పటాస్ సినిమాతో ఫాంలోకి వచ్చిన నందమూరి హీరో కళ్యాణ్ రామ్ ఇప్పుడు వరుస సినిమాలతో బిజీ అవుతున్నాడు. ప్రస్తుతం పూరి జగన్నాథ్ దర్శకత్వంలో ఇజం సినిమాలో నటిస్తున్నాడు ఈ హీరో. ఈ సినిమా కోసం సిక్స్ ప్యాక్ బాడీతో డిఫరెంట్ లుక్లో కనిపిస్తున్న కళ్యాణ్.. ఆ తరువాత చేయబోయే రెండు సినిమాలను ఫైనల్ చేశాడు. ఇజం సినిమాను తన సొంత నిర్మాణ సంస్థ ఎన్టీఆర్ ఆర్ట్స్ బ్యానర్పై తెరకెక్కిస్తుండగా.. తరువాతి సినిమాలు మాత్రం బయటి నిర్మాతలతో చేసేందుకు ప్లాన్ చేసుకుంటున్నాడు.
 
 ఇజం సినిమా తరువాత మెగా హీరో సాయి ధరమ్ తేజ్తో కలిసి ఓ మల్టీ స్టారర్ సినిమాలో నటించేందుకు రెడీ అవుతున్నాడు. ఈ సినిమాకు పిల్లా నువ్వులేని జీవితం ఫేం ఏయస్ రవికుమార్ చౌదరి దర్శకత్వం వహించనున్నాడు. ఈ సినిమాతో పాటు కామెడీ చిత్రాల దర్శకుడిగా గుర్తింపు తెచ్చుకున్న జి నాగేశ్వరరెడ్డి దర్శకత్వంలో మరో సినిమాకు అంగీకరించాడు.ఈ సినిమాను ఎన్టీఆర్తో నాన్నకు ప్రేమతో లాంటి సక్సెస్ ఫుల్ సినిమాను అందించిన బివిఎస్ఎన్ ప్రసాద్ నిర్మిస్తున్నారు.
 
 అంతేకాదు బాలకృష్ణ నటించిన సూపర్ హిట్ పాట 'దంచవే మేనత్త కూతురా' అనే పల్లవినే ఈ సినిమాకు టైటిల్గా ఫిక్స్ చేసే ఆలోచనలో ఉన్నారు చిత్రయూనిట్. ఇటీవల ఆడోరకం ఈడోరకం సినిమా సక్సెస్తో ఆకట్టుకున్న జి నాగేశ్వరరెడ్డి, ఈ శుక్రవారం సుశాంత్ హీరోగా తెరకెక్కిన ఆటాడుకుందాం రా సినిమాతో ఆడియన్స్ ముందుకు వస్తున్నాడు. ప్రస్తుతం అల్లరి నరేష్ హీరోగా ఇంట్లో దయ్యం నాకేం భయ్యం సినిమాను రూపొందిస్తున్నాడు. ఈ సినిమా పూర్తయిన తరువాత కళ్యాణ్ రామ్ హీరోగా తెరకెక్కబోయే సినిమాకు సంబందించిన ప్రీ ప్రొడక్షన్ వర్క్ మొదలవుతుంది.


 యంగ్ హీరో రాజ్ తరుణ్ జోరు పెంచుతున్నాడు. ఇప్పటికే ఉయ్యాల జంపాల, సినిమా చూపిస్త మామ సినిమాలతో వరుస సూపర్ హిట్స్ అందుకున్న ఈ యంగ్ హీరో, త్వరలో కుమారి 21ఎఫ్ సినిమాతో ఆడియన్స్ ముందుకు రానున్నాడు. సుకుమార్ స్కూల్లో తెరకెక్కిన ఈ సినిమాపై భారీ అంచనాలే ఉన్నాయి. ఇప్పటికే రిలీజ్ అయిన ఆడియో, టీజర్లకు మంచి రెస్పాన్స్ రావటంతో, చిత్ర విజయంపై చాలా నమ్మకంగా ఉన్నారు.
 
 ప్రస్తుతం రాజ్ తరుణ్ చేతిలో రెండు మూడు సినిమాలు ఉన్నాయి. ఇవి సెట్స్ మీద ఉండగానే మరో క్రేజీ ప్రాజెక్ట్ను అంగీకరించాడు రాజ్. మంచు విష్ణు హీరోగా చేస్తున్న ఓ సినిమాలో రాజ్ తరుణ్ను మరో హీరోగా ఎంపిక చేశారన్న టాక్ వినిపిస్తోంది. పంజాబీలో సూపర్ హిట్ అయిన ఓ కామెడీ ఎంటర్టైనర్ రీమేక్ రైట్స్ను చాలా కాలం క్రితమే తీసుకున్నాడు మంచు విష్ణు. అయితే అప్పటినుంచి ఈ సినిమా డిలే అవుతూ వస్తోంది. తాజాగా ఈ ప్రాజెక్ట్ను సెట్స్ మీదకు తీసుకురావాలని ప్లాన్ చేస్తున్నాడు విష్ణు.
 
 విష్ణు కెరీర్లోనే బిగెస్ట్ హిట్గా నిలిచిన దేనికైనా రెడీ సినిమాను డైరెక్ట్ చేసిన జి.నాగేశ్వరరెడ్డి దర్శకత్వంలో ఈ సినిమాను తెరకెక్కించాలని ప్లాన్ చేస్తున్నారట. ఇద్దరు హీరోలు ఉండే ఈ సినిమా కోసం విష్ణుతో పాటు రాజ్ తరుణ్ను మరో హీరోగా సెలెక్ట్ చేసుకున్నారు. ప్రస్తుతం సుశాంత్ హీరోగా ఆటాడుకుందాం రా సినిమాను తెరకెక్కిస్తున్న నాగేశ్వరరెడ్డి. ఆ సినిమా పూర్తయిన తరువాత విష్ణు, రాజ్ తరుణ్ల కాంబినేషన్లో తెరకెక్కే సినిమా పని మొదలెట్టనున్నాడు.