సాక్షి, హైదరాబాద్‌: మున్సిపాలిటీలు, కార్పొరేషన్లలో విలీనమైన గ్రామాల్లో సాదా బైనామాల ద్వారా జరిగిన వ్యవసాయ భూముల క్రయవిక్రయాలను ఉచితంగా క్రమబద్ధీకరించాలని ప్రభుత్వం నిర్ణయించింది. సాదాబైనామాల క్రమబద్ధీకరణకు మీసేవా కేంద్రాల ద్వారా దరఖాస్తుల స్వీకరణ గడువును నవంబర్‌ 10 వరకు పొడిగించింది. సీఎం ఆదేశాలతో సీఎస్‌ సోమేశ్‌ కుమార్‌ శనివారం ఉత్తర్వులు జారీ చేశారు. శనివారం కొడకండ్లలో రైతు వేదిక ప్రారంభించిన తర్వాత ఉమ్మడి వరంగల్‌ జిల్లా నేతలతో సమావేశమైన కేసీఆర్‌ను ఈ అంశంపై ప్రజా ప్రతినిధులు కోరగా సీఎం సానుకూలంగా స్పందించారు. ఆ వెంటనే ఇందుకు అనుగుణంగా ఉత్తర్వులు జారీ అయ్యాయి.

సాక్షి, నల్లగొండ: ఐఐటీ ఖరగ్‌పూర్‌లో నిర్వహించనున్న క్షితిజ్‌ వార్షిక టెక్నో మేనేజ్‌మెంట్‌ ఫెస్ట్‌కు దరఖాస్తులు ఆహ్వానిస్తున్నట్లు ఆ యూనివర్సిటీలో విద్యనభ్యసిస్తున్న తెలంగాణ ప్రాంత విద్యార్థులు శుక్రవారం ఒక ప్రకటనలో తెలిపారు. 2020 జనవరి 17 నుంచి జరిగే ఈ ఫెస్ట్‌కు దేశంలోని అన్ని రాష్ట్రాల్లో ఉన్న ఇంజనీరింగ్‌ కళాశాలల్లో చదివే విద్యార్థులు ఉచితంగా రిజిస్ట్రేషన్‌ చేసుకొని పాల్గొనాల్సి ఉందన్నారు. సాంకేతిక రంగంలో ప్రముఖ దిగ్గజ కంపెనీలైన ఐబీఎం, మైక్రోసాఫ్ట్, గూగుల్‌ డెవలపర్స్‌ ఫర్‌గో, సెబీ లాంటి సంస్థలు వర్క్‌షాప్‌లో పాల్గొంటాయని తెలిపారు. దేశవ్యాప్తంగా 70వేల మంది విద్యార్థులు పాల్గొంటారని, ఉత్తమ ప్రతిభ చూపిన సాంకేతిక అంశాలను ప్రదర్శించిన వారికి రూ. 50లక్షల బహుమతి ఉంటుందని పేర్కొన్నారు. ఈ ఫెస్ట్‌ రిజిస్ట్రేషన్‌ కోసం www.ktj.inలో రిజిస్ట్రేషన్‌ చేసుకోవాలన్నారు.


 
 ఉచిత రిజిస్ట్రేషన్లకే స్పందన
 
 125 గజాలను మించిన స్థలాలకు అరకొర దరఖాస్తులు
 
 రిజిస్ట్రేషన్ ధర మార్కెట్‌లోకన్నా ఎక్కువగా ఉండటమే కారణం
 
 ధరలపై ప్రభుత్వం పునరాలోచించాలని సూచిస్తున్న రెవెన్యూ వర్గాలు
 
 సాక్షి , హైదరాబాద్: తెలంగాణ ప్రభుత్వం ప్రకటించిన భూముల క్రమబద్ధీకరణ ప్రక్రియపై రాష్ట్ర విభజన ఎఫెక్ట్ పడింది! ప్రభుత్వ భూముల్లో నివాసాలు ఏర్పరచుకున్న వారికి ఆయా స్థలాలను క్రమబద్ధీకరించేందుకు ప్రభుత్వం సిద్ధమైన సంగతి తెలిసిందే. దీనికి సంబంధించిన జీవో 58 కింద 125 గజాల్లోపు స్థలాల ఉచిత క్రమబద్ధీకరణకు దరఖాస్తులు వెల్లువెత్తుతుండగా, అంతకన్నా ఎక్కువ స్థలాల క్రమబద్ధీకరణకు మాత్రం స్పందన కరువైంది. ప్రత్యేకించి రాజధానిలో ఈ పరిస్థితి నెలకొంది.
 
 ఈ భూముల విషయంలో గతంలో ఉమ్మడి రాష్ర్ట ప్రభుత్వం భారీగా పెంచిన రిజిస్ట్రేషన్ ధరలనే పరిగణనలోకి తీసుకోవడం ఇందుకు కారణం. దీంతో దీనికి సంబంధించిన జీవో 59కు ప్రజల నుంచి ఆశించిన స్పందన రావడం లేదు. విలువైన భూములున్న షేక్‌పేట్ మండలంలో శనివారం నాటికి ఉచిత క్రమబద్ధీకరణ కోసం 453 దరఖాస్తులు రాగా, సొమ్ము చెల్లించే కేటగిరీలో మాత్రం మూడు దరఖాస్తులే రావడం పరిస్థితికి అద్దం పడుతోంది.
  
 క్రమబద్ధీకరణే భారమైందా!
 
 ప్రైవేటు భూముల కొనుగోలు కంటే ప్రభుత్వ భూములను క్రమబద్ధీకరించుకోవడమే అధిక భారంగా మారిందని ఆ భూముల్లో నివాసముంటున్న వారు భావిస్తున్నారు. దీంతో ఆశించిన స్పందన రావడం లేదని రెవెన్యూ వర్గాలే అంటున్నాయి. రాష్ట్రం విడిపోయాక మార్కెట్‌లో భూముల ధరలు తగ్గాయని, రిజిస్ట్రేషన్ ధరలు మాత్రం అలాగే ఉన్నాయని చెబుతున్నాయి. హైదరాబాద్, రంగారెడ్డి జిల్లాలతో పాటు రాష్ట్ర వ్యాప్తంగా ముఖ్య నగరాలు, పట్టణాల్లోనూ చాలాచోట్ల భూముల ప్రస్తుత మార్కెట్ ధర కన్నా రిజిస్ట్రేషన్ ధరలు ఎక్కువగా ఉన్నాయన్న వాదన వినిపిస్తోంది.
 
 క్రమబద్ధీకరణకు తగిన స్పందన లేకపోవడంతో రాష్ర్ట ప్రభుత్వ లక్ష్యం నెరవేరేలా కనిపించడం లేదు. కాగా, ఈ విషయంలో ప్రభుత్వం వ్యాపార దృక్పథంతో కాకుండా సరళీకరణ విధానాన్ని అవలంభించాలని రెవెన్యూ అధికారులు సూచిస్తున్నారు. ఎన్నో ఏళ్లుగా నివాసాలేర్పరచుకుని ఉంటున్న వారికి ఆయా(ఆక్రమిత) స్థలాలను క్రమబద్ధీకరించడం మంచిదే అయినప్పటికీ, రిజిస్ట్రేషన్ ధరలు ఎక్కువగా ఉండడంతో కబ్జాదారులు ముందుకు రావడం లేదని అభిప్రాయపడుతున్నారు.
 
 ఉమ్మడి రాష్ట్రంలో అప్పటి ప్రభుత్వం 2013 ఏప్రిల్ 1నుంచి రిజిస్ట్రేషన్  ధరలను పెంచింది. అయితే రాష్ర్ట విభజన తర్వాత చాలా ప్రాంతాల్లో భూముల ధరలు తగ్గినమాట వాస్తవమని అధికారులు అంగీకరిస్తున్నారు. ఈ నేపథ్యంలో 2013 ఏప్రిల్ 1 కంటే ముందున్న రిజిస్ట్రేషన్ ధరలను ప్రస్తుత క్రమబద్ధీకరణ ప్రక్రియకు వర్తింపజేయడం మేలని, ప్రభుత్వం ఈ విషయమై పునరాలోచించాలని కోరుతున్నారు. అలాగే దరఖాస్తుల సమర్పణకు ఈ నెల 19 వరకు ఉన్న గడువును పెంచాలని కూడా సూచిస్తున్నారు.
  
 హైదరాబాద్‌లోని కొన్ని ప్రాంతాల్లో రిజిస్ట్రేషన్ ధరలు
  
 చదరపు గజం రూ. 62 - 65 వేలు
 పంజాగుట్ట రోడ్ నంబర్ 5, 14, పంజాగుట్ట చౌరస్తా నుంచి మాసబ్‌ట్యాంకువైపు, బంజారాహిల్స్ రోడ్ నంబర్ 2, 3, 10, 12, ఎర్రగడ్డ రైతుబజార్, మసీదు ప్రాంతాలు, ఫతేనగర్ ఫ్లైవోవర్ ఏరియా, జూబ్లీహిల్స్ రోడ్ నంబర్ 1, 10, 36, 45, 71, 78, 82, 92, శ్రీనగర్ కాలనీ, యూసఫ్‌గూడ పోలీస్ లైన్స్, వెంగళరావునగర్, ఎల్లారెడ్డిగూడ, మైత్రివనం తదితర ప్రాంతాలు
  
  చదరపుగజం ధర రూ. 42-45 వేలు
  అరోర హౌసింగ్ కాలనీ, గౌరీ శంకర్‌నగర్, కమలాపురి కాలనీ, ఇబ్రహీంనగర్, ఖాజానగర్, నందినగర్, పంజాగుట్ట రోడ్ నంబర్ 4,14, బంజారాహిల్స్ రోడ్ నంబర్ 9, 6, 7, 13, షేక్‌పేట్, షౌకత్‌నగర్, శ్రీరాంనగర్, జోహ్రానగర్, ఆల్విన్ లేఅవుట్, భరణి లేఅవుట్, హుడా ఎన్‌క్లేవ్, ఎమ్మెల్యే కాలనీ, నందిహిల్స్, నందగిరి హిల్స్, ప్రశాసన్ నగర్, విజయ కోఆపరేటివ్ సొసైటీ.. తదితర ప్రాంతాలు
  
 చదరపు గజం రూ. 33 వేలు
 కళ్యాణ్‌నగర్, ఎర్రగడ్డ విజయ ఆసుపత్రి రోడ్, మధురానగర్, శ్రీనివాసనగర్, టోలిచౌకి రోడ్ నుంచి టూంబ్స్ వరకు, సిద్ధార్థ నగర్, విమెన్ కోఆపరేటివ్ సొసైటీ తదితర ప్రాంతాలు.
  
  చదరపు గజం రూ. 25 వేలు
  బోరబండ, రాజీవ్‌నగర్, లక్ష్మినరసింహనగర్, సాయికృష్ణనగర్, వెంకటగిరి, అలీనగర్, ఏజీ కాలనీ, ఇమాంగూడ, ఇంజనీర్స్ కాలనీ, ఎల్‌ఐసీ కాలనీ, మారుతీనగర్, నాగార్జున నగర్, నవోదయ కాలనీ, ఎస్బీహెచ్ ఆఫీసర్స కాలనీ, శాలివాహన నగర్ కాలనీ, వికాసపురి, జవహర్‌నగర్, జయప్రకాశ్‌నగర్, రహమత్‌నగర్, కృష్ణదేవరాయనగర్, శ్రీరాం నగర్, హబీబ్ ఫాతిమానగర్ తదితర ప్రాంతాలు.
  (పైన పేర్కొన్న ప్రాంతాల్లో ప్రధాన రహదారి వెంబడి తప్ప మిగిలిన స్థలాల ధరలు రిజిస్ట్రేషన్ ధరకన్నా 15 నుంచి 25 శాతం తక్కువగా ఉన్నట్లు సంబంధిత అధికారులు చెబుతున్నారు.)