సాక్షి ప్రతినిధి, నెల్లూరు: కాంగ్రెస్ పార్టీకి జిల్లాలో తానే సారథ్యం వహిస్తానని మంత్రి ఆనం రామనారాయణరెడ్డి ప్రకటించారు. కిరణ్‌కుమార్‌రెడ్డి మీద శుక్రవారం ఆయన నేరుగా ధ్వజమెత్తడం ద్వారా మరోసారి అధిష్టానానికి తన విధేయత ప్రకటించుకున్నారు. రాష్ర్ట  విభజన అంశం తెర మీదకు వచ్చినప్పటి నుంచి కిరణ్‌కుమార్‌రెడ్డి పార్టీ హైకమాండ్‌పై ధిక్కార స్వరం వినిపిస్తూ వచ్చారు.
  
  జిల్లాకు చెందిన మంత్రి ఆనం రామనారాయణరెడ్డి మాత్రం ఇందుకు భిన్నమైన బాట ఎంచుకుని తన అదృష్టాన్ని పరీక్షించుకునేందుకు తహతహలాడుతూ వచ్చారు. విభజన ప్రక్రియ జరిగే సమయంలో కూడా రామనారాయణరెడ్డి అమ్మ(సోనియా)కు వ్యతిరేకంగా ఒక్క మాట కూడా మాట్లాడిన సందర్భం లేదు. విభజన బాధాకరమే అంటూనే ఇదే సందర్భంలో పార్టీ నిర్ణయమే శిరోధార్యం అనేలా వ్యవహరిస్తూ వచ్చారు. సీఎం రాజీనామా చేస్తారనే వార్తలు బయటకొచ్చినప్పటి నుంచి విధేయత మోతాదు మరింత పెంచారు.
  
  జిల్లాలోని పార్టీ శాసనసభ్యులు, ముఖ్య నేతలు పార్టీ మారే పనిలో పడ్డా,  తమకు మరో ప్రత్యామ్నాయం లేకపోవడం, ఇప్పుడు కాకపోయినా ఇంకొంత కాలానికైనా కాంగ్రెస్ హైకమాండ్ తమ కోరిక తీర్చదా అనే ఆశతో తాము కాంగ్రెస్‌లోనే కొనసాగుతామంటూ ప్రకటిస్తూ వచ్చారు. లోక్‌సభ, రాజ్యసభలో విభజన బిల్లుకు ఆమోద ముద్రపడిన అనంతరం శుక్రవారం రాజధానిలో తొలిసారి ఆయన ఈ అంశంపై నోరు విప్పారు. అంతా అయ్యాక ఇక చేయగలిగిందేమీ లేదనీ, విభజన బాధాకరమే అయినా కొత్తగా ఏర్పడబోయే రాష్ట్రాన్ని అభివృద్ధి పథంలో నడిపించేందుకు ప్రయత్నిస్తామని చెప్పుకొచ్చారు. తన రాజకీయ జీవితం కాంగ్రెస్‌తోనే వచ్చిందనీ, మంత్రిగా తాను పనిచేశానంటే కాంగ్రెస్ కార్యకర్తగానే తనకీ స్థాయి వచ్చిందని ఆయన చెప్పుకున్నారు. హస్త రక్షకుడిని తానేననీ, కాంగ్రెస్ నినాదాన్ని ప్రజల్లోకి తీసుకుని వెళ్లి నిలబెడతామని ప్రకటించుకోవడం ద్వారా జిల్లాలో నేదురుమల్లి వర్గం మళ్లీ క్రియాశీలకం కాకుండా అడ్డుకట్టవేసే వ్యూహానికి పదును పెట్టారు. త్వరలోనే నెల్లూరులో జిల్లా స్థాయి కాంగ్రెస్ కార్యకర్తల సమావేశం ఏర్పాటు చేయడం ద్వారా కాంగ్రెస్ వల్లే సీమాంధ్రకు ప్యాకేజీ వచ్చిందనే నినాదంతో మరోసారి జనం వద్దకు వెళ్లాలని నిర్ణయించారు. జిల్లాలోని 10 నియోజకవర్గాలు, ఎంపీ అభ్యర్థులందరినీ తన వారినే బరిలోకి దించడం ద్వారా జిల్లాలో కాంగ్రెస్ అంటే తామేననీ, తామంటే కాంగ్రెస్ అనే విధంగా పార్టీ మీద పట్టు సాధించే ఎత్తుగడ వేశారు.
  
  ఈసారి ఎన్నికల్లో  రాష్ట్రంలో ఎలాగూ కాంగ్రెస్ వచ్చే పరిస్థితి లేదని తెలిసినా, కేంద్రంలో అవకాశం ఉండొచ్చేమోననే ఆశ ఆనంతో ఈ అడుగులు వేయిస్తున్నట్లు రాజకీయ వర్గాలు అంచనా వేస్తున్నాయి. కేంద్రప్రభుత్వం అసెంబ్లీని సుప్త చేతనావస్థలో ఉంచినా తర్వాత రెండు రాష్ట్రాలకు సీఎంలను, కేబినెట్‌ను నియమిస్తుందని ఆనం గట్టిగా నమ్ముతున్నట్లు ప్రచారం జరుగుతోంది. ఈ అవసరాల రీత్యా కూడా రాష్ట్ర విభజన అనంతరం జిల్లాలో అందరికంటే ముందుగానే ఆనం రామనారాయణరెడ్డి మళ్లీ కాంగ్రెస్ జెండాను భుజానికెత్తుకున్నారనే అభిప్రాయాలు వ్యక్తం అవుతున్నాయి.
  


  రాపూరు, న్యూస్‌లైన్: కండలేరు జలాశయాన్ని సమగ్ర కండలేరుగా తీర్చిదిద్దేందుకు చర్యలు చేపట్టాలని అధికారులను రాష్ట్ర ఆర్థిక శాఖ మంత్రి ఆనం రామనారాయణరెడ్డి ఆదేశించారు. కండలేరు జలాశయ అతిథిగృహంలో బుధవారం ఆయన కలెక్టర్ శ్రీకాంత్, ఇరిగేషన్, తెలుగుగంగ అధికారులతో సమీక్ష నిర్వహించారు. అనంతరం విలేకరులతో మాట్లాడుతూ ఐఏబీ తీర్మానం మేరకు ఆయకట్టుకు నీటివిడుదలపై చర్చించామన్నారు. లోలెవల్ స్లూయీస్‌కు నీరు అందిన తర్వాత మనుబోలుకు విడుదల చేస్తామన్నారు.
  
  అన్నీ అనుకూలిస్తే ఈ ఏడాది కండలేరు జలాశయంలో 50 టీఎంసీల నీటిని నిల్వ చేయాలనే ఆలోచనలో ఉన్నామన్నారు. పొదలకూరు, మనుబోలు, చేజర్ల మండలాల్లోని 50 వేల ఎకరాలకు కండలేరు ఎడమ కాలువ ద్వారా నీరు అందించేందుకు లిఫ్ట్ ఇరిగేషన్‌కు రూ.62 కోట్లు మంజూరయ్యాయని, త్వరలో టెండర్ల ప్రక్రియ నిర్వహిస్తామన్నారు. కండలేరు నిర్వాసితులకు చెందిన 1,850 ఎకరాలకు నీరు అందించేందుకు చర్యలు తీసుకుంటున్నామన్నారు. భద్రతా కమిటీ సూచనల మేరకు జలాశయంలో కొన్ని పనులు చేపడతామన్నారు. ప్రాజెక్టు పరిధిలో అధిక లోడు వాహనాలు తిరగకుండా చర్యలు తీసుకోవాలని అధికారులకు సూచించారు. జలాశయం పరిధిలో 316 హెక్టార్ల అటవీ భూములున్నాయని, ఆ శాఖ నుంచి అనుమతి లభించినందున ఆ భూముల్లో నిలిచిపోయిన పనులను పూర్తి చేస్తామన్నారు. అన్ని పూర్తయితే 1.25 లక్షల ఎకరాలు సాగులోకి వస్తాయని వెల్లడించారు. స్పిల్‌వే పనులను త్వరితగతిన పూర్తి చేయాలని తెలుగుగంగ అధికారులను మంత్రి ఆదేశించారు.
  
  రూ.2 కోట్లతో టూరిజం ప్రాజెక్ట్
  కండలేరు జలాశయంలో రూ.2 కోట్లతో 25 ఎకరాల విస్తీర్ణంలో టూరిజం ప్రాజెక్ట్‌ను అభివృద్ధి చేయనున్నట్లు మంత్రి ఆనం వెల్లడించారు. కొండపై ఇరిగేషన్ శాఖ 3 ఎకరాలను కేటాయిస్తే పర్యాటక శాఖ ఆధ్వర్యంలో ఉద్యానవనం నిర్మిస్తారన్నారు. తోటపల్లిగూడూరు మండలంలోని కోడూరు బీచ్‌లో 10 ఎకరాల విస్తీర్ణాన్ని పర్యాటకంగా అభివృద్ధి చేయనున్నట్లు వివరించారు. సమావేశంలో కలెక్టర్ శ్రీకాంత్, ట్రెయినీ కలెక్టర్ వర్షిణి, ఆర్డీవో సుబ్రమణ్యేశ్వర రెడ్డి, ఎస్‌ఈలు సుబ్బారావు, కోటేశ్వరావు, ఈఈలు సురేష్‌బాబు, విశ్వనాథం, వెంకట రాజు, శ్రీనివాసరావు, డీసీసీబీ అధ్యక్షుడు ధనుంజయరెడ్డి, ఏఎంసీ అధ్యక్షుడు చెన్ను బాలకృష్ణారెడ్డి పాల్గొన్నారు.
  
  వెయ్యి కోట్లతో హైలెవ్
  కాలువ మొదటి దశ
  సోమశిల: మెట్ట ప్రాంత ప్రజల సాగు,తాగనీరు అవసరాలు తీర్చేందుకు సోమశిల హైలెవల్ కాలువ  మొదటి దశను వెయ్యి కోట్ల నిధులతో ప్రతిపాదించామని, పరిపాలన అనుమతి రాగానే పనులు మొదలవుతాయని రాష్ట్ర మంత్రి ఆనం రామనారాయణరెడ్డి తెలిపారు. సోమశిల జలాశయాన్ని బుధవారం ఆయన కలెక్టర్ ఎన్.శ్రీకాంత్‌తో కలిసి సందర్శించారు. కండలేరు వరద కాలువ హెడ్‌రెగ్యులేటర్, రేడియల్ క్రస్ట్‌గేట్లను పరిశీలించారు. నీటి లభ్యతపై అధికారులతో సమీక్ష నిర్వహించృరు. అనంతరం సోమశిల అతిథిగృహంలో విలేకరులతో మాట్లాడారు. హైలెవల్ కెనాల్‌కు ఆనం సంజీవరెడ్డి పేరును ప్రభుత్వం ఖరారు చేసిందని వెల్లడించారు.
  
  సోమశిల జలాశయంలో 59 టీఎంసీల నీటిని నిల్వ చేసి మిగిలిన జలాలను కండలేరుకు తరలిస్తున్నామని చెప్పారు. ఆయకట్టుకు వారం రోజుల్లో నీరు విడుదల చేస్తామన్నారు. కండలేరు వరద కాలువకు నీటి విడుదల ఆపిన వెంటనే లీకేజీలను అరికట్టేందుకు మరమ్మతులు చేపడతామన్నారు. ఆయన వెంట సోమశిల ఎస్‌ఈ సోమశేఖర్, ఈఈ ఢిల్లేశ్వరరావు, తహశీల్దార్ సోమ్లానాయక్, ఎంపీడీఓ ఐజాక్ ప్రవీణ్, నాయకులు వేణుగోపాల్‌రాజు, మెట్టుకూరు కృష్ణారెడ్డి, సుబ్బరాజు, అల్లంపాటి జనార్దన్‌రెడ్డి, ఉప్పల విజయ్‌కుమార్, మెట్టుకూరు రమణారెడ్డి ఉన్నారు.