కొన్ని చిత్రాల్లోని కొన్ని సంఘటనలు మనసులో నిలిచిపోతాయి.అవి భయపెట్టేవి కావచ్చు,థ్రిల్ చేసేవి కావచ్చు. అలాంటి సంఘటనే రమ్ చిత్రంలో తాను చవిచూశానని అంటోంది నటి సంచితాశెట్టి. సూదుకవ్వుమ్ చిత్రంలో ఊహా పాత్రలో మెరిసి యువత గుండెల్ని కొల్లగొట్టిన ఈ బ్యూటీ సుమారు మూడేళ్ల తరువాత తమిళంలో కథానాయకిగా నటిస్తున్న చిత్రం రమ్.నవ దర్శకుడు సాయి కథ,కథనం,దర్శకత్వం బాధ్యతల్ని నిర్వహిస్తున్న ఈ చిత్రాన్ని ఆల్ ఇన్‌ఫ్రక్చర్స్ పతాకంపై విజయ్ నిర్మిస్తున్నారు.
  
  అనిరుద్ సంగీతాన్ని అందిస్తున్న ఈ చిత్రం గురించి ఆ చిత్ర కథానాయకి సంచితాశెట్టి తెలుపుతూ పిజ్జా-2 చిత్రం తరువాత తాను నటిస్తున్న తమిళ చిత్రం రమ్ అని తెలిపారు.హారర్ థ్రిల్లర్ కథాంశంతో రూపొందుతున్న ఈ చిత్ర షూటింగ్ పూర్తిగా రాత్రి వేళల్లోనే చిత్రీకరణను జరుపుకుంటోందన్నారు. ఇందులో కారు చేజింగ్ సన్నివేశం ఉంటుందన్న విషయం తనకు తెలుసు గానీ ఆ కారును తానే డ్రైవ్ చేయాలన్న సంగతి తెలియదన్నారు.
  
   అనూహ్యంగా దర్శకుడు తన కారు ఎక్కించి డ్రైవ్ చేయమన్నారని తెలిపారు. దీంతో వెన్నులో వణుకు పట్టుకొచ్చిందన్నారు.ఆ వెంటనే తన సహ నటులు రిషికేష్, వివేక్, అమ్జద్ కారు ఎక్కారన్నారు. ఇక తన భయం రెట్టింపైందని చెప్పారు. కారణం తనకు కారును సాధారణంగా నడపడమే వచ్చు అని, ఇలా అర్ధరాత్రి చేజింగ్ చేయడం అంటే చాలా కంగారు పడ్డానని అన్నారు.
  
   ఎలాగోలా ఆ కారు చేజింగ్ పూర్తి చేసిన తరువాత దర్శకుడు వచ్చి ఏమ్మా భయపడతావు. సన్నివేశం సూపర్‌గా వచ్చింది అని చెప్పడంతో సంతోషంగా ఊపిరి పీల్చుకున్నానని సంచితాశెట్టి చెప్పుకొచ్చింది. ఈ కారు చేజింగ్ సన్నివేశంలో నటించడం మరుపురాని సంఘటనగా ఆమె పేర్కొంది. రమ్ చిత్రం మూడో షెడ్యూల్ చిత్రీకరణను జరుపుకుంటోందని యూనిట్ వర్గాలు వెల్లడించారు.
  


 కోలీవుడ్‌లో హారర్ కథా చిత్రాలకు ఆదరణ ఏ మాత్రం కొరవడలేదనడానికి నిదర్శనం ఆ తరహా చిత్రాల నిర్మాణాలు ఎక్కువ కావడమే. తాజాగా రమ్ అనే చిత్రం సోమవారం పూజా కార్యక్రమాలతో ప్రారంభమైంది. ఇంతకు ముందు మసాలాపడమ్ చిత్రాన్ని అందించిన ఆల్ ఇన్ పిక్చర్స్ సంస్థ అధినేత టి.విజయరాఘవేంద్ర నిర్మిస్తున్న తాజా చిత్రం ఇది. నవ దర్శకుడు సాయ్‌భరత్ కథ, కథనం,దర్శకత్వం బాధ్యతల్ని నిర్వహిస్తున్న ఈ చిత్రంలో హృషికేష్, సంచితశెట్టి హీరోహీరోయిన్లుగా నటిస్తున్న ఈ చిత్రంలో మియా, అంజత్‌ఖాన్, అర్జున్ చిదంబరం ప్రధాన పాత్రల్లో నటించనున్నారు. హాస్య నటుడు వివేక్, అంజాదే చిత్రం ఫేమ్ నరేన్ కీలక పాత్రలు పోషించనున్నారు.
 
 ఈ సందర్భంగా చిత్రం వివరాలను నిర్మాత విజయరాఘవేంద్ర తెలుపుతూ చిత్రంలో హీరోగా నటిస్తున్న హృషికేష్ తనకు మంచి మిత్రుడని చెప్పారు. ఈ కథ వినగానే నో అని చెప్పలేకపోయానన్నారు.అంత సంతృప్తి కలిగించడంతో వెంటనే షూటింగ్ మొదలెట్టేద్దాం అని చెప్పానన్నారు. హారర్ క్రైమ్ ఇతివృత్తంతో కూడిన ఈ చిత్ర కథ చాలా ఫ్రెష్‌గా ఉంటుందన్నారు. ప్రముఖ హాస్యనటుడు వివేక్ నటిస్తున్న తొలి హారర్ చిత్రం ఇదే కావడం విశేషం అన్నారు. అదే విధంగా నటుడు నరేన్ చాలా వైవిధ్యపాత్రలో కనిపించనున్నారని చెప్పారు.
 
 వేదాళం, నానుమ్ రౌడీదాన్, తంగమగన్ వంటి వరుస విజయాలు సాధించిన యువ సంగీత దర్శకుడు అనిరుద్ తమ చిత్రానికి సంగీత భాణీలు కట్టడం సంతోషంగా ఉందన్నారు. ఇది యూత్ టీమ్ రూపొందిస్తున్న చిత్రం అని కచ్చితంగా ప్రేక్షకులకు వినూత్న అనుభూతిని కలిగించే చిత్రంగా రమ్ ఉంటుందని అన్నారు.


  నేను ఫైట్స్ చేశానంటున్నారు నటి నికీషా పటేల్. ఇంతకీ ఈ బ్యూటీ ఎవరితో ఎందుకు ఫైట్స్ చేశారన్నదేగా మీ సందేహం. ‘‘ఎవరితోనో ఎందుకు ఫైట్స్ చేస్తాను, అంతా సినిమా కోసమే’’ నంటున్నదీ ఉత్తరాది భామ. సినిమాలో పోరాట దృశ్యాల్లో నటించానంటున్న నికీషా ప్రస్తుతం మంచి జోష్‌లో ఉన్నారు. ఆమె ఒక నాయకిగా నటించిన ఎన్నమో ఏదో చిత్రం ఇటీవలే తెరపైకి వచ్చింది. ఈ చిత్రంలో తన నటనకు పలువురి నుంచి ప్రశంసలు వస్తున్నాయంటూ సంతోషం వ్యక్తం చేస్తున్న ఈ అమ్మడి చేతిలో మరో మూడు, నాలుగు తమిళ చిత్రాలున్నాయట. వాటిలో ఒకటి రంభ ఊర్వశి మేనక (రమ్). ఈ చిత్రం గురించి నికీషా తెలుపుతూ రంభ ఊర్వశి మేనక చిత్రంలో నటి త్రిష, ఇషా చావ్లాతో కలిసి నటిస్తున్నానని చెప్పారు.
  
  ఇది మిస్టరీ థ్రిల్లర్ కథా చిత్రం అని తెలిపారు. ఇందులో తాను ఫైటింగ్ సన్నివేశాల్లోనూ నటించానని పేర్కొన్నారు. స్టంట్ మాస్టర్ విజయన్ కాంబినేషన్‌లో తాను నటిస్తున్న రెండో చిత్రం రంభ ఊర్వశి మేనక అని చెప్పారు. ఈ చిత్రంలోని పోరాట దృశ్యాలు, అలరిస్తాయన్నారు. దీంతోపాటు నారదన్ అనే మరో చిత్రంలో నటిస్తున్నట్లు తెలిపారు. ఇందులో నకుల్‌కు జంటగా నటనకు అవకాశం ఉన్న పాత్ర చేస్తున్నట్లు తెలిపారు. మెమొరీలాస్ అయిన యువతి పాత్రను పోషిస్తున్నట్లు తెలిపారు. వాటితో పాటు వారు ఫాంటసీ కథా చిత్రంలో నటించనున్నట్లు నికీషా వెల్లడించారు.