బీజింగ్‌: డోక్లాంలో రెండు నెలలుగా కొనసాగుతున్న ప్రతిష్టంభన నేపథ్యంలో భారత్‌లో నివసిస్తున్న చైనీయులకు ఆ దేశ ప్రభుత్వం తాజాగా భద్రతా సలహాను జారీచేసింది. వ్యక్తిగత భద్రతపై దృష్టి పెట్టాలని, స్థానిక భద్రతాపరమైన పరిస్థితులను ఎప్పటికప్పుడు బేరిజు వేసుకోవాలని భారత్‌లోని చైనీయులకు సూచించింది. డోక్లాం ప్రతిష్టంభన నేపథ్యంలో చైనా సర్కారు జారీచేసిన రెండో భద్రతాపరమైన సలహా ఇదని ఆ దేశ ప్రభుత్వ మీడియా పేర్కొంది.
 
 భారత్‌లో చైనీయులు ఎదుర్కొంటున్న పలు బెదిరింపులు, ముప్పుల గురించి వివరించిన ఆ దేశ మీడియా.. అనవసరంగా భారత్‌కు వెళ్లొద్దని తమ దేశ పౌరులకు సూచించింది. గతంలో జూలై 8న చైనా జారీచేసిన అడ్వయిజరీ కన్నా తాజా అడ్వయిజరీ తీవ్రంగా ఉండటం గమనార్హం. 'ప్రకృతి విపత్తులు, ట్రాఫిక్‌ ప్రమాదాలు, వ్యాధుల వ్యాప్తి తరచూ భారత్‌లో చోటుచేసుకుంటాయి' అంటూ ఈ అడ్వయిజరీలో చెప్పుకొచ్చింది. ఈ కారణాల వల్లే వీసా గడువు ముగిసినా పలువురు చైనీయులు ఇంకా భారత్‌లోనే ఉన్నారంటూ పేర్కొంది.


 న్యూఢిల్లీ: చైనా-భారత్‌ సరిహద్దులో ఉద్రిక్తతల దృష్ట్యా భారత్‌లో ఉంటున్న చైనా పౌరులకు న్యూఢిల్లీలోని చైనా ఎంబసీ భద్రతా సూచనలు చేసింది. భారత్‌కు వస్తున్న పౌరులు భద్రతా పరిస్ధితులను దృష్టిలో ఉంచుకోవాలని కోరింది.
 
 భారత్‌కు వస్తున్న పౌరులకు భద్రతా సూచనలు చేయడంపై మాట్లాడిన చైనా విదేశాంగ మంత్రిత్వ శాఖ అధికారులు.. తాము జారీ చేసిందని కేవలం సూచన మాత్రమేనని అలర్ట్‌ ఏమాత్రం కాదని పేర్కొన్నారు. కాగా, ఈ నెల 5వ తేదీన భారత్‌ను సందర్శిస్తున్న చైనా పౌరులకు అలర్ట్‌ జారీ చేసే విషయంపై ఆలోచిస్తామని చైనా విదేశాంగ శాఖ పేర్కొన్న విషయం తెలిసిందే.