హైదరాబాద్, బిజినెస్ బ్యూరో: టేకోవర్ల ముప్పు నుంచి తప్పించుకోవడంతోపాటు ఇతర బ్యాంకులను కొనుగోలు చేసేందుకు ప్రభుత్వరంగ ఇండియన్ బ్యాంక్ రంగం సిద్ధమయ్యింది. మూడు గ్రామీణ బ్యాంకులను ప్రధాన బ్యాంక్‌లో విలీనం చేయడం ద్వారా పెద్ద బ్యాంకుగా ఎదగడమే కాకుండా, వేరే బ్యాంక్‌ను కొనుగోలు చేసే స్థాయికి చేరతామంటున్నారు ఇండియన్ బ్యాంక్ చైర్మన్ అండ్ మేనేజింగ్ డెరైక్టర్ టి.ఎస్.భాసిన్. హైదరాబాద్‌లో కొత్త కార్యాలయాన్ని ప్రారంభించడానికి వచ్చిన భాసిన్ ‘సాక్షి’తో ప్రత్యేకంగా మాట్లాడారు.
 
  ఆ ఇంటర్వ్యూ వివరాలు.. విలీనాలు, కలయికలపై..
  దేశీయ బ్యాంకింగ్ రంగంలో విలీనాలు, కలయికలు తప్పనిసరి. కానీ ఈ విషయం ఇంకా చర్చల దశలోనే ఉంది. బ్యాంకుల బోర్డులు, ఉద్యోగ సంఘాలు, ఖాతాదారుల మధ్య అనేక చర్చలు జరిగి, దానికి తగిన వాతావరణం ఏర్పడిన తర్వాత విలీనాలు, కలయికలు ప్రారంభమవుతాయి. దీనికి ఇంకా సమయం ఉన్నా మేము మాత్రం టేకోవర్ ముప్పు నుంచి తప్పించుకోవడానికి ఇప్పటి నుంచే ప్రణాళికలు తయారు చేసుకుంటున్నాం. అందులో భాగంగా మా బ్యాంక్‌కు చెందిన మూడు గ్రామీణ బ్యాంకులను విలీనం చేసుకోవాలనుకుంటున్నాం.
 
 దీనికి సంబంధించి ఇప్పటికే కేంద్ర ఉన్నతాధికారులతో చర్చలు జరుగుతున్నాయి. ఇదే జరిగితే ఇండియన్ బ్యాంక్ శాఖల సంఖ్య ప్రస్తుతమున్న 2,260 నుంచి 3,500కి పెరగడమే కాకుండా, తగినంత మూలధనం సమకూరుతుంది. దీంతో వేరే బ్యాంకులను కోనుగోలు చేసే శక్తి వస్తుంది. అవకాశం వస్తే ప్రైవేటు, ప్రభుత్వ రంగ బ్యాంకులను కొనుగోలు చేయడానికి ప్రణాళికలను సిద్ధం చేసుకుంటున్నాం.
 
  నిధుల సేకరణ గురించి..
  గత పదేళ్ళుగా కేంద్రం నుంచి ఎటువంటి నిధుల సహాయం లేకుండా సొంత లాభాలతోనే వ్యాపారాన్ని విస్తరిస్తున్నాం. గడచిన ఏడాది రూ.1,159 కోట్ల నికర లాభం రావడంతో రూ10,000 కోట్ల వరకు అదనపు రుణాలను ఇవ్వగలం. ప్రస్తుత పరిస్థితుల్లో ప్రభుత్వం నుంచి కానీ, వాటాలను విక్రయించడం ద్వారా కానీ నిధులు సేకరించే ఆలోచన లేదు. బాసెల్-3 నిబంధనల ప్రకారం క్యాపిటల్ అడిక్వసీ రేషియో 13.1 శాతంగా, అదే బాసిల్-2 నిబంధనల ప్రకారం అయితే 12.48 శాతంతో పటిష్టంగా ఉంది.
 
  వ్యాపార విస్తరణ..
  కేంద్రంలో స్థిరమైన ప్రభుత్వం రావడంతో పాటు, వృద్ధిరేటు పెరుగుతుండటంతో రుణాలకు డిమాండ్ పెరుగుతుందని ఆశిస్తున్నాం. ఈ ఏడాది రుణాల్లో 18 నుంచి 20%, డిపాజిట్లలో 15.5% వృద్ధిని అంచనా వేస్తున్నాం. గడచిన ఏడాది 16% వృద్ధితో వ్యాపార పరిమాణం రూ.2.80 లక్షల కోట్లుగా ఉంది.
 
  ఎన్‌పీఏల విక్రయం గురించి
  ఎన్‌పీఏల రికవరీపై పూర్తి దృష్టి పెట్టడమే కాకుండా కొన్ని నిరర్థక ఆస్తులను విక్రయించాలని నిర్ణయించాం. 18 అకౌంట్లకు చెందిన రూ.562 కోట్ల విలువైన ఎన్‌పీఏలను అసెట్ రీకన్‌స్ట్రక్షన్ కంపెనీకి విక్రయించడానికి సంబంధించి చర్చలు జరుపుతున్నాం. త్వరలోనే ఈ ప్రక్రియ పూర్తవుతుంది. నికర నిరర్థక ఆస్తులు 2.26 శాతంగా ఉన్నాయి. పెద్దగా ఆందోళన చెందనవసరం లేదు.
 
  వడ్డీరేట్ల గురించి...
  ప్రభుత్వం ద్రవ్యోల్బణం తగ్గించడానికి పలు చర్యలు తీసుకుంటోంది. ముఖ్యంగా ఆహార సరఫరా వైపు పలు చర్యలు తీసుకుంటుండటంతో రుతుపవనాలు నెమ్మదించినా ధరల పెరుగుదలపై అంతగా ప్రభావం ఉండదనుకుంటున్నాం. రానున్న కాలంలో వడ్డీరేట్లు తగ్గడానికే అవకాశాలు కనిపిస్తున్నాయి.
 
  రాష్ట్ర విభజన ప్రభావం..
  రాష్ట్ర విభజన తర్వాత రెండు రాష్ట్రాల్లో అపారమైన వ్యాపార అవకాశాలు ఏర్పడ్డాయి. వీటిని అందిపుచ్చుకోవడానికి ఇప్పటికే ఆంధ్రప్రదేశ్ సీఎంను కలిశాం. త్వరలోనే తెలంగాణ  ముఖ్యమంత్రిని కూడా కలుస్తున్నాం.  ఆంధ్రాలో రేవులు, సెజ్‌లు, పరిశ్రమల అభివృద్ధికి అవకాశాలు ఉన్నాయి. ఆ అవకాశాలకు అనుగుణంగా వచ్చే రెండేళ్లలో రూ.10,000 కోట్లు రుణాలను ఇవ్వడానికి ప్రణాళికలు సిద్ధం చేసుకున్నాం.
 
  ఇందులో రేవుల కోసం రూ.5,000 కోట్లు, సెజ్‌లు, ఇతర రంగాల కోసం మరో రూ.5,000 కోట్ల కేటాయించాం. ప్రస్తుతం రెండు రాష్ట్రాల్లో కలిపి 301 శాఖలు ఉంటే ఈ ఏడాది చివరి నాటికి 350కి పెంచనున్నాం. అలాగే రెండు రాష్ట్రాల్లో కలిపి రూ.25,000 కోట్లుగా ఉన్న వ్యాపారాన్ని ఈ ఏడాది చివరి నాటికి రూ.35,000 కోట్లకు, 2016 మార్చికి రూ.50,000 కోట్లకు చేర్చాలని లక్ష్యంగా పెట్టుకున్నాం.


  న్యూఢిల్లీ: ద్రవ్యోల్బణం అదుపునకు సంబంధించి రిజర్వ్ బ్యాంక్ (ఆర్‌బీఐ) గవర్నర్ రఘురామ్ రాజన్ చేసిన ఒక ప్రతిపాదనకు చిదంబరం శుక్రవారం సంపూర్ణ మద్దతు పలికారు.  దీని ప్రకారం పార్లమెంటు ద్వారా ప్రభుత్వం ద్రవ్యోల్బణం కట్టడి లక్ష్యాన్ని నిర్దేశిస్తుంది. ఈ లక్ష్యాన్ని సాధించడం, ఇందుకు తగిన మార్గాలను అన్వేషించడం వంటి బాధ్యతలను ఆర్‌బీఐకి అప్పగిస్తుంది. తద్వారా ఒకవైపు ధరల స్థిరీకరణ, మరోవైపు వృద్ధి సాధనకు మార్గం సుగమం చేయడానికి వెసులుబాటు కలుగుతుంది.  ఆర్‌బీఐ బోర్డ్‌తో శుక్రవారం ఆర్థికమంత్రి సాంప్రదాయిక బడ్జెట్ అనంతర సమీక్షా సమావేశం జరిగింది.
 
 ఈ సమావేశం అనంతరం చిదంబరం విలేకరులతో మాట్లాడారు. ద్రవ్యోల్బణంపై రాజన్ సూచనను ఈ సందర్భంగా చిదంబరం ప్రస్తావనకు తెచ్చారు. ‘ఆర్‌బీఐ గవర్నర్ సూచన నాకు నచ్చింది. ఇది సరైన ధోరణే. ద్రవ్యోల్బణం లక్ష్యాన్ని నిర్దేశించే అధికారం పార్లమెంట్‌కు ఉంటుంది.  వృద్ధి పెంపు, ధరల కట్టడి లక్ష్యాలు నెరవేర్చడానికి ప్రభుత్వం, ఆర్‌బీఐ కలిసి పనిచేస్తాయనడంలో ఎటువంటి సందేహాలూ అక్కర్లేదు’ అని చిదంబరం ఈ సందర్భంగా పేర్కొన్నారు.
 
  ఆయన పేర్కొన్న ముఖ్యాంశాలు ఇవీ...
   18 నెలల క్రితంతో పోల్చితే ప్రస్తుతం ఆర్థిక వ్యవస్థ పటిష్టంగా ఉంది. 2013-14లో ద్రవ్యలోటును స్థూల దేశీయోత్పత్తితో పోల్చితే 4.6 శాతానికి కట్టడి చేయగలం. కరెంట్ అకౌంట్ లోటు  (క్యాడ్) 40 బిలియన్ డాలర్లలోపే ఉంటుంది.
 
   క్యాడ్ తుది గణాంకాలు పరిశీలించాక పసిడి దిగుమతులపై ఆంక్షలను సమీక్షించడం జరుగుతుంది.
 
   ప్రభుత్వ రంగ బ్యాంకులకు తాజా మూలధన కేటాయింపు విషయంలో కొత్త, వినూత్న మార్గాలను అన్వేషించాల్సిన అవసరం ఉంది. ఉద్యోగులకు షేర్ల జారీ, మైనారిటీ షేర్‌హోల్డర్లకు రైట్స్ ఇష్యూ వంటి అంశాలు ఇందులో ఉన్నాయి.
 
  త్వరలో కొత్త బ్యాంక్ లెసైన్సులు: రాజన్
  ఇదే సమావేశంలో పాల్గొన్న రాజన్ ఈ సందర్భంగా మాట్లాడుతూ, ఎన్నికల కమిషన్ అనుమతితో కొద్ది వారాల్లో కొత్త బ్యాంక్ లెసైన్సులను జారీ చేయడం జరుగుతుందని వివరించారు.  కాగా,మూలధనం విషయంలో బ్యాంకులు బాసెల్ 3 నిబంధనలను పాటించడానికి సంబంధించి ఒక అత్యున్నత స్థాయి కమిటీ ఏర్పాటయ్యింది.