శరవేగంగా గణపయ్యల తయారీ 
 
  వివిధ రూపాల్లో విగ్రహాలు అందుబాటులో
 
  ఉపాధి పొందుతున్న రాజస్థానీ కార్మికులు
 
 గద్వాల న్యూటౌన్‌ : భక్తులను దీవించడానికి మన బొజ్జ గణపయ్య వచ్చేస్తున్నాడు. మరో వారం రోజులు ఆగితే ప్రతి వీధిలో ఆది దేవుని దర్శన భాగ్యం ఉంటుంది. చిన్నాపెద్ద ఏకమై విఘ్నేశ్వరుని సేవలో మునిగి తేలుతారు. వారం రోజులు గ్రామాలు, పట్టణాలు, అన్ని వీధుల్లో సందడేసందడి నెలకొంటుంది. ఇప్పటికే మంటప నిర్వాహకులు విరాళాల సేకరణలో ఉండగా వివిధ ప్రాంతాలనుంచి వచ్చిన కార్మికులు గణపయ్యల తయారీలో నిమగ్నమై ఉన్నారు.
  
  
 వివిధ రూపాల్లో.. 
 సెప్టెంబర్‌ 5వ తేదీన వినాయక చవితిని దష్టిలో ఉంచుకొని రాజస్థాన్‌ రాష్ట్రానికి చెందిన కార్మికులు పట్టణంలో మకాం వేశారు. తమ కళా నైపుణ్యంతో వివిధ రూపాల్లో గణపయ్యలను తయారు చేసి తుది మెరుగులు దిద్దుతున్నారు. 15ఫీట్ల నుంచి 20 ఫీట్ల వరకు స్థానికంగానే విగ్రహాలను అందుబాటులో ఉంచారు. హైదరాబాద్‌ నుంచి విగ్రహాలకు కావాల్సిన ముడిసరుకులు తెచ్చుకుని రంగులు వేసే పనిలో నిమగ్నమయ్యారు. మయూరం, గరుడవాహనం, మొసలిపై, గజవాహనం, నేటి లేటెస్ట్‌ వాహనాలతోపాటు పార్వతీపరమేశ్వరుల ఒడిలో కూర్చున్నట్టు, బాహుబలిలా కనువిందు చేసే ఎన్నో రకాల విగ్రహాలను పండగ వరకు వేలల్లో తయారుచేసి సిద్ధంగా ఉంచారు. ప్రస్తుతం తుది మెరుగులు దిద్దుతున్నారు.
  
  
 ఏర్పాట్లలో మంటప నిర్వాహకులు 
 గణేష్‌ ఉత్సవ కమిటీలు తమదైన శైలిలో విగ్రహాలను ప్రతిష్ఠించడానికి సన్నద్ధమవుతున్నారు. దేవతామూర్తిని ఎంత ఆకర్షనీయంగా తీర్చిదిద్దుతే అంత పేరు వస్తుండటంతో ఈ సారి పోటీతత్వం మరీ పెరిగేలా ఉంది. ఇప్పటికే నిర్వాహకులు విరాళాల సేకరణ పూర్తిచేసుకొని మంటపాలను తీర్చిదిద్దే పనిలో ఉన్నారు. 
  
  
  పనులు పూర్తికావచ్చాయి
 పండగకు ఇంకా వారం రోజులే ఉండటంతో విగ్రహాల పనులు పూర్తి కావచ్చాయి. ప్రతి ఏడాది పండుగకు నాలుగు నెలలముందునుంచే తయారీ మొదలు పెడతాం. అందరికి నచ్చేలా ఎన్నో రకాల విగ్రహాలను తయారు చేశాం. ప్రతి ఏటా విగ్రహాలు అమ్మకాలు పెరుగుతూనే ఉన్నాయి. 
 – మోతీలాల్, తయారీదారుడు (రాజస్థాన్‌) 
  
  


 న్యూఢిల్లీ: జాతీయ ఉత్తమ ఉపాధ్యాయుడికి అవార్డు రూపంలో ఇచ్చే మొత్తాన్ని కేంద్ర ప్రభుత్వం రెండింతలు చేసింది. గతంలో ఉత్తమ ఉపాధ్యాయుడి అవార్డుకు ఎంపికైన వారికి రూ.25 వేలు ఇవ్వగా ఇక నుంచి రూ.50వేలు అందించనున్నారు. దీంతోపాటు గతంలో మాదిరిగా ఒక సర్టిఫికెట్ వెండిపతకం ఇస్తారు. ఈ విషయాన్ని కేంద్ర మానవ వనరుల శాఖ బుధవారం లోక్సభలో ప్రకటించింది.
 
 ఇది 2014 నుంచి వర్తించనుంది. గతంలో ఈ అవార్డు రూ.10 వేలుగా ఇవ్వగా దానిని 1999లో రూ.25 వేలకు పెంచారు. అప్పటి నుంచి మరోసారి పెంచడం ఇదే తొలిసారి. ప్రతి ఏటా రాష్ట్రపతి చేతుల మీదుగా సెప్టెంబర్ 5న ఈ అవార్డును అందిస్తారు. ప్రాథమిక, ప్రాథమికొన్నత, ప్రత్యేక అవసరాలు తీర్చగల పాఠశాలల్లో పనిచేసే ఉపాధ్యాయుల్లో ఉత్తమ సేవలను అందించిన వారిని గుర్తించి ఈ అవార్డును ప్రధానం చేస్తారు. వీరితోపాటు సంస్కృతం, అరబిక్, పర్షియన్ భాషల్లో బోధించే ఉపాధ్యయులకు సంప్రదాయ బద్ధంగా అవార్డును అందిస్తారు.