ఐటీడీఏలో అవినీతి రాజ్యం
 
      కాంట్రాక్టర్ల బిల్లులు నెలల తరబడి ఆలస్యం
 
      బిల్లు అడిగితే.. మెజర్‌మెంట్ బుక్ పోరుుందని సమాధానం
 
      చేయి తడిపిన వారికి వెంటనే మంజూరు
 
      నిబంధనలు సైతం బేఖాతరు
 
      అర్హత లేని సిబ్బందికి అదనపు బాధ్యతలు
 
  సాక్షి, హన్మకొండ: ఏజెన్సీ ప్రాంతంలో గిరిజనాభివృద్ధి సంస్థ ఇంజనీరింగ్ విభాగం.. ఉపాధి హామీ, ఇంటిగ్రేటెడ్ యాక్షన్ ప్లాన్ తదితర పథకాల ద్వారా ఏటా సగటున 100 కోట్ల రూపాయల పనులను చేపడుతోంది. ఈ పనులు నాణ్యతతో.. సకాలంలో జరిగేలా చూడటం అధికారుల బాధ్యత. కానీ, ఈ విభాగంలోని కార్యనిర్వహణాధికారి మాత్రం అసలు పనులను గాలికొదిలేసి.. అక్రమ సంపాదనే లక్ష్యంగా పెట్టుకున్నారన్న ఆరోపణలు వెల్లువెతున్నాయి.
 
 తమకు అనుకూలంగా ఉన్న కాంట్రాక్టర్లకే పనులు కట్టబెడుతున్నారు. ఇందుకు అడ్డుగా ఉన్న నిబంధనలను సైతం బేఖాతర్ చేస్తున్నారు. ఈ తరహా  పనులు చేసేందుకు సదరు అధికారి.. ఉద్యోగుల్లో తనదైన వర్గాన్ని కూడా ఏర్పాటు చేసుకున్నారు. రెగ్యులర్ ఉద్యోగులకు విధులు అప్పగించకుండా అర్హత లేని సిబ్బందికి అదనపు బాధ్యతలు కట్టబెట్టడం చూస్తే ఈ ఆరోపణలకు బలం చేకూరుతోంది.   
  
 రెగ్యులర్‌కు నో..
 
 ప్రస్తుతం ఒక ఎగ్జిక్యూటివ్ ఇంజనీర్‌తో పాటు మరో ఇద్దరు రెగ్యులర్ అసిస్టెంట్ ఇంజనీర్లు ఉన్నారు. ఇద్దరు అసిస్టెంట్ ఇంజనీర్ల ద్వారా పనులను పర్యవేక్షించాల్సిన ఈఈ ఇందుకు విరుద్ధంగా వ్యవహరిస్తున్నారు. రెగ్యులర్ ఉద్యోగులను పక్కన పెట్టారు. రెగ్యులర్ ఉద్యోగులకు అప్రధాన్య పోస్టులకు పంపించడంతో పాటు నెలల తరబడి ఒక్కటంటే.. ఒక్క పనీ అప్పగించలేదు.
 
 ఆఖరికి మేడారం జాతర సందర్భంగా ఇతర జిల్లాలో ఉన్న ఉద్యోగులు వచ్చి ఇక్కడ విధులు నిర్వహిస్తే... సదరు అధికారికి ఇక్కడ పని లేకుండా పోయింది. దీనిపై ఆ ఉద్యోగి కాళ్లకు చెప్పులరిగేలా తిరిగి చివరికి క్వాలిటీ కంట్రోల్‌కు మారిపోయారు. మరో అధికారికి ఇప్పటికీ సరైన పనిలేదు. రెగ్యులర్ ఉద్యోగులు చేయాల్సిన విధులను నిబంధనల విరుద్ధంగా నాన్ మస్టర్ రోల్(ఎన్‌ఎంఆర్)లో తాత్కాలిక ప్రాతిపదికన పనిచేస్తున్న ఉద్యోగులకు  అదనపు బాధ్యతలు అప్పగించారు. జాతర పనులతో పాటు ఈ ఇంజనీరింగ్ విభాగంలో ఆధ్వర్యంలో కోట్లాది రూపాయల వ్యయంతో చేపట్టిన పనుల పర్యవేక్షణ, మెజర్‌మెంట్ బాధ్యతలను అదనంగా కట్టబెట్టారు.
  
 ఎన్‌ఎంఆర్‌లదే రాజ్యం
  
 తమకు కీలక బాధ్యతలు అప్పజెప్పడంతో ఎన్‌ఎమ్‌ఆర్(నాన్‌మస్టర్ మస్టర్ రోల్) ఉద్యోగులు నిబంధనలను తుంగలో తొక్కి స్వలాభమే పరమావధిగా పని చేస్తున్నారు. వారు చెప్పినట్లుగా వినని కాంట్రాక్టర్లను ముప్పు తిప్పలు పెడుతున్నారు. సకాలంలో బిల్లులు డ్రా చేయకుండా ఇబ్బందులకు గురిచేస్తున్నారు. ప్రభుత్వం చేపట్టే నిర్మాణాలకు సంబంధించి ఎంతో కీలకమైన మెజర్‌మెంట్ బుక్ రికార్డులను సైతం తారుమారు చేస్తున్నారు. తాడ్వాయి మండలంలో బోర్లు వేసిన ఓ కాంట్రాక్టరుకు బిల్లులు చెల్లించకుండా ఆరు నెలలుగా తిప్పుకుంటున్నారు.
 
 ఇదేమని అడిగితే.. నీ మెజర్‌మెంట్ బుక్ పోయిందంటూ నిర్లక్ష్యంగా సమాధానం చెప్పారు. అప్పులు తెచ్చి  లక్షలాది రూపాయల వ్యయంతో బోర్లు వేశానని, నెలల తరబడి బిల్లు చెల్లించకపోవడంతో వడ్డీ పెరిగిపోతున్నదని, తన కుటుంబం వీధిన పడుతుందంటూ సదరు కాంట్రాక్టరు ఉన్నతాధికారులకు లిఖిత పూర్వకంగా ఫిర్యాదు చేశారు. ఇలా చాలా మంది కాంట్రాక్టర్లు బాధితులుగా మారారు. జంగాలపల్లి, లక్నవరం వద్ద రోడ్డు పనులు నిర్వహించిన కాంట్రాక్టరుకు రూ.14 లక్షల బిల్లులు ఏడాది కాలంగా ఆగిపోయాయి.
  
 ఇదేమని అడిగితే.. ఆయనకు కూడా నీ మెజర్‌మెంట్ బుక్ పోయింది అంటూ సమాధానం చెప్పారు. ఇప్పటికే లక్షలాది రూపాయలు ఖర్చు చేశాం. గట్టిగా అడిగితే ఆ డబ్బులు ఆగిపోతాయేమోననే భయంతో కాంట్రాక్టర్లు మిన్నకుండిపోతున్నారు.
  
 ఇల్లే.. ఆఫీసు
  
 కార్యాలయంలో చేపట్టిన పనులను సదరు అధికారిణి ఇంటి నుంచి చక్కబెడుతుండడం వల్లే ఫైళ్లు మాయం అవుతున్నాయని సంస్థలో పనిచేసే ఉద్యోగులే చెప్పుకుంటున్నారు. ఎన్‌ఎంఆర్ ఉద్యోగులు అన్ని ఫైళ్లను ఏటూరునాగారం కార్యాలయం నుంచి హన్మకొండలో ఉన్న సదరు అధికారి ఇంటికి తీసుకురావడం, అక్కడే చేతులు తడిపే పనులు చక్కబెట్టడం జరుగుతోంది. ఇందుకు సహకరించని పక్షంలో వారి మెజర్‌మెంట్ బుక్స్ మాయమైందంటూ కాంట్రాక్టర్లను నెలల తరబడి బిల్లుల కోసం తిప్పుకుంటున్నారు.
 
 కీలకమైన మెజర్‌మెంట్ బుక్స్ పోవడంపై కార్యనిర్వాణాధికారికే నేరుగా ఫిర్యాదు చేసినా ఇసుమంతైనా చలనం లేదని కాంట్రాక్టర్లు అంటున్నారు. అధికారుల స్వార్థపూరిత వైఖరి కారణంగా ఇంజనీరింగ్ విభాగంలో పనులు సకాలంలో జరగడం లేదు. అంతేకాదు గిరిజనుల అభ్యున్నతికి ఉపయోగపడాల్సిన ప్రజాధనం పక్కదారి పడుతోంది. ఇప్పటికే లోకాయుక్త విచారణ ప్రారంభమైనందున... కలెక్టర్, ఐటీడీఏ పీఓ సైతం ఈ అంశాలపై దృష్టి సారించాల్సిన అవసరం ఉంది.
  


   ని‘బంధనాల్లో’ పథకం
  అడ్డంకిగా ఇంటిగ్రేటెడ్ యాక్షన్‌ప్లాన్
  ఏడాది ముగుస్తున్నా కదలని యూనిట్లు
  
  ఒంగోలు కలెక్టరేట్, న్యూస్‌లైన్:
  పశుక్రాంతి పథకం పశు‘భ్రాంతి’గా మారింది. ని‘బంధనాల్లో’ చిక్కుకొని రైతుల దరిచేరడం లేదు. ఈ ఏడాది అమలులోకి వచ్చిన ఇంటిగ్రేటెడ్ యాక్షన్ ప్లాన్ ఈ పథకానికి ప్రతిబంధకంగా మారింది.  ప్రస్తుత ఆర్థిక సంవత్సరం ముగుస్తున్నా యూనిట్లు మాత్రం ముందుకు కదలడం లేదు. జిల్లాకు 874 యూనిట్లు మంజూరు చేస్తే పదుల సంఖ్యకు మించకపోవడం పథకం అమలు తీరుకు అద్దం పడుతోంది. పథకానికి సంబంధించి రూ 3.16 కోట్ల నగదు కేటాయించినా పూర్తి స్థాయిలో వినియోగం కాక మూలుగుతున్నాయి. చివరకు అది రైతుల దరి చేరడం భ్రాంతిగానే మిగులుతోంది.
  
  దారిద్య్ర రేఖకు దిగువన ఉండి పాడి పరిశ్రమపై ఆధారపడిన రైతులను ప్రోత్సహించాలన్న ఉద్దేశంతో పశుక్రాంతి పథకానికి శ్రీకారం చుట్టారు. పాడి పరిశ్రమ రంగాన్ని ప్రోత్సహించడం, రైతులు ఆర్థికంగా నిలదొక్కుకునేలా చూడటం, పాల దిగుబడి మరింత పెంపొందించడం, తలసరి పాల వినియోగం పెంచడం ఈ పథకం ముఖ్యోద్దేశం. మొదట్లో ఈ పథకంపై రైతులు పెద్దగా ఆసక్తి చూపలేదు. హర్యానా, కర్ణాటక వంటి ప్రాంతాల నుంచి పశువులను తీసుకురావడం, అవి ఇక్కడి వాతావరణానికి అలవాటు పడకపోవడంతో రైతులు ముందుకు రాలేదు. క్రమేణా అవి కూడా ఇక్కడి వాతావరణానికి అలవాటు పడుతూ వస్తున్నాయి. హర్యానా నుంచి మొర్రా జాతి గేదెలు, కర్ణాటక  నుంచి జెర్సీ, హెచ్‌ఎఫ్ ఆవులను కొనుగోలు చేసి ఇక్కడి రైతులకు అందిస్తున్నారు. ఆ రెండు ప్రాంతాలకు చెందిన జాతుల్లో పాల ఉత్పత్తి ఎక్కువగా ఉండటంతో ప్రభుత్వం వాటికే ప్రాధాన్యం ఇస్తోంది.
  
  పశుక్రాంతి కింద మూడు రకాల యూనిట్లను రైతులకు అందిస్తున్నారు. రెండు గేదెలతో లక్ష రూపాయల విలువైన యూనిట్‌ను ఇస్తున్నారు. ఇందులో 50 శాతం సబ్సిడీ ఇస్తున్నారు. అంటే రైతు 50 వేలు చెల్లిస్తే సరిపోతుంది. దాణా, రవాణా, బీమా ఉచితంగా అందిస్తారు. మినీ డెయిరీ కింద ఐదు గేదెలున్న యూనిట్‌ను 2.50 లక్షల రూపాయలతో అందిస్తున్నారు. ఇందులో 25 శాతం సబ్సిడీ. మిగిలిన 75 శాతం రైతులు చెల్లించాల్సి ఉంటుంది. ఈ యూనిట్‌కు సంబంధించి దాణా, రవాణా, బీమా ఉచితంగా ఇవ్వడంతోపాటు సబ్సిడీపై గడ్డి కోసే యంత్రాన్ని కూడా అందిస్తున్నారు. మూడవది మీడియం డెయిరీ యూనిట్. ఈ యూనిట్ కింద 20 గేదెలు ఇస్తారు. వాటి విలువ 10 లక్షల రూపాయలు. రూ2.50 లక్షలను సబ్సిడీ కింద ఇస్తారు. దాణా, రవాణా, బీమా ఉచితంగా ఇవ్వడంతోపాటు సబ్సిడీపై గడ్డి కోసే యంత్రాన్ని అందిస్తారు.
  
  సీన్ మారింది...
  ఇంటిగ్రేటెడ్ యాక్షన్ ప్లాన్‌తో ఒక్కసారిగా సీన్ మారిపోయింది. గతంలో ఏ ప్రాంతానికి చెందిన వారినైనా లబ్ధిదారులుగా ఎంపిక చేసుకునే వెసులుబాటు ఉండేది. ప్రస్తుతం అలాంటి పరిస్థితులు కనిపించడం లేదు. ఒక్కో మండలంలో ఒక్క గ్రామాన్ని ఇంటిగ్రేటెడ్ యాక్షన్ ప్లాన్ కింద చేర్చడం వల్ల ఆ మండలంలోని మిగిలిన గ్రామాలను దూరం చేసినట్లయింది. దాంతో ఆ గ్రామంలోనే లబ్ధిదారులను గుర్తించాల్సి వస్తోంది. ఒకవైపు నిధులు పుష్కలంగా ఉన్నప్పటికీ లబ్ధిదారులు కరువయ్యారు. ఇంటిగ్రేటెడ్ యాక్షన్ ప్లాన్ మంచి ఉద్దేశంతో పెట్టినప్పటికీ పశుక్రాంతి వంటి పథకాలకు మాత్రం విఘాతంగా మారుతోంది. గ్రామాలు మారుకుంటూ తమ గ్రామానికి వచ్చేసరికి అప్పటి వరకు ఆసక్తి కనబరచిన రైతులు కూడా వెనక్కు తగ్గుతున్నారు.