ఐడీఎస్-2016 కింద ఆదాయ వివరాలు వెల్లడించిన వారి జాబితాను ప్రకటించాలి: ఉండవల్లి
  సాక్షి, హైదరాబాద్: కేంద్ర ప్రభుత్వం ప్రకటించిన స్వచ్ఛంద ‘ఆదాయ వెల్లడి పథకం(ఐడీఎస్)-2016’ వివరాలు ఆంధ్రప్రదేశ్ ముఖ్యమంత్రి చంద్రబాబునాయుడుకు తెలిసినప్పుడు.. సాధారణ ప్రజలు ఎందుకు తెలుసుకోకూడదని మాజీ ఎంపీ, పెట్రోలియం, సహజవాయువు పార్లమెంటరీ స్టాండింగ్ కమిటీ మాజీ చైర్మన్ ఉండవల్లి అరుణ్‌కుమార్ ప్రశ్నించారు. ఐడీఎస్-2016 కింద స్వచ్ఛందంగా తమ ఆదాయాలను వెల్లడించిన వారి పేర్ల జాబితాను పారదర్శకతకోసం కేంద్రప్రభుత్వం విడుదల చేయాలని ఆయనడిమాండ్ చేశారు. ఈ మేరకు కేంద్ర ఆర్థిక మంత్రి అరుణ్‌జైట్లీకి ఆయన గురువారం లేఖ రాశారు.
  


 రాజమహేంద్రవరం: గోప్యంగా ఉంచాల్సిన సమాచారం కొందరికే ఎలా తెలుస్తుందని కేంద్ర ప్రభుత్వాన్ని మాజీ ఎంపీ ఉండవల్లి అరుణ్ కుమార్ ప్రశ్నించారు. ఆదాయ వెల్లడి పథకం-2016 వివరాలపై ఆంధ్రప్రదేశ్ సీఎం చంద్రబాబుకు చేసిన వ్యాఖ్యలపై కేంద్ర ఆర్థికమంత్రి అరుణ్ జైట్లీకి గురువారం ఆయన లేఖ రాశారు.
 
 ఐడీఎస్-2016 జాబితా అధికారికంగా విడుదల చేయలేదని సెంట్రల్ బోర్డ్ ఆఫ్ డైరెక్ట్ ట్యాక్సెస్ (సీబీడీటీ) స్పష్టం చేసిన నేపథ్యంలో... తనకు సమాచారం తెలిసిందని చంద్రబాబు ఎలా ప్రచారం చేసుకుంటారని ఉండవల్లి ప్రశ్నించారు. కేంద్ర ఆర్థికశాఖ నుంచి చంద్రబాబుకు అధికారికంగా సమాచారం ఇచ్చారా అని అడిగారు. సమాచారం ఇవ్వనప్పుడు చంద్రబాబు ఇష్టానుసారం ఎలా మాట్లాడతారని నిలదీశారు. ఇదే విషయమై ప్రధాని నరేంద్ర మోదీకి ఆంధ్రప్రదేశ్ ప్రతిపక్ష నాయకుడు వైఎస్ జగన్ మోహన్ రెడ్డి లేఖ రాశారు.