సాక్షి, విశాఖపట్నం : కొత్త సర్కారు కొలువుదీరాక ఆర్టీసీలో కొత్త జోష్‌ నెలకొంది. భారీ సంఖ్యలో కొత్త నియామకాలతో పాటు కాంట్రాక్టు ఉద్యోగుల క్రమబద్ధీకరణ, పదోన్నతులు, ఐచ్ఛిక బదిలీలకు వీలు కల్పిస్తూ వైఎస్సార్‌సీపీ ప్రభుత్వం కీలక నిర్ణయం తీసుకుంది. ఇందులో భాగంగా ఆర్టీసీ విజయనగరం జోన్‌లో త్వరలో 700 మంది డ్రైవర్లు, 200 మంది కండక్టర్ల నియామకం చేపట్టనున్నట్టు ఆ జోన్‌ ఎగ్జిక్యూటివ్‌ డైరెక్టర్‌ (ఈడీ) పి.కృష్ణమోహన్‌ వెల్లడించారు. ఇటీవల ఈడీగా బాధ్యతలు చేపట్టిన ఆయన బుధవారం ‘సాక్షి’తో మాట్లాడారు. ఆయన ఏమన్నారంటే.. ► కండక్టరు నుంచి సూపరింటెండెంట్‌ స్థాయి వరకు ఇంజినీరింగ్, పర్సనల్, అకౌంట్స్, స్టోర్స్‌ విభాగాల్లోని ఏడీసీలు, టీఐ3, డిప్యూటీ సూపరింటెండెంట్, సూపరింటెండెంట్లకు గతంలో తాత్కాలికంగా పదోన్నతులు పొందిన 62 మందిని క్రమబద్ధీకరిస్తున్నాం. మరో రెండు రోజుల్లో ఈ ప్రక్రియను పూర్తి చేస్తాం.  ►  కాంట్రాక్టు ఉద్యోగులుగా పనిచేస్తున్న కండక్టర్లు, డ్రైవర్లను క్రమబద్ధీకరించేందుకు ప్రభుత్వం అనుమతించింది. దీంతో విజయనగరం జోన్‌లో 14 మంది డ్రైవర్లు, ఇద్దరు కండక్టర్లకు ప్రయోజనం చేకూరుతోంది. మరో 240 పనిదినాలు పూర్తి చేసిన 50 మందికి త్వరలో రెగ్యులరైజ్‌ చేయబోతున్నాం.  ►  జోన్‌ పరిధిలో 700 మంది డ్రైవర్లు, 200 మంది కండక్టర్ల నియామకాన్ని చేపట్టనున్నాం. వీరిలో 200 మందిని ఈ నెలలోనే నియమిస్తాం. మిగిలిన వారిని ప్రభుత్వం నుంచి అనుమతులు రాగానే నియామకాలు జరుపుతాం. దశల వారీగా వచ్చే ఏడాది డిసెంబర్‌ లోగా ఖాళీగా ఉన్న పోస్టులను భర్తీ చేస్తాం.  ►  విజయనగరం జోన్‌లో 400 వరకు వివిధ స్థాయిల్లో ఖాళీలున్నాయి. కొన్నింటిని కండక్టర్లకు ఏడీసీలుగా పదోన్నతులిచ్చి భర్తీ చేస్తాం. మిగిలినవి డైరెక్ట్‌ రిక్రూట్‌మెంట్‌ ద్వారా భర్తీకి యాజమాన్యం అనుమతి కోరాం.  ►  కొత్త ప్రభుత్వం అర్టీసీ ఉద్యోగుల అంతర్‌ జిల్లాల బదిలీలకు అనుమతినిచ్చింది.  డ్రైవర్లు, కండక్టర్లు, శ్రామికులు, మెకానిక్‌ల వద్ద అసిస్టెంట్లుగా పనిచేసే వారు తాము కోరుకున్న చోటుకు బదిలీకి అవకాశం కల్పించింది. 2005 నుంచి ఒక జిల్లా వారు మరో జిల్లాలో పనిచేస్తున్న వారున్నారు. వారి అభీష్టం మేరకు సొంత జిల్లా లేదా ఇతర జిల్లాలకు బదిలీకి దరఖాస్తు చేసుకోవచ్చు. ఇప్పటికే విజయనగరం జోన్‌లో 400 మందికి పైగా అంతర్‌ జిల్లాల బదిలీలకు దరఖాస్తు చేసుకున్నారు. ఇంకా ఎవరైనా బదిలీ కోరుకుంటే ఈనెల 6 వరకు అవకాశం ఉంది. పది రోజుల్లో ఈ అంతర్‌ జిల్లాల బదిలీల ప్రక్రియను పూర్తి చేస్తాం.  పార్శిల్‌ కౌంటర్ల ఆధునికీకరణ.. ∙సురక్షితంగా లగేజి చేరవేయడం కోసం ఆర్టీసీ నిర్వహిస్తున్న పార్శిల్‌ కౌంటర్లను ఆధునికీకరణ ప్రక్రియ జరుగుతోంది. జోన్‌ పరిధిలో ఉన్న పార్శిల్‌ కౌంటర్లలో సీసీ కెమెరాలు, కంప్యూటరైజేషన్, వెహికల్‌ ట్రాకింగ్, ఫిర్యాదుల సెల్‌ ఏర్పాటు చేస్తున్నాం. ఫిర్యాదుల సెల్‌ను ఈనెల ఒకటో తేదీ నుంచి అందుబాటులోకి తెచ్చాం. 60 ఎలక్ట్రిక్‌ బస్సులకు ప్రతిపాదన.. ∙రాష్ట్రంలో 350 ఎలక్ట్రిక్‌ బస్సులు కొనుగోలు చేయాలని ప్రభుత్వం యోచిస్తోంది. ఇందులో విశాఖ రీజియన్‌కు 60 ఎలక్ట్రిక్‌ బస్సులు అవసరమని ప్రతిపాదనలు పంపించడం జరిగింది.  ∙ఆధునిక సదుపాయాలున్న కరోనా బస్సుల పనితీరు బాగున్నా ఆ సంస్థ సేవలు సంతృప్తికరంగా లేవు. లోపాలు తలెత్తిన సత్వరమే సరిచేయాలని కోరుతున్నాం. అయినా జాప్యం జరుగుతోంది. విశాఖ రీజియన్‌లో 8 కరోనా బస్సులు నడుస్తున్నాయి.  

సాక్షి, అమరావతి: ఆర్టీసీలో ఎస్సీ, ఎస్టీ బ్యాక్‌లాగ్‌ పోస్టులిప్పిస్తామని నిరుద్యోగుల నుంచి డబ్బులు వసూలు చేసిన వ్యవహారంలో రాష్ట్ర ఎస్సీ, ఎస్టీ కమిషన్‌ చైర్మన్‌ కారెం శివాజీకి పాత్ర ఉన్నట్టు తాజాగా వెల్లడైన ఆడియో టేపులు తేటతెల్లం చేస్తున్నాయి. నెల్లూరు జిల్లాలో కండక్టర్‌గా విధులు నిర్వహిస్తూ.. ఆర్టీసీ ఎస్సీ, ఎస్టీ ఎంప్లాయీస్‌ వెల్ఫేర్‌ అసోసియేషన్‌ రాష్ట్ర ప్రధాన కార్యదర్శి హోదాలో ఉన్న కోవూరు ఎజ్రా శాస్త్రి ఆర్టీసీ బ్యాక్‌లాగ్‌ పోస్టుల వ్యవహారంలో భారీ ఎత్తున వసూళ్లకు పాల్పడిన వ్యవహారంపై ఆదివారం ‘సాక్షి’లో కథనం ప్రచురితమవడం తెలిసిందే. కాగా, ఎజ్రా శాస్త్రికి, కారెం శివాజీకి మధ్య జరిగిన సంభాషణలకు సంబంధించిన ఆడియో టేపులు ఆదివారం వెలుగులోకి వచ్చాయి. దాదాపు గంటన్నరపాటు వీరిద్దరి మధ్య జరిగిన ఈ సంభాషణల్లో కారెం శివాజీ ఖాతాకు నేరుగా రూ.12 లక్షలు పంపించినట్టు ఎజ్రా శాస్త్రి వెల్లడించారు. నా పేరు చెప్పి భారీగా వసూలు చేశావుగానీ, నాకు అంత ఇవ్వలేదు కదా అని కారెం శివాజీ.. శాస్త్రితో అనడం ఈ టేపుల్లో ఉంది. ఇదిలా ఉండగా, ఈ వ్యవహారంలో రాష్ట్రవ్యాప్తంగా నిరుద్యోగులకు ఆశ కల్పించి శాస్త్రి చేసిన వసూళ్లు రూ.2 కోట్ల వరకు ఉన్నట్టు బాధితులు చెబుతున్నారు. ఎస్సీ, ఎస్టీ కమిషన్‌ చైర్మన్‌గా ఉన్న కారెం శివాజీ బ్యాక్‌లాగ్‌ పోస్టుల భర్తీకి నోటిఫికేషన్‌ ఇస్తారని, ఆ వెంటనే ఆర్టీసీలో నోటిఫికేషన్‌ జారీ అవుతుందని చెబుతూ ఎజ్రా శాస్త్రి యూనియన్‌లో ప్రచార కార్యదర్శిగా ఉన్న చంద్రశేఖర్‌ ఆజాద్‌ నుంచి రూ.12.5 లక్షలు వసూలు చేసినట్టు తెలుస్తోంది. జూనియర్‌ అసిస్టెంట్‌ పోస్టులు ఇప్పిస్తామని చెప్పడంతో ఆజాద్‌ మరికొందరి నుంచి కూడా డబ్బు వసూలు చేసినట్లు బాధితులు చెబుతున్నారు. నెల్లూరు ప్రధాన బస్టాండ్‌లో క్యాంటీన్‌ నిర్వహిస్తున్న కడప జిల్లా మైదుకూరు మండలం కేశలింగాయపల్లికి చెందిన తిరుమలయ్య మోసపోయి రూ.15 లక్షలు పోగొట్టుకున్నాడు. బాధితులు ఆర్టీసీ ఎండీ మాలకొండయ్యను కలసి ఫిర్యాదు చేయగా.. కేసు పెట్టాలని సూచించడం, బాధితులు కృష్ణలంక పోలీస్‌స్టేషన్‌లో ఫిర్యాదు చేసినా పోలీసులు కేసు నమోదు చేయకపోవడం, దీనిపై బాధితులు విజయవాడ పోలీసు కమిషనర్‌ను కలసి ఫిర్యాదు చేయడం తెలిసిందే. నాపై వచ్చిన ఆరోపణలన్నీ అవాస్తవం: కారెం ఆర్టీసీలో బ్యాక్‌లాగ్‌ పోస్టులిప్పిస్తానని ఎవరి వద్ద డబ్బులు తీసుకోలేదని, అలాంటి అలవాటు తన చరిత్రలో లేదని కారెం శివాజీ చెప్పారు. ఆరోపణలపై ‘సాక్షి’ వివరణ కోరగా ఆయన పైవిధంగా స్పందించారు. ఆర్టీసీ యూనియన్‌లో రెండు గ్రూపులున్నాయని, వాటిమధ్య తలెత్తిన వివాదాల వల్లే ఈ ఆరోపణలు వస్తున్నాయని ఆయన చెప్పారు. ఎవరి వద్దా డబ్బు తీసుకోలేదని, బ్యాక్‌లాగ్‌ పోస్టుల వ్యవహారంతో తనకు సంబంధం లేదన్నారు. 


 సాక్షి, హైదరాబాద్: ఆర్టీసీలో 9,920 కండక్టర్, 14,657 డ్రైవర్ పోస్టుల భర్తీకి ఆర్థిక శాఖ ఆమోదం తెలిపింది. వీటి భర్తీ బాధ్యతను యాజమాన్యానికే అప్పగించింది. నేరుగా నియామకాలు చేపట్టాలని ఉత్తర్వుల్లో పేర్కొంది. ఈ జీవోను ఆధారంగా చేసుకుని ఒకట్రెండు రోజుల్లో రవాణా శాఖ మరో జీవో జారీ చేయనుంది. ప్రస్తుతం ఆర్టీసీలో పనిచేస్తున్న కాంట్రాక్టు సిబ్బందినే ఈ పోస్టుల్లో భర్తీ చేయనున్నారు. కాగా ఆర్టీసీలోని పోస్టులతోసహా మొత్తం 26,395 పోస్టుల భర్తీకి ఆర్థికశాఖ ఆమోదముద్ర వేసింది. హోం, న్యాయ, రెవెన్యూ శాఖల్లోని 734 హాస్టల్ వెల్ఫేర్ ఆఫీసర్ గ్రేడ్-2, జూనియర్ అసిస్టెంట్, జూనియర్ స్టెనోగ్రాఫర్,  గిరిజన సంక్షేమ శాఖలో 898 టీచర్ పోస్టులు. బేవరేజెస్ కార్పొరేషన్‌లో 175 పోస్టులు భర్తీ చేస్తారు.
  
  ఖాళీలు తెలుసుకుని ఫీజు చెల్లించండి
  సాక్షి, హైదరాబాద్: వీఆర్‌ఓ,  వీఆర్‌ఏ పోస్టులకు దరఖాస్తు చేసేవారు ముందుగా తమ విభాగంలో ఖాళీలు ఉన్నాయో లేదో సరిచూసుకోవాలని రాష్ట్ర భూ పరిపాలన విభాగం ప్రధాన కమిషనర్ కార్యాలయం సూచించింది. రోస్టర్ పాయింట్ ప్రకారం తమ విభాగం(రిజర్వేషన్) కోటాలో ఖాళీలు ఉన్నాయని నిర్ధారించుకున్న తర్వాతే దరఖాస్తు రుసుం చెల్లించాలని కోరింది.