తనను ప్రేమించిన ప్రియురాలు మరో వ్యక్తిని పెళ్లి చేసుకుందంటూ మండల కేంద్రమైన తాండూరులో గురువారం ఓ యువకుడు కొద్దిసేపు వీరంగం వేశాడు. సదరు యువకుడు తెలిపిన వివరాల ప్రకారం.. కరీంనగర్‌కు చెందిన ఎం.అరుణ్‌కుమార్ తిర్యాణికి చెందిన యువతితో కరీంనగర్‌లో ప్రేమాయణం కొనసాగించాడు. సదరు యువతి కరీంనగర్‌లో ఏఎన్‌ఎంగా పనిచేస్తున్న సమయంలో వారిద్దరి మధ్య ఏర్పడిన పరిచయం ప్రేమకు దారితీసింది.
  
  ఈ క్రమంలో ఆ యువతి తన స్వగ్రామానికి వచ్చి రెండ్రోజుల క్రితం మరో యువకుడిని పెళ్లి చేసుకుంది. ఈ విషయం తెలుసుకున్న అరుణ్‌కుమార్ ఆ యువతికి ఫోన్ చేసి పెళ్లి చేసుకున్నావంటే తాను నమ్మడం లేదని పేర్కొన్నాడు. తాండూర్ ఐబీకి వస్తే తన భర్తను చూపిస్తానని ఆ యువతి చెప్పింది. దీంతో గురువారం సాయంత్రం భర్తతో కలిసి వచ్చిన ఆ యువతితో అరుణ్‌కుమార్ గొడవకు దిగాడు. తనను మోసగించవద్దని, పెళ్లి చేసుకోవాలని ప్రాధేయపడ్డాడు. దీంతో ఆ యువతి అక్కడి నుంచి వెళ్లిపోయింది.
  
 ఆ తర్వాత కొద్దిసేపు అరుణ్‌కుమార్ తాండూర్‌లో హల్‌చల్ చేశాడు. తనకు ఆ యువతే కావాలంటూ కనిపించిన వారికల్లా తన ప్రేమ కథ చెప్పడంతో జనం భారీగా గుమిగూడారు. విషయం తెలుసుకున్న తాండూర్ అదనపు ఎస్సై రాజేంద్రప్రసాద్ అక్కడికి చేరుకుని అరుణ్‌కుమార్‌తో మాట్లాడారు. అతడిని పోలీస్‌స్టేషన్‌కు తీసుకెళ్లారు.