* దర్యాప్తు సంస్థల విచారణలో మావోయిస్ట్ నేత ఉసెండి వెల్లడి
 * ఎన్‌ఐఏ, సీఆర్పీఎఫ్, చత్తీస్‌గఢ్ పోలీసుల విచారణ
 * మూడో పెళ్లి విషయం పార్టీకి వివరించానని వెల్లడి
  
 సాక్షి, హైదరాబాద్:  ఎలాంటి హింసాత్మక దాడుల్లోనూ పాల్గొనలేదంటూ మావోయిస్ట్ నేత గుమ్మడివెల్లి వెంకట కిషన్ ప్రసాద్ అలియాస్ గుడ్సా ఉసెండి దర్యాప్తు సంస్థల విచారణలో వెల్లడించాడు. ఇటీవల లొంగిపోయిన ఉసెండిని రాష్ట్ర పోలీసులతోపాటు జాతీయ దర్యాప్తు సంస్థ(ఎన్‌ఐఏ), కేంద్ర రిజర్ దళం (సీఆర్పీఎఫ్), చత్తీస్‌గఢ్ పోలీసులు విచారిస్తున్నారు. దండకారణ్య స్పెషల్ జోనల్ కమిటీ అధికార ప్రతినిధిగా వ్యవహరించిన ఉసెండి,... చత్తీస్‌గఢ్‌లో జరిగిన హింసాత్మక ఘటనలకు సంబంధించి, అక్కడి కోర్టులో విచారణను ఎదుర్కోవలసి ఉంది. పార్టీ విధానాలతో విబేదించి, లొంగిపోయిన ఉసెండికి న్యాయ పరమైన ఇబ్బందులు కూడా కలిగించకుండా చూడాలని పోలీసుశాఖ భావిస్తోంది.
 
 కోర్టు కేసులతో సంబంధంలేకుండానే తన లొంగుబాటును అంగీకరించాలన్న ఉసెండి షరతుకు అంగీకరించిన నేపథ్యంలో, రాష్ట్ర ప్రభుత్వం ఆ దిశగా ప్రయత్నాలు చేస్తోంది. కోర్టు అనుమతితో పనిలేకుండానే ఉసెండిని చత్తీస్‌గఢ్ పోలీసులువిచారిస్తున్నారు. చత్తీసగఢ్ పీసీసీ అధ్యక్షుడిని, కేంద్ర మంత్రి కాన్వాయ్‌ని లక్ష్యంగా చేసుకుని మావోయిస్టులు జరిపిన దాడిపై ఎన్.ఐ.ఎ. అధికారులు, ఉసెండి నుంచి సమాచారం రాబడుతున్నారు. 2010 ఏప్రిల్ ఆరున చింతల్‌నార్ అటవీ ప్రాంతంలో సీఆర్పీఎఫ్ 62వ బెటాలియన్‌కు చెందిన 76 మంది మృతికి కారణమైన మావోయిస్టుల దాడిపై సీఆర్పీఎఫ్ కూడా వివరాలు రాబడుతోంది.
 
 రాజీతో విడిపోయి, సంతోషితో సహజీవనం
 ఉసెండి మూడో పెళ్లిపై మావోయిస్టు పార్టీ చేసిన ప్రకటనతో, ఆ విషయం చర్చనీయాంశమైంది. భార్య రాజీ ఉండగానే ఉసెండి, సంతోషి మార్కంతో సంబంధం పెట్టుకున్నాడని, తాము చర్య తీసుకునేలోపే ఆతను పరారయ్యాడని పార్టీ ్రప్రకటించింది. సంతోషిని ఉసెండి భార్యగా పోలీసులు అధికారికంగా ప్రకటించినా, వారిద్దరికీ పెళ్లికాలేదని తెలిసింది. దీనితో ఈ విషయమై ఎలా సమాధానం చెప్పుకోవాలో పోలీసులకు బోధపడటంలేదు. ఆదివాసీ యువతి మిడ్కోను ఉసెండి 1996లో పెళ్లిచేసుకున్నాడు.
 
 అతనికి మరో యువతితో సంబంధం ఉందని పార్టీ నేతలకు భార్య ఫిర్యాదుచేయడంతో వారు విచారణ జరిపి, 1999లోనే ఉసెండి స్థాయిని తగ్గించారు. ఎన్‌కౌంటర్‌లో మొదటి భార్య మిడ్కో మృతితో ఉసెండి, 2001లో రాజీని పెళ్లిచేసుకున్నాడు. ఐదేళ్ల క్రితం తమ మధ్య విబేధాల సంగతిని రాజీ, పార్టీ దృష్టికి తీసుకెళ్లింది. విభేదాలొస్తే విడాకులకు పార్టీలో అవకాశం ఉన్నా, ఉసెండి రాజీతో విడాకులు తీసుకోకుండానే సంతోషితో సహజీవనం ప్రారంభించాడు. కాగా, తన సహజీవనంపై పార్టీకి కూడా వివరించినట్టుట్టు ఉసెండి వాదిస్తున్నారు.


 సాక్షి, హైదరాబాద్: ప్రభుత్వానికి లొంగిపోయిన గుడ్సా ఉసెండి మావోయిస్టు విప్లవోద్యమానికి తీరని ద్రోహం చేశాడని మావోయిస్టు దండకారణ్యం స్పెషల్ జోన్‌కమిటీ (డీకేజెడ్‌సీ) కార్యదర్శి  రావుల శ్రీనివాస్ ఎలియాస్  రామన్న  మండిపడ్డాడు. మీడియాకు ఆడియో క్యాసెట్ ద్వారా సోమవారం ఒక ప్రకటనను రామన్న విడుదల చేశాడు. సుదీర్ఘ కాలం మావోయిస్టు విప్లవోద్యమంలో కొనసాగిన  ఉసెం డికి పార్టీ తగిన గుర్తింపునిచ్చిందని తెలిపారు.
  
   కానీ, రాజకీయంగా అనైతికతకు పాల్పడ్డ ఉసెండి ప్రభుత్వం విదిల్చే ఎంగిలి మెతుకుల కోసం ఆశపడి  లొం గిపోయాడని ఆరోపించారు.  అతని వెంట లొంగిపోయిన సంతోషి ఆయన భార్య కాదని, ఆమె మావోయిస్టు దళ సభ్యురాలని పేర్కొన్నారు. ఉసెండి మొ దటి భార్య సబిత గతంలో జరిగిన ఎన్‌కౌంటర్‌లో  మరణించిందని, తర్వాత పార్టీ అనుమతితో రాజీని పెళ్లి చేసుకున్నాడని తెలిపారు. ప్రస్తుతం రాజీ మావోయిస్టు దళంలోనే కొనసాగుతున్నట్లు వెల్లడించారు.


 సాక్షి ప్రతినిధి, వరంగల్: మావోయిస్టుల కీలక నేత గుముడవెల్లి వెంకట కృష్ణప్రసాద్ (జీవీకే) అలియాస్ గుడ్సా ఉసెండి లొంగుబాటు ఇటీవల తీవ్ర చర్చనీయాంశమైంది. మావోయిస్టు పార్టీ కీలక నేతగా ఉన్న ఉసెండి లొంగుబాటుతో.. ఇక లొంగుబాట్ల పరంపర కొనసాగుతుందని కేంద్ర హోంమంత్రి, రాష్ట్ర పోలీసు ఉన్నతాధికారులు చెబుతున్నారు. కానీ.. వామపక్ష ఉద్యమ అనుకూలురు మాత్రం ఇదంతా పోలీసుల ఎత్తుగడేనని, లొంగిపోయింది ఉసెండి కాదు.. జీవీకే ప్రసాద్ అని అంటున్నారు. అయితే ప్రభుత్వం, వామపక్ష ఉద్యమకారుల వాదనలెలా ఉన్నా... మావోయిస్టు పార్టీలో మరో నలుగురు ఉసెండిలు ఉన్నట్లు ప్రచారం జరుగుతోంది. గుముడవెల్లి వెంకట కృష్ణప్రసాద్ వారిలో ఒకరని అంటున్నారు.
  
  ‘‘ఉసెండి’ అనే పేరు ఛత్తీస్‌గఢ్‌లోని ఆదివాసీలకు ఉంటుంది. అలా అక్కడి మావోయిస్టుల్లో ఉసెండి పేరుతో ఉన్న ఓ దళ సభ్యుడు పోరాటాల్లో ముందుండేవాడు. ఒక ఎన్‌కౌంటర్‌లో ఆయన ప్రాణాలు కోల్పోయాడు. మావోయిస్టుల్లో అమరవీరుల పేరుతో కీలక నేతలు కొనసాగే సంప్రదాయం ఉంది. అలా ఆ ఆదివాసీ దళ సభ్యుడి పేరుతో పలువురు కీలక నేతలు పార్టీలో కొనసాగుతున్నారు’’ అని మావోయిస్టు పార్టీ సానుభూతిపరులు చెబుతున్నారు. దాంతోపాటు ఆదివాసీలతో మమేకం కావడం కోసం కూడా మావోయిస్టు కీలక నేతలు అక్కడి వారి పేర్లతో పనిచేస్తున్నారు. ఇలా కొంతకాలంగా ఆంధ్రప్రదేశ్, ఛత్తీస్‌గఢ్, ఒడిశాల్లో మావోయిస్టుల భారీ దాడులన్నీ ఉసెండి పేరుతోనే జరుగుతున్నాయి.
  
  మావోయిస్టు పార్టీ పత్రిక నిర్వహణతో పాటు మావోయిస్టులు జరిపిన భారీ దాడులు, ఎన్‌కౌంటర్ ఘటనలకు సంబంధించి ‘గుడ్సా ఉసెండి’ పేరుతోనే ప్రకటనలు వస్తున్నాయి. సల్వాజుడుం వ్యవస్థాపకుడు మహేంద్రకర్మ, ఆ రాష్ట్ర పీసీసీ అధ్యక్షుడు నందకుమార్ పటేల్, మరో ఇద్దరు కేంద్ర మాజీ మంత్రులను మావోయిస్టులు మందుపాతరలు అమర్చి హతమార్చారు. ఆ ఘటనలకు సంబంధించిన ప్రకటనలూ గుడ్సా ఉసెండి పేరుతోనే వచ్చాయి. ప్రస్తుతం లొంగిపోయిన కృష్ణప్రసాద్ కూడా ‘ఉసెండి’ పేరుతో ప్రకటనలు ఇచ్చేవారని తెలుస్తోంది. మావోయిస్టు పార్టీ ఈయనకు అంతర్గత పత్రిక వ్యవహారాలు, సాహిత్య, డాక్యుమెంట్ తదితర కీలక పనులు అప్పగించినట్లు తెలిసింది.
  
  దాడుల వ్యవహారంలో కీలకంగా వ్యవహరిస్తూ, జనతన సర్కార్‌ను నడుపుతున్న వారిలో ఉన్న కడారి సత్యనారాయణరెడ్డి (కరీంనగర్) అలియాస్ కోసా, రావుల శ్రీనివాస్ (వరంగల్) అలియాస్ రామన్న, గాజర్ల అశోక్ (వరంగల్) అలియాస్ ఐతు, ప్రభాకర్ (మహబూబ్‌నగర్) అలియాస్ కిరణ్, ప్రసాదరావు (కరీంనగర్) అలియాస్ చంద్రన్న... వీరందరు కూడా ‘గుడ్సా ఉసెండి’ పేరుతోనే కార్యక్రమాలు చేపడుతారని చెబుతున్నారు. ఇప్పుడు వారంతా దండకారణ్యంలోనే ఉన్నారని అంటున్నారు. ఉసెండి పేరుతో కొనసాగిన కృష్ణప్రసాద్ లొంగుబాటు విషయంలో పోలీసులు వ్యూహత్మకంగా వ్యవహరించారని వామపక్ష ఉద్యమ మద్దతుదారులు చెబుతున్నారు. ‘ఉసెండి’ పేరిట చేసిన దాడులు, ప్రకటనలు మావోయిస్టు పార్టీ ఉనికిని నిలిపాయని.. అలాంటి ఉసెండి లొంగిపోయారని చెప్పడం ఇప్పుడు పోలీసుల ప్రధాన ఉద్దేశంగా కనబడుతోందని వారు అంటున్నారు.