నరసరావుపేట వెస్ట్, న్యూస్‌లైన్: నరసరావుపేట పార్లమెంటరీ నియోజకవర్గ కాంగ్రెస్ పార్టీ అభ్యర్థి ఎంపికపై రాహుల్‌గాంధీ దూతలు ఆ పార్లమెంటరీ నియోజకవర్గ పరిధిలోని అసెంబ్లీ సెగ్మెంట్లలో సోమవారం పర్యటించారు. నరసరావుపేట అసెంబ్లీ నియోజకవర్గంలోనూ పర్యటించారు. పట్టణంలోని రాష్ట్ర సహకార శాఖ మంత్రి కాసు వెంకటకృష్ణారెడ్డి క్యాంపు కార్యాలయానికి వచ్చిన ఏఐసీసీ ప్రతినిధి, కర్నాటక రాష్ట్ర మాజీ మంత్రి కె.శివమూర్తి నరసరావుపేట, చిలకలూరిపేట నియోజకవర్గాల పార్టీ నాయకులతో సమావేశం నిర్వహించారు. ఒక్కొక్కరినీ పిలిచి అభిప్రాయాలను సేకరించారు.
 
 అధిక శాతం మంది మంత్రి కాసు వెంకటకృష్ణారెడ్డిని నరరావుపేట పార్లమెంటు అభ్యర్థిగా ఎంపిక చేయాలంటూ శివమూర్తికి నివేదించారు. నరసరావుపేట పార్లమెంటు నియోజకవర్గంలో మొదట్నంచీ కాసు కుటుంబీకులు కాంగ్రెస్ పార్టీ అభివృద్ధికి చేస్తున్న కృషిని ద్వితీయశ్రేణి నాయకులు ఈ సందర్భంగా వివరించారు. ప్రతిసారి స్థానికేతరులను నరసరావుపేటకు తీసుకువచ్చి పార్లమెంటు అభ్యర్థిగా నియమిస్తున్నారని దీంతో ఇబ్బందులు తలెత్తుతున్నాయని అనేక మంది పరిశీలకుని దృష్టికి తీసుకువచ్చారు.
 
  ఈసారి కాసు కృష్ణారెడ్డికి పార్లమెంటు అభ్యర్థిగా అవకాశం ఇవ్వకపోతే పరిణామాలు తీవ్రంగా ఉంటాయనీ.. కొందరు నాయకులు స్వరం పెంచి మాట్లాడినట్లు సమాచారం. వినుకొండ నియోజకవర్గంలో కూడా అధిక శాతంమంది కాసు కృష్ణారెడ్డినే పార్లమెంటు అభ్యర్థిగా ఎంపిక చేయాలంటూ ఏఐసీసీ పరిశీలకుని వద్ద వాదన వినిపించినట్లు తెలిసింది.


 వరంగల్ సిటీ, న్యూస్‌లైన్ : ఏఐసీసీ ఉపాధ్యక్షుడు రాహుల్‌గాంధీ దూత సోమవారం భువనగిరి లోక్‌సభ నియోజకవర్గ పరిధిలోని జనగామ సెగ్మెంట్ నేతలతో సమావేశం కానున్నారు. భువనగిరిలో సోమవారం ఉదయం 10 గంటలకు లోక్‌సభ నియోజకవర్గ పరిధిలోని నాయకుల నుంచి సమాచారం సేకరించనున్నారు. ఈ సమావేశానికి రాహుల్‌దూతగా, ఏఐసీసీ పరిశీలకుడిగా మహారాష్ట్రకు చెందిన మాజీ ఎమ్మెల్యే సేవక్‌వాగిల్ పాటిల్ హాజరవుతున్నారు. జిల్లాలో మంత్రి పొన్నాల లక్ష్మయ్య ప్రాతినిధ్యం వహిస్తున్న అసెంబ్లీ స్థానం నల్లగొండ జిల్లా పరిధిలోని భువనగిరి నియోజకవర్గ పరిధిలో ఉన్న విషయం తెలిసిందే. ఈ నియోజకవర్గం నుంచి ప్రస్తుతం కోమటిరెడ్డి రాజగోపాల్‌రెడ్డి ఎంపీగా ప్రాతినిధ్యం వహిస్తున్నారు.
 
  ఈ సమావేశానికి జనగామ పరిధిలోని నియోజకవర్గ నాయకులు, మండల, బ్లాక్ కాంగ్రెస్ అధ్యక్షులు, మాజీ ఎమ్మెల్యేలు, సర్పంచ్‌లు, అనుబంధ సంఘాల నాయకులు హాజరుకానున్నారు. ఈ మేరకు జిల్లా పీసీ సీ పరిశీలకులు రాపోలు జయప్రకాష్, లక్ష్మణ్‌రావుగౌడ్ ఇప్పటికే నియోజకవర్గ నాయకులకు స మాచారం అందజేశారు. సంక్రాంతి తర్వాతే ఈ సమాచారం సేకరించాలని పీసీసీ కోరినప్పటికీ ఏఐసీసీ పరిశీలకుని కోరిక మేరకు సోమవారం ఈ సమావేశం ఏర్పాటు చేసినట్లు సమాచారం.  
 
  సంక్రాంతి తర్వాత వరంగల్, మహబూబాబాద్
  జిల్లాలోని వరంగల్, మహబూబాబాద్ లోక్‌సభ నియోజకవర్గ పరిధిలో అభ్యర్థులకు సంబంధించిన సమాచారం సేకరించనున్న ఏఐసీసీ పరిశీలకులు సంక్రాంతి తర్వాత వచ్చే అవకాశాలున్నట్లు పార్టీ వర్గాలు తెలిపాయి. మూడు రోజులుగా రాహుల్ దూతల కోసం జిల్లా కాంగ్రెస్ నేతలు ఎదురుచూశారు. ఎప్పుడు వస్తారనే స్పష్టమైన సమాచారం లేకపోవడంతో నేతల్లో సందిగ్ధత నెలకొంది. రానున్న సార్వత్రిక ఎన్నికలకు ముందస్తుగా లోక్‌సభ అభ్యర్థుల ఎంపికపై కసరత్తు చేపట్టిన కాంగ్రెస్ పార్టీ ఈ మేరకు ఢిల్లీ నుంచి పరిశీలకులను పంపిస్తున్నారు. ఈ నెల 14వ తేదీ వరకు జిల్లాలోని లోక్ సభ అభ్యర్థులపై నివేదికలు సమర్పించాలని రాహుల్ ఆదేశించినప్పటికీ వీలుకాలేదు.
 
  ఏఐసీసీ పరిశీలకులు జిల్లాలో పర్యటించి, పార్టీ నేతలు, శ్రేణులు నుంచి అభిప్రాయాలు సేకరిం చి సమర్థుడైన అభ్యర్థి పేరును రాహుల్‌కు నివేదించనున్నారు. మహారాష్ట్రకు చెందిన అగర్వాల్‌ను జిల్లాకు పంపించాలని నిర్ణయించినప్పటికీ స్వల్ప అనారోగ్య కారణాలతో ఆయన రాలేక పోయినట్లు సమాచారం. సంక్రాంతి తర్వాత రాహుల్ దూతలు జిల్లాలో పర్యటించే అవకాశం ఉన్నట్లు తెలుస్తోంది. ఎప్పుడు వచ్చినా సమాచా రం అందించేందుకు పీసీసీ నుంచి జిల్లా పరిశీల కులుగా ఉన్న జయప్రకాష్, లక్ష్మణ్‌రావుతో పాటు, జిల్లా నాయకులు  సిద్ధమయ్యారు.