సమాజ్‌వాది పార్టీ వ్యవస్థాపక అధ్యక్షుడు, ఉత్తరప్రదేశ్‌ మాజీ ముఖ్యమంత్రి ములాయం సింగ్‌ యాదవ్‌ జీవితం ఆధారంగా ‘మై ములాయం సింగ్‌ యాదవ్‌’ (నేను ములాయం సింగ్‌ యాదవ్‌) అనే సినిమా తెరకెక్కుతోంది. సువేందు రాజ్‌ ఘోష్‌ దర్శకత్వం వహిస్తున్న ఈ చిత్రంలో ములాయం పాత్రలో అమిత్‌ సేథి నటిస్తున్నారు. ఈ చిత్రం పోస్టర్‌ని విడుదల చేశారు చిత్రబృందం. ఈ సందర్భంగా సువేందు రాజ్‌ ఘోష్‌ మాట్లాడుతూ– ‘‘ములాయం సింగ్‌ యాదవ్‌ అనే పేరే ఎంతో శక్తివంతమైంది. ఒక రైతు కొడుకు ముఖ్యమంత్రిగా, అత్యంత శక్తివంతమైన వ్యక్తిగా ఎదిగారు. భారతదేశంలోని అతిపెద్ద రాష్ట్రాల్లో ఒకటైన ఉత్తర ప్రదేశ్‌ రాష్ట్రాభివృద్ధి కోసం, ప్రజల కోసం ఆయన ఎంతో చేశారు. అలాంటి వ్యక్తి జీవితం గురించి ప్రజలందరికీ తెలియాల్సిన అవసరం ఉంది. ఆయన జీవితంలో జరిగిన నిజమైన సంఘటనల ఆధారంగా ఈ సినిమా తెరకెక్కిస్తున్నా’’ అన్నారు.  


 లౌకిక వర్సిటీకి ములాయం ఏమైనా వీసీనా?: నితీశ్
 పట్నా: లౌకికవాదంపై తనకు సమాజ్‌వాది పార్టీ అధినేత ములాయంసింగ్ యాదవ్ నుంచి సర్టిఫికెట్ అవసరం లేదని జేడీ(యూ) నేత, బిహార్ ముఖ్యమంత్రి నితీశ్‌కుమార్ పేర్కొన్నారు. బీజేపీతో 12 ఏళ్ల పాటు స్నేహం చేసినందుకు తన లౌకిక విశ్వసనీయతను ములాయం ప్రశ్నించటాన్ని తిప్పికొడుతూ ఆయన పైవిధంగా స్పందించా రు. మంగళవారం ఒక ప్రైవేటు టీవీ చానల్ ఏర్పాటు చేసిన కార్యక్రమంలో నితీశ్ మాట్లాడుతూ.. ‘‘ఆయనేమైనా లౌకికవాద విశ్వవిద్యాలయానికి వైస్ చాన్స్‌లరా?
 
 నేనేమైనా పరిశోధన స్కాలర్‌నా? ఆయన నుంచి నేను లౌకికవాదంపై సర్టిఫికెట్ (ధ్రవీకరణపత్రం) కోరుతున్నానా?’’ అని ఎద్దేవా చేశారు. ‘‘నేను లోక్‌నాయక్ జయప్రకాశ్‌నారాయణ్, రామ్‌మనోహర్ లోహియా స్కూల్ నుంచి వచ్చినవాడిని. లౌకికవాదంపై ఎవరి నుంచీ నాకు ఎటువంటి సర్టిఫికెటూ అవసరం లేదు’’ అని వ్యాఖ్యానించారు.
  
 నితీశే మా కూటమి సీఎం: లాలూ
 న్యూఢిల్లీ: బిహార్ శాసనసభ ఎన్నికల్లో ఆర్‌జేడీకి ఎక్కువ సీట్లు వచ్చినా కూడా తమ కూటమి ముఖ్యమంత్రి నితీశ్‌కుమారే అవుతారని ఆ పార్టీ అధినేత లాలూప్రసాద్ స్పష్టంచేశారు. ‘కాంగ్రెస్, జేడీ(యూ), ఆర్‌జేడీలతో కూడిన మహా కూటమి అధికారంలోకి వస్తే.. ఎవరికి ఎన్ని సీట్లు వచ్చాయనే దానితో సంబంధం లేకుండా.. నితీశ్ సీఎం పదవి చేపడతారు. బీజేపీని బిహార్ నుంచి వట్టిచేతులతో వెనక్కు పంపేలా చూడటమే మా ప్రాధాన్యం’అని ఆయన మంగళవారం ఢిల్లీలో మీడియాతో అన్నారు.