సాక్షి, హైదరాబాద్‌: స్పెషల్‌ ఇంటెలిజెన్స్‌ బ్యూరో (ఎస్‌ఐబీ) మాజీ చీఫ్‌ టి.ప్రభాకర్‌రావు ఆదేశాల మేరకు తాము హైకోర్టు న్యాయమూర్తుల ఫోన్లనూ ట్యాప్‌ చేశామని ఈ కేసులో నిందితుడిగా ఉన్న అదనపు ఎస్పీ నాయిని భుజంగరావు బయటపెట్టారు. తాము నిఘా ఉంచి, పర్యవేక్షించిన వారిలో జస్టిస్‌ శరత్‌ కాజా కూడా ఉన్నారని వెల్లడించారు. అక్రమ ఫోన్‌ ట్యాపింగ్‌ కేసులో 2024 మార్చి 23న అరెస్టయిన భుజంగరావును పోలీసులు రెండుసార్లు తమ కస్టడీలోకి తీసుకుని విచారించారు. ఈ నేపథ్యంలోనే ఆయన పలు విషయాలు వెల్లడించినట్లు నేరాంగీకార వాంగ్మూలాల్లో పొందుపరిచిన పోలీసులు.. వీటిని కోర్టు దృష్టికి తీసుకెళ్లారు. వాటిలోని వివరాల ప్రకారం.. సూర్యాపేట జిల్లా మిర్యాల గ్రామానికి చెందిన భుజంగరావు 1991లో ఎస్సైగా ఎంపికయ్యారు. మల్కాజిగిరి, నాచారం, వనస్థలిపురంలో పనిచేసి, 2005లో ఇన్‌స్పెక్టర్‌గా పదోన్నతి పొందారు. మాదాపూర్‌ ఇన్‌స్పెక్టర్‌గా విధులు నిర్వర్తించిన తర్వాత డిప్యుటేషన్‌పై 2011 జనవరి నుంచి 2014 ఫిబ్రవరి వరకు ట్రాన్స్‌కోలో పనిచేశారు. పదోన్నతి పొందిన తర్వాత 2014–15 మధ్య ఎస్‌ఐబీలో డీఎస్పీగా పని చేశారు. అదనపు ఎస్పీగా పదోన్నతి పొందిన తర్వాత 2021లో డిప్యుటేషన్‌పై నిఘా విభాగంలోకి వెళ్లారు. గత ఏడాది డిసెంబర్‌ 16 వరకు పొలిటికల్‌ ఇంటెలిజెన్స్‌ వ్యవహారాలు పర్యవేక్షించారు. బీఆర్‌ఎస్‌ను మళ్లీ అధికారంలోకి తేవడానికి... భుజంగరావు ఇంటెలిజెన్స్‌లో టాప్‌ సీక్రెట్‌ సెల్‌ అనే స్పెషల్‌ వింగ్‌ను పర్యవేక్షించారు. ఇందులో తనకు నమ్మకస్తులైన ఇన్‌స్పెక్టర్లు చలపతి, శ్రీధర్, ఎస్సై సెయింట్‌ ప్రభాకర్‌ రాజు, ఏఎస్సైలు నర్సింగ్‌ రావు, జంగయ్య కీలకంగా వ్యవహరించారు. భుజంగరావు రాజకీయ నాయకుల కార్యకలాపాలతోపాటు అసమ్మతి నేతలు, ప్రతిపక్ష పార్టీల్లోని పరిస్థితులను గమనిస్తూ వివరాలను ఉన్నతాధికారులకు ఇచ్చేవారు. ఇంటెలిజెన్స్‌లో పని చేస్తుండగానే భుజంగరావుకు ప్రభాకర్‌ రావుతో పరిచయం ఏర్పడింది. ఇద్దరి సామాజిక వర్గం ఒకటే కావడంతో బాగా దగ్గరయ్యారు. ప్రభాకర్‌రావు 2020 జూన్‌లో పదవీ విరమణ చేశారు. బీఆర్‌ఎస్‌ ప్రభుత్వం ఆయన్ను ఓఎస్డీ హోదాలో చీఫ్‌ ఆఫ్‌ ఆపరేషన్స్‌గా నియమించింది. అప్పటి ప్రభుత్వ పెద్దల ఆశీర్వాదంతో 2020 నవంబర్‌లో నిఘా విభాగాధిపతిగా నియమితులయ్యారు. అప్పటి నుంచి ఆయన తన సామాజిక వర్గానికి చెందిన, తనకు నమ్మకమైన వారిని నిఘా విభాగంలోకి తీసుకురావడం ప్రారంభించారు. డీఎస్పీ ప్రణీత్‌రావు, అదనపు ఎస్పీగా రిటైర్‌ అయిన వేణుగోపాల్‌ రావు, అదనపు ఎస్పీ తిరుపతన్నల, వెంకట్రావు ఇలా ఎస్‌ఐబీలోకి వచి్చనవారే. ప్రత్యర్థి పార్టీల నాయకులతోపాటు బీఆర్‌ఎస్‌లోని తిరుగుబాటుదారులను పర్యవేక్షించడం, వారికి సంబం«ధించిన ఆర్థిక వనరులను దెబ్బతీయడం ద్వారా బీఆర్‌ఎస్‌ను మూడోసారి అధికారంలోకి తీసుకురావడానికి వీళ్లు పని చేశారు. దీనికోసం ఎస్‌ఐబీ, నిఘా విభాగాల్లో ఉన్న అన్ని వనరులనూ వినియోగించుకున్నారు. ఎవరి నిఘాకు చిక్కకుండా... హైదరాబాద్‌ నగరంపై పట్టు నిలుపుకోవడం కోసం బీఆర్‌ఎస్‌ నాయకులు పి.రాధాకిషన్‌రావును టాస్‌్కఫోర్స్‌ ఓఎస్డీగా నియమించుకున్నారు. ఇన్‌స్పెక్టర్‌ గట్టుమల్లు రాధాకిషన్‌ రావు ద్వారానే ఎస్‌ఐబీలోకి వచ్చారు. భుజంగరావు సహా అంతా బీఆర్‌ఎస్‌ కోసం పనిచేసేలా ఒప్పించిన ప్రభాకర్‌రావు అందుకు ప్రతిఫలంగా వారికి యాక్సిలేటరీ పదోన్నతులు, వివిధ పతకాలతోపాటు ఇన్సెంటివ్స్‌ కూడా ఇప్పించేవాడు. వీళ్లంతా ఎవరి నిఘాకు చిక్కకుండా ఉండేందుకు వీళ్లంతా వాట్సాప్‌ వంటి ఎన్‌క్రిప్టెడ్‌ కమ్యూనికేషన్‌లోనే సంప్రదింపులు జరిపారు. 2018కి ముందు అప్పటి నిఘా చీఫ్‌ నవీన్‌ చంద్‌ ద్వారా ప్రభాకర్‌రావు ఏర్పాటు చేయించిన స్పెషల్‌ ఆపరేషన్‌ టీమ్‌ (ఎస్‌ఓటీ) పని తీరు రానురాను మారిపోయింది. ప్రణీత్‌రావు చేతికి వచ్చిన తర్వాత కేవలం అక్రమ ఫోన్‌ ట్యాపింగ్‌ కోసమే పని చేసింది. బీఆర్‌ఎస్‌ రాజకీయ ప్రత్యర్థుల సమాచారాన్ని సేకరించే భుజంగరావు ఆ వివరాలను ప్రభాకర్‌రావుతోపాటు ప్రణీత్‌కు ఇచ్చి వారి ఫోన్లు ట్యాపింగ్‌ చేయించేవాడు. మునుగోడు ఉప ఎన్నికల సమయంలో ప్రణీత్‌ ఇచి్చన సమాచారంతోనే ఆ పట్టణ శివార్లలో రూ.కోటి నగదు పోలీసులు స్వా«దీనం చేసుకోగలిగారు. వాట్సాప్‌ గ్రూప్‌ల ఏర్పాటు సాధారణంగా నిఘా విభాగం ఓ ఫోన్‌ నంబర్‌ను నిఘాలో ఉంచాలన్నా, ట్యాప్‌ చేయాలన్నా అదనపు డీజీ అనుమతి తీసుకోవాలి. అయితే ఆ అవసరం లేకుండా నేరుగా ఏ నంబర్‌ అయినా ట్యాప్‌ చేసే స్వేచ్ఛను భుజంగరావుకు ప్రభాకర్‌రావు ఇచ్చారు. గత అసెంబ్లీ ఎన్నికల్లో కేసీఆర్‌ కామారెడ్డిలోనూ పోటీ చేశారు. ఆయన్ను గెలిపించడం కోసం ప్రతిపక్ష పార్టీల నేతలను దెబ్బతీయడానికి ప్రభాకర్‌రావు ప్రత్యేక చర్యలు తీసుకున్నారు. బీజేపీ అభ్యర్థి కె.వెంకట రమణారెడ్డి, రేవంత్‌రెడ్డి సోదరుడు కొండల్‌ రెడ్డి కదలికలను ట్రాక్‌ చేయడానికి డీఎస్పీ తిరుపతన్న నేతృత్వంలో ప్రత్యేక బృందం పని చేసింది. దీనికోసం ప్రణీత్‌ ఎస్‌ఐబీ టీమ్‌తో ‘కేఎంఆర్‌’పేరుతో ప్రత్యేక వాట్సాప్‌ గ్రూప్‌ను ఏర్పాటు చేశారు. గత ఎన్నికల సమయంలో హైదరాబాద్‌తోపాటు చుట్టుపక్కల ప్రాంతాల్లో ప్రతిపక్షాలకు చెందిన నగదును పట్టుకోవడానికీ తిరుపతన్న టీమ్‌ పని చేసింది. దీనికోసం ‘పోల్‌–2023’పేరుతో మరో వాట్సాప్‌ గ్రూప్‌ ఏర్పాటు చేశారు. దాదాపు 15 కీలక ఆపరేషన్లలో ప్రతిపక్షాలకు చెందిన నగదు పట్టుకోవడంతోపాటు ఇతర చట్ట విరుద్ధ కార్యకలాపాలు చేశారు. విద్యార్ధి, కులసంఘాల నాయకుల పైనా... ప్రభాకర్‌రావు నేతృత్వంలోని ఎస్‌ఐబీ అధికారులు ప్రభుత్వాన్ని విమర్శించే విద్యార్థి సంఘాల, కులసంఘాల నాయకుల పైనా నిఘా ఉంచారు. జర్నలిస్టులు, హైకోర్టు న్యాయమూర్తులు, ప్రభుత్వం, బీఆర్‌ఎస్‌ నాయకులకు సంబంధించిన ముఖ్యమైన కేసులను వాదించే న్యాయవాదుల ఫోన్లతోపాటు వారి వ్యక్తిగత జీవితాలనూ ప్రభాకర్‌రావు మానిటర్‌ చేయించారు. ఈ వివరాలన్నీ తెలుసుకోవడం ద్వారా వారిని ప్రభావితం చేయడం లేదా భయపెట్టాలని భావించారు. ఈటల రాజేందర్‌ బీఆర్‌ఎస్‌ నుంచి బయటకు రావడంతోపాటు టీఎస్‌పీఎస్సీ పేపర్‌ లీకేజ్‌పై ఆందోళన చేయడం, కేటీఆర్, ఎమ్మెల్యేలకు ఎర కేసులపై వ్యాఖ్యలు చేయడం, హుజూరాబాద్‌ ఉప ఎన్నికల్లో పోటీ చేయడం తదితర సందర్భాల్లో ఆయన కదలికలు, ఫోన్‌పై నిఘా కొనసాగిందని భుంజగరావు చెప్పారు. ప్రధానంగా ప్రతిపక్షాలను ఇరుకున పెట్టాలని, ఆర్థికంగా దెబ్బతీయాలని బీఆర్‌ఎస్‌కు లాభం చేకూర్చాలనే లక్ష్యాలతోనే తాము పని చేసినట్లు అంగీకరించారు. 2023 అసెంబ్లీ ఎన్నికల్లో బీఆర్‌ఎస్‌ ఊహించని విధంగా ఓడిపోవడంతో ప్రభాకర్‌రావు ఆదేశాల మేరకు ట్యాపింగ్, అక్రమ నిఘాకు సంబంధించిన సాక్ష్యాధారాలు ధ్వంసం చేయడానికి భుజంగరావు సహా అధికారులంతా కలిసి కుట్ర చేసి అమలుపరిచారని పోలీసులు కోర్టుకు తెలిపారు.


 సాక్షి, సిటీబ్యూరో: ఇళ్లల్లో చోరీలకు పాల్పడే ఘరానా దొంగని సీసీఎస్ పోలీసులు బుధవారం అరెస్టు చేశారు. నగరంలోని వివిధ పోలీసు స్టేషన్లలో 14కుపైగా కేసుల్లో ఇప్పటికే అరెస్టు అయి బయట తిరుగుతున్న వట్టపల్లి గుంతల షా దర్గా వాసి హబీబ్ ముసఫా ఖాన్ (అలియాస్ అఫ్జల్ ఖాన్, దిలవర్ ఖాన్)పై చాంద్రాయణ గుట్ట పోలీసు స్టేషన్, సెంట్రల్ క్రైమ్ స్టేషన్‌లో బాధితుల ఫిర్యాదుమేరకు కేసులు నమోదుచేశారు. ఈ మేరకు చార్మినార్ గుల్జార్ హౌస్ వద్ద వృత్తిరీత్యా బైక్ మెకానిక్ అయిన హబీబ్‌ను పట్టుకున్నారు.
 
 సీసీఎస్ జాయింట్ పోలీసు కమిషనర్ టి.ప్రభాకర్ రావు కథనం ప్రకారం... గతేడాది డిసెంబర్ 14న చాంద్రాయణ గుట్టలోని సోనీ షాప్‌లో యజమాని మహ్మద్ సైఫుద్దీన్, అతని కుటుంబసభ్యులు లేకపోవడంతో హబీబ్...సహచరుడు గఫ్ఫర్ సహకారంతో మెయిన్ డోర్‌లాక్‌ను ధ్వంసం చేసి పది తులాల బంగారు ఆభరణాలు, ఎల్‌సీడీ టీవీ, రెండు మొబైల్‌లు, రూ.50వేల నగదు అపహరించుకపోయాడు.
 
 2013 నవంబర్‌లో చాంద్రాయణగుట్టలోని మిలాత్‌నగర్‌లో అఫ్జల్‌ఖాన్ కుటుంబసభ్యులు ఇంట్లో లేనిది గమనించి హబీబ్, అతని సోదరుడు సల్మాన్‌ఖాన్, గఫ్పర్‌లు కలిసి ఇంటి తాళాన్ని పగులగొట్టి 25 తులాల బంగారు ఆభరణాలు, రెండు వీడియో, డిజిటల్ కెమెరాలు, రెండు ఐప్యాడ్ ఫోన్‌లు, ఎనిమది గడియారాలు, రూ.60వేల నగదును ఎత్తుకెళ్లారు. ఈ రెండు కేసుల్లో విచారణ చేపట్టిన సీసీఎస్ స్పెషల్ టీమ్‌టూ పోలీసు ఇన్‌స్పెక్టర్ డీవీ ప్రదీప్ కుమార్ రెడ్డి నేతృత్వంలో చార్మినార్ గుల్జార్ హౌస్ వద్ద హబీబ్‌ను వలపన్ని పట్టుకున్నారు. సుమారు ఐదు లక్షల విలువైన 200 గ్రాముల బంగారు ఆభరణాలు, ఒక ఎల్‌సీడీ టీవీ, రెండు ఎల్‌పీజీ గ్యాస్ సిలిండర్లు స్వాధీనం చేసుకున్నారు. మరో నిందితుడు గఫ్పర్ పరారీలో ఉన్నాడు. చిన్నప్పటి నుంచే దొంగతనాలకు అలవాటుపడిన హబీబ్ ఉదయమంతా బైక్ మెకానిక్ పనిచేస్తూ...రాత్రివేళలో ఇళ్లకు కన్నాలు వేసేవాడని పోలీసులు చెబుతున్నారు.


 నల్లగొండ ఎస్పీ శ్రీకారం
 ఆనందంలో కుటుంబాలు
 రాష్ర్టమంతా అమలు చేయాలి
 పోలీసు అధికారుల సంఘం వినతి
  
 సాక్షి ప్రతినిధి, నల్లగొండ : సుదీర్ఘ కాలంగా పెండింగులో ఉన్న ‘పోలీసులకు.. వారాంతపు సెలవు’పై నల్లగొండ పోలీసు అధికారులు తొలి అడుగు వేశారు. తెలంగాణ రాష్ట్రం ఏర్పాటయ్యాక కొత్త రాష్ట్రంలో ఈ విప్లవాత్మక నిర్ణయం అమలవుతున్న తొలి జిల్లాగా నల్లగొండ రికార్డుల్లోకి  ఎక్కింది. జిల్లా ఎస్పీ డాక్టర్ టి.ప్రభాకర్‌రావు ఇచ్చిన ఆదేశాలతో ఈనెల 22 నుంచి ఈ జిల్లాలో కానిస్టేబుల్‌స్థాయి నుంచి సీఐల వరకు వీక్లీ ఆఫ్‌ను వినియోగించుకుంటున్నారు.  కేసీఆర్  సీఎంగా ప్రమాణ స్వీకారం చేశాక, తొలి ప్రసంగంలోని పోలీసులకు వీక్లీ ఆఫ్ అమలు చేస్తామని హామీ ఇచ్చారు. నల్లగొండలో జరిగిన జిల్లా పోలీసు అధికారుల సంఘం సర్వసభ్య సమావేశంలో ఎస్పీ అక్కడికక్కడే ఈ ప్రకటన చేశారు.
  
  ‘32 ఏళ్ల సర్వీసులో ఈనెల 22వ తేదీన చాలా సంతోషంగా అన్పించింది. ఆ రోజు నాకు వారాంతపు సెలవు (వీక్లీ ఆఫ్) వచ్చింది. ఆనాడు కుటుంబ సభ్యులమంతా బేఫికర్‌గా గడిపాం. బంధువుల ఇంట్లో పెళ్లికి కలిసే వెళ్లాం. గతంలో సెలవు పెట్టినా, స్టేషన్ నుంచి ఎప్పుడు ఎవరి ఫోన్ వస్తుందో తెలియక టెన్షన్‌తో గడిపేవాడిని. మాకూ వీక్లీ ఆఫ్ ఇవ్వాలని పోలీసు మాన్యువల్ ఉన్నా ఏ ప్రభుత్వాలూ ఇప్పటిదాకా అమలు చేయలేదు. ఇన్నేళ్లకు నిజమైంది. ఇలాగే, 8 గంటల పని దినాన్ని కూడా అమలు చేయాలి..’ అని భూదాన్‌పోచంపల్లి పోలీస్‌స్టేషన్‌లో ఏఎస్‌ఐగా పనిచేస్తున్న  వై.వెంకట్రామిరెడ్డి అభిప్రాయపడ్డారు. ఈ ఒక్క ఉదాహరణ చాలు, నల్లగొండ జిల్లా పోలీసుశాఖలో అమలవుతున్న ‘వీక్లీ ఆఫ్’ సిబ్బందిలో ఎంతటి ఆనందాన్ని నింపిందో అర్థం చేసుకోవడానికి.
  
   పది రోజుల పాటు కసరత్తు చేసిన జిల్లా పోలీసు అధికారులు ఏ పోలీసుస్టేషన్లలో ఎవరెవరికి ఏయే రోజు వారాంతపు సెలవు ఇవ్వనున్నారో పట్టిక తయారు చేశారు. దీంతో రాష్ట్రంలో తొలిసారిగా ఈనెల 22వ తేదీ నుంచి నల్లగొండ జిల్లాలో పోలీసులకు వీక్లీ ఆఫ్ అమలు మొదలై మూడు రోజులు పూర్తయ్యింది. ఈ మూడు రోజుల్లో వారాంతపు సెలవును వినియోగించుకున్న పోలీసులు, వారి కుటుంబ సభ్యులు ఎంతో ఆనందం వ్యక్తం చేశారు.  ‘నేను 9వ తరగతి చదువుతున్నా. ఇప్పటివరకు నాన్నకు సెలవన్న మాటే వినలేదు. కానీ నిన్న సడెన్‌గా స్టేషన్ నుంచి ఫోన్ చేసి నీకు ఈ రోజు వీక్లీఆఫ్ అలాట్ చేశామన్నట్లు నాన్న చెప్పారు. చాలా సంతోషమేసింది. వారంలో ఒక్క రోజు నాన్న మాతో గడుపుతారన్న ఆలోచన కొత్తగా అనిపించినా.. చాలా ఆనందంగా ఉంది. ఇక నాన్న రోజంతా మాతో గడుపుతారని తెలి సింది. ఎస్పీ అంకుల్‌కి థ్యాంక్స్’ అని దేవరకొండకు చెందిన కానిస్టేబుల్ నాగార్జున కుమార్తె అలేఖ్య సంబరపడిపోయింది. ‘సమైక్య రాష్ట్రంలోని 1.30 లక్షల మంది పోలీసు సిబ్బందిలో మానసిక ఒత్తిడి వల్ల రోజుకు ఇద్దరు పోలీసు ఉద్యోగులు చనిపోయినట్లు మా సర్వేలో తేలింది. అదే తెలంగాణలోని 50 వేల మంది సిబ్బందిలో రోజుకొకరు చొప్పున చనిపోతున్నారు.
  
  ఇతర ఏ ప్రభుత్వ శాఖల్లో ఈ విపరీతం లేదు.  డీఎస్పీ స్థాయి వరకూ ఈ నిర్ణయాన్ని అమలు చేయాలని ప్రభుత్వాన్ని డిమాండ్ చేశాం. అయినా, తొలి అడుగు పడింది. దీనికి సీఎం కేసీఆర్‌కు, హోం మినిష్టర్, డీజీపీలకు, నల్లగొండ ఎస్పీకి కృతజ్ఞతలు చెబుతున్నాం. ఇతర జిల్లాల ఎస్పీలు కూడా ఈ నిర్ణయం తీసుకోవాలని కోరుతున్నాం..’ అని పోలీసు అధికారుల సంఘం రాష్ట్ర అధ్యక్షుడు గోపిరెడ్డి వివరించారు.  
  
  విశ్రాంతి దొరికింది
 పోలీస్‌శాఖలో వీక్లీ ఆఫ్ అమలు చేయడం సంతోషంగా ఉంది. 25 ఏళ్లుగా పనిచేస్తున్నా. అత్యవసర పని ఉంటే సెలవు మంజూరు చేయించుకుని వెళ్లాలి. వారంలో ఒక రోజైనా సొంత పనులు చేసుకునే అవకాశం లభించేది కాదు.  వారాంతపు సెలవులే కాకుండా పని భారాన్ని తగ్గిస్తే ఇంకా బాగుంటుంది.  
 - జోగునూరి వీరమల్లయ్య, హెడ్ కానిస్టేబుల్, సూర్యాపేట
  
  కుటుంబాన్ని చూసుకునే అవకాశం
  పోలీసులతో పాటు హోంగార్డులకు కూడా ప్రభుత్వం వారాం తపు సెలవులివ్వడం ఎంతో ఆనందంగా ఉంది. సెలవు రోజు కుటుంబ సభ్యులతో గడపడంతోపాటు కుటుంబ పనులు చక్కబెట్టుకునేందుకు వీలు లభించినట్లయింది. సెలవులు లేకపోవడంతో చిన్న చిన్న సంతోషాలకు కూడా దూరంగా ఉండాల్సి వచ్చేది. ప్రభుత్వం మా శ్రమను గుర్తించడం అభినందనీయం.     
 - రేణుక, హోంగార్డు, నకిరేకల్