జల్పాయిగురి : ప్రస్తుతం సెల్ఫీల ట్రెండ్‌ కొనసాగుతోంది. అరుదైన సెల్ఫీల కోసం ఎంతవరకైనా వెళ్తున్నారు కొందరు. ఇటీవల ఓ యువకుడు కొండపై సెల్ఫీ తీసుకుంటుండగా ప్రమాదవశాత్తు జారిపడి మృతి చెందాడు. ఎలుగుబంటితో సెల్ఫీకి ప్రయత్నించి ప్రాణాలు కొల్పోయాడు మరో వ్యక్తి. తాజాగా సెల్ఫీల కోసం ఎగబడి జాతీయ పక్షి నెమలి చావుకు కారణమయ్యారు పశ్చిమబెంగాల్‌లోని ఓ గ్రామ ప్రజలు. వివరాల్లోకి వెళితే.. జల్పాయిగురి జిల్లాలోని బరిఘోరియా గ్రామ పరిధిలోనికి ఆదివారం నెమలి ప్రవేశించింది. ఆ విషయం ఊరంతా తెలిసిపోయింది. నెమలితో సెల్ఫీలు దిగేందుకు అక్కడి వారంతా ఆరాటపడ్డారు. ఒకరు దాని కాలు లాగితే.. మరోకరు మెడ లాగారు.. దీంతో కొద్దిసేపటికి సృహ కొల్పోయిన నెమలి ఆ తర్వాత కొద్దిసేపటికే మృతి చెందింది. ఈ ఘటనపై పోలీసులు స్పందిస్తూ.. కొన ఊపిరితో ఉన్న నెమలిని వైద్యం కోసం తరలిస్తుండగా మార్గమధ్యంలోనే చనిపోయిందని వెల్లడించారు. దీనిపై దర్యాప్తు ప్రారంభించామని పోలీసు, అటవీ శాఖ అధికారులు పేర్కొన్నారు. నెమలి మృతదేహాన్ని వన్యప్రాణి సంరక్షణ అధికారులకు అందజేశామన్నారు. నెమలి ఎలా మృతి చెందిందో తెలుసుకునేందుకు ప్రయత్నిస్తున్నామని తెలిపారు. సెల్ఫీల కోసం ఇతరులను ఇబ్బంది పెట్టడం పరిపాటిగా మారింది. అంతే కాకుండా జంతువులతో కూడా సెల్ఫీలు దిగుతూ వాటిని కూడా అసౌకర్యానికి గురిచేయడంపై జంతుప్రేమికులు ఆందోళన వ్యక్తం చేస్తున్నారు.


 ఈమధ్యకాలంలో సెల్ఫీల గురించి అన్నీ షాకింగ్‌ కథనాలే విన్నాం. సెల్ఫీలు అతిగా తీసుకొంటే అదొక మానసిక జబ్బుగా పరిణమించే అవకాశముందని హెచ్చరికలను చూశాం. ప్రమాదకర ప్రాంతాల్లో సెల్ఫీలు దిగి.. ప్రాణాలు పోగొట్టుకుంటున్నవారిని చూసి అయ్యో అని బాధపడ్డాం.
 
 ఇలాంటి క్లిష్ట పరిస్థితుల్లో సెల్ఫీ ప్రేమికులకు ఓ మంచి తీపి కబురు లాంటి వార్త ఇది. నవ్వుతూ సెల్ఫీలు దిగడం వల్ల మీరు ఆనందంగా ఉండే అవకాశాలు మరింత పెరుగుతాయట. సెల్ఫీల గురించి అన్నీ చెడ్డవార్తలే వస్తున్న తరుణంలో కాలిఫోర్నియా యూనివర్సిటీ నిర్వహించిన అధ్యయనంలో ఈ మంచి కబురు వెలువడింది. 41మంది విద్యార్థుల మీద నాలుగువారాలపాటు అధ్యయనం చేసి ఈ నిర్ధారణకు వచ్చారు. సెల్ఫీలు తీసుకొని మీ మూడ్‌ ఎలా ఉందో తెలుపమంటూ పరిశోధకులు విద్యార్థులను కోరారు. అయితే, సెల్ఫీల కోసం లేని నవ్వు తెచ్చిపెట్టుకొని ఫొటో దిగినా.. ఆ రోజు మొత్తం చాలా ఆనందంగా, ఆత్మవిశ్వాసంగా గడిపినట్టు విద్యార్థులు ఈ అధ్యయనంలో వెల్లడించారు. ఇలా సెల్ఫీలు తీసుకోవడం ద్వారా ఆనందకరమైన ప్రక్రియలో భాగం కావొచ్చునంటున్నారు కాలిఫోర్నియా యూనివర్సిటీ ప్రొఫెసర్‌ మార్క్‌ మారినో. ఆయన తన తరగతి గదిలో సెల్ఫీ టేకింగ్‌ ప్రాజెక్టును నిర్వహించారు. మన ప్రతిబింబాన్ని, మనలోని సుగుణాలను తెలుసుకోవడానికి కాదు.. ఎదుటివారితో మనం ఎలా కమ్యూనికేట్‌ కావాలన్న విషయంలో సెల్ఫీలు సాయం చేస్తాయని ఆయన చెప్తున్నారు.
 
 కానీ..
 సెల్ఫీలు ఆనందాన్ని ఇస్తాయి కరెక్టే.. కానీ మరీ ఎక్కువగా సెల్ఫీలు తీసుకోవడం మాత్రం అంతమంచిది కాదని మరో అసోసియేట్‌ ప్రొఫెసర్‌ యల్దా ఉల్స్‌ తెలిపారు. "మనం ఎదిగాక మన చుట్టూ ఉన్న ప్రజలు, పరిసరాల ఫొటోలు తీసుకోవాలనుకుంటాం. మనతో మనం ప్రతిబింబించుకోవడం కన్నా సమాజంతో మనం ప్రతిబింబించుకోవడం ముఖ్యం కదా' అని ఉల్స్‌ చెప్తారు. నిజమే ఆత్మసంతృప్తికి, స్వీయమోహానికి మధ్య ఒక సన్నని రేఖ ఉంటుంది. సెల్ఫీలు విషయంలోనూ అది వర్తిస్తుంది.
 ఇటీవలికాలంలో కొన్ని హ్యాపీ సెల్ఫీలివి..!!