ఆస్ట్రేలియాకు చెందిన ప్రసిద్ధ క్రోచెట్‌ ఆర్టిస్ట్‌ జెన్నీ కింగ్‌ నోటి నుంచి వినిపించే మాట... ‘అల్లికల కళకు మాంత్రిక శక్తి ఉంది. అది మన మనసును ఎప్పుడూ ఆహ్లాదభరితం చేస్తుంది. మంత్రముగ్ధుల్ని చేసే మనోహర కళ ఇది’.మార్కాపురానికి చెందిన స్వాప్నిక రాజ్ఞీ చిన్నప్పుడే ఆ మంత్రముగ్ధకళలలో ఓనమాలు నేర్చుకుంది. ఆ కళ ఇచ్చిన ఉత్తేజం ఊరకేపోలేదు. అల్లికల కళలో చేయి తిరిగిన స్వాప్నిక పేరు గిన్నిస్‌బుక్‌లోకి ఎక్కింది.ప్రకాశం జిల్లా మార్కాపురానికి చెందిన స్వాప్నిక అమ్మమ్మ తోటకూర క్రిస్టియనమ్మ పట్టణంలోని బాలికోన్నత పాఠశాలలో ఉపాధ్యాయురాలిగా పనిచేస్తూ తీరిక వేళల్లో ఇంట్లో అల్లికలు (క్రోచెట్స్‌) చేసేది. అమ్మమ్మ అల్లికల పనిలో ఉన్నప్పుడు స్వాప్నిక ఆసక్తిగా గమనించేది. అలా ‘అమ్మమ్మ అల్లికల స్కూల్‌’ లో స్టూడెంట్‌గా చేరింది. గురువుగారి ప్రియ శిష్యురాలు అయింది. అల్లికలకు సంబంధించి ఎన్నో మెళకువలు అవలీలగా నేర్చుకుంది.కొత్త అల్లికల గురించి ఆలోచించడమే కాదు, క్రోచెట్స్‌కు సంబంధించి కొత్త రికార్డ్‌ల గురించి తెలుసుకోవడం అంటే స్వాప్నికకు ఇష్టం. మదర్‌ ఇండియాస్‌ క్రోచెట్‌ క్వీన్స్‌ (ఎంఐక్యూ)లో ఆరు వేలమందికి పైగా సభ్యులు ఉన్నారు. ప్రపంచవ్యాప్తంగా ఎంతోమంది క్రోచెట్‌ ఆర్టిస్ట్‌లకు స్ఫూర్తినిచ్చే సంస్థ ఇది. ‘క్రోచెట్‌ క్వీన్స్‌’కు చెందిన మహిళలు అతి పెద్ద క్రోచెటెడ్‌ దుప్పటి, అతి పెద్ద క్రోచెటెడ్‌ స్కార్ఫ్, అతి పెద్ద క్రోచెటెడ్‌ క్రిస్మస్‌ డెకరేషన్‌... మొదలైన వాటితో రికార్డ్‌ సృష్టించారు.‘ఎంఐక్యూ’లాంటి సంస్థల రికార్డుల గురించి తెలుసుకునే క్రమంలో స్వాప్నికకు రికార్డ్‌లపై ఆసక్తి మొదలైంది.‘గిన్నిస్‌ బుక్‌ రికార్డ్‌’ అంటే ప్రపంచ దృష్టిని ఆకర్షించే సవాలు. అలాంటి అరుదైన సవాలును స్వీకరించే అవకాశం స్వాప్నికకు విశాఖపట్టణంలో వచ్చింది.విశాఖపట్టణానికి చెందిన ‘మహిళా మనోవికాస్‌ క్రాఫ్ట్స్‌ అండ్‌ క్రియేషన్‌’ సంస్ధ క్రోచెట్స్‌కు సంబంధించి నిర్ణీత వ్యవధిలో అత్యధిక కళాకృతులు తయారు చేయాలని సవాలు ఇచ్చింది. ఈ సవాలుకు ‘సై’ అంటూ స్వాప్నిక బృందంలోని మహిళలు అతి తక్కువ సమయంలో 58,112 క్రోచెట్‌ స్క్వేర్‌లను తయారుచేసి ‘లార్జెస్ట్‌ డిస్‌ప్లే ఆఫ్‌ క్రోచెట్స్‌ స్వే్కర్‌’ అనే టైటìఃల్‌ సొంతం చేసుకున్నారు. గిన్నిస్‌ బుక్‌ రికార్డ్‌ నెలకొల్పారు. గిన్నిస్‌ రికార్డు కోసం 20వేల క్రోచెట్స్‌ స్క్వేర్స్‌ తయారు చేయాల్సి ఉండగా స్వాప్నిక బృందం 58,112 తయారుచేసి వరల్డ్‌ రికార్డు సాధించింది.‘గిన్నిస్‌ రికార్డ్‌ ఇచ్చిన ఉత్సాహంతో భవిష్యత్‌లో మరిన్ని రికార్డ్‌లు నెలకొల్పుతాం’ అంటుంది ఆత్మవిశ్వాసం నిండిన గొంతుతో స్వాప్నిక రాజ్ఞీ. కూచిపూడి నుంచి కరాటే వరకు‘నేర్చుకుంటే పోయేదేమీ లేదు... వచ్చేదే తప్ప’ అన్నట్లుగా ఉంటుంది స్వాప్నిక ఉత్సాహం. అల్లికల కళలో చేయి తిరిగిన స్వాప్నిక అక్కడితో ఆగిపోలేదు. తల్లిదండ్రులు నాగెళ్ల లీనా కెఫీరాల, డాక్టర్‌ కొండేపోగు డేవిడ్‌ లివింగ్‌ స్టన్‌ ్రపోత్సాహంతో కూచిపూడి నేర్చుకుంది. రాష్ట్ర స్థాయిలో ఎన్నో బహుమతులు గెలుచుకుంది. కరాటేలో కూడా ప్రావీణ్యం సంపాదించింది. బిఫార్మసీ చదివే రోజుల్లో స్వాప్నిక తన చేతులపై జీపును నడిపించుకుని సాహసవంతమైన ఫీట్‌ చేసింది. వృత్తిరీత్యా ఫార్మసిస్టు అయిన స్వాప్నిక ప్రవృత్తిరీత్యా ఆర్టిస్ట్‌. ఎప్పటికప్పుడు కొత్త కళలపై ఆసక్తి చూపుతుంటుంది.– గోపాలుని లక్ష్మీ నరసింహారావు, ‘సాక్షి’, మార్కాపురం, ప్రకాశం జిల్లా

చెరసాలలో కృష్ణుడిని కన్న దేవకికి అండగా వసుదేవుడున్నాడు! లాక్‌డౌన్‌లో పురుడు పోసుకున్న కొంతమంది తల్లులకు అండగా ఎవరూ లేరు.. వాళ్ల గుండె ధైర్యం, పేగు బలం తప్ప!! ఆ శక్తితోనే బిడ్డలకు జన్మనిచ్చారు .. చేయి పట్టుకొనే తోడెవరూ రాకపోయినా!! పసికూన ఏడుపు వినేంత దగ్గర్లోనే తనవాళ్లున్నారనే భరోసా లేకపోయినా!! ప్రెగ్నెన్సీ గైడెన్స్‌ను గూగుల్‌ నుంచి తీసుకున్నా  ప్రసవమప్పుడు మాత్రం తనవాళ్లు రావాల్సిందే. బిడ్డ ఏడుపు వినేంత దగ్గర్లో ఉన్నామనే భరోసా ఇవ్వాల్సిందే. కరోనా కర్ఫ్యూ ఆ భద్రత లేకుండా చేసింది. అయినా ధైర్యం వీడలేదు ఆ తల్లులు. పండంటి బిడ్డల్ని చూసుకొని పడిన కష్టాన్నంతా మరచిపోయారు. ఆ సంఘటనలు కొన్ని.. స్వప్నిక కౌశిక్‌ది తమిళనాడు. ప్రైవేట్‌ ఉద్యోగిని. గర్భనిర్ధారణ జరిగినప్పటి నుంచీ ఆమె రక్తహీనతతో బాధపడింది. ఉద్యోగానికి సెలవు పెట్టి విశ్రాంతిలోనే ఉంది. ఎనిమిది నెలలు గడిచాయి. ఈలోపు లాక్‌డౌన్‌ ప్రకటించారు. దాంతో హడావిడిగా తన తల్లిగారి ఊరైన చెన్నైకి వెళ్లిపోయింది. ఫ్యామిలీ డాక్టర్‌కు చూపించుకుంది. మళ్లీ వారానికి  వెళ్లేసరికి ఆ డాక్టర్‌కు కరోనా డ్యూటీ పడడంతో ఆమే వేరే డాక్టర్‌ను సూచించింది. ఆమె దగ్గర ఆ వారం చూపించుకోగానే ఆమే కరోనా డ్యూటీ చేయాల్సి రావడంతో ఇంకో డాక్టర్‌కు మారాల్సి వచ్చింది స్వప్నిక. ‘ఇదంతా నరకంగా ఉండేది నాకు. మాటిమాటికీ డాక్టర్‌ను మార్చాల్సి రావడం, క్లినిక్‌కు వెళ్లే చాన్స్‌ లేకపోవడంతో ఫోన్‌లోనే మారిన డాక్టర్లందరికీ నా హిస్టరీ చెప్పడం, వాళ్లు అర్థం చేసుకొని ట్రీట్‌ చేసేలోపు మళ్లీ వాళ్లు మారడం.. ఎంత టెన్షన్‌ పడ్డానో దేవుడికే తెలుసు. ఒక్కోసారి డెలివరీ అయినా సవ్యం గా జరిగేనా అని భయమేసేది. అన్నట్టుగానే నా డెలివరీ టైమ్‌కి కరోనా కేసులు ఎక్కువయ్యాయి చెన్నైలో. పెద్దవాళ్లు త్వరగా ఇన్‌ఫెక్ట్‌ అవుతారని అమ్మ లేకుండానే హాస్పిటల్‌కు వెళ్లా. లాక్‌డౌన్‌తో మా వారూ రాలేకపోయారు. నాకు నేను చెప్పుకున్న ధైర్యమే ఆ గండం గట్టెక్కేలా చేసింది. ఈ పసిదాన్ని చూడగానే నా బాధంతా ఎగిరిపోయింది’ అని చెప్తుంది స్వప్నిక కూతుర్ని ముద్దాడుతూ. వలస కూలీకి అటెండెంట్‌గా.. డాక్టర్‌ అనిత గౌర.. కర్ణాటకలోని కలబురగి(గుల్బర్గా) ఎమ్‌ఆర్‌ మెడికల్‌ కాలేజీ హాస్పిటల్‌ లో స్త్రీ వైద్యనిపుణులుగా పనిచేస్తున్నారు. కరోనా లాక్‌డౌన్‌ ప్రకటించేనాటికి నిండు చూలాలు. ఆమె భర్త రాజీవ్‌ కొనిన్‌ హృద్రోగనిపుణులు. కరోనా డ్యూటీలో ఉన్నాడు. దాంతో డెలివరీ కోసమని అమ్మ దగ్గరకు వెళ్లింది అనిత. అమ్మ అన్నపూర్ణ గౌర కూడా డాక్టరే. లాక్‌డౌన్‌ వల్ల ఎవరూ తోడులేక ప్రసవవేదనతో ఆసుపత్రి చేరిన గర్భిణీలకు తల్లీ, తోబుట్టువూ తామై డెలివరీ చేశారు ఈ అమ్మాకూతుళ్లు. ‘అమ్మ దగ్గరకు వస్తున్న పేషంట్లను చూస్తూంటే రెస్ట్‌ తీసుకోవాలన్న ఆలోచనే రాలేదు. నొప్పులతో వచ్చిన ఎవరినీ వెనక్కిపంపలేదు. వాళ్లలో వలస కూలీలూ ఉన్నారు. వరుసగా నాలుగు డెలివరీలు చేసిన రాత్రులూ ఉన్నాయి. ‘అలా నేను బిడ్డను కనే ముందు రోజు వరకూ డెలివరీలు చేశాను’ అంటూ చేతుల్లో ఉన్న తన బిడ్డను గుండెకు హత్తుకుంది డాక్టర్‌ అనితా గౌర. ఏప్రిల్‌ 20న ఆమెకు కూతురు పుట్టింది. అనిత పురిటినొప్పులు పడుతున్న సమయంలో ఆమె తల్లి అన్నపూర్ణ ఓ మహిళా వలస కూలీకి డెలివరీ చేస్తోంది. పది కిలోమీటర్లు నడవలేక.. ఒడిశాలోని  కలహండి కరువుకు కేరాఫ్‌. కరోనా లాక్‌డౌన్‌తో ఆ గిరిజన ప్రాంతానికి అందే అత్యవసరాలకూ చెక్‌ పడింది. ఇక్కడి కెర్పై గ్రామంలో గర్భిణీలు, చిన్నపిల్లలకు మందులు, టీకాలు లేవు. అత్యవసర పరిస్థితుల్లో గర్భిణీలు కెర్పై నుంచి ఆరోగ్యకేంద్రం ఉన్న ఊరికి బస్సు అందుకోవాలంటే పదికిలోమీటర్లు నడవాలి. వెళ్లలేక  ఇళ్లల్లోనే ప్రసవించారు. ఆ  గిరిజన తల్లుల పేగుబలమే ఆ బిడ్డల్ని బతికించింది. ఈ విషయం తెలిసిన అక్కడి స్వచ్ఛంద సేవా కార్యకర్తలు కొందరు    ‘మందులు, ఆహారపదార్థాలను హోమ్‌ డెలివరీ చేద్దామన్నా రవాణా సౌకర్యాలు అందుబాటులో లేవు. దాంతో నిస్సహాయంగా ఉండిపోతున్నాం’  అంటున్నారు.


 సాగర్, స్వప్నిక జంటగా నండూరి వీరేశ్‌ దర్శకత్వంలో గూన అప్పారావు నిర్మిస్తున్న ‘సంభవం’ హైదరాబాద్‌లో ప్రారంభమైంది. ముహూర్తపు సన్నివేశానికి తెలంగాణ ప్రభుత్వ సలహాదారు విద్యాసాగర్‌ రావు క్లాప్‌ ఇవ్వగా, మాజీ ఎంపీ ఆవుల వీరశేఖర్‌ కెమేరా స్విచ్చాన్‌ చేశారు. వ్యాపారవేత్త బాబా భాయ్‌ గౌరవ దర్శకత్వం వహించారు. ‘‘మర్డర్‌ మిస్టరీ నేపథ్యంలో సాగే హారర్‌–థ్రిల్లర్‌ చిత్రమిది. హత్య చేసిందెవరు? అనేది ప్రస్తుతానికి  సస్పెన్స్‌’’ అన్నారు నండూరి వీరేశ్‌.
 ‘‘మా సంస్థ నిర్మించిన ‘లవ్‌ స్పాట్‌’, ‘గురుబ్రహ్మ’ చిత్రాల్ని త్వరలో విడుదల చేస్తాం’’ అన్నారు గూన అప్పారావు.