► రాష్ట్రాలకు కరెంటు సాయం చేస్తాం: గోయల్‌
 ►  ఆధార్‌ ద్వారా బిల్లుల చెల్లింపును ప్రోత్సహించాలి 
 న్యూఢిల్లీ: అణువిద్యుదుత్పత్తి కేంద్రాల ఏర్పాటుకు ముందుకొచ్చే రాష్ట్రాలకు గరిష్టంగా విద్యుత్‌ పంపిణీ జరుగుతుందని కేంద్ర మంత్రి పీయూష్‌ గోయల్‌ తెలిపారు. ఆధార్‌ అనుసంధానిత బ్యాంకు అకౌంట్ల ద్వారా కరెంటు బిల్లుల చెల్లింపును ప్రోత్సహించాలని ఆయన కోరారు. ఢిల్లీలో రాష్ట్రాలు, కేంద్ర పాలిత ప్రాంతాల విద్యుత్‌ శాఖ మంత్రులతో రెండ్రోజుల పాటు ఢిల్లీలో జరిగిన జాతీయ సదస్సులో మంత్రి ఈ అంశాన్ని తెరపైకి తెచ్చారు.
 ‘ఏ రాష్ట్రమైనా అణువిద్యుత్‌ కేంద్రాలు ఏర్పాటు చేసేందుకు ఆసక్తి చూపకుండా.. పక్క రాష్ట్రాల ఉత్పత్తి ఫలాలను అనుభవించాలనుకుంటే అలాంటి ఆలోచనలను అనుమతించం. అలాంటి వారు ఎక్కువకాలం కేంద్రం విద్యుత్‌ సాయాన్ని ఆశించకూడదు’ అని గోయల్‌ స్పష్టం చేశారు. ఈ విధానాన్ని కొత్త పంపిణీ విధానంలో చేరుస్తామని స్పష్టం చేశారు. ప్రస్తుతం గాడ్గిల్‌ ఫార్ములా ప్రకారం విద్యుత్‌ పంపిణీ జరుగుతోందని, ఈ పంపిణీ విధానాన్ని మరింత ప్రభావవంతంగా మార్చేందుకు కేంద్రం ప్రయత్నాలు చేస్తోందన్నారు. దేశవ్యాప్తంగా విద్యుదుత్పత్తిపై ఒకే స్థిరమైన ధరను నిర్ణయించాలన్న ఎన్టీపీసీ సూచనను ఈ సందర్భంగా గోయల్‌ గుర్తుచేశారు.


 కృత్రిమ ద్వీపాల అవసరాల కోసం చైనా కసరత్తు
  
 హాంకాంగ్: అన్ని రంగాల్లో ముందుకు దూసుకెళ్తున్న చైనా.. సముద్ర జలాలపై ఆధిపత్యం కోసం అవసరమైన అన్ని మార్గాలనూ వాడుకుంటోంది. దక్షిణ చైనా సముద్రంలో తాను ఇటీవల నిర్మించిన కృత్రిమ ద్వీపాల అవసరాల కోసం సముద్రంలో తేలియాడే అణు విద్యుత్ కేంద్రాల నిర్మాణానికి తెరతీసింది.
 
 ఎందుకు?
  వివాదాస్పద దక్షిణ చైనా సముద్రంలో చైనా తన సైనిక, సముద్ర భద్రత అవసరాల కోసం ‘ఫీరీ క్రాస్ రీఫ్’, ‘జాన్సన్ రీఫ్’ తదితర పేర్లతో ఇటీవల కొన్ని కృత్రిమ ద్వీపాలు నిర్మించింది. అక్కడి రాడార్ వ్యవస్థలు, లైట్‌హౌస్‌లు, బ్యారక్‌లు, పోర్టులు, వైమానిక స్థావరాల నిర్వహణకు భారీగా విద్యుత్ కావాలి. వేల మైళ్ల దూరంలోని భూమిపై ఉన్న పవర్ గ్రిడ్ల నుంచి వీటికి తీగల ద్వారా విద్యుత్‌ను అందించడం చాలా కష్టమైన పని. దీనికి పరిష్కారంగా.. సముద్రంలోనే అణు విద్యుత్ కేంద్రాలను నిర్మించి విద్యుత్ సరఫరా చేయాలని చైనా యోచిస్తోంది. ఈ ద్వీపాలతోపాటు చమురు రిఫైనరీల విద్యుత్ అవసరాలను తీర్చేందుకు నౌకలపై అణు ప్లాంట్లను నిర్మించాలని చైనా షిప్పింగ్ ఇండస్ట్రీస్ కార్పొరేషన్ కసరత్తు చేస్తోంది. ప్లాంట్లకు చాలా డిమాండ్ ఉందని, ఇవి భారీగా కావాలని చైనా అణు ఇంధన సంస్థ డెరైక్టర్ జు దాజే చె ప్పారు.
 
 గతంలో..
  తేలియాడే అణు విద్యుత్ ప్లాంట్లు కొత్తవేమీ కాదు. రెండో ప్రపంచ యుద్ధకాలం నాటి ఒక నౌకలో అమెరికా 1960లలో అణు రియాక్టర్‌ను ఏర్పాటు చేసింది. పనామా కెనాల్ జోన్‌లోని విద్యుత్ అవసరాల కోసం దీన్ని నిర్మించారు.  
 
 ఎంతవరకు సురక్షితం?
  దక్షిణ చైనా సముద్రంలో తరచూ భారీ తుపాన్లు వస్తుంటాయి. అణు ప్లాంటు ఉన్న నౌకలు తుపాన్ల ముప్పును తట్టుకోవాల్సి ఉంటుంది.  ఇలాంటి నౌకలో కీలక రియాక్టర్ కరిగిపోవడం వంటి భారీ అణు ప్రమాదాలు జరిగితే గాలుల ద్వారా రేడియోధార్మికత జనావాసాలకు వ్యాపించే అవకాశముందని యూనియన్ ఆఫ్ కన్సర్న్డ్ సైంటిస్ట్స్‌కు చెందిన అణు భద్రత ప్రాజెక్టు డెరైక్టర్ డేవిడ్ లాక్కామ్ చెప్పారు.


 జనరల్ ఇన్సూరెన్స్ సహా   12 సంస్థలతో ఏర్పాటు
 కేంద్ర మంత్రి జితేంద్రసింగ్ వెల్లడి
 విదేశీ అణు సంస్థలకు నష్టపరిహారం బాధ్యత లేనట్లే!
 {పమాదం జరిగితే ఈ నిధి నుంచే పరిహారం
 
 న్యూఢిల్లీ: దేశంలో అణు విద్యుత్ కేంద్రాలను నిర్మించే అంతర్జాతీయ అణు సంస్థలకు ప్రయోజనం కలిగించేలా... రూ.1,500 కోట్లతో అణు ప్రమాద బీమా నిధిని కేంద్రం ఏర్పాటు చేసింది. ఒకవేళ ఆయా అణు విద్యుత్ కేంద్రాల్లో ఏదైనా ప్రమాదం జరిగినట్లయితే ఈ నిధి నుంచే నష్టపరిహారాన్ని చెల్లిస్తారు. తద్వారా విదేశీ అణు సంస్థలు నష్టపరిహారం చెల్లించాల్సిన బాధ్యత నుంచి తప్పించుకున్నట్లే! ఈ విషయాన్ని అణు ఇంధన శాఖ సహాయ మంత్రి జితేంద్రసింగ్ శనివారం ఢిల్లీలో వెల్లడించారు. అణు ప్రమాద పరిహారం అంశం కారణంగానే ‘గోరఖ్‌పూర్ హరియాణా అణువిద్యుత్ పరియోజన’ వంటి పలు ప్రాజెక్టుల నిర్మాణాలు నిలిచిపోయాయని.. ఇప్పుడు ఆ ప్రాజెక్టుల పనులన్నీ తిరిగి ప్రారంభమవుతాయని చెప్పారు. అంతేగాకుండా దేశంలో కొత్త అణు విద్యుత్ కేంద్రాల ఏర్పాటుకు అంతర్జాతీయ సంస్థలు ముందుకు వస్తాయన్నారు. ఐదేళ్లలో విద్యుదుత్పత్తిని మూడింతలు చేయాలన్న ప్రధాని మోదీ లక్ష్యాన్ని సాధించేందుకు ఇది తోడ్పతుందని పేర్కొన్నారు. కాగా అణుశక్తిపై అపోహలను తొలగించేందుకు, అవగాహన కల్పించేందుకు ఢిల్లీలోని జాతీయ సైన్స్ సెంటర్‌లో ఒక ప్రత్యేక విభాగాన్ని ఏర్పాటు చేయనున్నట్లు తెలిపారు. ప్రమాదాల బాధ్యత నుంచి అణు రియాక్టర్లు, పరికరాల సరఫరాదారులకు ఉపశమనం కోసమే ఈ నిధిని ఏర్పాటు చేశారని అణుశక్తి విభాగం కార్యదర్శి ఆర్‌కే సిన్హా చెప్పారు.
 
  12 సంస్థల ఆధ్వర్యంలో..
 జనరల్ ఇన్సూరెన్స్ కార్పొరేషన్ ఆఫ్ ఇండియా (జీఐసీ)తో పాటు న్యూ ఇండియా, ఓరియంటల్ ఇన్సూరెన్స్, నేషనల్ ఇన్సూరెన్స్, యునెటైడ్ ఇండియా ఇన్సూరెన్స్ తదితర 11 ఇతర జీవితబీమాయేతర సంస్థల ఆధ్వర్యంలో అణు ప్రమాద బీమా నిధిని ఏర్పాటు చేశారు. దీనికి కింద ‘న్యూక్లియర్ ఆపరేటర్స్ లయబిలిటీ ఇన్సూరెన్స్ పాలసీ’, ‘న్యూక్లియర్ సప్లయర్స్ స్పెషల్ కంటింజెన్సీ పాలసీ’లను అందిస్తారు. అయితే ఈ కంపెనీలన్నీ కలసినా ఇంకా రూ.600 కోట్లు తగ్గాయని.. అందులో వంద కోట్లను ఒక దేశీయ బీమా కంపెనీ, మిగతా రూ.500 కోట్లను బ్రిటిష్ అణు బీమా నిధితో భర్తీ చేస్తారని జీఐసీ జనరల్ మేనేజర్ వై.రాములు చెప్పారు. ట
  
 ఎందుకీ ఏర్పాటు..?
 యూపీఏ హయాంలో తెచ్చిన అణు ప్రమాదాల జవాబుదారీ చట్టం (సీఎల్‌ఎన్‌డీ) ప్రకారం... అణు విద్యుత్ కేంద్రాల్లో ఏదైనా ప్రమాదం జరిగితే ఆ అణు రియాక్టర్లను సరఫరా చేసిన సంస్థల నుంచి నష్టపరిహారాన్ని పొందవచ్చు. ఈ నష్టపరిహారం అత్యంత భారీగా ఉండే నేపథ్యంలో విదేశీ సంస్థలు అణు రియాక్టర్ల సరఫరా, విద్యుత్ కేంద్రాల నిర్మాణంపై వెనుకడుగు వేశాయి. దీంతో ఒకవేళ అణు విద్యుత్ కేంద్రాల్లో ప్రమాదాలు జరిగితే బాధితులకు నష్టపరిహారం చెల్లించేందుకు ప్రత్యేకంగా ఒక బీమా నిధిని ఏర్పాటు చేస్తామని, కంపెనీలకు బాధ్యత లేకుండా చేస్తామని కేంద్ర ప్రభుత్వం అంతర్జాతీయ అణు సంస్థలకు హామీ ఇచ్చింది. అందులో భాగంగా ఎన్డీయే ప్రభుత్వం రూ.1,500 కోట్లతో ‘అణు ప్రమాద బీమా నిధి’ని ఏర్పాటు చేసింది.
  


 భారత్-రష్యా మధ్య 20 కీలక ఒప్పందాలు
 న్యూఢిల్లీ: భారత్-రష్యా మధ్య బంధం మరింత బలోపేతమైంది. కీలక రంగాల్లో మరింత లోతుగా సహకరించుకోవాలని, దశాబ్దంలోగా ఇరు దేశాల మధ్య బంధాన్ని కొత్త శిఖరాలకు చేర్చాలని ఇరు దేశాలు నిర్ణయించాయి. మరో 20 ఏళ్లలో భారత్‌లో కనీసం 12 అణు విద్యుత్ కేంద్రాలను ఏర్పాటు చేసేందుకు రష్యా అంగీకరించింది. అలాగే భారత్ కోసం అత్యాధునిక హెలికాప్టర్లను కూడా తయారు చేసివ్వనుంది. రక్షణ, చమురు, గ్యాస్, వైద్యం, గనులు, కమ్యూనికేషన్లు తదితర కీలక రంగాల్లో పెట్టుబడులకు సంబంధించి వ్యూహాత్మక భాగస్వామ్యం బలోపేతమయ్యేలా 20 ఒప్పందాలను కూడా కుదుర్చుకుంది. గురువారం ప్రధాని నరేంద్ర మోదీ, రష్యా అధ్యక్షుడు వ్లాదిమిర్ పుతిన్ మధ్య జరిగిన వార్షిక సమావేశం సందర్భంగా ఇరు దేశాల మధ్య సంబంధాలను కొత్త దశకు తీసుకెళ్లాలని నిర్ణయించారు. దాదాపు మూడున్నర గంటలపాటు జరిగిన ఈ భేటీలో అణు ఇంధన సహకారంపైనే ప్రధానంగా దృష్టిసారించారు. ప్రస్తుతమున్నకుడంకుళం అణు విద్యుత్ కేంద్రానికి తోడు రష్యా సహకారంతో మరో కేంద్రాన్ని వెంటనే ఏర్పాటు చేసేందుకు స్థల గుర్తింపు ప్రక్రియను వేగవంతం చేయాలని భారత్ నిర్ణయించింది. అనంతరం ఇరువురు నేతలు సంయుక్తంగా మీడియా సమావేశంలో పాల్గొన్నారు.
 
 భారత శక్తికి రష్యా మూలస్తంభం వంటిదని మోదీ ఈ సందర్భంగా పేర్కొన్నారు. రక్షణ రంగంలో భారత వ్యూహాత్మక భాగస్వామిగా రష్యా పాత్ర మరింత పెరుగుతుందని ప్రధాని తెలిపారు. ‘కొత్త రక్షణ ప్రాజెక్టుల విషయంలో మేం విస్తృతంగా చర్చించాం. మేక్ ఇన్ ఇండియా వంటి దేశ ప్రాధాన్యాంశాలకు తోడ్పడే విధంగా రక్షణ సంబంధాలను కొనసాగించడంపై దృష్టి సారించాం. తన వద్దనున్న అత్యాధునిక హెలికాప్టర్‌ను ఇకపై పూర్తిగా భారత్‌లోనే తయారుచేసేందుకు రష్యా అంగీకరించింది. దీన్ని భారత్ ఎగుమతి కూడా చేయొచ్చు. ఇతర రక్షణ రంగ పరికరాలను భారత్‌లో తయారు చేసేందుకు రష్యా సుముఖంగా ఉంది’ అని మోదీ వెల్లడించారు. అలాగే అంతర్జాతీయ స్థాయి ప్రమాణాలతో కూడిన అణు రియాక్టర్ల నిర్మాణంపై కూడా దృష్టిసారించినట్లు చెప్పారు. దీనికి సంబంధించిన పరికరాలు, విడి భాగాల తయారీ కూడా భారత్‌లోనే జరుగుతుందని మోదీ పేర్కొన్నారు. అణు విద్యుత్ కేంద్రాల ఏర్పాటును వేగవంతం చేయాలని అణు సహకారంపై సంయుక్తంగా విజన్ డాక్యుమెంట్‌ను రూపొందించుకున్నట్లు తెలిపారు. చమురు, సహజవాయువు రంగాల్లోనూ పరస్పరం సహకరించుకునేలా ఎజెండాను రూపొందించుకోనున్నట్లు చెప్పారు.
 
 ఇరు దేశాల కరెన్సీలతోనే వాణిజ్యం
 ఆర్థిక రంగంలో మరింత సహకారానికి కృషి చేయాలని, వాణిజ్య చెల్లింపులను ఇరుదేశాల కరెన్సీలోనే జరుపుకొనేలా ప్రోత్సహించాలని భారత్-రష్యా అంగీకారానికి వచ్చాయి. ఇందుకోసం ఎదురయ్యే అడ్డంకులు, సమస్యల పరిష్కారానికి సిఫారసులు చేసేందుకుగాను ఓ వర్కింగ్ గ్రూప్‌ను ఏర్పాటు చేశాయి. ఇంధన రంగంతో పాటు పెట్రో కెమికల్స్‌లోనూ సంయుక్త ప్రాజెక్టులను చేపట్టాలని, టెక్నాలజీ ఆధారిత ప్రాజెక్టుల విషయంలో సంయుక్తంగా డిజైన్, అభివృద్ధి, తయారీని చేపట్టాలని నిర్ణయించాయి. అంతరిక్షం, వైమానిక రంగం, ఖనిజాభివృద్ధి తదితర రంగాలకూ దీన్ని విస్తరించాలని అంగీకారానికి వచ్చాయి. ఎరువులు, వజ్రాల వ్యాపారం, ఫార్మా, ఐటీ, పారిశ్రామిక పార్కుల ఏర్పాటు వంటి అంశాలపైనా దృష్టి సారించాలని ఇరుదేశాధినేతలు నిర్ణయించారు.
 
 ఉగ్రవాదానికి తావు లేకుండా చేస్తాం
 జమ్మూతోపాటు చెచెన్యాలో ఇటీవల జరిగిన ఉగ్రవాద దాడుల్లో చనిపోయిన వారికి భారత్-రష్యా సంతాపం ప్రకటించాయి. ఈమేరకు ఓ సంయుక్త ప్రకటనను విడుదల చేశాయి. ఉపఖండంలోని ఉగ్రవాద స్థావరాలను దశాబ్దంలోగా నామరూపాల్లేకుండా చేస్తామని అందులో పేర్కొన్నాయి. పొరుగు దేశాల్లో జరుగుతున్న పరిణామాలను బట్టి అంతర్జాతీయంగా విస్తరిస్తున్న ఉగ్రవాదాన్ని అరికట్టడానికి దేశాల మధ్య మరింత సహకారం అవసరమని అభిప్రాయపడ్డాయి. భారత్-రష్యా మధ్య ద్వైపాక్షిక సంబంధాలను సరికొత్తగా తీర్చిదిద్దుకోవాల్సిన సమయం ఆసన్నమైందని పేర్కొన్నాయి.
 
 ఒప్పందాలు ఇవే..
 హైడ్రోకార్బన్ల ఉత్పత్తిలో సంయుక్త పరిశోధన, రష్యా నుంచి భారత్‌కు హైడ్రోకార్బన్ల సరఫరా కోసం పైప్‌లైన్ వ్యవస్థ ఏర్పాటుపై అధ్యయనం, దీర్ఘకాలిక ఎల్‌ఎన్‌జీ సరఫరా, పదేళ్ల పాటు ముడిచమురు సరఫరా, రష్యాలో పెట్టుబడులకు అవకాశాలను సంయుక్తంగా గుర్తించడం, రష్యా ఎరువుల కంపెనీ ‘ఆక్రాన్’ను దాదాపు రూ. 12 వేల కోట్లకు భారత కంపెనీల కన్సార్షియం చేపట్టడం, కుడంకుళం అణు కేంద్రంలో మూడు, నాలుగో యూనిట్‌ను నెలకొల్పడం వంటి ఒప్పందాలను ఇరుదేశాలకు సంబంధించిన సంస్థలు తాజా వార్షిక సదస్సు సందర్భంగా కుదుర్చుకున్నాయి. అలాగే వార్తల పరస్పర మార్పిడికి వీలుగా రష్యన్ న్యూస్ ఏజెన్సీతో ప్రెస్ ట్రస్ట్ ఆఫ్ ఇండియా(పీటీఐ) ఒప్పందం కుదుర్చుకుంది. వీసా నిబంధనల సరళీకరణకు కూడా ఇరు దేశాలు అంగీకరించాయి.