సాక్షి, హైదరాబాద్‌: ఎన్‌ఐటీ, ట్రిపుల్‌ ఐటీ, జీఎఫ్‌టీఐల్లో ప్రవేశాలకు నిర్వహించాల్సిన జాయింట్‌ ఎంట్రన్స్‌ ఎగ్జామినేషన్‌ (జేఈఈ) మెయిన్‌ దరఖాస్తుల ప్రక్రియ సెప్టెంబర్‌ 1 నుంచి ప్రారంభంకానుంది. దీనికి అవసరమైన అన్ని ఏర్పాట్లను నేషనల్‌ టెస్టింగ్‌ ఏజెన్సీ(ఎన్‌టీఏ) పూర్తి చేసింది. ఇప్పటివరకు ఈ పరీక్షను సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ) నిర్వహించగా, ఇప్పుడు ఎన్‌టీఏ ఆధ్వర్యంలో పరీక్షల నిర్వహణకు కేంద్ర ప్రభుత్వం చర్యలు చేపట్టింది. దీంతో ఎన్‌టీఏ తమ వెబ్‌సైట్‌ను (https:// www. nta. ac. in)  అందుబాటులోకి తెచ్చింది. విద్యార్థులు ఈ వెబ్‌సైట్‌ ద్వారానే ఆన్‌లైన్‌లో దరఖాస్తు చేసుకోవాలని ఎన్‌టీఏ పేర్కొంది. ఇందుకోసం రిజిస్ట్రేషన్‌ లింకును వెబ్‌సైట్‌లో అందుబాటులో ఉంచింది. రానున్న జనవరిలో నిర్వహించే జేఈఈ పరీక్ష కోసం సెప్టెంబర్‌ 1 నుంచి 30 వరకు దరఖాస్తులు స్వీకరించనుంది. ఈ పరీక్షలను 2019 జనవరి 6 నుంచి 20 వరకు నిర్వహించనుంది. ఫలితాలను జనవరి 31న విడుదల చేయనుంది. అనంతరం ఏప్రిల్‌లో రెండోసారి నిర్వహించే పరీక్ష కోసం 2019 ఫిబ్రవరి 8 నుంచి మార్చి 7 వరకు దరఖాస్తులను స్వీకరించాలని నిర్ణయించింది. ఆ పరీక్షలను ఏప్రిల్‌ 6 నుంచి 20 వరకు నిర్వహించనుంది. ఫలితాలను ఏప్రిల్‌ 30న విడుదల చేయనుంది. ఈ పరీక్షలను ఆన్‌లైన్‌లోనే నిర్వహించేలా చర్యలు చేపట్టింది. మరోవైపు యూజీసీ నెట్‌కు కూడా సెప్టెంబర్‌ 1 నుంచి 30 వరకు దరఖాస్తులను స్వీకరించేందుకు ఎన్‌టీఏ ఏర్పాట్లు చేసింది.  


 సాక్షి, హైదరాబాద్: తెలంగాణ రాష్ట్రంలో ప్రత్యేకంగా టీ ఇంటర్మీడి యెట్ బోర్డును ఏర్పాటు చేసుకున్నా.. జేఈఈ మెయిన్ దరఖాస్తుల్లో తెలంగాణ బోర్డును ప్రత్యేకంగా చూపించలేదు. దీంతో గత నెలలో దరఖాస్తు చేసే సమయంలో విద్యార్థులు ఏపీ ఇంటర్ బోర్డు పేరుమీదే దరఖాస్తు చేసుకున్నారు. ప్రస్తుతం జేఈఈ మెయిన్ దరఖాస్తుల్లో పొరపాట్ల సవరణకు సెంట్రల్ బోర్డు ఆఫ్ సెకండరీ ఎడ్యుకేషన్ (బోర్డు) అవకాశం కల్పించింది. ఈ నెల 31  వరకు గడువు ఇచ్చింది. ప్రస్తుతం బోర్డు పరి దిని మార్చుకునేందుకు విద్యార్థులు చూస్తున్నా ఆన్‌లైన్ దరఖాస్తుల్లో తెలంగాణ ఇంటర్ బోర్డును చూపించడం లేదు.
  
  ఈ నేపథ్యంలో  జేఈఈ మెయిన్ ఆన్‌లైన్ దరఖాస్తుల్లో తెలంగాణ ఇంటర్మీడియెట్ బోర్డును చూపించాలని ఈ నెల 28న సీబీఎస్‌ఈకి లేఖ రాసేందుకు బోర్డు అధికారులు సిద్ధమయ్యారు. సవరణల గడువును పెంచాలని కూడా లేఖలో కోరనున్నారు. మెయిన్‌తోపాటు జేఈఈ అడ్వాన్స్‌డ్‌లోనూ తెలంగాణ ఇంటర్మీడియెట్ బోర్డును ప్రత్యేకంగా చూపించేలా ఆప్షన్ పొందుపరచాలని సీబీఎస్‌ఈని కోరనున్నారు.