అవినీతి, అక్రమాలను సాగించే సంఘ విద్రోహ శక్తులపై ఓ లేడీ పోలీస్ ఆఫీసర్ ఎలాంటి పోరాటం సాగించిందనే కథాంశంతో రూపొందిన చిత్రం ‘బుల్లెట్ రాణి’. నిషా కొఠారీ ప్రధాన పాత్రలో సాజిద్ ఖురేషీ దర్శకత్వంలో ఎం.ఎస్. యూసఫ్ నిర్మించిన ఈ చిత్రం అన్ని కార్యక్రమాలనూ పూర్తి చేసుకుంది. ఈ సందర్భంగా నిషా మాట్లాడుతూ- ‘‘నీతీ, నిజాయతీ గల పోలీస్ ఆఫీసర్ పాత్రలో కనిపించనున్నా. సరికొత్త కథాకథనాలతో దర్శకుడు సాజిద్ ఈ చిత్రాన్ని బాగా తెరకెక్కించారు. ఇప్పటివరకు నేను చేసిన చిత్రాలన్నింటి కన్నా ఈ ‘బుల్లెట్ రాణి’ నాకెంతో ప్రత్యేకం.
 
 సినిమా కచ్చితంగా అందరికీ నచ్చుతుంది’’ అని చెప్పారు. సాజిద్ ఖురేషీ మాట్లాడుతూ - ‘‘టైటిల్ రోల్‌కు న్యాయం చేయడానికి నిషా రెండు నెలల పాటు కసరత్తులు చేసింది. తెలుగు, కన్నడ భాషల్లో ఏకకాలంలో ఈ చిత్రం నిర్మించాం. ఇటీవల రషెస్ చూసుకుంటే చాలా సంతృప్తి అనిపించింది. నవంబర్ ద్వితీయార్ధంలో ఈ చిత్రాన్ని విడుదల చేయాలనుకుంటున్నాం’’ అని చెప్పారు.


 అందమైన అమ్మాయి చేతులు రక్తంతో తడిశాయి. తనకు అన్యాయం చేసిన వాళ్ల అంతు తేల్చింది. మరి ఎందుకో కారణం తెలియాలంటే ‘క్రిమినల్స్’ చూడాల్సిందే అంటున్నారు దర్శకుడు  ఓషో తులసీరామ్. ప్రియాంక కొఠారి ఇందులో ముఖ్య పాత్రధారిణి. మంత్ర ఎంటర్‌టైన్‌మెంట్స్ పతాకంపై పి.శ్రీనివాసరావు, సి.హెచ్.వి. శర్మ ఈ చిత్రాన్ని నిర్మిస్తున్నారు. ఈ చిత్రం టీజర్‌ను దర్శకుడు విజయ్‌కుమార్ కొండా ఆవిష్కరించారు. ఓషో తులసీరామ్ మాట్లాడుతూ -‘‘ప్రియాంక కొఠారి తన పాత్రకు పూర్తి న్యాయం చేసింది. ఈ సినిమా అందరికీ నచ్చుతుంది’’ అని చెప్పారు. ఈ కార్యక్రమంలో వెలిగొండ శ్రీనివాస్, తుమ్మలపల్లి రామసత్యనారాయణ, కార్తీక్, ప్రియాంక కొఠారి తదితరులు పాల్గొన్నారు.