శాండల్‌వుడ్ నటుడు శివరాజ్‌కుమార్ కుమార్తె డాక్టర్ నిరుపమా వివాహం సోమవారం బెంగళూరులోని ప్యాలెస్ గ్రౌండ్స్‌లో ఘనంగా జరిగింది. బెంగళూరులోని హెచ్‌ఎస్‌ఆర్ లేఅవుట్‌కు చెందిన ఎల్.మంజేగౌడ, పార్వతి దంపతుల ద్వితీయ కుమారుడు డాక్టర్ దిలీప్ కుమార్‌తో డాక్టర్ నిరుపమా ఏడడుగులు నడిచి దాంపత్య జీవితంలోకి అడుగుపెట్టారు. దక్షిణాది రాష్ట్రాలకు చెందిన సినీ, రాజకీయ ప్రముఖులు హాజరయ్యారు.
 
 టాలీవుడ్ నటుడు అక్కినేని నాగార్జునతో పాటు తమిళనటుడు ప్రభు, శాండల్‌వుడ్ నటులు దర్శన్, కిచ్చా సుదీప్, రవిచంద్రన్, గణేష్, సీనియర్ నటీమణులు జయంతి, అంబికా, లీలావతి, భారతి, జయమాలా తదితరులు హాజరయ్యారు. రాజకీయ ప్రముఖులు ఎస్.ఎంృకష్ణ, రాష్ట్ర మంత్రి ఆర్.వి.దేశ్‌పాండే, తమిళనాడుకు చెందిన స్టాలిన్ తదితరులు పాల్గొన్నారు. సోమవారం సాయంత్రం త్రిపుర వాసినిలో నిర్వహించిన రిసెప్షన్ కార్యక్రమానికి టాలీవుడ్‌కు చెందిన ప్రముఖ దర్శకుడు రాజమౌళి హాజరుకావడం విశేషం.             - సాక్షి, బెంగళూరు
  
 


 సోషల్ వెబ్‌సైట్ పేజీల్లో లెక్కకు మించి పెరుగుతున్న ఫ్యాన్స్ లిస్ట్ చూసి మురిసిపోయే తారలకు ఝలక్ ఇది. శాండల్‌వుడ్ భామ నికితా థక్రాల్ మైక్రో బ్లాగింగ్ పేజీలో ఓ తుంటరి తన ‘ప్రైవేట్ అసెట్స్’ ఫొటోలు పోస్ట్ చేశాడు. ఈ అసభ్యకర, అభ్యంతరకర ప్రవర్తనకు నికిత షాకైంది. ‘ఇది అభిమానులు నాతో మాట్లాడే ప్లేస్.
 మతిచెడినవారి వికృత చేష్టల కోసం కాదు. అతడు పంపిన పిక్చర్స్, మెసేజ్‌లు అసహ్యంగా, జగుప్సగా ఉన్నాయి. ఇలాంటివారు మరికొంత మంది కూడా ఉన్నారు. ఇది నా ఒక్కదాని సమస్య కాదు. చాలామంది మహిళలు ఈతరహా పోకిరీల చేష్టలకు బలవుతున్నారు’ అంటూ ట్వీట్ చేసింది నికిత.
  


 
 ఉప్పి-2 టీజర్‌ను విడుదల చేసిన శివరాజ్‌కుమార్
 
 సాక్షి, బెంగళూరు : దర్శకుడు కావాలనే కోరికతో శాండల్‌వుడ్‌లోకి అడుగుపెట్టిన ఉపేంద్ర అనంతర దర్శకత్వంతో పాటు తనదైన మార్కు నటనతో హీరోగా కూడా పేరు ప్రఖ్యాతులు సంపాదించారు. శాండల్‌వుడ్ అభిమానులతో రియల్‌స్టార్‌గా పిలిపించుకునే ఉప్పి పుట్టినరోజు వేడుకలను ఆయన కుటుంబ సభ్యులతో పాటు అభిమానులు గురువారమిక్కడ ఘనంగా జరుపుకున్నారు. 46వ వసంతంలోకి అడుగుపెట్టిన ఉపేంద్ర ఆయన భార్య ప్రియాంక, తల్లిదండ్రులు, అభిమానుల మధ్య ఘనంగా పుట్టినరోజు వేడుకలను జరుపుకున్నారు.
  
 బుధవారం రాత్రి నుంచే ఉపేంద్ర నివాసానికి చేరుకున్న అభిమానులు ఆయనకు శుభాకాంక్షలు తెలిపేందుకు పోటీపడ్డారు. ఇక ఉప్పి పుట్టినరోజు సందర్భంగా ఆయన నివాసానికి వెళ్లిన ప్రముఖ శాండల్‌వుడ్ నటుడు శివరాజ్‌కుమార్, ఉప్పికి కేక్ తినిపించి శుభాకాంక్షలు తెలియజేశారు. ఇక ఉపేంద్ర అభిమానులు ఎంతగానో ఎదురుచూస్తున్న ఉప్పి-2 టీజర్‌ను కూడా శివరాజ్‌కుమార్ ఈ సందర్భంగా లాంఛనంగా ఆవిష్కరించారు.
  
 నేడు ప్రేక్షకుల ముందుకు‘సూపర్ రంగ’....
 
 గురువారం పుట్టినరోజు వేడుకలు జరుపుకున్న ఉపేంద్రకు పుట్టినరోజు కానుకగా ఆయన నటించిన ‘సూపర్ రంగ’ సినిమా నేడు (శుక్రవారం) ప్రేక్షకుల ముందుకు రానుంది. ప్రముఖ హాస్యనటుడు సాధుకోకిల ఈ చిత్రానికి దర్శకత్వం వహిస్తుండగా, కె.మంజు నిర్మాణ బాధ్యతలను నిర్వర్తిస్తున్నారు. తెలుగులో బాక్సాఫీస్ హిట్‌గా నిలిచిన ‘కిక్’ చిత్రానికి రీమేక్‌గా ఈ సినిమా తెరకెక్కిన విషయం తెలిసిందే. ఇక ఈ చిత్రంలో కృతి కర్బందా కథానాయికగా కనిపించనున్నారు. రాష్ట్ర వ్యాప్తంగా దాదాపు 200 థియేటర్లలో విడుదల కానున్న ఈ సినిమా ఉపేంద్రకు ఎలాంటి అనుభవాన్ని అందించనుందో వేచిచూడాల్సిందే.
  


 సాక్షి, బెంగళూర : గ్లామరస్ ప్రాతల్లో తనదైన అందంతో టాలీవుడ్, శాండల్‌వుడ్‌లో తళుక్కున మెరిసిన తార ప్రియమణి. ఇక టాలీవుడ్‌లో ఎన్నో చిత్రాలకు మెలోడీ మ్యూజిక్‌ను అందించిన దర్శకుడు ఆర్.పి.పట్నాయక్. శాండల్‌వుడ్‌లో వీరిద్దరి భాగస్వామ్యంతో ప్రేక్షకుల ముందుకు రానున్న సినిమా ‘వ్యూహ’.
 
 ఈ సినిమాకు కథ, దర్శకత్వాన్ని ఆర్.పి.పట్నాయక్ అందిస్తుండగా, ప్రియమణి ఈ సినిమాలో ప్రధాన పాత్రను పోషిస్తున్నారు. పొలిటికల్ థ్రిల్లర్‌గా సాగే ఈ సినిమాలో ప్రియమణి పవర్‌ఫుల్ సీబీఐ అధికారి పాత్రలో కనిపించనుండగా, ప్రముఖ నటుడు రంగాయణ రఘు మరో ముఖ్యపాత్రలో కనిపించనున్నారు. త్వరలోనే కన్నడ ప్రేక్షకుల ముందుకు రానున్న ఈ సినిమాకు సంబంధించిన ట్రైలర్ శనివారం రాత్రి నగరంలో విడుదలైంది.
 
 ఈ కార్యక్రమంలో దర్శకుడు ఆర్.పి.పట్నాయక్, నటీనటులు ప్రియమణి, రంగాయణ రఘు పాల్గొన్నారు. ఇక ఈ సందర్భంలో ఆర్.పి.పట్నాయక్ మాట్లాడుతూ....ఈ సినిమాలో కథే హీరో పాత్రను నిర్వహిస్తుందని అన్నారు. ఈ సినిమా కచ్చితంగా విమర్శకుల మన్ననలు అందుకుంటుందనే అశాభావాన్ని ఆర్.పి.పట్నాయక్ వ్యక్తం చేశారు.


 
  శాండల్‌వుడ్ చరిత్రలో మొట్టమొదటి సారిగా తెరపై
 
  నగ్నంగా కనిపించనున్న నవీన్ కృష్ణ
 
 సాక్షి, బెంగళూరు :శాండల్‌వుడ్ నటుడు నవీన్‌కృష్ణ, బాలీవుడ్ నటుడు అమీర్‌ఖాన్ దారిలో నడిచేందుకు ప్రయత్నిస్తున్నారు. ఏ విషయంలో అనుకుంటున్నారా...తెరపై నగ్నంగా కనిపించడంలో! అవును పి.కె సినిమా మొదటి పోస్టర్‌లో రైలు పట్టాల మధ్య అమీర్‌ఖాన్ నగ్నంగా కనిపించి పలు వివాదాలకు తెరతీసిన విషయం తెలిసిందే.
 
 ఇప్పుడు శాండల్‌వుడ్ నటుడు నవీన్ కృష్ణ కూడా శాండల్‌వుడ్ చరిత్రలోనే మొట్టమొదటి సారిగా వెండితెరపై నగ్నంగా కనిపించేందుకు ఓకే చెప్పేశారు. నవీన్ కృష్ణ ప్రధాన పాత్ర పోషించడమే కాకుండా మాటల రచయితగా కూడా పనిచేస్తున్న ‘హగ్గద కొనె’ సినిమాలో ఈ సన్నివేశాలు కనిపించనున్నాయి. ఈ సినిమాకు దయాల్ పద్మనాభన్ దర్శకత్వం వహిస్తుండగా, ఉమేష్ బనాకార్ నిర్మాతగా వ్యవహరిస్తున్నారు.
 
 ప్రముఖ రచయిత పర్వతవాణి రాసిన ఓ నాటకం ఆధారంగా ఈ సినిమా తెరకెక్కుతోంది. ఉరిశిక్ష పడిన ఓ ఖైదీ గడిపే జైలు జీవితం సన్నివేశాలను ఎంతో సహజంగా ప్రేక్షకులకు చూపించడంలో భాగంగానే నవీన్ కృష్ణతో ఈ సన్నివేశాలను చిత్రించామని దర్శకుడు దయాల్ చెబుతున్నారు. ఉరిశిక్షకు చేరువవుతున్న ఓ ఖైదీ నిస్సహాయ పరిస్థితులను, జైలు గోడల మధ్య అతని జీవితాన్ని కృత్రిమంగా చూపించడం తనకు ఇష్టం లేక నవీన్ కృష్ణతో ఈ విషయంపై చర్చించాన న్నారు.
 
 ఇందుకు నవీన్‌కృష్ణ అంగీకరించడంతో జైలు ఊచల వెనక నవీన్‌కృష్ణ నగ్నంగా నిలబడి ఉన్న దృశ్యాలను గత గురువారం నగరంలో వేసిన ప్రత్యేక జైలు సెట్‌లో చిత్రించామని అన్నారు. ఒక నటుడు ఇలా వెండితెరపై నగ్నంగా కనిపించడానికి సన్నద్ధమవడం శాండల్‌వుడ్ చరిత్రలో ఇదే మొదటిసారి కావడం విశేషం.