే ప్రమాదం ఉందని సునీతా తివారీ అనే న్యాయవాది వినిపించిన వాదనలను పరిగణనలోకి తీసుకున్న చీఫ్‌ జస్టిస్‌ దీపక్‌ మిశ్రా, జస్టిస్‌ ఎ.ఎం.ఖాన్‌విల్కర్, జస్టిస్‌ చంద్రచూడ్‌లతో కూడిన ధర్మాసనం.. ‘ ఇటువంటి మతాచారాలను ‘ప్రొటెక్షన్‌ ఆఫ్‌ చిల్డ్రన్‌ ఫ్రం సెక్సువల్‌ ఆఫెన్సెస్‌’ (పోక్సో) యాక్ట్‌ పరిధిలోకి తీసుకురావలసిన అవసరం ఉంది’ అని అభిప్రాయపడింది ::: నర్మదా బచావో ఆందోళన్‌ ఉద్యమ కార్యకర్త మేధాపాట్కర్, ఖాదీ అండ్‌ విలేజ్‌ ఇండస్ట్రీస్‌ కమిషన్‌ ఛైర్మన్‌ వి.కె. సక్సేనా మధ్య 18 ఏళ్లుగా సాగుతున్న న్యాయపోరాటంలో ఢిల్లీలోని ఒక కోర్టు పాట్కర్‌ను దోషిగా నిర్ధారించి, ఆమెపై సక్సేనా వేసిన పరువు నష్టం దావాను సమర్థించింది. ఈ కేసులో మొదట మేధాపాట్కర్‌ తన పైన, తమ ఆందోళన పైన సక్సేనా వార్తాపత్రికలకు అనుచితమైన ప్రకటనలు ఇచ్చారని కోర్టును ఆశ్రయించగా, 2006లో ఒక టీవీ న్యూస్‌ చానల్‌తో తన పరువు మంటగలిసేలా పాట్కర్‌ మాట్లాడారని ఆరోపిస్తూ ఆమెపై సక్సేనా పరువునష్టం దావా వేశారు ::: సమాజంలో మహిళలపై జరుగుతున్న హింసను మరణశిక్షలు నిర్మూలించలేవని ఇండియాలోని ‘ఆమ్నెస్టీ ఇంటర్నేషనల్‌’ అభిప్రాయపడింది. నిర్భయ సామూహిక అత్యాచారం  కేసులోని దోషులు.. కోర్టులు తమకు విధించిన మరణశిక్షను పునఃపరిశీలించాలని వేసుకున్న రివ్యూ పిటిషన్‌ను విచారించిన సుప్రీంకోర్టు వారి మరణశిక్షను నిర్ధారించడంపై ఆమ్నెస్టీ ఈ విధమైన అభిప్రాయాన్ని వ్యక్తం చేసింది. ఇండియన్‌ ఉమెన్స్‌ ట్వంటీ20 క్రికెట్‌ కెప్టెన్, అర్జున అవార్డు విజేత హర్‌మన్‌ప్రీత్‌ కౌర్‌కు ఈ ఏడాది మార్చి 1న ఇచ్చిన డిప్యూటీ సూపరింటెండెంట్‌ ఆఫ్‌ పోలీస్‌ ర్యాంకును పంజాబ్‌ ప్రభుత్వం ఉపసంహరించుకుంది. మీరట్‌లోని ‘చౌదరి చరణ్‌ సింగ్‌ యూనివర్సిటీ’ నుంచి 2011లో పట్టభద్రురాలైనట్లుగా హర్‌మన్‌ప్రీత్‌ పొందుపరిచిన డిగ్రీ సర్టిఫికెట్‌ నకిలీదని తేలడంతో.. ఈ ఉపసంహరణ నిర్ణయం తీసుకున్న ప్రభుత్వం, ఇష్టమైతే ఆమె తన ఇంటర్మీడియట్‌ విద్యార్హతపై కానిస్టేబుల్‌గా కొనసాగవచ్చునని తెలిపింది :::  ఐక్యరాజ్యసమితి ఆధ్వర్యంలో ఇటీవల జెనీవాలో జరిగిన ‘వరల్డ్‌ హెల్త్‌ అసెంబ్లీ’ సమావేశంలో సభ్యదేశాలు ‘బెస్ట్‌ఫీడింగ్‌’కు అనుకూలంగా చేసిన తీర్మానం అమలు కాకుండా ఉండేందుకు అమెరికా అడ్డుపుల్లులు వేసే సూచనలు కనిపిస్తున్నాయి. బిడ్డకు తల్లిపాలే శ్రేష్టమైనవని తేల్చి చెప్పడం ద్వారా పాల పొడి పరిశ్రమలు బిలియన్‌ డాలర్ల వ్యాపారాన్ని నష్టపోవలసి వస్తుందన్న ఆందోళనలు వ్యక్తం కావడంతో అమెరికా.. ఆ వ్యాపార కుబేరుల తరఫున తీర్మానానికి వంకలు పెట్టాలని చూస్తోంది ::: ఆస్కార్‌ అకాడెమీలో గౌరవ సభ్యురాలిగా చేరవలసిందిగా తనకు వచ్చిన ఆహ్వానాన్ని ఫ్రాన్స్‌ నటి ఎమ్మాన్యుయేల్‌ సీగ్నర్‌ రెండో మాట లేకుండా తిరస్కరించారు. అత్యాచార ఆరోపణలపై రెండు నెలల క్రితం తన భర్త రోమన్‌ పొలాన్‌స్కీని అకాడెమీ సభ్యత్వం నుంచి తొలగించడంపై ఆమె తీవ్ర ఆగ్రహావేశాలతో ఉన్నారు. ఇన్‌స్టాగ్రామ్‌లో తన డ్యాన్స్‌ వీడియోలను పోస్ట్‌ చేసిన యువతిని ఇరాన్‌ ప్రభుత్వం నిర్బధంలోకి తీసుకుంది. ఇరానియన్, పాశ్యాత్య నృత్య సంప్రదాయాలలో డ్యాన్స్‌ చేస్తూ దాదాపు 300 వీడియోలను సోషల్‌ మీడియాలో అప్‌లోడ్‌ చేసిన మేదే హొజాబ్రీ అని ఆ యువతి.. ‘ఫాలోవర్స్‌ సంఖ్యను పెంచుకోడానికి మాత్రమే నేనిలా చేశాను తప్ప, మరో ఉద్దేశం లేదు’ అని ఇచ్చిన వివరణను ఇరాన్‌ ప్రభుత్వం పరిగణనలోకి తీసుకున్నదీ లేనిదీ వెంటనే తెలియరాలేదు ::: ప్రపంచకప్‌ ఫుట్‌బాల్‌ పోటీల వేలంవెర్రితో విసుగు చెందిన పేరు వెల్లడించని ఒక వధువు తన పెళ్లి జరుగుతున్న వేదిక దగ్గర ఫుట్‌బాల్‌ స్క్రీన్‌లు పెట్టడం లేదనీ, పెళ్లికి వచ్చినవాళ్లు తమ ఫోన్‌లలోనైనా మ్యాచ్‌లను చూడటం నిషిద్ధం అని ప్రకటించడం విశేషం అయింది. నిషిద్ధాన్ని మీరి, పెళ్లికి వచ్చినవాళ్లు కొందరు.. స్వీడన్, ఇంగ్లండ్‌ల మధ్య శనివారం జరుగుతున్న మ్యాచ్‌ను అక్కడి ఒక టీవీలో చానల్‌ మార్చుకుని చూస్తున్న విషయాన్ని గమనించిన వధువు వెంటనే పెళ్లి వేదిక మీద నుంచి దిగి వచ్చి టీవీ ఆఫ్‌ చేయించింది.  


 న్యూఢిల్లీ: మరోసారి కేంద్రమంత్రి స్మృతి ఇరానీ విద్యార్హతలకు సంబంధించిన కేసు తెరమీదకు వచ్చింది. కిందిస్థాయి కోర్టులో ఆమెకు ఉపశమనం లభించినా హైకోర్టులో మాత్రం మరోసారి ఈ కేసు విచారణ మొదలైంది. ఆమె విద్యార్హతలకు సంబంధించిన పత్రాలన్ని కోర్టుకు సమర్పించాలంటూ స్పష్టం చేసింది. వాటిని పరిశీలించిన తర్వాతే ఎవరికి సమన్లు ఇవ్వాలనే విషయం నిర్ణయిస్తామని తెలిపింది.
 
 ఎన్నికల కమిషన్‌కు ఇచ్చిన అఫిడవిట్‌లో తాను డిగ్రీ పూర్తి చేసినట్లు స్మృతి ఇరానీ పేర్కొన్నారని, వాస్తవానికి ఆమె డిగ్రీ పూర్తి చేయలేదని, కరస్పాండెన్స్‌ కోర్సు ద్వారా బ్యాచిలర్‌ ఆఫ్‌ కామర్స్‌లో ఉన్నారని, అది పూర్తి చేయలేదని, తప్పుడు వివరాలు ఎన్నికల కమిషన్‌కు ఇచ్చిన ఆమెపై చర్యలు తీసుకోవాలంటూ అహ్మద్‌ ఖాన్‌ అనే వ్యక్తి కిందిస్థాయి కోర్టులో ఫిటిషన్‌ వేయగా ఆ కోర్టు తోసిపుచ్చింది. దీంతో అతడు హైకోర్టుకు వెళ్లగా విచారణకు స్వీకరించిన కోర్టు స్మృతి ఇరానీ విద్యార్హత రికార్డులు ఇవ్వాలని ఆదేశించింది.
  
  


 ఇస్లామాబాద్: నకిలీ డిగ్రీ వివాదంతో పాకిస్థాన్ ప్రతిపక్ష నాయకుడు, మాజీ క్రికెటర్ ఇమ్రాన్ ఖాన్ చిక్కుల్లో పడ్డారు. ఇమ్రాన్ ఖాన్ భార్య రెహమ్ ఖాన్ డిగ్రీ సర్టిఫికెట్ నకిలీదని బ్రిటన్ దినప్రతిక వెల్లడించడంతో ఆయనపై విమర్శలు వెల్లువెత్తాయి. ఇంగ్లండ్ లోని నార్త్ లిండ్సే కాలేజీలో బ్రాడ్ కాస్ట్ జర్నలిజంలో డిగ్రీ చదినట్టు రెహమ్ ఖాన్ చెప్పుకున్నారు.
 
 అసలు ఆ కాలేజీలో బ్రాడ్ కాస్ట్ జర్నలిజం కోర్సు లేదని, రెహమ్ ఖాన్ పేరుతో ఎవరూ చదవలేదని 'ఎక్స్ ప్రెస్ ట్రిబ్యూన్' దినపత్రిక వెల్లడించింది. తన క్వాలిఫికేషన్ పై రెహమ్ ఖాన్ అబద్దం చెప్పారని 'డైలీ మెయిల్' పేర్కొంది. పాకిస్థాన్ చానళ్లు ఈ వార్తను పదేపదే ప్రచారం చేయడంతో రెహమ్ ఖాన్ మండిపడ్డారు. ఈ వార్తలు నిరాధారమని ఆమె కొట్టిపారేశారు.