సాక్షి, ముంబై : ప్రముఖ బాలీవుడ్‌ నటి శ్రద్ధా కపూర్‌పై క్రిమినల్‌ కేసు నమోదైంది. గత రెండు నెలల క్రితం విడుదలైన హసీనా పార్కర్‌ అనే చిత్రంలో శ్రద్ధా ప్రధాన పాత్ర పోషించింది. ముంబై అండర్‌ వరల్డ్‌ డాన్‌ దావూద్‌ ఇబ్రహీం సోదరి హసీనా పార్కర్‌ జీవితాధారంగా ఈ చిత్రం తెరకెక్కింది. అయితే ఈ సినిమాలో శ్రద్ధ కపూర్‌ ధరించిన దుస్తుల విషయంలో ముంబైలో క్రిమినల్‌ కేసు నమోదైంది. ఓ ప్రముఖ కంపెనీ శ్రద్ధకు దుస్తులు డిజైన్‌ చేసింది. ఒప్పందం ప్రకారం సదరు కంపెనీ పేరును సినిమాలో వేస్తామని నిర్మాత నహిత్‌ ఖాన్‌ మాటిచ్చారు. కానీ  సినిమా మెత్తంలో ఎక్కడా కంపెనీ పేరు వేయలేదు. దీంతో కంపెనీ యాజమాన్యం, నిర్మాత నహిత్‌ ఖాన్‌ , శ్రద్ధా కపూర్‌పై ముంబై లోని అంధేరీ మెట్రలోపాలిటన్‌​ కోర్టులో పిటీషన్‌ వేసింది. కోర్టు ఆదేశాల మేరకు నహిత్‌ ఖాన్‌, శ్రద్ధా కపూర్‌పై పోలీసులు కేసు నమోదు చేశారు. దర్యాప్తు చేసిన తర్వాత అసలు విషయం ఏంటనేది వెల్లడిస్తామని పోలీసులు తెలిపారు. శ్రద్ధా కపూర్‌ ప్రధాన పాత్ర పోషించిన ఈచిత్రంలో అంకూర్‌ భాటియా, రాజేష్‌ తైలాంగ్‌లు కీలక పాత్రల్లో నటించారు. గత సెప్టెంబర్‌ 22న ఈచిత్రం ప్రేక్షకుల ముందుకు వచ్చింది.


 సాక్షి, సినిమా: బాలీవుడ్ యంగ్ బ్యూటీ శ్రద్ధా కపూర్‌ పై ఛీటింగ్ కేసు నమోదయ్యింది. తన తాజా చిత్రం విషయంలో శ్రద్ధ తమతో చేసుకున్న ఒప్పందాన్ని ఉల్లంఘించారంటూ ప్రముఖ సంస్థ ఏజే మిస్ట్రీ అండ్‌ తియా మిన్హాస్‌ దావా వేసింది.  
  
 శ్రద్ధా కపూర్‌ తాజాగా హసీనా పార్కర్‌ చిత్రంలో నటించిన విషయం తెలిసిందే. ఈ చిత్రంలో ఆమెకు ఏజేటీఎం సంస్థ దుస్తులు సమకూర్చింది. చిత్ర ప్రమోషన్ ఈవెంట్లలో కూడా తమ బ్రాండ్ దుస్తులే ధరించాలని శ్రద్ధా, చిత్ర నిర్మాతలతో ఏజేటీఎం ఒప్పందం చేసుకున్నారు. కానీ, ఆమె అలాంటిదేం చేయకుండానే ప్రమోషన్‌లలో పాల్గొంటోంది.
  
 దీంతో సదరు సంస్థ హీరోయిన్‌ శ్రద్ధాకపూర్‌తోపాటు చిత్ర నిర్మాతలపైనా ముంబై కోర్టులో ప్రైవేట్ ఫిర్యాదు చేసింది. అక్టోబర్ 26న ఈ కేసు బెంచ్ ముందుకు రానుంది. మాఫియా డాన్‌ దావూద్‌ సోదరి జీవిత ఇతివృత్తంగా హసీనా పార్కర్‌ రూపొందిన విషయం తెలిసిందే. మరోవైపు సైనా నెహ్వాల్‌ బయోపిక్‌తోపాటు ప్రభాస్‌ సాహోలో కూడా శ్రద్ధా కపూర్‌ హీరోయిన్‌గా నటిస్తోంది.


 ముంబయి : తన సోదరి శ్రద్ధాకపూర్‌పై వస్తున్న రూమర్లను పట్టించుకోనని ప్రముఖ బాలీవుడ్‌ నటుడు సిద్ధాంత్‌ కపూర్‌ చెప్పారు. ఎవరైనా చెబితే నవ్వి ఊరుకుంటానని తెలిపారు. మిగితా ఎవరికీ తెలియనన్ని విషయాలు తన సోదరి గురించి తనకు మాత్రమే తెలుసని చెప్పారు. తన సోదరిపై తనకు అధికారం ఉన్నట్లుగా వ్యవహరిస్తానని అదే సమయంలో తామిద్దరం చాలా సన్నిహిత మిత్రుల మాదిరిగా ఉంటూ అన్ని విషయాలు చర్చించుకుంటామని అన్నారు. ప్రస్తుతం వీరిద్దరు కూడా హసీనా పార్కర్‌ అనే చిత్రంలో నటిస్తున్నారు. ఇందులో సిద్ధాంత్‌ దావూద్‌ ఇబ్రహీంగా నటిస్తుండగా.. శ్రద్ధా అతడి సోదరి హసీనా పాత్రలో నటిస్తున్నారు.
 
 ఈ సందర్భంగా కొంతమంది మీడియా ప్రతినిధులు ఆయనతో మాట్లాడే ప్రయత్నం చేశారు. ముఖ్యంగా ఫర్హాన్‌ అక్తర్‌తో శ్రద్ధా చాలా చనువుగా ఉంటున్నారని, వారిద్దరి మధ్య సంబంధాలు బయటకు చెప్పలేనంతగా గాఢంగా మారాయంటూ రూమర్లు వినిపిస్తున్నాయనే విషయాన్ని ప్రస్తావించగా ఆయన నవ్వి వదిలేశారు. 'మేం చాలా మంచి మిత్రులం. ఒకరి సలహాను ఒకరం పాటిస్తాం. మా ఇద్దరి మధ్య ఎలాంటి అహంబావ సమస్యలు ఉండవు. మేం ఎల్లప్పుడు ఒకరికోసం ఒకరం ఉంటాం. శ్రద్ధా గురించి బయటవారికంటే నాకే బాగా తెలుసు. నిజమేమిటో కూడా నాకే తెలుసు. అందుకే ఇలాంటి కథలు వినిపిస్తున్నప్పుడు నవ్వి ఊరుకుంటాను. వదంతులు అనేవి ఎప్పటికీ వదంతులుగానే ఉండిపోతాయి. వాటిని మనం ఏం చేయలేం' అని చెప్పారు.


 ముంబై:  శ్రద్ధాకపూర్‌  అప్‌ కమింగ్‌  'హసీనా పార్కర్'  ట్రైలర్‌  రిలీజ్‌ అయింది.  అండర్‌ వరల్డ్‌  డాన్‌ దావూద్ ఇబ్రహీం  సోదరి హసీనా పాత్రలో చాలెంజింగ్‌గా  కనిపిస్తోంది.  ఇప్పటికే ఫస్ట్‌లుక్‌,  పోస్టర్లతో కట్టుకున్న ఈ  మూవీ తాజా ట్రైలర్‌ కూడా అదే రీతిలో మైండ్‌  బ్లోయింగ్‌ లుక్‌ లో అదరగొడుతోంది.
 
 అటు ఇంతకుముందెన్నడూ చూడని కొత్త అవతారంలో తనను చూడబోతున్నారని చిత్రం రిలీజ్‌కోసం చాలా  ఆసక్తిగా ఎదురు చూస్తున్నానంటూ శ్రద్ధా కపూర్‌ ట్విట్టర్‌లో  ట్రైలర్‌ను పోస్ట్‌ చేసింది.
  
 నాహిద్ ఖాన్ నిర్మిస్తున్న ఈ చిత్రానికి అపూర్వ లఖియా దర్శకత్వం వహిస్తున్నారు. ఇందులో దావూద్‌ పాత్రలో శ్రద్ధా సోదరుడు సిద్ధాంత్‌ కపూర్‌ నటిస్తున్నాడు. ఆగస్ట్‌ 18న ఈ చిత్రం ప్రేక్షకుల ముందుకు రానున్న సంగతి తెలిసిందే.
 
  


 ‘మర్దానీ’ హిట్‌ను ఎంజాయ్ చేస్తున్న రాణీ ముఖర్జీ త్వరలోనే మాఫియా రాణి పాత్ర పోషించనుంది. మాఫియా డాన్ దావూద్ ఇబ్రహీం చెల్లెలు హసీనా పర్కార్ జీవిత కథ ఆధారంగా అపూర్వ లఖియా తెరకెక్కించనున్న చిత్రంలో రాణీ ముఖర్జీ టైటిల్ రోల్‌లో కనిపించనుంది. దక్షిణ ముంబైలోని నాగ్‌పడా ప్రాంతం నుంచి కార్యకలాపాలు సాగించిన హసీనా ‘గాడ్‌మదర్ ఆఫ్ నాగ్‌పడా’గా పేరుమోసింది. ఆమె పాత్రకు రాణీ ముఖర్జీ పూర్తిగా న్యాయం చేయగలదని దర్శకుడు లఖియా చెబుతున్నాడు.
  


 సాక్షి, ముంబై: పరారీలో ఉన్న మోస్ట్ వాంటెడ్ మాఫియా డాన్ దావూద్ ఇబ్రహీం చెల్లెలు హసీనా పార్కర్(54) ఆదివారం ముంబైలో గుండెపోటుతో మృతిచెందింది. తీవ్ర ఛాతీ నొప్పి రావడంతో హసీనాను ఆస్పత్రికి తీసుకెళ్లారని, ఆమె చికిత్స పొందుతూ చనిపోయిందని పోలీసులు తెలిపారు.  హసీనా.. దావూద్ ముంబై వ్యాపారాలను, అక్రమ ఆస్తులను చూసేదని సమాచారం. నాగ్‌పాడాలోని గార్డన్ హాల్ అపార్టుమెంట్‌లో విలాసవంతమైన ఫ్లాట్‌లో ఉంటున్న ఆమెకు లేడీ డాన్‌గా గుర్తింపు ఉంది. ఆమె ప్రత్యక్షంగా మాఫియాను నడపకున్నా దక్షిణ ముంబైలోని కొన్ని ప్రాంతాల్లో ఆమె ఆజ్ఞ లేనిదే ఏదీ జరగదని అంటుంటారు. హసీనా భర్త ఇస్మాయిల్ పార్కర్‌ను 1991లో అరుణ్ గావ్లీ ముఠా హత్య చేయడంతో ఆమె వార్తల్లోకి వచ్చింది.


 ముంబై: అండర్ వరల్డ్ డాన్ దావుద్ ఇబ్రహీం సోదరి హసీనా పర్కర్ మరణించింది. ఆదివారం మధ్యాహ్నం ముంబైలోని ఓ ప్రైవేట్ ఆస్పత్రిలో ఆమె గుండె పోటుతో చనిపోయినట్టు పోలీసులు తెలిపారు. ఆమె వయసు 55 సంవత్సరాలు.
 
 మధ్యాహ్నం హసీనాకు గుండెలో నొప్పి రావడంతో డొంగ్రిలోని ఆస్పత్రికి తరలించారు. వైద్యులు ఆమెను కాపాడేందుకు 45 నిమిషాలు శ్రమించినా ఫలితం లేకపోయింది. హసీనా మృతదేహాన్ని దక్షిణ ముంబైలోని ఆమె నివాసానికి తీసుకెళ్లారు. 1991లో ఆమె భర్త ఇస్మాయిల్ పర్కర్ను ప్రత్యర్థులు కాల్చిచంపారు. ఆ తర్వాత హసీనా అండర్ వరల్డ్ కార్యకలపాల్లో పాల్గొన్నారు. ఆమెపైన కేసులు కూడా నమోదైనట్టు ముంబై పోలీసులు తెలిపారు. ఇదిలావుండగా దేశం విడిచి పారిపోయిన దావుద్ అజ్ఞాతంలో ఉన్న సంగతి తెలిసిందే. పాకిస్థాన్లో ఉన్నాడని పోలీసులు భావిస్తున్నారు.