సాక్షి, హైదరాబాద్‌: యాదాద్రి భువనగిరి జిల్లా రంగాపూర్‌ భూముల కేసు హైకోర్టు లో పెండింగ్‌లో ఉందని, సుప్రీంకోర్టు, సివిల్‌ కోర్టు కూడా తమకు అనుకూలంగానే ఉత్తర్వులు ఇచ్చాయని, ఈ భూముల విషయంలో తాము ఎలాంటి తప్పులకు పాల్పడలేదని రిటైర్డ్‌ మిలటరీ అధికారి కల్నల్‌ నార్నె రంగారావు వివరణ ఇచ్చారు. ‘భూదాన్‌ దొంగలు దొరికేనా’ శీర్షికన ఈ నెల 25న ‘సాక్షి’ప్రచురించిన కథనంలో తన ప్రస్తావన తీసుకురావడంపై ఆయన స్పందించారు. నార్నె ఎస్టేట్స్, ఈస్ట్‌సిటీ భూములపై కొందరు 1996లో కావాలనే కోర్టులో కేసు వేశారని, అయితే, ప్లాట్ల యజమానులను ఖాళీ చేయించవద్దని కోర్టు తీర్పు చెప్పిందని, అయినా కలెక్టర్‌పై పెద్ద ఎత్తున ఒత్తిడి చేసి రాత్రికి రాత్రే భూములు స్వాధీనం చేసుకున్నారన్నారు. ఈ విషయాన్ని హైకోర్టు దృష్టికి తీసుకెళ్లగా భూములను ఈస్ట్‌సిటీకి అప్పగించిందని, భూదాన్‌ బోర్డును రిసీవర్‌గా నియమించిందని ఆయన ఒక ప్రకటనలో తెలిపారు. ఆ తర్వాత సుప్రీం కోర్టు, సివిల్‌కోర్టులూ ఈ కేసులో తమకనుకూలంగా తీర్పులిచ్చాయని, దీన్ని కూడా కొందరు హైకోర్టులో సవాల్‌ చేయగా, ఆ కేసు పెండింగ్‌లో ఉందన్నారు.


  జవహర్‌నగర్, న్యూస్‌లైన్: జవహర్‌నగర్ పరిధిలోని నార్నె రంగారావు ఎస్టేట్స్‌కు గ్రామపంచాయతీ అధికారులు మంగళవారం నోటీసులు జారీ చేశారు. ఈ సందర్భంగా పంచాయతీ కార్యదర్శి జయరాం మాట్లాడుతూ.. ఫైరింగ్‌రేంజ్ పరిసర ప్రాంతాల్లో వర్షపునీరు దిగువప్రాంతాలకు వెళ్లకుండా ప్రహరీ నిర్మాణం చేపట్టారని ఎక్స్ సర్వీస్‌మెన్ కాలనీ, శ్రీసాయి వెల్ఫేర్ సొసైటీల ఫిర్యాదు మేరకు ఎన్నోసార్లు ఎస్టేట్ వారికి నోటీసులు జారీ చేశామని అన్నారు. అయినా స్పందించలేదని, తాజాగా మరోసారి నోటీసులు జారీ చేసినట్లు చెప్పారు. వారం రోజుల గడువు అనంతరం ప్రహరీ నిర్మాణాన్ని కూల్చివేసి నాలాను నిర్మించనున్నట్లు పేర్కొన్నారు.