రాయచోటి, న్యూస్‌లైన్ :  రాష్ట్రాన్ని సమైక్యంగా వుంచుతామంటూ పాలకులు ప్రకటించేంతవరకు ఉద్యమాన్ని విరమించే ప్రసక్తేలేదని, ఎలాంటి త్యాగాలకైనా తాము సిద్ధమేనని సమైక్యరాష్ట్ర పరిరక్షణ వేదిక జెఏసి నేతలు వెంకటేశ్వరరెడ్డి, రామమోహన్, యహియాబాష, మనో హర్‌రాజు, సి.బి.మనోహర్‌రెడ్డి, బి.వి.రమణలు ప్రకటించారు. బుధవారం స్థానిక ఆర్టీసీ బస్టాండు ఆవరణంలో స్థానిక ఏరియా ఆసుపత్రి ఉద్యోగులు, సిబ్బంది రిలేదీక్షలను చేపట్టారు. వీరికి సంఘీభావం తెల్పిన జేఏసీనేతలు మాట్లాడుతూ సమైక్య రాష్ట్రపరిరక్షణ కోసం ఉపాధ్యాయ, ఉద్యోగులు, ఎన్‌జిఓలు,ఆర్టీసీ కార్మికులు ఉద్యమిస్తుండడం ఎంతైనా అభినందనీయమన్నారు. రాష్ట్రవిభజనను తీవ్రస్థాయిలో వ్యతిరేకించి అడ్డుకోవాల్సిన అన్నిపార్టీల నేతలు నిమ్మకు నీరెత్తినట్లు మిన్నకుండి పోవడం దారుణమన్నారు. ప్రజల ఓట్లతో గద్దెనెక్కిన నేతలకు ప్రజాభీష్టం మేరకు తప్పక నడుచుకోవాల్సి వుందన్నారు.  
  
 పురవీధులలో ర్యాలీ : స్థానిక ఆర్టీసీ బస్టాండులోని రిలేదీక్షల శిబిరం నుండి సమైక్యవాదులు రాష్ట్రవిభజనను నిరసిస్తూ పురవీధులలో నిరసన ర్యాలీ ని నిర్వహించారు. ఈ సందర్భంగా వారు కేంద్ర-రాష్ట్రమంత్రులు బొత్ససత్యనారాయణ, రఘువీరారెడ్డి, ఆనం రామనారా యణరెడ్డి, చిరంజీవి, పల్లంరాజు, కోట్ల,   పురందేశ్వరి, పనబాక లక్ష్మి తదితరులకు వ్యతిరేకంగా పెద్ద ఎత్తున నినాదాలు చేశారు. వెంటనే మంత్రులంతా రాజీనామాలు ఆమోదించుకుని ఉద్యమంలో పాల్పంచుకోవాలంటూ డిమాండ్ చేశారు.             
  
 వినూత్న నిరసన... రాష్ట్రవిభజనను అడ్డుకోలేని సీమాంధ్రకు చెందిన అసమర్థ కేంద్ర-రాష్ట్రమంత్రుల చిత్రపటాలపై బుధవారం సమైక్యవాదులు వినూత్నరీతిలో   నిరసన తెలిపారు. సీమాంధ్రకు చెందిన కేంద్ర-రాష్ట్రమంత్రులందరి ఫోటోలను ముద్రి ంచిన బ్యానర్‌ను సమైక్యవాదులు నేతాజి సర్కిల్‌లో జాతీయర హదారిపై పడేసి టమోటాలు, కోడిగ్రుడ్లు, చెప్పులతో కొట్టి నిరసన తెలిపారు. ఈ కార్యక్రమంలో సమైక్యరాష్ట్ర పరిరక్షణ వేదిక జెఏసి నేతలు వెంకటేశ్వరరెడ్డి, రామమో హన్, పుల్లయ్య, ఖాజామియా, మనోహర్‌రాజు, శేఖరనాయక్, తిప్పారెడ్డి, గంగిరెడ్డి, శివారెడ్డితో పాటు పలువురు ఉద్యోగ, ఉపాధ్యాయులు, ఆర్టీసి జెఏసి సభ్యులు, నేతలు పాల్గొన్నారు.
  
 బ్యాంకులను మూసివేత...
 సమైక్యరాష్ట్ర పరిరక్షణవేదిక రాష్ట్రనేతల పిలుపుమేరకు బుధవారం పట్టణంలో సమైక్యవాదులు రెండవరోజు కూడా కేంద్రప్రభు త్వ కార్యాలయాలు, సంస్థలను మూయించేశారు. పట్టణంలోని ఆంధ్రబ్యాంకు, ఎపిజిబి, హెచ్‌డిఎఫ్‌సి, కార్పొరేషన్ బ్యాంకు, యాక్సిస్‌బ్యాంకు, సిండికేట్, స్టేట్‌బ్యాంకుల వద్దకెళ్ళి వాటిని మూయించారు. అలాగే పోస్టాపీసు, ఎల్‌ఐసి కార్యాలయం, ముత్తూట్ ఫైనాన్స్ తదితర సంస్థలను కూడా మూయించేశారు. 
  
 విఆర్‌ఓల దీక్షలు : తహశీల్దార్ కార్యాలయం వద్ద  సమైక్యాంధ్ర జెఏసి ఆధ్వర్యంలో నిర్వహిస్తున్న దీక్షాశిబిరంలో బుధవారం  మండలంలోని పలు గ్రామాల విఆర్‌ఓలు దీక్షలు చేపట్టారు. వీరికి జెఏసి నేతలు నాగిరెడ్డి,జనార్దన్, శ్రీనివాసరాజు, నాగేశం, ఉపాధ్యాయసంఘం నేతలు వెంకట్రామిరెడ్డి, రెడ్డెన్న,శివారెడ్డి,రాజారమేష్,జాబీర్‌ల తో పాటు ఉపాధ్యాయులు నరసింహారెడ్డి,శ్రీనివాసులు,రెడ్డెప్పరెడ్డి,సునీర్, నాగయ్య, వెంకట్రామరాజు సంఘీభావం తెలిపారు. 
  
 కొనసాగిన న్యాయవాదుల దీక్షలు : స్థానిక కోర్డుసముదాయంలో గత 64 రోజులుగా న్యాయవాదులు చేపడుతున్న రిలేదీక్షలను బుధవారం కూడా కొనసాగించా రు. దీక్షలలో న్యాయవాదులు  శ్రీనివాసులు, నరసింహారెడ్డి, వి.సి.రెడ్డెప్పరెడ్డి, కోర్టుఉద్యోగి ఖాదర్‌వలీ తదితరులు వున్నారు. వీరికి పలువురు సీనియర్,జూనియర్ న్యాయవాదులు, ఉద్యోగులు  సంఘీభావం తెలిపారు.
  


 న్యూస్‌లైన్ నెట్‌వర్క్: సమైక్యాంధ్ర ఉద్యమకారుల ఆగ్రహం కారణంగా కేంద్రమంత్రి చిరంజీవి తనయుడు రామ్ చరణ్ తేజ్ నటించిన ‘తుఫాన్’ చలన చిత్ర ప్రదర్శనకు అవరోధం ఏర్పడింది. సినిమా విడుదలైన శుక్రవారం గ్రామీణ జిల్లాలోని వివిధ కేంద్రాల్లో  ప్రదర్శనకు ఎదురుదెబ్బ తగిలింది. అనకాపల్లి, నర్సీపట్నం, పాయకరావుపేట, చోడవరం, మాడుగుల, యలమంచిలి, అరకు తదితర ప్రాంతాల్లో ఉదయం నుంచే సమైక్య వాదులు థియేటర్ల వద్ద మోహరించారు.
 
 పోలీసుల బందోబస్తు ఉన్నప్పటికీ సినిమా ప్రదర్శనను అడ్డుకునే ధ్యేయంతో ఆందోళన చేపట్టారు. కేంద్ర మంత్రి చిరంజీవి సమైక్యాంధ్ర ఉద్యమానికి మద్దతు తెలపడం లేదని, పదవికి రాజీనామా చేయడం లేదని, అందుకే తాము ఆయన కుటుంబ సభ్యుల సినిమాలను అడ్డుకుంటామని స్పష్టం చేశారు. తమకు సహరించారని రామ్ చరణ్ అభిమానులను, థియేటర్ల యాజమాన్యాలను కోరారు. దాంతో అభిమానులు థియేటర్ల వెలుపలికి వచ్చేశారు. యజమానులు కూడా సినిమా ప్రదర్శనను నిలిపేశారు. ఒకటి రెండు చోట్ల సిని మాను ఆలస్యంగా ప్రారంభించారు. మొత్తం మీద చాలా చోట్ల శుక్రవారం ప్రదర్శన సాధ్యం కాలేదు. ఎక్కడా ఉద్రిక్త పరిస్థితులు చోటు చేసుకోలేదు.
  
 అభిమానులపై లాఠీ ఝళిపింపు
 
  నర్సీపట్నం రూరల్: తుఫాన్ చిత్రం విడుదల నేపథ్యంలో పోలీసులు భారీ బందోబస్తు నిర్వహించారు. చిత్రప్రదర్శన సందర్భంగా ఎలాంటి అవాంఛనీయ సంఘటనలు జరగకుండా శుక్రవారం పట్టణ సీఐ ప్రసాదరావు సీఆర్‌పీఎఫ్ బలగాలను శ్రీకన్య సినీ కాంప్లెక్స్ వద్ద మోహరింపజేశారు. ఉదయం 8గంటలకే రామ్‌చరణ్‌తేజ్ అభిమానులు అధిక సంఖ్యలో సినిమా చూసేందుకు తరలివచ్చారు. మూకుమ్మడిగా వారు సినిమా కాంప్లెక్స్ ప్రాంగణంలోకి కు ప్రయత్నించడంతో పోలీసులు స్వల్పంగా లాఠీచార్జి చేశారు. సినిమా డిస్ట్రిబ్యూటర్ చిత్ర ప్రదర్శనను నిలిపివేయడంతో రామ్‌చరణ్ అభిమానులు నిరాశతో వెనుదిరిగారు. పోలీసులు మధ్యాహ్నం 12గంటల వరకు సినిమాకాంప్లెక్స్ ఆవరణలోనే పహారా కాశారు.
  
 ఒకరోజు వాయిదా
 
  అనకాపల్లి అర్బన్: తుఫాన్ చిత్రం విడుదల శుక్రవారం నిలిచిపోయింది. ఇక్కడి వెంకటేశ్వ ర, పర్తిసాయి, షిరిడిసాయి థియేటర్లలో ఈ చి త్రాన్ని ప్రదర్శించాల్సి ఉంది. సమైక్యాంధ్ర జే ఏసీ సూచన ప్రకారం చిత్ర ప్రదర్శనను ఒక రో జు వాయిదా వేసుకుంటున్నట్టు నిర్వాహకులు, రామ్ చరణ్ అభిమానులు తెలిపారు. శనివా రం నుంచి యథావిధిగా ప్రదర్శిస్తామన్నా రు.
  
 నినాదాలు, బైఠాయింపు
 
  పాయకరావుపేట: తుఫాన్ ప్రదర్శనను ఉద్యోగులు, ఉపాధ్యాయుల జేఏసీ సభ్యులు అడ్డుకున్నారు. ఉదయం మోర్నింగ్ షో సమయానికి వీరు ర్యాలీగా చిత్ర మందిర్, సూర్య థియేటర్ల వద్దకు వచ్చి బైఠాయించారు. సమైక్యాంధ్రకు మద్దతు పలకని చిరంజీవి కుమారుడి సినిమా ప్రదర్శనను నిలిపేయాలని పెద్ద ఎత్తున నినాదాలు చేశారు. అభిమానులు థియేటర్ల నుంచి వెలుపలికి రావాలని కోరడంతో వారు తలవొగ్గారు. అయితే ఆందోళన తర్వాత మళ్లీ ప్రదర్శన ప్రారంభించారు. రెండు థియేటర్ల వద్ద భారీ పోలీసు బందోబస్తు ఏర్పాటు చేసారు.
  
 ఆర్టీసీ కార్మికుల, ఉద్యోగుల ఆందోళన
 
  మాడుగుల: తుఫాన్ సినిమా ప్రదర్శనను మాడుగులలో ఆర్టీసీ కార్మికులు, ఉద్యోగ, ఉపాధ్యాయ జేఏసీ సభ్యులు అడ్డుకున్నారు. స్థానిక కనకరత్న థియేటర్ వద్ద ఆర్టీసీ కార్మికులు, జేఏసీ సభ్యులు ఆందోళనలు చేపట్టారు. సోనియాకు, కెసీఆర్‌కు వ్యతిరేకంగా నినాదాలు చేశారు. పోలీసులు రంగప్రవేశం చేసి ఆందోళనకారులను నిలువరించారు.
  
 అరకులో నిరసన
 
  అరకులో తుఫాన్ ప్రదర్శనను ఎన్జీవో, సమైక్యాంధ్ర జేఏసీ నేతలు అడ్డుకున్నారు. జ్యోతి మహాల్‌లో శుక్రవారం ఉదయం ఆటను నిలిపివేశారు. చిరంజీవి కేంద్ర మంత్రి పదవికి రాజీనామా చేయాలని, సమైక్యాంధ్ర పోరాటంలో పాల్గొనాలని నినాదాలు చేశారు.
  
 వాల్‌పోస్టర్ల దహనం
 
  యలమంచిలి/యలమంచిలి రూరల్: తుఫాన్ సినిమా ప్రదర్శనను సమైక్యవాదులు అడ్డుకున్నారు.  పట్టణంలోని తులసీ, సీత చిత్రమందిర్‌లలో విడుదలైన సినిమాను ఆపడానికి ఆందోళనకారులు ఉదయం 10 గంటలకే థియేటర్‌లకు చేరుకున్నారు. ఉదయం ఆట ప్రదర్శించకుండా అడ్డుకున్నారు.  వాల్‌పోస్టర్‌లను చింపేసి తగులబెట్టారు.  సమైక్యవాదుల నిరసనలతో సినిమా థియేటర్ యాజమాన్యం ఉదయం ఆట ప్రదర్శనను నిలిపివేసింది.  
  


 హైదరాబాద్ : సమైక్యాంధ్ర కోసం పోరాడుతున్న ఏపీఎన్జీఓల తీరుకు నిరసనగా ఏపీఎన్జీవో భవన్‌ను ముట్టడించేందుకు  తెలంగాణ మాలమహానాడు కార్యకర్తలు బుధవారం ప్రయత్నించారు. కార్యాలయం ముందు బైఠాయించి అన్నదమ్ముల్లా కలిసుందామని... రాష్ట్రాలుగా విడిపోదామని వారు కోరారు. సీమాంధ్ర ప్రజలకు తెలంగాణ ప్రాంతంలో ఎలాంటి ఇబ్బందులు కలగవని చెప్పారు.
 
 ఈ నెల 7న ఏపీఎన్జీఓలు నిర్వహించ తలపెట్టిన సభను వెంటనే విరమించుకోవాలని డిమాండ్‌ చేశారు. సమాచారం అందుకున్న పోలీసులు ఆందోళనకారులను అక్కడ నుంచి తరలించారు. ఏపీ ఎన్జీవోలు ఏడో తేదీన తలపెట్టిన సభకు పోలీసులు అనుమతి ఇచ్చిన విషయం తెలిసిందే.