పాత పెన్షన్‌ విధానాన్ని పునరుద్ధరించాలని డిమాండ్‌ చేస్తూ  రైల్వేతోపాటు కేంద్ర, రాష్ట్ర ప్రభుత్వ ఉద్యోగులు సమ్మెకు దిగనున్నారు. 2024, మే ఒకటి నుంచి చేపట్టబోయే ఈ సమ్మెలో 28 లక్షల కేంద్ర ప్రభుత్వ ఉద్యోగులు, మూడు కోట్లకుపైగా రాష్ట్ర ప్రభుత్వ ఉద్యోగులు, వివిధ కార్మిక సంఘాలు పాల్గొననున్నట్లు తెలిపాయి.  ప్రస్తుతం అమవుతున్న జాతీయ పెన్షన్ స్కీమ్ (ఎన్‌పీఎస్) స్థానంలో పాత పెన్షన్ స్కీమ్ (ఓపీఎస్)ని పునరుద్ధరించాలని ఈ ఉద్యోగులంతా డిమాండ్ చేస్తున్నారు. మీడియాకు అందిన సమాచారం ప్రకారం పాత పెన్షన్ స్కీమ్ పునరుద్ధరణ జాయింట్ ఫోరమ్(జేఎఫ్‌ఆర్‌ఓపీఎస్‌) ఢిల్లీలో నిర్వహించిన ఒక సమావేశంలో ఈ నిర్ణయం తీసుకుంది. ఈ సమావేశంలో మార్చి 19న ప్రభుత్వానికి సమ్మె నోటీసు ఇవ్వాలని ఫోరమ్‌ సభ్యులు ఏకగ్రీవంగా తీర్మానించారు. ఈ అంశంపై కేంద్రంతో జరిపిన చర్చలు విఫలమవడంతో సమ్మెకు దిగాలని నిర్ణయించినట్లు ఫోరమ్‌ కన్వీనర్, ఆల్ ఇండియా రైల్వేమెన్ ఫెడరేషన్ (ఏఐఆర్‌ఎఫ్‌) ప్రధాన కార్యదర్శి శివ గోపాల్ మిశ్రా తెలిపారు.

శ్రమ నుంచి శ్రామికుల్ని, శ్రామికుల నుంచి శ్రమను ఎలా అయితే విడదియ్యలేమో అలా ప్రపంచం నుంచి శ్రమను, శ్రామికులను విడదియ్యలేం. శ్రమలేందే శ్రామికులు లేరు; శ్రామికులు లేందే శ్రమలేదు; శ్రమ, శ్రామికులు లేందే ప్రపంచం లేదు. మనిషికి ప్రపంచం ఆధారం; ప్రపంచానికి శ్రామికుడు ఆధారం. ప్రతి మనిషికి శ్రామికుడి అవసరం ఉంది; ప్రతిమనిషీ శ్రామికుడు అవ్వాల్సిన అవసరం ఉంది. మన ఈ ప్రపంచం మనకు ఇవాళ ఇలా ఉందీ అంటే అది శ్రామికులు శ్రమిస్తూనే ఉన్నందువల్ల వచ్చిన ఫలితమే. శ్రమతో శ్రామికులు సృజించిన ఆకృతి ప్రపంచం. శ్రమతో, శ్రమలో శ్రామికుడు జీవనం చేస్తున్నందువల్లే ప్రపంచానికి స్థితి, ద్యుతి ఉన్నాయి. అవి మనకు ఆలవాలమూ అయినాయి. మన మనుగడ సాగేందుకు అవి మనతో, మనకై ఉన్నాయి. ‘శ్రమైక జీవన సౌందర్యానికి సమానమైనది లేనేలేదు’ అని కవి శ్రీశ్రీ అన్నారు. శ్రమైకజీవనం సౌందర్యమై ప్రపంచం మొత్తానికి సౌందర్యాన్ని తీసుకు వచ్చింది! శ్రమ అన్నదాన్ని లుప్తం చేసి ఊహించుకుంటే ప్రపంచం వికృతంగా ఉంటుంది. శ్రమైక జీవనం అన్నది సౌందర్యం మాత్రమేనా? కాదు. శ్రమైకజీవనం ఈ ప్రపంచానికి లభించిన సౌభాగ్యం కూడా. అనాది గా ప్రపంచం పొందిన ప్రగతికి కారణం శ్రామికుడు. శ్రామికుడు ప్రపంచానికి సౌందర్యప్రదాత. శ్రామికుడు ప్రపంచానికి సౌభాగ్యప్రదాత. అటువంటి శ్రామికుడికి, అతడి శ్రమకు న్యాయం జరుగుతోందా? అనాదిగానే అది లేదు అన్నది క్షేత్ర వాస్తవంగా మనకు ప్రస్ఫుటంగా తెలుస్తూనే ఉంది.‘మన ప్రపంచంలో చాలా విషయాలు అన్యాయం; / పత్తిని నాటని వాళ్లు శ్రేష్ఠమైన పత్తి బట్టలు కట్టుకుంటారు. / అంతే కాదు పొలంలో పని చెయ్యని వాళ్లు తెల్లటి బియ్యం తింటారు’ అని అంటూ చైనాలోని ఒక అజ్ఞాత యూనాన్‌ జానపద కవి వందలయేళ్ల క్రితమే ఆవేదనను వ్యక్తపరిచాడు. చిందిన చెమట కు అందిన ఫలం చాలని స్థితి ఎప్పటి నుంచో ఉంది. ఈ పరిస్థితి ఇకనైనా మారాలి. శ్రమకు, శ్రామికుడికి తగిన ఫలం దక్కాలి. ‘మేఘాలు తియ్యటి నీరును ఇచ్చినట్టుగా, తేనెటీగలు తేనెను ఇచ్చినట్టుగా నువ్వు పశువుల్లో పాలను సృష్టించావు. అదే విధంగా పగలంతా శ్రమించిన శ్రామికుడికి ధాన్యాదిరూపంలో సంపదను ఇవ్వు’ అంటూ వేదంలో ఒక దైవ ప్రార్థన ఉంది. శ్రామికుడికి న్యాయం జరగాలన్న ఆకాంక్ష కూడా ఎప్పటినుంచో వస్తూనే ఉంది. ఇకనైనా శ్రమకు, శ్రామికులకు న్యాయం సాకారం కావాలి. ఏడాదిలో ఏ ఒక్కరోజునో శ్రామికుల రోజు అనీ, ఆ రోజున ఏదో హడావిడి చేసేసి, ఉపన్యాసాలు ఇచ్చేసి ఆ తరువాత శ్రామికుల్ని నిర్లక్ష్యం చెయ్యడం ఇక చాలు. ప్రతిరోజూ శ్రామికులకు, శ్రమకు న్యాయం చేస్తూ మనం మన మనుగడను సౌందర్యవంతమూ, సౌభాగ్యవంతమూ చేసుకుందాం. శ్రామికులకు, శ్రమకు గౌరవాన్ని, మన్నను ఇస్తూ మనల్ని మనం గౌరవించుకుందాం; మనకు మనం మన్ననను కలిగించుకుందాం. ఏ ఒక్కరోజో శ్రామికుల రోజు అవదు. ప్రతిరోజూ శ్రామికుల రోజే. సూర్యోదయంతో మొదలయ్యే ప్రతి దినమూ శ్రామికుల దినమే! శ్రమ అన్నది చిందే దినమే! శ్రమ చిందనిదే, శ్రామికులు పని చెయ్యనిదే ఏ దినమూ గడవదు కదా? ఆది, సోమ, మంగళ, బుధ, గురు, శుక్ర, శని అంటూ ఒక్కో పేరుతో ఒక్కో దినం ఉంది. ఏ పేరుతో ఉన్న దినమైనా శ్రమ, శ్రామికుల అభినివేశంతోనే అది దినంగా నడుస్తుంది, గడుస్తుంది. ప్రతిదినమూ శ్రామికుల దినమే! – రోచిష్మాన్‌

‘కార్మిక దినోత్సవం’ సందర్భంగా బాలీవుడ్‌ ‘మిస్టర్‌ పర్ఫెక్షనిస్టు’ ఆమీర్‌ ఖాన్‌, హీరోయిన్‌ అలియా భట్‌ మహారాష్ట్రలోని లాథూర్‌లో నిర్వహించిన ‘మహాశ్రమదాన్‌’ కార్యక్రమంలో పాల్గొన్నారు. ‘పాని’ ఫౌండషన్‌ అధ్వర్యంలో నిర్వహించిన ఈ శ్రమదానంలో ఆమీర్‌, అలియా పాల్గొన్న ఫోటోలు ప్రస్తుతం ఇంటర్నెట్‌లో వైరల్‌ అయ్యాయి. లాథూర్‌లో నీటి ఎద్దడి ఎంత తీవ్రంగా ఉంటుందో అందరికి తెలిసిన విషయమే. లాథూర్‌ గ్రామ ప్రజల దాహాన్ని తీర్చడానికి రైలు​ బోగీల ద్వారా నీటిని సరఫరా చేసిన విషయం విదితమే. ఇలాంటి కరువు ప్రాంతంలో వర్షపు నీటిని ఒడిసిపట్టి భవిష్యత్‌ అవసరాలకు ఎలా వినియోగించుకోవచ్చో ప్రజలకు తెలియజేయడానికి ‘పాని’ సంస్థ ఈ శ్రమదానం కార్యక్రమాన్ని నిర్వహించింది. మే, 1న దేశమంతటా ‘కార్మిక దినోత్సవం’ జరుపుకుంటుంటే మహారాష్ట్రీయులు మాత్రం ‘కార్మిక దినోత్సవం’తో పాటు ‘మహారాష్ట్ర దివాస్‌’ను కూడా జరుపుకుంటారు. ఈ పర్వదినం సందర్భంగా గ్రామీణులతో భుజం భుజం కలిపి శ్రమదానం చేసి కరువుకు వ్యతిరేకంగా పోరాడి ‘జలమిత్రులు’గా మారండని ఆమీర్‌ఖాన్‌ ఏప్రిల్‌ 19న పూణేలో జరిగిన ఓ కార్యక్రమంలో పిలుపునిచ్చారు. పాని ఫౌండేషన్‌ ఆధ్వర్యంలో మే 1 న ఈ కార్యక్రమాన్ని నిర్వహిస్తామని తెలిపారు. దాని అములులో భాగంగానే ఈ రోజు లాతూర్‌లో శ్రమదానం కార్యక్రమం నిర్వహించారు. ఈ కార్యక్రమంలో అమీర్‌ ఖాన్‌తో పాటు అలయా భట్‌ కూడా పాల్గొన్నారు. ఈ సందర్భంగా ఆమీర్‌ ఖాన్‌  మాట్లాడుతూ ‘తొలుత తీవ్రమైన కరువును ఎదుర్కొంటున్న ప్రాంతాల్లో ప్రారంభించిన ఈ కార్యక్రమాన్ని త్వరలోనే మిగతా కరువు ప్రాంతాలకు అనంతరం పట్టణాలకు కూడా విస్తరిస్తామని’ తెలిపారు. ఆమీర్‌ ఖాన్‌తో కలిసి ఇలా శ్రమదానం కార్యక్రమంలో పాల్గొనడం చాలా ఆనందంగా ఉందని అలియా భట్‌ అన్నారు. ప్రస్తుతం అలియా ‘కళంక్‌’ చిత్రంలో నటిస్తుంది. పాని ఫౌండేషన్‌..... ప్రజలకు వాటర్‌షెడ్‌ మేనేజ్‌మెంట్‌ గురించి అవగాహన కల్పించడానికి 2016 సంవత్సరంలో  ఆమీర్‌ ఖాన్‌ ఆయన సతీమణి కిరణ్‌ రావ్‌తో కలిసి ఎటువంటి లాభాపేక్షను ఆశించకుండా ఈ ‘పాని’ ఫౌండేషన్‌ను ప్రారంభించారు. ఈ ఫౌండేషన్‌ ప్రధాన ధ్యేయం జనాలకు వర్షపు నీటిని నిల్వ చేసుకోవడం ఎలా అనే అంశం గురించి అవగాహన కల్పిచండం. అందుకు గాను ఈ పాని సంస్థ ఆధ్వర్యంలో గ్రామాల మధ్య ‘వాటర్‌ కప్‌’ పోటీలను నిర్వహిస్తారు. ఈ పోటీల్లో వాటర్‌షెడ్‌ కార్యక్రమాన్ని విజయవంతంగా అమలు చేసిన గ్రామాలను గుర్తించి వాటికి బహుమతిని కూడా ఇస్తారు. మొదటి స్థానంలో నిలిచిన గ్రామానికి 75లక్షల రూపాయల నగదు బహుమతి తర్వాతి స్థానాల్లో నిలిచిని వారికి వరుసగా 50, 45లక్షల రూపాయల నగదు బహుమతిని ఇస్తారు. ఈ కార్యక్రమాన్ని ఎక్కువ మందికి చేరువచేయ్యడినికి గాను 2018, మార్చి 22 ప్రపంచ నీటి దినోత్సవం సందర్భంగా జలమిత్ర అనే నూతన కార్యక్రమాన్ని రూపొందించారు.


 కవర్ స్టోరీ
 నేడు కార్మిక దినోత్సవం
 మనిషి శ్రమను సులువు చేయడానికి పుట్టింది. మనిషి పరిశ్రమను తగ్గించడానికి పుట్టింది. మనిషి అవసరాలు తీర్చడానికి పుట్టింది. కానీ మనిషిని మింగేయడానికి పుట్టలేదు. కాని రాబోయే రోజుల్లో యంత్రం మనిషిని పక్కన పెట్టనుందా? మనిషి శ్రమను తానే చేసి మనిషిని పస్తు పెట్టనుందా? రోబోల విజృంభణతో ఆ ప్రమాదమే కనిపించనుందని విజ్ఞులు భాష్యం చెప్తున్నారు. రాబోయే రోజుల్లో, అంటే 2045 కల్లా చైనాలో 77 శాతం ఉద్యోగాలు ‘మనుషులు’ పోగొట్టుకో నున్నారు. భారత్‌లో ఈ సంఖ్య 69 శాతం అని అంచనా. అమెరికాలో ఇది కేవలం 47 శాతమే. ఎందుకంటే ఇప్పటికే అక్కడ రోబోల వాడకం ఉంది కాబట్టి.
     
 మనిషి తప్పు చేస్తాడు. తప్పుల నుంచే పాఠాలు నేర్చుకుంటాడు. అందులో నుంచే ఎదుగుతాడు. కాని యంత్రం తప్పు చేయదు. పైగా అది జీతం పెంచ మని అడగదు. సమ్మె నోటీసు ఇవ్వదు. యాజమాన్యాలు ఆరోపించినట్టుగా ‘పని ఎగ్గొట్టి’ టీలు కాఫీలు అని క్యాంటీన్లో గంటలు గంటలు గడపదు. అంతెందుకు... అది ఇంటికి పోదు. ఇంటి నుంచి రాదు. కనుక లేట్ ఎంట్రీ సమస్య కూడా ఉండదు. దానికి తెలిసింది పని చేయడమే. కనుక రోబోను ఎందుకు పెట్టుకోకూడదు? అనే ఆలోచన చాలా సంస్థల యాజమాన్యాలకు వస్తోంది. చైనాలో ‘ఫాక్స్‌కాన్’ అనే అతి పెద్ద కాంట్రాక్ట్ ఉత్పత్తి సంస్థలో పది లక్షల మంది కార్మికులు పని చేస్తున్నారు.
 
 2011లో ఆ సంస్థ పది వేల రోబోలను పనిలో విని యోగించింది. సంవత్సరానికి ముప్ఫై వేల రోబోలను పెంచుకుంటూ పోయింది. దాని వల్ల ప్రస్తుత సంవత్స రంలో భవిష్యత్ అవసరాలకు అవసరమైన పది లక్షల మంది మానవ కార్మికులను పనిలోకి తీసుకోవా ల్సిన అవసరం లేదని కంపెనీ తేల్చింది. అంటే అంతమంది చైనా కార్మికుల నోట ఒరిజినల్ మట్టే పడిందన్న మాట. అమెరికా యూరప్‌లలో అంటే ఎక్కడైతే మానవ కార్మికుల పనికి ఎక్కువ వేతనం చెల్లించాల్సి వస్తున్నదో అక్కడ మనుషుల కంటే రోబోలకే ప్రాధాన్యం ఇవ్వొచ్చనే వాదన బలపడుతోంది.
 
 దాని ఫలితంగా డ్రైవర్లు, సేల్స్ బాయ్‌లు, గోడౌన్ కీపర్లు, క్యాషియర్లు, చిన్నా చితకా కంప్యూటర్ ప్రోగ్రామర్లు వీళ్లంతా 2025 నాటికే పెద్ద స్థాయిలో ఉద్యోగాలు కోల్పోనున్నారు. ఆరోగ్య రంగంలో ఇప్పటికే అనస్తీషి యన్లుగా రోబోలు పని చేస్తున్నాయి. క్యాన్సర్‌ను గుర్తించే రేడియాలజిస్టులుగా మనుషుల కంటే రోబోలే సమర్థంగా పని చేస్తున్నాయనే పరిశీలన ఉంది. ఈ నేపథ్యంలో రోబోల ఆక్రమణ ఎక్కడి దాకా వెళ్లనుందనేది అనూహ్యంగా ఉంది. మనిషికి ఉన్న అతి పెద్ద ఆయుధం ఊహాశక్తి.
 
 రోబోలకు లేనిది మనిషికి ఉన్నది అదే. కాని రోబోలు కూడా ఆయా సంస్థల అవసరాల రీత్యా కొన్ని ‘ఊహలు’, ‘ప్రతిపాదన’లు చేయగలిగే స్థితికి టెక్నాలజీ అభివృద్ధి అవుతోంది. ముఖ్యంగా రోబోల వల్ల ఉత్పత్తి పెరగడం. భారీ ఉత్పత్తిని కోరే వారు అందువల్ల కూడా వీటిని ఆదరిస్తు న్నారు. ఇంకో పెద్ద ప్రమాదం ఏమంటే మనిషి ఐ.క్యు. (ఇంటెలిజెన్స్ కోషియెంట్) తీవ్రంగా పెరుగుతూ పోదు. కాని ఈ సంతవ్సరం తయారయ్యే రోబో ఐ.క్యు. కంటే రాబోయే రెండేళ్లలో తయా రయ్యే రోబో ఐ.క్యు. చాలా ఎక్కు వగా ఉండే అవకాశం ఉంది. అంటే రోబోలు తమ మేధస్సును పెంచుకుంటూ పోయి మనిషిని వెనక్కు వదిలేస్తాయన్న మాట. వీటితో మనిషి ఏ మాత్రం పోటీ పడగలడు?
     
 మన పురణాలు దేనినీ వదల్లేదు. ఇలాంటి వాటికి కూడా నమూనాలను ఇచ్చి వెళ్లాయి. భస్మాసురుడు తన వరంతో తనే నాశనమయ్యాడు. మనిషి కూడా తను కని పెట్టిన రోబోతోనే తన ఉపాధిని నాశనం చేసుకోబోతున్నాడు. మనిషి యంత్రం కంటే మెరుగ్గా అవిశ్రాంతంగా పని చేయక పోవచ్చు. కాని హృదయంతో పని చేస్తాడు. శ్రద్ధతో పని చేస్తాడు. ఆవేశంతో పని చేస్తాడు. అనురక్తితో పని చేస్తాడు. ఆ పని వెనుక ఆ శ్రమ వెనుక ఒక ఆత్మ సంతృప్తి ఉంటుంది. కృతజ్ఞత ఉంటుంది. తాను ప్రకృతికి సమాజానికి ఇవ్వగలిగింది ఇస్తున్నాననే ధన్యత కనిపిస్తుంది. మనిషికి మంచి చెడు తెలుసు. చెడును తగ్గించి మంచిని పెంచుకుంటూ పోవడం తెలుసు.
  
 కాని యంత్రానికి అది తెలియదు. అది వికాసం కోసమే కాదు వినాశనం కోసం కూడా పని చేయగలదు. స్పందనే సృష్టికి ఆయువు. స్పందన లేని లోహం ప్రమాదానికి హేతువు. యంత్రం వర్సెస్ మనిషి మనుగడలో మనిషే గెలుస్తాడని మా నమ్మకం!
  
 అది రోబోల రాజ్యం!
 ఇటీవలి కాలంలో చైనాలో రోబోల వినియోగం బాగా పెరిగింది. దానికి ఉదాహరణ రోబో రెస్టారెంట్. గాంగ్జో నగరంలో ఉన్న ఈ రెస్టారెంట్లో మనుషులకు బదులుగా రోబోలు వెయిటర్లుగా పని చేస్తున్నాయి. కస్టమర్ల దగ్గరకు వచ్చి ఆర్డర్ చెప్పమని అడుగుతాయి. చెప్పినవి రాసుకుని కిచెన్లోకి వెళ్లి చెఫ్‌కి ఇస్తాయి. వంటకాలను తీసుకొచ్చి సర్వ్ చేస్తాయి. ట్రాలీలో డ్రింక్స్ పెట్టి తోసుకుంటూ రెస్టారెంట్ అంతా తిరుగుతుంటాయి. బిల్ ఇస్తాయి. కస్టమర్లు వెళ్లాక గిన్నెలు తీస్తాయి. టేబుల్ క్లీన్ చేస్తాయి. వాటి పనితీరు చూసి అందరూ ఆశ్చర్యపోతున్నారు. రోబోలైతే టిప్ కూడా ఇవ్వక్కర్లేదు అని మురిసిపోతున్నారు!
  
 రోబోటిక్ లాన్ మౌవర్స్ లాన్లలో పెరిగిన గడ్డిని సమంగా కట్ చేస్తాయి. మొక్కలకు నీళ్లు కూడా పెడతాయి. ఆటోమేటెడ్ పూల్ క్లీనర్స్ అతి పెద్ద స్మిమ్మింగ్ పూల్‌ను కూడా మూడు గంటల్లో శుభ్రం చేసేస్తాయి.  పూల్‌ను ముందుగా స్క్రబ్ చేసుకుంటూ వెళ్లి, ఆపైన మంచి నీటితో కడిగేస్తాయి. చెత్త ఉంటే పూర్తిగా తీసేస్తాయి.
  
 ‘రూంబా’ అనే వాక్యూమ్ క్లీనర్ రోబోలు ఇంట్లో నేలను చక్కగా శుభ్రం చేస్తాయి. ‘డ్రెస్‌మ్యాన్’ అనే రోబోలు బట్టలు ఉతికి, వాటిని ఇస్త్రీ కూడా చేస్తాయి. మరికొన్ని రోబోలు కూరగాయలను కూడా ఇట్టే కట్ చేస్తాయి. అదే విధంగా కొన్ని దేశాల్లో అయితే వంట చేసే రోబోలు కూడా వచ్చేశాయి!
  
  
 టీచింగ్ రోబోలు
 పిల్లలతో హోమ్‌వర్క్ చేయిస్తాయి. దగ్గర కూర్చుని చదివిస్తాయి. చిన్నపిల్లలకు రైమ్స్ దగ్గర నుంచి పెద్ద వాళ్లకు కాలేజీ పాఠాల వరకూ అన్నిటినీ బోధిస్తాయి.
  
  
 అన్ని దేశాల పరిశ్రమల్లోనూ రోబోలను ఉపయోగించడం ప్రారంభించారు. పరిశ్రమల్లో పని చేసే రోబోల కొనుగోళ్లు ఒక్క 2014లోనే 29శాతం పెరిగినట్లు ‘ఇంటర్నేషనల్ ఫెడరేషన్ ఆఫ్ రోబోటిక్స్’ సంస్థ వెల్లడించింది.
  
 ప్రపంచంలోనే తొలి ‘రోబో ఫామ్’ 2017లో జపాన్‌లో క్యోటో సమీపంలో ప్రారంభం కానుంది. ఈ కూరగాయల ఫ్యాక్టరీలో పూర్తిగా రోబోలే పనులు, పర్యవేక్షణ విధులు నిర్వహిస్తాయి. మనిషి అన్నవాడే అందులో ఉండడట!
  
 చైనాలో ‘ఫాక్స్ కాన్’ అనే అతి పెద్ద ఉత్పత్తి సంస్థకు పది లక్షల మంది కార్మికులు పని చేస్తున్నారు. 2011లో ఆ సంస్థ 10,000 రోబోలను పనిలో వినియోగించింది. సంవత్సరానికి 30,000 రోబోలను పెంచుకుంటూ పోయింది. దాని వల్ల భవిష్యత్ అవసరాలకు అవసరమైన మానవ కార్మికులు పది లక్షల మందిని పనిలోకి తీసుకోవాల్సిన అవసరం లేదని కంపెనీ తేల్చింది. జర్మనీలో కూడా ప్రజల ఉపాధి అవకాశాలకు రోబోలు పెద్ద ముప్పుగా పరిణమించాయి. ఉపాధిలో 59 శాతం రోబోలు ఆక్రమించుకుంటున్నాయి. రాబోయే కాలంలో కోటి ఎనభై లక్షల మంది ఉద్యోగాలు కోల్పోనున్నారని ఒక అధ్యయనం
  చెబుతోంది.
  
 సెక్యూరిటీ
 రోబోలు ఇంటికి అపరి చితులు వస్తే వెంటనే యజ మాని ఫోన్‌కు మెసేజ్ పంపు తాయి. ఇంట్లో దొంగలు పడితే ఆ తతంగాన్ని రికార్డు చేసి వీడియోను కూడా పంపిస్తాయి.
 కర్టెసీ: డిజిటల్