అల్లు అర్జున్‌... ఆయన అభిమానులకు ఈ పేరొక పవిత్ర మంత్రం. బన్నీ సినిమా రిలీజైందంటే చాలు తెలుగు రాష్ట్రాలు దద్దరిల్లిపోయేలా సందడి చేస్తుంటారీ ఫ్యాన్స్‌. అలాంటిది రేపు ఆయన బర్త్‌డే అంటే వీళ్ల హంగామా ఏ రేంజ్‌లో ఉంటుందో ప్రత్యేకంగా చెప్పక్కర్లేదు. ఇప్పటికే పలు చోట్ల పెద్ద పెద్ద కటౌట్లు పెట్టి ర్యాలీలు తీస్తూ స్వీట్లు పంచుతూ, డ్యాన్సులు చేస్తూ తెగ హడావిడి చేస్తున్నారు. వీళ్లు ఇంతగా అభిమానిస్తున్న ఆ హీరో కూడా మామూలోడు కాదు. ఏ సినిమా జనాలకు నచ్చుతుందో, ఎలాంటి కథలైతే ప్రేక్షకులకు బోర్‌ కొట్టవో, ఏవి తీస్తే అభిమానులు ఎగిరి గంతులేస్తారో అచ్చంగా అలాంటి సినిమాలే ఎంచుకుంటాడు. అవలీలగా హిట్లు సాధిస్తాడు. తొలి సినిమా 'గంగోత్రి'లో అమాయక చక్రవర్తిగా కనిపించిన అల్లు అర్జున్‌ 'దేశముదురు'లో సన్యాసిని సైతం ప్రేమలో పడేసే తెలివైనోడిగా కనిపించి అదుర్స్‌ అనిపించుకున్నాడు. తండ్రిని ఆరాధించే కొడుకుగా, ప్రేయసి కోసం పాట్లు పడే ప్రేమికుడిగా, అన్న కోసం ఎవరినైనా ఎదిరించే తమ్ముడిలా, ఆశయం కోసం అన్నీ వదులుకునే యువకుడిగా.. ఇలా అన్నిరకాల పాత్రల్లోనూ ఒదిగిపోయాడాయన. డైలాగ్‌ డెలివరీతో, డ్యాన్స్‌ స్టెప్పులతో, కొత్త లుక్స్‌తో ఎప్పటికప్పుడు నయా ట్రెండ్‌ను సృష్టించే ఈ హీరో కెరీర్‌లో అత్యధిక వసూళ్లు సాధించి బ్లాక్‌ బస్టర్స్‌గా నిలిచిన చిత్రాలేంటో చూసేద్దాం.. సెన్సేషన్‌ క్రియేట్‌ చేసిన అల వైకుంఠపురములో అల్లు అర్జున్‌ కెరీర్‌లోనే అత్యధిక వసూళ్లు సాధించిన చిత్రం అల వైకుంఠపురములో. ఫ్యామిలీ డ్రామా, కామెడీ పార్ట్‌ మెండుగా ఉన్న ఈ చిత్రం జనాలకు బాగా కనెక్ట్‌ అయింది. దీనికి తోడు థమన్‌ అందించిన సంగీతం సినిమాకు బాగా ప్లస్‌ అయింది. త్రివిక్రమ్‌ శ్రీనివాస్‌ డైరెక్ట్‌ చేసిన ఈ చిత్రం ప్రపంచవ్యాప్తంగా రూ.200 కోట్లకు పైగా వసూలు చేసింది. గతేడాది సంక్రాంతికి బరిలో దిగిన ఈ చిత్రం సూపర్‌ డూపర్‌ హిట్‌గా నిలిచింది. వంద కోట్లు దాటేసిన సరైనోడు బోయపాటి శ్రీను దర్శకత్వం వహించిన ఈ సినిమా 2016లో ప్రేక్షకుడి ముందుకు వచ్చింది. రకుల్‌ ప్రీత్‌సింగ్‌, కేథరిన్‌ హీరోయిన్లుగా నటించిన ఈ చిత్రం సూపర్‌ హిట్‌గా నిలిచింది. ఈ చిత్రానికి రూ.127 కోట్లు వచ్చాయి. బాక్సాఫీస్‌ను దున్నేసిన దువ్వాడ జగన్నాథం అల్లు అర్జున్‌ ద్విపాత్రాభినయం చేసిన సినిమా ఇది. ఒక పాత్రలో బన్నీ పూజారిగా కనిపిస్తే, మరో పాత్రలోఅండర్‌కవర్‌ ఆఫీసర్‌గా కనిపిస్తాడు. ఇందులో కిషోర్‌ కామెడీ, పూజా హెగ్డేతో బన్నీ కెమిస్ట్రీ అదిరిపోయింది. దేవి శ్రీప్రసాద్‌ అందించిన సంగీతం కూడా ఈ సినిమాకు హైప్‌ తీసుకొచ్చింది. 2017లో వచ్చిన దువ్వాడ జగన్నాథం సుమారు రూ.115 కోట్ల వసూళ్లు కురిపించింది. శభాష్‌ అనిపించుకున్న సన్నాఫ్‌ సత్యమూర్తి విలువలే నా ఆస్తి అంటూ తండ్రి సిద్ధాంతాన్ని నమ్ముతాడు బన్నీ. ఇందులో అన్నీ ఉన్న శ్రీమంతుడి స్థాయి నుంచి ప్రతీది కోల్పోయిన నిరుద్యోగి మారతాడు బన్నీ. విలువల కోసం అన్నింటినీ వదులుకునే వ్యక్తిగా బన్నీ నటన అద్భుతంగా ఉంటుంది. త్రివిక్రమ్‌ చేసిన మ్యాజిక్‌, సమంత క్యారెక్టరైజేషన్‌, ఉపేంద్ర, స్నేహ, నిత్యామీనన్‌లు కనిపించే సీన్లు ప్రేక్షకుడిని వినోదాన్ని పంచుతాయి. ఈ చిత్రం సెంచరీకి అడుగు దూరంలో ఆగిపోయి రూ.90 కోట్ల కలెక్షన్లు సాధించింది. బాక్సాఫీస్‌ దగ్గర పరుగులు పెట్టిన రేసుగుర్రం 2014లో ఈ సినిమాలో బన్నీ నటన గురించి చెప్పడానికి మాటలు సరిపోవు. బన్నీ రౌడీతో తలపడే సన్నివేశాలు, అన్నతో ఫైట్‌ చేసే తీరు, స్పందనగా శృతి హాసన్‌ నటన, బ్రహ్మానందం కామెడీ టైమింగ్‌ ప్రేక్షకుడికి డబుల్‌ ఎంటర్‌టైన్‌మెంట్‌ అందించాయి. సురేందర్‌ రెడ్డి దర్శకత్వం వహించిన ఈ సినిమాకు రూ.60 కోట్లు వచ్చాయి. చదవండి: రష్మిక ఫస్ట్‌లుక్‌ ఎక్కడంటూ ఫ్యాన్స్‌ ఫైర్‌‌‌ కోహ్లిని ఎత్తిపడేసిన అనుష్క.. వీడియో వైరల్‌!


 బన్నీ, బోయపాటి కెరీర్‌లో హయ్యస్ట్ గ్రాసర్ ‘సరైనోడు’
 ఎర్ర తోలు కదా స్టయిల్‌గా ఉంటాడనుకుంటున్నావేమో. మాస్ ఊర మాస్... అని ఏ ముహూర్తాన ‘సరైనోడు’ టీజర్ రిలీజ్ చేశారో కానీ, ఆనాటి నుండి ఆ డైలాగ్ అల్లు అర్జున్  అభిమానులు, తెలుగు ప్రేక్షకులు, ముఖ్యంగా ఫ్యామిలీ ఆడియన్స్ నోట పదే పదే పలకడం విశేషం. టీజర్ విడుదలైనప్పట్నుంచీ ఈ చిత్రం కోసం అల్లు అభిమానులందరూ వెయిట్ చేసారు.
 
 ఏప్రిల్ 22న రిలీజైన ‘సరైనోడు’ అల్లు అర్జున్ కెరీర్‌లో బెస్ట్ ఓపెనింగ్స్ ఇచ్చి, ఊర మాస్‌కి కనెక్ట్ అయితే సినిమా రేంజ్ ఎలా ఉంటుందో నిరూపించింది. మంచి మౌత్ టాక్‌తో కలెక్షన్ల సునామీ క్రియేట్ చేస్తోందీ చిత్రం. స్టయిలిష్ స్టార్ అల్లు అర్జున్ నటించిన చిత్రం స్టయిల్‌గా ఉండాలి కదా.. ఊర మాస్ ఏంటి? అని అనుకున్న వాళ్ల అంచనాలు తారుమారు చేస్తూ వారినే ఓసారి ఆలోచింపజేసే విధంగా ‘సరైనోడు’ బాక్సాఫీస్‌పై తన పంజా విసురుతున్నాడు. చాలా ఏరియాల్లో ఇప్పటికే (వారం రోజులకే) టాప్ గ్రాసర్‌గా నిలిచింది ‘సరైనోడు’ చిత్రం.
 
 దర్శకుడు బోయపాటి శ్రీనుకి మాస్ ప్రేక్షకుల నీరాజనాలు మెండుగా ఉన్నాయనటంలో అతిశయోక్తి కాదు. బోయపాటి శ్రీను గత చిత్రాలు దీనికి నిదర్శనం. అయితే స్టయిలిష్ స్టార్ అల్లు అర్జున్, మాస్ కమర్షియల్ డెరైక్టర్ బోయపాటి శ్రీను కాంబినేషన్ అంటే ఎలా ఉండ బోతుంది? అని మీమాంసలో ఉన్న కొందరి ఊహలను తారుమారు చేస్తూ, బ్రహ్మాండమైన కలెక్షన్లతో మాస్, యూత్ ఫ్యామిలీ ఆడియన్స్‌ను ఆకట్టుకుంటూ విజయపథంలో సాగుతోంది.
  
 స్టయిలిష్ స్టార్ అల్లు అర్జున్ కెరీర్‌లో ఇప్పటికే మూడు చిత్రాలు ‘రేసుగుర్రం’, ‘సన్నాఫ్ సత్యమూర్తి’, ‘రుద్రమదేవి’ (స్పెషల్ రోల్) 50 కోట్ల క్లబ్‌లో ఉండగా ఇప్పుడు ‘సరైనోడు’ నాలుగో చిత్రంగా చేరబోతోంది. ఎంటైర్ ఫ్యామిలీ ఆడియన్స్ ‘సరైనోడు’ చిత్రానికి బ్రహ్మరథం పట్టారు. ‘‘కేవలం 7 రోజుల్లో 72 కోట్ల గ్రాస్ వసూలు చేసి, 2016 బ్లాక్‌బస్టర్ ఫ్యామిలీ ఎంటర్‌టైనర్‌గా రికార్డు క్రియేట్ చేసింది’’ అని ట్రేడ్ విశ్లేషకులు త్రినాథ్ రావు మీడియాకు తెలిపారు.
  
 విజయనగరం, పార్వతీపురం లాంటి సెంటర్స్‌లో ఆల్ టైం రికార్డుగా కలెక్షన్లు రావటం, నెల్లూరు, సీడెడ్, వైజాగ్ వంటి ఏరియాల్లో బిగ్గెస్ట్ కలెక్షన్లతో దూసుకుపోవటం, వెస్ట్, ఈస్ట్, కృష్ణ, గుంటూరులో బన్నీ రేంజ్‌ని డబుల్ చేసే విధంగా కలెక్షన్ల రికార్డు క్రియేట్ అవ్వటం... మొత్తం మీద ఈ చిత్రం బన్నీ, బోయపాటి కెరీర్‌లో హయ్యస్ట్ గ్రాసర్‌గా నిలిచిందని యూనిట్ సభ్యులు చెబుతున్నారు. గతంలో బన్నీ నటించిన చాలా చిత్రాలకు ఈ విధంగానే మిక్స్‌డ్ టాక్ రావటం.. అవి బన్నీ కెరీర్‌లో బెస్ట్ మూవీస్‌గా నిలవటం విశేషం. బన్నీ పెర్‌ఫార్మెన్స్, బోయపాటి శ్రీను దర్శకత్వం వంటి అంశాలు ఓవర్‌సీస్‌లో కూడా డాలర్ల వర్షం కురవడానికి కారణమయ్యాయి.


  ‘‘మా సొంత బ్యానర్ గీతా ఆర్ట్స్‌లో నేను చేసిన ‘హ్యాపీ’, ‘బద్రీనాథ్’ చిత్రాలు సరిగ్గా ఆడలేదు. మా బ్యానర్‌లో ఎలాగైనా హిట్ సాధించాలనే నా కల ‘సరైనోడు’తో తీరింది. ఈ సినిమాతో మాస్‌లోకి వెళ్లాలనే నా లక్ష్యం రెండొందల శాతం నెరవేరింది’’ అని హీరో అల్లు అర్జున్ తెలిపారు. అల్లు అర్జున్, రకుల్ ప్రీత్‌సింగ్, కేథరిన్ కాంబినేషన్‌లో బోయపాటి శ్రీను దర్శకత్వంలో అల్లు అరవింద్ నిర్మించిన ‘సరైనోడు’ చిత్రం ఇటీవల విడుదలైంది.
  
  ఈ సందర్భంగా చిత్ర బృందం మంగళవారం హైదరాబాద్‌లో సక్సెస్‌మీట్ నిర్వహించారు. నిర్మాత అల్లు అరవింద్ మాట్లాడుతూ -‘‘బన్నీ ఓ సారి నావద్దకొచ్చి తనకు మాస్ ఇమేజ్ లేదని చెప్పడంతో నాకు వెంటనే బోయపాటి గుర్తొచ్చి కలిశాను. అతను ఆరు నెలలు వర్క్ చేసి కథ రెడీ చేశాడు. అతనిపై నమ్మకంతో భారీగా ఖర్చు పెట్టా. బోయపాటి, బన్నీ కెరీర్‌లో అధిక వసూళ్లు సాధించిన చిత్రమిదే’’ అని చెప్పారు.
  
   ‘‘ప్రతి సినిమానూ తొలి చిత్రంగానే భావిస్తా. ‘లెజెండ్’ తర్వాత మంచి కథతో సినిమా చేయాలని బన్నీతో చేశా. శ్రీకాంత్‌గారు తన పాత్రకు ప్రాణం పోశారు. ఆది పినిశెట్టి విలన్‌పాత్రలో అద్భుతంగా నటించారు’’ అని దర్శకుడు బోయపాటి పేర్కొన్నారు. కథానాయికలు రకుల్ ప్రీత్‌సింగ్, కేథరిన్, నటులు శ్రీకాంత్, సాయికుమార్, ఆది పినిశెట్టి, విద్యుల్లేఖా రామన్, ఫైట్ మాస్టర్స్ రామ్-లక్ష్మణ్ త దితరులు మాట్లాడారు.
  


 చెన్నై: స్టైలిష్ స్టార్ అల్లు అర్జున్ తాజా చిత్రం 'సరైనోడు' బాక్సాఫీస్ వద్ద మంచి వసూళ్లు రాబడుతోంది. సినిమాపై మిశ్రమ స్పందన వ్యక్తమైనప్పటికీ రిలీజ్ రోజున భారీ కలెక్షన్లు కొల్లగొట్టాడు. రిలీజ్ రోజున ప్రపంచవ్యాప్తంగా రూ. 22 కోట్లు వసూలు చేసిందని ట్రేడ్ ఎనలిస్ట్ త్రినాథ్ వెల్లడించారు. విమర్శకులకు ఈ సినిమా నచ్చనప్పటికీ ప్రేక్షకులు మాత్రం బాగా ఎంజాయ్ చేస్తున్నారని ఆయన విశ్లేషించారు. వీకెండ్ లో ఎంత వసూలు చేస్తుందనే దానిపై కలెక్షన్లు ఆధారపడివుంటారని చెప్పారు. విదేశాల్లో 'సరైనోడు' కాసుల వర్షం కురిపిస్తున్నాడని చెప్పారు. ఉత్తర అమెరికాలో ఇప్పటికే కలెక్షన్లు 5 లక్షల డాలర్లు మించాయి.
 
 గీతా ఆర్ట్స్ నిర్మించిన ఈ సినిమా ఏప్రిల్ 22న ప్రపంచవ్యాప్తంగా విడుదలైంది. బోయపాటి శ్రీనివాస్ దర్శకత్వం వహించిన ఈ సినిమాలో రకుల్ ప్రీత్, కేథరిన్ ట్రెసా హీరోయిన్లుగా నటించారు.