‘‘పెళ్లంటూ చేసుకుంటే ప్రేమ వివాహమే చేసుకుంటాను’’ అని మీడియా సాక్షిగా చెప్పేశారు తమన్నా. అక్షయ్‌కుమార్‌కు జోడీగా ఆమె నటించిన ‘ఇట్స్ ఎంటర్‌టైన్‌మెంట్’ చిత్రం ఆగస్ట్ 8న విడుదల కానుంది. ఈ సందర్భంగా ఆ సినిమా ప్రచారంలో జోరుగా పాల్గొంటున్నారీ మిల్కీ బ్యూటీ. ఇందులో భాగంగానే ఓ ఛానల్‌కి ఇచ్చిన ఇంటర్‌వ్యూలో తన పెళ్లి గురించి ఆసక్తికరమైన విషయాలు ప్రస్తావించారు. ‘‘పెళ్లి మీద నాకు కచ్చితమైన అభిప్రాయం ఉంది. అమ్మానాన్నలు చూపించిన అబ్బాయిని ఇష్టం ఉన్నా, లేకపోయినా పెళ్లి చేసేసుకొని, సర్దుకుపోయి కాపురం చేయడం అనే విధానానికి నేను విరుద్ధం.
  
   ఎక్కడైనా రాజీ పడొచ్చుకానీ, జీవిత భాగస్వామిని ఎంచుకునే విషయంలో మాత్రం రాజీ పడకూడదు. అందుకే... నేను ముమ్మాటికీ ప్రేమ వివాహమే చేసుకుంటాను. అయితే ఇంట్లోవారికీ, మీకూ చెప్పే చేసుకుంటాను కానీ, దొంగచాటు పెళ్ళి మాత్రం చేసుకోను’’ అని కుండ బద్దలుకొట్టినట్టు చెప్పారు తమన్నా. ‘ఇట్స్ ఎంటర్‌టైన్‌మెంట్’ సినిమా గురించి మాట్లాడుతూ -‘‘పేరుకు తగ్గట్టుగానే ఆద్యంతం వినోదాత్మకంగా ఉంటుందీ సినిమా. పొట్టచెక్కలయ్యేట్టు నవ్విస్తుంది. అయితే... భావోద్వేగపూరితమైన సన్నివేశాలు కూడా ఉంటాయి.
  
   ఇంతవరకూ నా కెరీర్‌లో చేయనటువంటి భిన్నమైన పాత్రను ఇందులో చేశాను. ఇక అక్షయ్‌కుమార్‌తో నటించడం మాత్రం నా జీవితంలో మరిచిపోలేను. దాదాపు పాతికేళ్ల కెరీర్ ఆయనది. కానీ... ఇప్పటికీ తొలి సినిమాకు కష్టపడ్డట్టే కష్టపడతారు. ఈ సినిమా పుణ్యమా అని ఆయన నుంచి చాలా విషయాలు నేర్చుకున్నాను. తెల్లవారు జామునే నిద్ర లేస్తారాయన. జీవితాన్ని ఎంతో క్రమశిక్షణతో సాగిస్తుంటారు. అందుకే... ఇప్పటికీ అంత ఫిట్‌గా ఉన్నారు’’ అని చెప్పుకొచ్చారు తమన్నా.
  


 వెండితెరపై ఇప్పటి వరకు బికినీలు ధరించడం, ముద్దు సన్నివేశాలు వంటివాటిలో నటించలేదని భవిష్యత్తులో కూడా నటించనని మిల్కీ బ్యూటీ తమన్నా బాటియా స్పష్టం చేశారు. తమన్నా, ఇషా గుప్తా, బిపాసా బసులు నటించిన బాలీవుడ్ చిత్రం 'హమ్ షకల్స్' త్వరలో విడుదల కానుంది. ఈ నేపథ్యంలో శుక్రవారం తమన్నా ముంబైలో మాట్లాడింది. 'హమ్ షకల్స్' చిత్రంలోని ఓ సన్నివేశంలో హీరోయిన్లు బికినీ ధరించి నటించాల్సి వచ్చిందని చెప్పారు.
  
 అయితే ఆ సన్నివేశంలో తాను మాత్రం షార్ట్స్ ధరించి నటించానని చెప్పారు. 'హమ్ షకల్స్' చిత్రంలో సైఫ్ అలీఖాన్ సరసన, అలాగే 'ఇట్స్ ఎంటర్టైన్మెంట్' చిత్రంలో అక్షయ్ కుమార్ సరసన నటిస్తున్నానని తెలిపారు. ఇద్దరు ఎంతో పరిణితి చెందిన మంచి నటులని తెలిపారు. అలాగే ఇద్దరికి నటనలో ఎంతో తేడా ఉందన్నారు. ఓంకార, హమ్తుమ్, ఏజెంట్ వినోద్ చిత్రాలలో సైఫ్ నటన ఆమోఘమని తమన్నా వెల్లడించింది.


   ‘‘ఆరోగ్యమే మహాభాగ్యం అంటారు. ఆ విషయాన్ని నేను బాగా నమ్ముతాను. అందుకే, ఆరోగ్యం గురించి బాగా శ్రద్ధ తీసుకుంటాను’’ అన్నారు తమన్నా. అకాల భోజనం, మితిమీరిన ఆహారం కూడదని కూడా సలహా ఇస్తున్నారామె. ఈ మిల్క్ బ్యూటీ సినిమాల్లోకొచ్చి దాదాపు ఏడేళ్లయ్యింది. ఇన్నేళ్లల్లో తమన్నా శరీరాకృతిలో పెద్దగా మార్పు రాలేదు. సన్నగా ఉండటం కోసం ఆల్‌మోస్ట్ కడుపు మాడ్చేసుకుంటారా? అని అడిగినప్పుడు పై విధంగా స్పందించారామె. బరువు పెరుగుతామని కొంతమంది సరిగ్గా తినరని, అలా చేస్తే ఆరోగ్యం పాడవుతుందని, ఆరోగ్యానికి మంచివి ఎంచుకుని తింటే మంచిదని సూచించారామె. అది మాత్రమే కాదు.. చెడు ఉంటేనే మంచి విలువ తెలుస్తుందని చెబుతూ -‘‘ఈప్రపంచంలో ఎవరూ పర్‌ఫెక్ట్ కాదు. ప్రతి ఒక్కరిలోనూ లోపాలు ఉంటాయి. నాలో కూడా కొన్ని లోపాలున్నాయి. అవి ఎవరికీ హాని చేయని లోపాలు. అందుకే, వాటిని సరిదిద్దుకోవడానికి ప్రయత్నం చేయను. ఎందుకంటే, మంచి పక్కన చెడు ఉంటేనే.. మంచి బాగా ఎలివేట్ అవుతుంది’’ అని తెలిపారు.
  
   ప్రస్తుతం హిందీలో ‘ఇట్స్ ఎంటర్‌టైన్‌మెంట్’, ‘హమ్ షకల్స్’ చిత్రాల్లో నటిస్తున్నారామె. తెలుగులో ‘ఆగడు’, ‘బాహుబలి’ చిత్రాలు చేస్తున్నారు. ఈ ఏడాది తమిళ చిత్రాలపై కూడా దృష్టి పెట్టాలనుకుంటున్నానని తమన్నా పేర్కొన్నారు. జనరల్‌గా మీకెలాంటి సినిమాలంటే ఇష్టం అనే ప్రశ్న తమన్నా ముందుంచితే -‘‘నాకు పాపులర్ సినిమాల్లో నటించడం ఇష్టం. పాపులర్ సినిమాలంటే అన్ని వర్గాలవారూ చూడదగ్గవి అన్నమాట. ఆ తరహా సినిమాల్లో నటించడంవల్ల ప్రేక్షకులందరికీ దగ్గరవ గలుగుతాం అని నా ఫీలింగ్’’ అని చెప్పారు.


  ఆ అందమైన భవంతి పేరు ‘ఎమ్‌ఐ6’. లండన్‌లోని థేమ్స్ నదీ తీరాన ఉందా భవంతి. భద్రతా కారణాల దృష్ట్యా ఎవర్ని పడితే వాళ్లని అందులోకి అనుమతించరు. కానీ, దర్శకుడు సాజిద్‌ఖాన్ తన పరపతిని ఉపయోగించి అనుమతి సంపాదించారు. ప్రస్తుతం ఆయన దర్శకత్వం వహిస్తున్న ‘హమ్‌షకల్స్’ చిత్రానికి సంబంధించిన కొన్ని కీలక సన్నివేశాలను ఆ భవంతిలో చిత్రీకరించాలనుకున్నారాయన. సైఫ్ అలీఖాన్, రితేష్ దేశ్‌ముఖ్, రామ్‌కపూర్, బిపాసా బసు, తమన్నా, ఇషా గుప్తా ముఖ్య తారలుగా ఈ చిత్రం రూపొందుతోంది.
  
   వీళ్ల కాంబినేషన్‌లోనే సీన్స్ తీయాలనుకున్నారు. ఎమ్‌ఐ6లోని 14వ అంతస్తులో సన్నివేశాల చిత్రీకరణకు మొత్తం రంగం సిద్ధమైంది. ఇక, యూనిట్ సభ్యులందరూ ఆ అంతస్తుకి చేరుకోవాలన్నమాట. అందరూ హుషారుగా లిఫ్ట్ దగ్గరకు వెళ్లారు. కట్ చేస్తే... ‘దిస్ లిఫ్ట్ ఈజ్ అండర్ మెయిన్‌టెనన్స్’ అనే బోర్డ్ వెక్కిరించింది. ఇక, గులాబీ బాల తమన్నా, బ్లాక్ బ్యూటీ బిపాసా బసు, క్యూట్ గాళ్ ఇషా గుప్తా పరిస్థితి ఎలా ఉంటుందో అర్థం చేసుకోండి. ఎత్తు మడమల చెప్పులతో 14 అంతస్తులు ఎక్కలేమని ఈ లలనామణులు భావించారు.
  
   చేసేదేముంది? ఒక చేత్తో చెప్పులు పట్టుకుని, ఆయాస పడుతూ గమ్యం చేరుకున్నారు. సైఫ్, రితేష్ తదితరులకూ ఈ భవంతి ఓ రేంజ్‌లో చుక్కలు చూపించిందట. ఆయాసం తీరి, కొంచెం కూల్ అయిన తర్వాత ఇదిగో... ఇక్కడ ఫొటోలో ఉన్నట్లు నవ్వులు చిందించిందీ బృందం. ఇదిలా ఉంటే.. ‘హిమ్మత్‌వాలా’తో బాలీవుడ్‌కి బాగా దగ్గరైన తమన్నా ప్రస్తుతం ‘ఇట్స్ ఎంటర్‌టైన్‌మెంట్’ అనే చిత్రంలో నటిస్తోంది. ఇది పూర్తయ్యేలోపు ‘హమ్‌షకల్స్’లో అవకాశం రావడం, అందులోనూ మంచి పాత్ర చేస్తుండటం తమన్నాకి డబుల్ ధమాకాలా ఉందట.
  


 హిమ్మత్ వాలా రీమేక్ బాక్సాఫీస్ వద్ద పరాజయం పొందడంతో తమన్నా ప్రస్తుతం అక్షయ్ కుమార్ తో నటిస్టున్న 'ఇట్స్ ఎంటర్ టైన్ మెంట్'పై గంపెడాశలు పెట్టుకుంది. ఈ చిత్రంలో అక్షయ్ కుమార్ నటన తనను ఎంతగానో ఆకట్టుకుందని తమన్నా తెలిపింది. కెమెరా ముందు అక్షయ్ నటన ను చూసి తాను మైమరిచిపోయానని తమన్నా ప్రశంసల వర్షం కురిపించింది. 
  
 ఈ చిత్రంలో అక్షయ్ నటన కన్నులకు పండగే అని తెలిపింది. అక్షయ్ తో నటించడం ఓ గొప్ప అనుభూతి అని తెలిపింది. 'ఇట్స్ ఎంటర్ టైన్ మెంట్' చిత్రం షూటింగ్ బ్యాంకాక్ లో జరిగిందని తెలిపింది. బాలీవుడ్ లో సాజిద్ ఖాన్ రూపొందిస్తున్న 'హమ్ షకల్స్' చిత్రంలో సైఫ్ ఆలీ ఖాన్ సరసన మరో చిత్రంలో తమన్నా నటిస్తోంది.