అత్యాచార ఘటనపై ఓ బిహార్‌ ఎమ్మెల్యే విద్యార్థినులతో అత్యంత మొరటుగా వ్యవహరించారు. తానే పోలీసు అవతారం ఎత్తి ఇంటరాగేషన్‌ చేపట్టిన సదరు నాయకుడు ‘ఆమె రేప్‌కు గురైందని ఎలా చెప్తారు? రక్తం ఎక్కడి నుంచి వస్తుంది?’ అంటూ ప్రశ్నించారు. బీజేపీ మిత్రపక్షమైన కేంద్రమంత్రి ఉపేంద్ర కుశ్వాహ నేతృత్వంలోని రాష్ట్రీయ లోక్‌ సమతాపార్టీ ఎమ్మెల్యే లలన్‌ పాశ్వాన్‌ ఇలా వికృత ప్రశ్నలు అడిగి విద్యార్థినులను ఇబ్బంది పెట్టారు.
 
 బిహార్‌లోని వైశాలీలో ప్రభుత్వ హాస్టల్‌లో చదువుకునే ఓ పదో విద్యార్థిని అనుమానాస్పద పరిస్థితుల్లో చనిపోయింది. ఆమె దుస్తులు రక్తంలో తడిసిపోయాయి. ఈ ఘటన నేపథ్యంలో హాస్టల్‌కు వచ్చిన ఎమ్మెల్యే పాశ్వాన్‌ తానే స్వయంగా విద్యార్థులను ప్రశ్నించి.. ఇంటరాగేషన్‌ మొదలుపెట్టారు. అభ్యంతరకరమైన ప్రశ్నలు అడిగిన ఆయన.. ’మీరు విద్యార్థులు. మీకు స్పష్టంగా సమాధానం చెప్పాలి. ఇప్పుడు మీరు స్పష్టంగా చెప్పలేకపోతే.. రేపు మీపై అత్యాచారం జరగొచ్చు. రేపిస్టు మీ గదికే వస్తే మీరు ఏం చేస్తారు’ అంటూ ఆయన విద్యార్థినులపై ప్రశ్నల వర్షం కురిపించారు. రేపిస్టు కొంతమంది అమ్మాయిలకు తెలిసివాడే కావొచ్చునంటూ డిటెక్టివ్‌ అవతారం కూడా ఎత్తారు. ఇలా అందరి ముందు ఎమ్మెల్యే అడిగిన వికృత ప్రశ్నలకు విద్యార్థినులు బెదిరిపోయారు. ఆ తర్వాత ఉపాధ్యాయుల వైపు తిరిగి మీలో కూడా కొందరు రేపిస్టుకు సాయం చేసి ఉండవచ్చునని పేర్కొన్నారు. ఈ ఘటనకు సంబంధించిన వీడియో వెలుగుచూడటం దుమారం రేపుతోంది. కొత్త సంవత్సరం సందర్భంగా బెంగళూరులో జరుగుతున్న కీచక పర్వం నేపథ్యంలో మహిళలు, అమ్మాయిల పట్ల మొరట ప్రవర్తన చర్చనీయాంశమైన సంగతి తెలిసిందే. అయితే, తన తీరును సమర్థించుకున్న ఎమ్మెల్యే లలన్‌ పాశ్వాన్‌ తన ప్రశ్నల వెనుక ఎలాంటి దురుద్దేశం లేదంటూ చెప్పుకొచ్చారు.
  


 ముంబై : బాలీవుడ్ హీరో స‌ల్మాన్ ఖాన్  ఇటీవలి   రేప్  వుమెన్  వ్యాఖ్యలను వ్యతిరేకిస్తున్న వారి సంఖ్యక్రమంగా  పెరుగుతోంది. తాజాగా సల్మాన్ వివాదాస్పద వ్యాఖ్యలపై మరో ఖాన్ స్పందించారు.   సల్మాన్ వ్యాఖ్యలు దురదృష్టకరమన్న స్టార్ హీరో అమిర్ ఖాన్..ఈ వ్యవహారంలో ఆయనకు సలహా ఇవ్వడానికి మాత్రం నిరాకరించారు.  సల్మాన్   వ్యాఖ్యలను  ప్రత్యక్షంగా తాను వినలేదనీ..మీడియా ద్వారా తెలుసుకున్నానని చెప్పారు.  స‌ల్మాన్ అలాంటి కఠిన  వ్యాఖ్యలు చేయడం సరికాదన్నారు.  మీరేమైనా సల్మాన్ కు సలహా ఇస్తారా అని ప్రశ్నించినపుడు  సల్మాన్ కు  సలహా ఇవ్వడానికి తానెవ్వర్ని అంటూ తప్పించుకున్నారు.      
 
  దంగ‌ల్ ఫిల్మ్ పోస్ట‌ర్ విడుద‌ల సంద‌ర్భంగా ఆమిర్ ఖాన్ సోమవారం  మీడియాతో మాట్లాడారు.   కాగా  సుల్తాన్ ఫిల్మ్‌లో రెజ్లర్ గా న‌టిస్తున్న స‌ల్మాన్ త‌న పాత్ర గురించి ప్రస్తావిస్తూ షూటింగ్ ముగిసిన త‌ర్వాత త‌న ప‌రిస్థితి అత్యాచారానికి గురైన మ‌హిళ‌లా ఉంద‌ని వ్యాఖ్యానించడం దేశ‌వ్యాప్తంగా  దుమారాన్ని రేపింది.  ఈ క్రమంలో పలువురు బాలీవుడ్ ప్రముఖులు, సన్నిహితులు  అలా  విభిన్నంగా స్పందించారు. అలా  నోరు జారడం మంచిది కాదని ఒకరంటే.. మీడియా అనవసర రాద్దాంతం   చేస్తోందని మరికొందరు వ్యాఖ్యానించారు.
 దీనిపై జాతీయ మహిళా కమిషన్,ఇతర మహిళా సంఘాలు సీరియస్ గా స్పందించాయి. అనుచిత వ్యాఖ్యలు చేసిన  సల్మాన్ క్షమాపణ చెప్పాలని డిమాండ్ చేశాయి. అయితే  సారీ చెప్పేందుకు  సల్మాన్ నిరాకరించి లైట్ తీసుకున్న  సంగతి తెలిసిందే.