పోలవరం: పోలవరం ప్రాజెక్టు నిర్మాణ ప్రాంతంలో 33 కేవీ విద్యుత్‌ సబ్‌స్టేషన్‌ నిర్మాణానికి మంగళవారం ఈపీడీసీఎల్‌ సీఎండీ ఎంఎం నాయక్‌ శంకుస్థాపన చేశారు. ప్రాజెక్టు నిర్మాణ పనులకు సంబంధించి ప్రత్యేకంగా ఈ సబ్‌స్టేషన్‌ నుంచి విద్యుత్‌ సరఫరా చేస్తామని ఆయన చెప్పారు. 20 రోజుల్లో నిర్మాణ పనులు పూర్తిచేసి విద్యుత్‌ సరఫరా చేస్తామన్నారు. డంపింగ్‌ల కారణంగా పోలవరం ప్రాంతంలో విద్యుత్‌ లైన్లు, స్తంభాలు మార్చాల్సి వస్తే అంచనాలు పంపాలని ఏపీ ట్రాన్స్‌కో ఎస్‌ఈ సీహెచ్‌ సత్యనారాయణరెడ్డిని ఆదేశించారు. ట్రాన్స్‌ట్రాయ్‌ ఏజెన్సీ డిప్యూటీ వైస్‌ ప్రెసిడెంట్‌ కె.తిరుమలేశ్, ట్రాన్స్‌కో ఏడీ కె.నరసింహమూర్తి, డీఈ ఆర్‌.సాల్మన్‌రాజు, ప్రాజెక్టు ఈఈ పి.కుమార్‌ పాల్గొన్నారు. 
 స్పిల్‌వే గేట్ల నిర్మాణ పనుల పరిశీలన
 పోలవరం ప్రాజెక్ట్‌ స్పిల్‌వే ప్రాంతంలో గేట్ల నిర్మాణ పనులను ప్రాజెక్ట్‌ అధారిటీ కమిటీ సభ్యుడు ఓంకార్‌సింగ్, రాజీవ్‌ జస్వాల మంగళవారం పరిశీలించారు. మొత్తం 48 గేట్లు ఏర్పాటు చేయాల్సి ఉండగా, ఇప్పటి వరకు రెండు గేట్ల నిర్మాణం పూర్తయ్యిందని, మరో రెండు గేట్ల నిర్మాణ పనులు జరుగుతున్నాయని చెప్పారు. నిర్మాణానికి వినియోగించే స్టీల్‌ నాణ్యత, గేట్లు తయారీ విధానాన్ని పరిశీలించారు. ప్రాజెక్ట్‌ ఈఈ పి.బుల్లియ్య వారి వెంట ఉన్నారు. 


 పశ్చిమ గోదావరి జిల్లా: పోలవరంపై ఏపీ సీఎం చంద్రబాబు నాయుడు అధికారులతో సోమవారం సమీక్ష నిర్వహించారు. రేపటి నుంచి పోలవరం చుట్టూ పోలీస్ పికెటింగ్ నిర్వహించాలని తెలిపారు. ప్రైవేట్ వ్యక్తుల రాకపోకలపై నిఘా కట్టుదిట్టం చేయాలన్నారు. 2018కల్లా పోలవరం పూర్తి కావాల్సిందేనని ఆదేశించారు. అనుమతుల కోసం అవసరమైతే ప్రత్యేక విమానంలో ఢిల్లీ వెళ్లాలని ఆధికారులకు చంద్రబాబు సూచించారు.
 
 మరో వైపు ఏలేరులో 25 టీఎంసీల నీటిని నిల్వ చేసేందుకే.. పురుషోత్తపట్నం ఎత్తిపోతల పథంకం చేపట్టామని సీఎం తెలిపారు. ఈ ప్రాజెక్టు పూర్తైతే విశాఖ, తూర్పు గోదావరి జిల్లాలకు మేలు కలుగుతుందని అన్నారు. వంశధార, నాగావళిని అనుసంధానం చేసి.. ఇచ్చాపురం వరకూ నీళ్లు తీసుకెళ్లే యోచనలో ప్రభుత్వం ఉందని అన్నారు. పరిశ్రమలు, పట్టణీకరణ కూడా రాష్ట్రాభివృద్ధికి ముఖ్యమని చెప్పారు. జిల్లాలో ఏర్పాటు కానున్న మెగా ఆక్వాఫుడ్ పార్కుతో ప్రజలకు ఎలాంటి ఇబ్బందులు రాకుండా చర్యలు తీసుకుంటామని సీఎం హామీ ఇచ్చారు.