న్యూఢిల్లీ: దేశంలో కాలుష్య ఉద్గారాలను నియంత్రించడంలో భాగంగా కేంద్రం కీలక నిర్ణయం తీసుకుంది. భారత్‌ స్టేజ్‌ (బీఎస్‌)–4 ప్రమాణాలతో దేశంలో తయారయ్యే వాహనాల రిజిస్ట్రేషన్‌ను 2020, జూన్‌ 30 నాటికి నిలిపివేస్తామని కేంద్రం తెలిపింది. 2020, ఏప్రిల్‌ 1 వరకు తయారైన వాహనాలన్నింటికీ ఈ నిషేధం వర్తిస్తుందని వెల్లడించింది. ఈ మేరకు మోటార్‌ వాహనాల చట్టంలో మార్పులు చేపట్టేందుకు ముసాయిదా నోటిఫికేషన్‌ను విడుదల చేసింది. ప్రస్తుతం బీఎస్‌–4 ప్రమాణాల నుంచి 2020 నాటికి ఏకంగా బీఎస్‌–6 ప్రమాణాలను అందుకోవాలని కేంద్రం ఇంతకుముందు నిర్ణయం తీసుకున్న సంగతి తెలిసిందే. తాజాగా తీసుకొచ్చిన ముసాయిదాపై ప్రజలు, సంబంధిత వర్గాలు తమ అభిప్రాయాలను డిసెంబర్‌ 20లోగా తెలియజేయాలని కేంద్రం సూచించింది. 


 లాస్‌ ఏంజెలిస్‌: కాలుష్య ఉద్గారాల విషయంలో వాహన తయారీ దిగ్గజం ఫోక్స్‌వ్యాగన్‌ .. అమెరికా, యూరప్‌ నియంత్రణ సంస్థల కన్నుగప్పిన తీరును శాస్త్రవేత్తలు కనిపెట్టారు. ఉద్గార పరీక్షలు జరిపేటప్పుడు కాలుష్యకారక వాయువుల విడుదలను నియంత్రించేలా ఫోక్స్‌వ్యాగన్‌ కార్లలో కంప్యూటర్‌ కోడ్‌ను ఉపయోగించినట్లు కనుగొన్నారు. టెస్ట్‌ పూర్తయిపోయినట్లు కంప్యూటర్‌ ధృవీకరించుకున్నాక.. నియంత్రణ వ్యవస్థ డీయాక్టివేట్‌ అయ్యేది. అటు తర్వాత నుంచి పరిమిత స్థాయికి 40 రెట్లు అధికంగా నైట్రోజన్‌ ఆక్సైడ్‌ వాయువులు కారు నుంచి విడుదలయ్యేవి.