బెంగళూరు: స్పిన్‌ అస్త్రాలు, ఐపీఎల్‌లో తమ బౌలర్ల మెరుపులు... అంటూ ఎంతో హుషారుగా బెంగళూరుకు విచ్చేసిన అఫ్గానిస్తాన్‌కు క్రికెట్‌లో అసలు ‘టెస్టు’ ఎదురైంది. ఒక పూటలో 20 ఓవర్ల ఆటతో ఆకట్టుకున్నంత ఈజీ కాదని భారత బ్యాట్స్‌మెన్‌ శతక్కొట్టుడుతో చెప్పేశారు. మూడు సెషన్లు... మూడు చెరువుల నీళ్లు తాగించినంత పనిని ఒక్కరోజులోనే బోధపడేలా బాదేశారు. ఓపెనర్లు శిఖర్‌ ధావన్‌ (96 బంతుల్లో 107; 19 ఫోర్లు, 3 సిక్సర్లు), మురళీ విజయ్‌ (153 బంతుల్లో 105; 15 ఫోర్లు, 1 సిక్స్‌) సెంచరీలతో కదంతొక్కారు. గురువారం తొలిరోజు ఆటలో భారత్‌ భారీస్కోరు చేసింది. నిర్ణీత ఓవర్ల కోటా (90 ఓవర్లు) పూర్తికాకపోయినా... 78 ఓవర్లలోనే 6 వికెట్లకు 347 పరుగులు చేసింది. రెండు సెషన్లపాటు నీరుగారిన అఫ్గాన్‌ బౌలర్లు  మూడో సెషన్‌తో ఊపిరి పీల్చుకున్నారు. ఐదు వికెట్లు తీసి హమ్మయ్య అనుకున్నారు. యమిన్‌ అహ్మద్జాయ్‌కి 2 వికెట్లు దక్కాయి. మూడో సెషన్‌కు ముందు వర్షంతో ఆటకు గంటసేపు అంతరాయం ఏర్పడింది. పొద్దుపోయేవరకూ ఆటను కొనసాగించినా పూర్తి ఓవర్లు సాధ్యపడలేదు. భారీస్కోరు దిశగా... టాస్‌ నెగ్గిన భారత్‌ బ్యాటింగ్‌ ఎంచుకుంది. ఓపెనర్లు ధావన్, విజయ్‌ చిన్నస్వామి స్టేడియంలో చెలరేగారు. తొలి టెస్టు ఆడుతున్న అఫ్గాన్‌ బౌలింగ్‌ దళంలో ఎవ్వరిని విడిచిపెట్టకుండా బాదేశారు. వన్డేను తలపించినట్లుగా 11వ ఓవర్లోనే జట్టు స్కోరు 50 చేరింది. 20 ఓవర్లోనే వంద దాటింది. విజయ్‌ నింపాదిగా ఆడుతుంటే ధావన్‌ దంచేశాడు. భారత్‌ 27 ఓవర్లు ముగిసే సరికి వికెట్‌ కోల్పోకుండా 158 పరుగులు చేసి సెషన్‌ను ముగించింది. రెండో సెషన్‌లో ధావన్‌ నిష్క్రమించడంతో తొలి వికెట్‌కు 168 పరుగుల భాగస్వామ్యం ముగిసింది. అయినప్పటికీ భారత జోరు మాత్రం కొనసాగింది. విజయ్‌ (80 బంతుల్లో; 7 ఫోర్లు, 1 సిక్స్‌) అర్ధసెంచరీ పూర్తి చేసుకోగా, 36.3 ఓవర్లలోనే స్కోరు 200 పరుగులు దాటింది. మరోవైపు లోకేశ్‌ రాహుల్‌ (54; 8 ఫోర్లు) ధాటిగా ఆడాడు. ఇద్దరు కలిసి మరో భారీ భాగస్వామ్యానికి తెరతీశారు. 46 ఓవర్లో 248/1 వర్షం కురవడంతో టి విరామానికి వెళ్లారు. అనంతరం రాహుల్‌ అర్ధశతకం పూర్తి చేసుకున్నాడు. 4 పరుగుల వ్యవధిలో  విజయ్, రాహుల్‌ నిష్క్రమించడంతో చివరి సెషన్‌లో అఫ్గాన్‌కు పట్టుచిక్కింది. జట్టు స్కోరు 300 దాటాక రషీద్‌ బౌలింగ్‌లో రహానే,  ముజీబ్‌ బౌలింగ్‌లో పుజారా (35) వెనుదిరిగారు. దినేశ్‌ కార్తీక్‌ రనౌట్‌ కావడంతో మూడో సెషన్‌లో అఫ్గాన్‌ చేతికి 5 వికెట్లు చిక్కాయి. అయ్యో పాపం... అఫ్గాన్, రషీద్‌... ఆడుతోంది తొలిటెస్టు కాబట్టి అఫ్గానిస్తాన్‌ ఆరంభంలో అడుగడుగునా కష్టపడింది. ఫీల్గింగ్‌ మోహరింపు, బౌలర్ల వినియోగం ఏదీ తెలియక విలవిలలాడింది. మరోవైపు రషీద్‌ ఖాన్‌కు టెస్టు క్రికెట్‌ విలువెంటో తెలిసేందుకు ఎంతోసేపు పట్టలేదు. కట్టుదిట్టంగా 4 ఓవర్లు వేసినంత ఈజీగా 40 ఓవర్లు సాధ్యం కాదని ఒక్కరోజులోనే తెలిసొచ్చింది. ముఖ్యంగా ధావన్‌ అతని బౌలింగ్‌ను చీల్చిచెండాడాడు. తొలిరోజు అందరికంటే ఎక్కువగా 26 ఓవర్లు వేసిన అతను కేవలం రెండే మెయిడిన్లు వేసి ఏకంగా 120 పరుగులిచ్చుకున్నాడు. స్కోరు వివరాలు భారత్‌ తొలి ఇన్నింగ్స్‌: విజయ్‌ ఎల్బీడబ్ల్యూ (బి) వఫాదార్‌ 105; ధావన్‌ (సి) నబి (బి) యమిన్‌ అహ్మద్‌జై 107; రాహుల్‌ (బి) యమిన్‌ అహ్మద్‌జై 54; పుజారా (సి) నబి (బి) ముజీబ్‌ 35; రహానే ఎల్బీడబ్ల్యూ (బి) రషీద్‌ ఖాన్‌ 10; కార్తీక్‌ రనౌట్‌ 4; హార్దిక్‌ పాండ్యా బ్యాటింగ్‌ 10; అశ్విన్‌ బ్యాటింగ్‌ 7; ఎక్స్‌ట్రాలు 15; మొత్తం (78 ఓవర్లలో 6 వికెట్లకు) 347. వికెట్ల పతనం: 1–168, 2–280, 3–284, 4–318, 5–328, 6–334. బౌలింగ్‌: యమిన్‌ అహ్మద్‌జై 13–6–32–2, వఫాదార్‌ 15–4–53–1, నబి 8–0–45–0, రషీద్‌ ఖాన్‌ 26–2–120–1, ముజీబ్‌ 14–1–69–1, అస్గర్‌ స్తానిక్‌జై 2–0–16–0. శిఖర్‌ మెరుపులు చారిత్రక టెస్టులో ధావన్‌ అద్భుత ఇన్నింగ్స్‌తో అదరగొట్టాడు. మ్యాచ్‌ మొదలైన మొదటి సెషన్‌లోనే సెంచరీ సాధించిన తొలి భారత బ్యాట్స్‌మన్‌గా రికార్డులకెక్కాడు. 2006లో వెస్టిండీస్‌తో జరిగిన టెస్టులో సెహ్వాగ్‌ 99 పరుగులు చేశాడు. 14వ ఓవర్లోనే అఫ్గాన్‌ తమ తురుపుముక్క రషీద్‌ ఖాన్‌ను రంగంలోకి దించగా... ధావన్‌ మరింత రెచ్చిపోయా డు. మూడు బౌండరీలు బాది 47 బంతుల్లోనే (10 ఫోర్లు, 1 సిక్సర్‌) ఫిఫ్టీ పూర్తిచేసుకున్నాడు. రషీద్‌ వేసిన ఇన్నింగ్స్‌ 20వ ఓవర్‌లో 2 ఫోర్లు, ఒక భారీ సిక్సర్‌తో 15 పరుగులు సాధించాడు. 26వ ఓవర్లో బౌండరీతో ధావన్‌ కేవలం 87 బంతుల్లోనే 18 ఫోర్లు, 3 సిక్సర్ల సాయంతో సెంచరీ పూర్తి చేసుకున్నాడు. ధావన్‌కంటే ముందు ట్రంపర్‌ (103 నాటౌట్, ఆసీస్‌), మెకార్ట్‌నీ (112 నాటౌట్, ఆసీస్‌), బ్రాడ్‌మన్‌ (105 నాటౌట్‌), మజీద్‌ ఖాన్‌ (108 నాటౌట్, పాకిస్తాన్‌), వార్నర్‌ (100 నాటౌట్, ఆసీస్‌)లు లంచ్‌లోపే ఈ ఫీట్‌ సాధించాడు.

పడింది ఒక వికెట్టే... వచ్చినవి 301 పరుగులు! తొలి టెస్టులో లంకను వెలుతురులేమి కాపాడిందేమో కానీ... ఈ టెస్టును కాపాడాలంటే బహుశా ఎనిమిదో వండర్‌ కావాలేమో! నాగ్‌పూర్‌లో భారత టాపార్డర్‌ పరుగుల హోరును, శతకాల జోరును చూపెట్టింది. ఇప్పటికే ఆధిక్యం వంద దాటింది. ఇంకా చేతిలో 8 వికెట్లు. ఇక ఈ ఆధిక్యం ఎందాకో... ఈ మ్యాచ్‌ ఏ రోజు ముగుస్తుందో నేటి సాయంత్రమే తేలిపోనుంది!   నాగ్‌పూర్‌: రెండో టెస్టు రెండో రోజే భారత్‌ చేతిలోకొచ్చేసింది. ఇక ఐదో రోజుదాకా చూడాల్సిన అవసరం రాదేమో! తొలిరోజు బౌలర్ల శ్రమకు రెండో రోజు బ్యాట్స్‌మెన్‌ జోరు కలిసింది. దీంతో ఆధిక్యం అందనంత దిశగా సాగిపోతోంది. ఓపెనర్‌ మురళీ విజయ్‌ (221 బంతుల్లో 128; 11 ఫోర్లు, 1 సిక్స్‌), చతేశ్వర్‌ పుజారా (284 బంతుల్లో 121 బ్యాటింగ్‌; 13 ఫోర్లు) సెంచరీలతో కదంతొక్కారు. కెప్టెన్‌ కోహ్లి (70 బంతుల్లో 54 బ్యాటింగ్‌; 6 ఫోర్లు) అర్ధసెంచరీని అధిగమించాడు. దీంతో శనివారం ఆట ముగిసే సమయానికి భారత్‌ తొలి ఇన్నింగ్స్‌లో 98 ఓవర్లలో 2 వికెట్లకు 312 పరుగులు చేసింది. ఇప్పటికే 107 పరుగుల ఆధిక్యంలో ఉన్న ఆతిథ్య జట్టు చేతిలో 8 వికెట్లున్నాయి. దీంతో మూడో రోజు భారత్‌ భారీ ఆధిక్యానికి రంగం సిద్ధమైంది.  సెషన్‌కో ఫిఫ్టీ, సెంచరీ!  రెండో రోజంతా భారత బ్యాట్స్‌మెన్‌దే ఆధిపత్యం. ఓవర్‌నైట్‌ స్కోరుకు మరో 301 పరుగులు జత చేసిన కోహ్లి సేన కేవలం ఒకే ఒక్క వికెట్‌ను కోల్పోయింది. భారత బ్యాట్స్‌ మెన్‌ సగటున సెషన్‌కో ఫిఫ్టీ, సెంచరీ సాధించారు. తొలి సెషన్‌లో విజయ్‌ అర్ధ శతకం కొడితే... రెండో సెషన్‌లో పుజారా ఆ పని చేశాడు. కాసేపటికి విజయ్‌ సెంచరీ పూర్తి చేసుకున్నాడు. ఇక మూడో సెషన్‌లో పూజారా శతక్కొట్టగా... కోహ్లి అర్ధ సెంచరీ బాదేశాడు. రెండు సెషన్ల పాటు వికెట్‌ కోసం తపించినా వికెట్‌ లభించలేదు. ఎట్టకేలకు మూడో సెషన్‌లో విజయ్‌ని హెరాత్‌ అవుట్‌ చేయడంతో భారత్‌ రెండో వికెట్‌ కోల్పోయింది.  భారీ భాగస్వామ్యం  క్రితం రోజు స్కోరు 11/1తో శనివారం ఆట కొనసాగించిన భారత బ్యాట్స్‌మెన్‌ విజయ్, పుజారా పర్యాటక బౌలర్ల భరతం పట్టారు. లంక పేసర్లు, స్పిన్నర్లు ఎలాంటి బంతిని వేసినా ఏకాగ్రతను మాత్రం కోల్పోలేదు. దీంతో ఇక్కట్లు లంకకు... పరుగులు భారత్‌ పక్షాన నిలిచాయి. లంక కెప్టెన్‌ చండిమాల్‌ పేసర్లు, స్పిన్నర్లను మార్చి మార్చి ప్రయోగించినా ఈ జోడిని విడగొట్టలేకపోయాడు. విజయ్‌ అర్ధసెంచరీ పూర్తి చేసుకున్న కాసేపటికే భారత్‌ స్కోరు 100 పరుగులు చేరింది. రెండో సెషన్‌ కూడా దీనికి భిన్నంగా సాగలేదు. దీంతో మొదట విజయ్, పుజారాల భాగస్వామ్యం శతకాన్ని దాటింది. ఆ తర్వాత పుజారా కూడా తన ఫిఫ్టీని పూర్తి చేసుకున్నాడు.  ఇలా లంక కష్టాలు సెషన్‌ సెషన్‌కు పెరిగాయి. అటు వికెట్లు పడగొట్టలేక, ఇటు పరుగులకు అడ్డుకట్ట వేయలేక అలసిసొలసిపోయారు. మరోవైపు మెల్లగా విజయ్‌ సెంచరీని అధిగమించాడు. ఇక మూడో సెషన్‌లో భారత్‌ స్కోరు 200 పరుగులకు... ఆ తర్వాత ఆధిక్యాన్ని (శ్రీలంక 205) అందుకుంది. రెండో వికెట్‌కు 209 పరుగులు జోడిం చాక ఎట్టకేలకు లంక శిబిరంలో విజయ్‌ వికెట్‌ ఆనందాన్ని నింపింది. కానీ కోహ్లి వచ్చాక మళ్లీ కష్టాలు పెరిగాయి. అతను పుజారాతో కలిసి వడివడిగా పరుగులు జతచేశాడు. ఈ క్రమంలో పుజారా సెంచరీ, కోహ్లి అర్ధసెంచరీ పూర్తి చేసుకోగా... లంక మాత్రం మరో వికెట్‌ తీయలేకపోయింది.  ♦ 1 టెస్టుల్లో పదో సెంచరీ సాధించిన మురళీ విజయ్‌కి లంకపై ఇదే తొలి శతకం  ♦ 3 పుజారా–విజయ్‌లు ఇప్పటి వరకు మూడు సార్లు డబుల్‌ సెంచరీ భాగస్వామ్యాలు నమోదు చేశారు.  ♦ 10 2013 తర్వాత విజయ్‌–పుజారా జోడీ చేసిన సెంచరీ భాగస్వామ్యాల సంఖ్య. మరో 8 అర్ధశతక భాగస్వామ్యాలూ ఉన్నాయి. ఈ నాలుగేళ్ల కాలంలో ప్రపంచంలో ఏ జోడీ ఈ ఘనత సాధించలేకపోయింది.  ♦ 10 టెస్టు కెరీర్‌లో పుజారా 14 సెంచరీలు చేస్తే... ఇందులో సొంతగడ్డపైనే పది ఉన్నాయి.   స్కోరు వివరాలు  శ్రీలంక తొలి ఇన్నింగ్స్‌: 205; భారత్‌ తొలి ఇన్నింగ్స్‌: రాహుల్‌ (బి) గమగే 7; మురళీ విజయ్‌ (సి) పెరీరా (బి) హెరాత్‌ 128; పుజారా బ్యాటింగ్‌ 121; కోహ్లి బ్యాటింగ్‌ 54; ఎక్స్‌ట్రాలు 2; మొత్తం (98 ఓవర్లలో 2 వికెట్ల నష్టానికి) 312.  వికెట్ల పతనం: 1–7, 2–216. బౌలింగ్‌: లక్మల్‌ 18–2–58–0, గమగే 22–7–47–1, హెరాత్‌ 24–8–45–1, షనక 13–3–43–0, పెరీరా 21–0–117–0. 


 ఫతుల్లా : బంగ్లాదేశ్ తో జరుగుతున్న ఏకైక టెస్టు మ్యాచ్ లో టీమిండియా ఓపెనర్ మురళీ విజయ్(103, 10 ఫోర్లు, 1 సిక్సర్) సెంచరీ చేశాడు. 201 బంతుల్లో తన కెరీర్ లో ఆరో టెస్టు సెంచరీ నమోదు చేశాడు. మురళీ విజయ్(106 నాటౌట్), శిఖర్ ధావన్ (166 నాటౌట్) ప్రస్తుతం క్రీజులో ఉన్నారు. 65 ఓవర్లలో భారత్ వికెట్ నష్టపోకుండా 273 పరుగులు చేసింది.
 
 భారత్ తొలి ఇన్నింగ్స్‌లో వికెట్లేమీ నష్టపోకుండా 239 పరుగులతో  శిఖర్ ధావన్ (150 బ్యాటిం గ్), మురళీ విజయ్ (89 బ్యాటింగ్) మూడో రోజు బ్యాటింగ్ కు దిగిన విషయం తెలిసిందే. భారీ వర్షం కారణంగా భారత్, బంగ్లాదేశ్‌ల మధ్య జరుగుతున్న ఏకైక టెస్టులో రెండో రోజు గురువారం ఆట పూర్తిగా రద్దయిన విషయం తెలసిందే.